Panagsaknap ti Kristianidad

SAKBAY ti iyuuli ni Jesu-Kristo sadi langit idi 33 K.P., ken iti panagpakadana, intedna kadagiti pasurotna daytoy a rebbengen: “Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Ara 1:8) Nagmatalekda iti rebbengenda.

Sangapulo nga aldaw kalpasanna, iti Pentecostes, ti nasantuan nga espiritu nagdisso iti agarup 120 nga adalan nga agur-uray idiay Jerusalem, ket nagsaoda “maipapan iti natan-ok a bambanag ti Dios.” (Ara 2:1-4, 11) Iti dayta met laeng nga aldaw, agarup 3,000 ti nabautisaran. (Ara 2:37-41) Iti las-ud ti ababa a tiempo, dagiti adalan ‘pinunnoda ti Jerusalem iti sursuroda.’ (Ara 5:27, 28, 40-42) Ania ti imbungana? “Ti bilang dagiti adalan nagtultuloy nga immadu iti kasta unay idiay Jerusalem.”​—Ara 6:7.

Manipud Jerusalem, nagsaknap ti trabaho a panangsaksi. Kas imbunga ti ibubusor iti panangsaksida idiay Jerusalem, naiwarawara dagiti adalan iti intero a Judea ken Samaria. Manen, nangibunga dayta iti iyaaduda.​—Ara 8:1, 4, 14-17.

Idi 36 K.P., inyeg ni apostol Pedro ti naimbag a damag idiay Cesarea, a sadiay nabautisaran ni Cornelio ken ti sangakabbalayanna, dagiti kaunaan a di nakugit a Gentil a nakomberte. (Ara 10) Kalpasan dayta, ti sistematiko a pamay-an iti panangsaksi kadagiti di Judio ket nalawag a nairugi idiay Antioquia ti Siria. Kas imbungana, “maysa a dakkel a bilang dagiti nagbalin a manamati nagturongda iti Apo.” (Ara 11:20, 21) Sipud idin, ti trabaho a panangsaksi nagsaknap iti dadduma pay a nasion ket literal a dimmanon “agingga iti kaadaywan a paset ti daga.”