NAFIS

[mabalin a nagtaud iti sao a kaipapananna ti “kararua”].

Ti maika-11 iti nailista a 12 nga annak ni Ismael. (Ge 25:13-16; 1Cr 1:29-31) Kas panguluen, isu met ti nagbalin nga ulo ti maysa a tribu dagiti Ismaelita a nangaramat iti naganna ken maipagarup a nagnaed iti teritoria nga adda iti daya wenno amianan a daya a beddeng ti Naikari a Daga. Idi kaaldawan ni Saul, dagiti tribu da Ruben, Gad, ken ti kagudua a tribu ni Manases nga agnanaed iti daya ti Jordan sibaballigi a nakigubatda kadagiti Hagrita ken kadagiti kakappon dagitoy, a pakairamanan ti tribu ni Nafis, ket kinautiboda ti nakaad-adu unay a dinguen ken tattao. (1Cr 5:10, 18-22) Kas kunaen ti sumagmamano nga eskolar, posible a dagitoy a kautibo manipud Nafis ket napagtrabaho kas Netineo nga agserserbi iti santuario, ket kalpasan ti isusubli manipud pannakaidestiero idiay Babilonia, kaputotanda dagidiay naawagan annak ni Nefusesim, wenno Nefusim.​—Ne 7:46, 52; Esd 2:43, 50.