KINANAINKALINTEGAN

Ti Griego a sao nga e·pi·ei·kesʹ, a naipatarus a “kinanainkalintegan,” nadepinar a kaipapananna ti “maitutop, mayanatup; ngarud, maiparbeng, nainkalintegan, natimbeng, managpalabas, saanna nga ipilit ti nakais-istrikto a panangannurot iti linteg; iparangarangna dayta a kinamannakaawat a mangutob a ‘siaasi ken nainkalintegan kadagiti kinapudno ti maysa a kaso.’”​—Vine’s Expository Dictionary of Old and New Testament Words, 1981, Tomo 2, p. 144, 145.

Ti kinanainkalintegan ket naisalsalumina a galad ti nailangitan a sirib. (San 3:17) Dayta ti kualidad a masapul a maadda iti maysa a lalaki a madutokan kas manangaywan iti kongregasion Kristiano. (1Ti 3:2, 3) Kasapulan nga agbalin a nainkalintegan iti bagina, iti pannakilangenna iti sabsabali, ken iti panangmatmatna kadagiti parikut. Kasta met, maparparegta dagiti Kristiano iti pangkaaduan nga agbalinda a nainkalintegan. Impatigmaan ni apostol Pablo kadagiti taga Filipos: “Ti kinanainkalinteganyo [“kinatulok,” Int] maammuan koma dagiti amin a tattao.” (Fil 4:5) Ket nabilin ni Tito a palagipanna dagiti Kristiano iti Creta “nga agbalinda a nainkalintegan [iti literal, natulok].” (Tit 3:1, 2, Rbi8 ftn) Mayanatup unay daytoy, yantangay ti pakabuklan dagiti agnanaed iti Creta addaanda iti pakasarsaritaan kas naulbod, makadangran nga atap nga an-animal, ken buklis nga awanan pagsapulan.​—Tit 1:12.

Iti 1 Pedro 2:18 nabagbagaan dagiti adipen iti balay nga “agpasakupda koma kadagiti makinkukua kadakuada buyogen ti isuamin a maiparbeng a panagbuteng, saan laeng a kadagiti naimbag ken nainkalintegan, no di ket kasta met kadagidiay narigat nga ay-aywen.”