MADAI
Ti maikatlo a nailista nga anak ni Jafet. (Ge 10:2; 1Cr 1:5) Maipagarup nga isu ti nagtaudan dagiti Medo. Maigapu itoy a pannakaawat, ti Hebreo a Ma·dhaiʹ naipatarus a “dagiti Medo,” wenno “Media” iti dadduma a paset ti Biblia, kas iti 2 Ar-ari 17:6; 18:11; Ester 1:3; Isaias 13:17; 21:2; ken iti dadduma pay a teksto. Dagiti Medo naawaganda met iti Madaia iti pagsasao nga Asirio-Babiloniko (Akkadiano) ken Mada iti Daan a Persiano. Adda idi tiempo a nagnaedda iti nangangato a lantag ti Iran, a nagindegda nangnangruna iti nagbaetan ti Kabambantayan ti Elburz (iti abagatan ti Baybay Caspiano) ken ti Kabambantayan ti Zagros agingga iti daya ti Asiria. Ti agdama a nagan nga Iran ket naadaw iti sao nga “Aryan” wenno Aryano, termino a naaramat a tumukoy kadagidiay nagtaud ken Jafet.