Jerusalem a Dinadael Dagiti Romano

SAKBAY unay ti ipapatayna idi 33 K.P., inawagan ni Jesus ti Jerusalem a “mammapatay kadagiti mammadto ken manangubor kadagidiay naibaon kenkuana.” Kas intero a siudad, inulitna ti inaramidna iti napalabas ken linaksidna ti Anak ti Dios.​—Mt 23:37.

Impadto ni Jesus ti mapasamak: “Umayto kenka dagiti aldaw inton dagiti kabusormo mangbangonda iti aglikmutmo iti sarikedked nga addaan natirad a kaykayo.” (Lu 19:41-44) Kinunana pay: “Inton makitayo ti Jerusalem a nalikmut kadagiti nagkampo a buyot, iti kasta . . . dagidiay adda idiay Judea rugianda koma ti agkamang iti bambantay.”​—Lu 21:20, 21.

Gapu iti iyaalsa dagiti Judio, dimteng idi 66 K.P. dagiti buyot ti Roma iti sidong ni Cestius Gallus maibusor iti Jerusalem. Ngem, kas napaliiw ni Josephus, “kellaat a pinagsanudna [ni Gallus] dagiti buyotna, . . . ken, kasungani ti pagarupen ti amin, pimmanaw iti siudad.” Daytoy ti nangted kadagiti Kristiano iti gundaway a makapagtalaw manipud Jerusalem, nga isu ti inaramidda. Di nagbayag, nagsubli dagiti buyot ti Roma nga indauluan ni Tito. Iti daytoy a gundaway nangibangonda iti “sarikedked nga addaan natirad a kaykayo,” maysa a naipalikmut nga alad a 7.2 km (4.5 mi) ti kaatiddogna. Kalpasan ti agarup lima a bulan a pannakalakub, naan-anay a nadadael ti siudad ket ti templo napagbalin a rebrebba. Kalpasan ti tallo a tawen, idi 73 K.P., innala dagiti buyot ti Roma ti maudi a salindeg dagiti Judio, ti sarikedked ti Masada iti tuktok ti bantay. (Kitaenyo iti baba.)

Ipagpaganetget ti pannakadadael ti Jerusalem ti kinapateg ti panangipangag iti padto ti Biblia.