KINASADUT

Saanna a kayat ti agtrabaho wenno awanan panagporsegi; agtugtugaw lattan; kinailiil; kinaginad; kinapamayan wenno kinabuntog. Ti Hebreo a berbo nga ʽa·tsalʹ kaipapananna ti “agpampamayan.” (Uk 18:9) Ti pangilasin a sao (adjective) a nainaig iti daytoy a berbo ket naipatarus a “nasadut.” (Pr 6:6) Ti Griego a sao nga o·kne·rosʹ kaipapananna ti “nabuntog, naginad.” (Mt 25:26; Ro 12:11, Int) Ti sabali pay a termino, no·throsʹ, kaipapananna ti “nabuntog, ngelngel.”​—Heb 5:11; 6:12.

Ni Jehova ken ti Anakna, kas dua a katan-okan a Managobra, kagurada ti kinasadut. Kinuna ni Jesus: “Ni Amak agtultuloy nga agar-aramid agingga ita, ket agtultuloyak nga agar-aramid.” (Jn 5:17) Iti intero a Sao ti Dios, napakdaaran ti nasadut a tao ken nakondenar ti kinasadut.

Ti Panagpampanunot ti Nasadut a Tao. Nailadawan ti nasadut a tao iti libro ti Proverbio. Umuna iti amin, mangparnuay kadagiti lapped iti bukodna a panunot tapno maikalinteganna ti bagina iti saanna a panangirugi iti proyekto. “Ti dalan daydiay nasadut ket kas iti alad a siitan.” (Pr 15:19) Matmatanna ti annongna kas dalan iti sanguananna a napno iti siitan a mula a nakarigrigat a lasaten. Intono kuan mangaramiden kadagiti nakakatkatawa a pambar iti kinaginadna, a kunkunana: “Adda leon idiay ruar! Iti tengnga dagiti publiko a plasa mapapatayakto!” a kasla ket tay adda agur-uray a peggad iti trabahona nga iti kinapudnona ket awan. (Pr 22:13) Masansan a ti kinasadut napakuyogan iti kinatakrot, panagkedked gapu iti buteng. (Mt 25:26, Rbi8 ftn; 2Ti 1:7) Uray pay balakadan ken dagdagen ti sabsabali, agbalikid iti iddana ‘a kas iti ridaw iti pagpusiposanna,’ a kas ket tay saan a makabangon. Kasadutna pay a pakanen ti bagina. “Inlemmengna ti imana iti malukong ti bangkete; isu napakil unay a mangisubli iti dayta iti ngiwatna.” (Pr 26:14, 15; 19:24) Ngem al-allilawenna ti bagina nga ibagbagana iti mismo a pusona nga umiso ti ar-aramidenna.

Ti kasta a tao ruamna ti mangpartuat iti makaallilaw ken parparbo a panagrasrason. Mabalin a panunotenna a makadangran ti trabaho iti salun-atna wenno isu nabannog unay. Mabalin nga ipapanna a ‘maikari a patartaraken lattan.’ Wenno, ‘ipabigatna’ ti trabahona. (Pr 20:4) No makaaramid iti sangkabassit pagarupenna a naaramidnan ti pasetna, kas iti naaramidan ti sabsabali. Nupay makaipaay ti amin a nasaet a tattao iti nainkalintegan a sungbat ti aniaman kadagita nga argumento, isu “nasirsirib kadagiti bukodna a mata,” a pagarupenna a dagidiay a tattao ti maag gapu iti panangikagkagumaanda ken ti panangparparegtada kenkuana nga aramidenna met ti kasta.​—Pr 26:13-16.

Ti nasadut a tao ket awanan “pannakapnek” wenno pannakakontento iti ‘pagtaraon ken pagkawes.’ (1Ti 6:6-8) Imbes ketdi, masansan nga agtarigagay iti bambanag nga ad-adda pay ngem iti taraon wenno kawes. “Daydiay nasadut ipakpakitana nga isu agtartarigagay, ngem ti kararuana awanan.” (Pr 13:4) Awanan iti konsiderasion wenno panagraem iti padana a tao, ngem kayatna nga ipaaramid ti trabahona iti sabali a tao, ken kayatna pay ketdi a ti sabali a tao ti mangipaay iti bambanag a tartarigagayanna.​—Pr 20:4.

Ti Supapak ti Kinasadut. Nupay mabalin a pagarupen ti nasadut a tao a saetannanto met laeng ti agtrabaho, ti supapak ti kinasadutna kellaat a dumtengen kenkuana ket naladawton, ta naibaga kenkuana: “Sangkabassit pay a turog, sangkabassit pay nga iriridep, sangkabassit pay a panangidalikepkep kadagiti ima iti panagidda, ket ti kinakurapaymo sigurado a dumtengto kas iti asinoman a managsursor, ken ti panagkasapulam kas iti maysa nga armado a lalaki.”​—Pr 6:9-11.

Uray no iti literal wenno piguratibo, pudno ti pannakailadawan ti kasasaad ti nasadut a tao: “Limmabasak iti igid ti talon ti nasadut a tao ken iti igid ti kaubasan ti tao nga awanan iti puso. Ket, adtoy! isuamin dayta nangpataud kadagiti dakes a ruot. Dagiti siitan inabbonganda ti mismo a rabawna, ket ti met laeng bato a paderna narban.” “Gapu iti dakkel a kinasadut agbayukyok ti aramid nga awanan, ket gapu iti panangibaba kadagiti ima agubo ti balay.”​—Pr 24:30, 31; Ec 10:18.

Siasinoman a mangtangdan iti nasadut a tao, wenno siasinoman nga ibagianna ket mapaayto laeng ken marurod ken malugi, ta, “kas suka kadagiti ngipen ken kas asuk kadagiti mata, kasta ti nasadut a tao kadagidiay mangibabaon kenkuana.”​—Pr 10:26.

Ti kinasadut daydiay naginad mangyegto kenkuana kadagiti dakes a resulta, ta “ti mismo a panaggartem daydiay nasadut isunto ti mangpapatay kenkuana.” Tartarigagayanna ti bambanag a saanna a pakaikarian wenno bambanag a dakes. Mabalin a mairubo no padpadasenna a gun-oden dagita. Iti aniaman a pamay-an, ti panagtarigagayna a nabuyogan iti kinasadut ti mangyadayo kenkuana iti Dios a Gubuayan ti biag.​—Pr 21:25.

Ti nasadut a Kristiano saanna a suksukayen dagiti bunga ti espiritu, a mangparegta ken mangtignay (Ara 18:25), no di ket pudno nga isagmakna ti bagina. Palpalugodanna dagiti tarigagay ti lasag. Di agbayag mabalin a ‘magnanton a nakagulgulo,’ ‘a saan a pulos agtrabaho no di ket makibibiang iti saanna a pakaseknan.’​—2Te 3:11.

No Kasano ti Panangmatmat ti Kongregasion Kristiano. Iti nagkauna a kongregasion Kristiano adda naipasdek nga urnos tapno maipaayan iti namaterialan a tulong dagidiay marigrigat, nangnangruna dagiti balo a babbai. Agparang a ti sumagmamano kadagiti ub-ubing a balo a babbai kayatda nga usaren ti wayawayada kas balo tapno sireregta a makipasetda iti Nakristianuan a ministerio. (Idiligyo ti 1Co 7:34.) Nabatad a ti sumagmamano ket naipaayan iti namaterialan a tulong. Ngem imbes nga usarenda iti umiso a pamay-an ti dakdakkel a wayawayada ken kanayonan a tiempoda, nagbalinda a sadut, di makumikom, ken nangrugida nga umalla-allatiw. Nagbalinda a manangidanondanon ken mannakibiang iti ar-aramid ti sabsabali a tattao, a sarsaritaenda ti bambanag a saanda a rebbeng. Gapu itoy, binilin ni apostol Pablo ti manangaywan a ni Timoteo a saanna nga iraman ti kakasta a tattao iti listaan dagiti matulongan no di ket bay-anna ida a makiasawa ket aramatenda dagiti pigsa ken abilidadda iti panangpadakkel iti annak ken panangaywan iti sangakabbalayan.​—1Ti 5:9-16.

Maipapan iti namaterialan a tulong iti kongregasion Kristiano, ti pagalagadan ti Biblia ket: “No ti asinoman saanna a kayat ti agtrabaho, saan met koma a mangan.” (2Te 3:10) Ti ulo ti pamilia masapul nga ipaayna ti kasapulan ti sangakabbalayanna, ket ti asawa a babai saan a rebbeng a mangan iti “tinapay ti kinasadut.”​—Pr 31:27; 1Ti 5:8.

Liklikan ti Kinasadut iti Panagadal ken iti Ministerio. Adda naipaay a balakad maibusor iti kinasadut mainaig iti panagadal ken pananggun-od iti naun-uneg a pannakaawat iti pangpanggep ti Dios kasta met iti pannakipaset iti Nakristianuan a ministerio. Tinubngar ni apostol Pablo ti sumagmamano a di rumangrang-ay a Hebreo a Kristiano, nga impatuldona: “Nagbalinkayo a ngelngel [agpampamayan] iti panagdengngegyo. Ta, pudno unay, nupay rebbeng koma a mannursurokayon gapu iti panawen, kasapulanyo manen nga adda mangisuro kadakayo manipud pangrugian kadagiti pamunganayan a banag dagiti sagrado a pammakdaar ti Dios; ket nagbalinkayo a kas kadagiti makasapul iti gatas, saan nga iti nakired a taraon.” (Heb 5:11, 12) Imbalakadna pay: “Dikay agpalpallailang [naginad] iti aramidyo. Nasgedkayo koma iti espiritu.”​—Ro 12:11.