KORITA

[Ken (Kukua ni) Kore].

Kaputotan ni Kore, a nagrebelde idi kaaldawan ni Moises. Dagiti Korita ket maysa a sangakabbalayan dagiti Cohatita a Levita iti dasig ti amma ken nagtaudda ken Kore babaen iti tallo nga annakna a da Asir, Elcana, ken Abiasaf. (Ex 6:18, 21, 24; Nu 16:1-3) “Saan a natay ti annak ni Kore” a naikanunong iti amada (Nu 26:10, 11), nalawag a gapu ta saanda a simmurot iti panagrebeldena.

Idi nasensus ti Israel idiay Tantanap ti Moab, “ti pamilia dagiti Korita” ket naipasalista a kadua dagiti Levita a pamilia. (Nu 26:57, 58) Idi aglemlemmeng pay laeng ni David gapu ken Ari Saul, adda sumagmamano a Korita a karaman kadagiti nabileg a lallaki a kimmappon kenkuana idiay Siclag. (1Cr 12:1, 6) Ti Levita a kumakanta a ni Heman ken ni mammadto Samuel ket agpada a Korita (1Cr 6:33-38), ket intuding ni Ari David dagiti kameng ti pamilia ni Heman kas kumakanta. (1Cr 15:16, 17; 16:37, 41, 42; 25:1, 4-6) Dagiti Korita ket karaman idi kadagiti agay-aywan iti ruangan ti balay ni Jehova (1Cr 26:1-9, 19), ket idi kaaldawan ni Jehosafat “timmakder dagiti Levita iti annak dagiti Cohatita ken iti annak dagiti Korita tapno idaydayawda ni Jehova a Dios ti Israel buyogen ti maysa a nalablabes ti kinanatbagna a timek” gapu iti naikari a pannakaispal manipud iti nagtitipon a puersa ti Moab, Ammon, ken Seir.​—2Cr 20:14-19.

Espesipiko a nadakamat dagiti annak ni Kore kadagiti paulo ti Salmo 42, 44-49, 84, 85, 87, ken Sal 88. Nupay nagbalin a rebelioso ti amada, saan nga insingir ni Jehova iti annak ni Kore ti biddutna, ket gapu ta matalekda nabendisionanda ken naikkanda iti pribilehio nga agserbi idiay templo.