PERIZEO, DAGITI

Maysa kadagiti tribu a nagnaed iti daga ti Canaan sakbay a sinakup dayta dagiti Israelita. (Ge 13:3-7; 34:30; Ex 3:8, 17) Saanda a nadakamat iti listaan ti 70 a pamilia kalpasan ti Layus, a mangdakamat kadagiti “pamilia ti Canaanita.” (Ge 10:15-18) Saan nga ammo ti kapuonanda.

Dagiti Perizeo ket karaman kadagiti tribu a ti dagada ket inkari ti Dios iti bin-i ni Abraham. (Ge 15:18-21; Ne 9:7, 8) Idi tiempo ti panangsakup dagiti Israelita iti Naikari a Daga, agnanaed dagiti Perizeo iti kabambantayan a rehion ti Canaan. (Jos 11:3) Idi tinagikua ti tribu ni Juda ti naituding a teritoriana, pinarmekna dagiti Perizeo ken dagiti Canaanita idiay Bezec, a nabatad nga adda iti laud ti Jerusalem. (Uk 1:4, 5; Jos 24:11) Kalpasan a biningbingay dagiti Israelita ti daga ti Canaan, nagtalinaed ti sumagmamano a Perizeo iti teritoria ti Efraim ken Manases.​—Jos 17:15-18.

Karaman dagiti Perizeo kadagiti pito a nasion a nabileg ken adu ti populasionna a maulit-ulit nga imbilin ni Jehova a talipuposen ti Israel apaman a makastrekda iti Naikari a Daga. Rumbeng a saanda a makitulag wenno maaddaan iti pannakiasawa nga aliansa kadakuada, saanda met a mangipakita iti pabor kadakuada. (Ex 23:23, 24; 33:2; 34:11-13; De 7:1-3; Jos 3:10) Nupay kasta, saan ida a tinalipupos dagiti Israelita, ket kas naipadto, nagbalin dagiti Perizeo a silo iti Israel.​—De 7:4; 20:17, 18; Uk 3:5, 6.

Idi tiempo ni Solomon, ti sumagmamano a natedda a Perizeo ket karaman kadagiti napilit nga agtrabaho. (1Ar 9:20, 21; 2Cr 8:7, 8) Idi nagsubli dagiti Judio manipud pannakaidestieroda idiay Babilonia, naduktalan ni Esdras a naaddaanda iti pannakiasawa nga aliansa kadagiti Perizeo. Nupay kasta, gapu iti balakadna pinapanawda dagita a ganggannaet nga assawa a babbai. (Esd 9:1, 2; 10:11, 12, 44) Saan a nadakamat dagiti Perizeo iti naud-udi a pakasaritaan iti Biblia.