TULONG
Namaterialan a saranay kadagidiay awanan iti umdas a kasapulan iti biag gapu iti kinalakay wenno kinabaket, bisin, wenno dadduma pay a pakarigatan.
Ti maysa a naisalsalumina a pakabigbigan dagiti matalek nga adipen ti Dios isu ti kinatulokda a tumulong kadagiti marigrigat a tattao. (Job 29:16; 31:19-22; San 1:27) Idi umuna a siglo, inyurnos ti kongregasion ti Jerusalem ti panagiwaras iti taraon kadagiti marigrigat a Kristiano a balo a babbai. Idi agangay, pito a kualipikado a lallaki ti nadutokan a mangsigurado nga awan kadagiti maikari a balo a babbai ti naliwayan iti inaldaw a panagiwaras. (Ara 6:1-6) Sumagmamano a tawen kalpasanna, iti suratna ken Timoteo, imbatad ni apostol Pablo a ti tulong ti kongregasion kadagiti balo a babbai ket agpaay laeng kadagidiay saan a nakurkurang ngem 60 ti tawenda. Ti kakasta a balo a babbai ket tattao nga addaan iti rekord ti nasayaat nga ar-aramid iti pannakaidur-as ti Kristianidad. (1Ti 5:9, 10) Nupay kasta, saan a ti kongregasion no di ket dagiti annak ken appoko ti kangrunaan a makinrebbeng iti panangipaay iti kasapulan dagiti lallakay ken babbaketen a nagannak ken apongda. Kas insurat ni Pablo: “No ti asinoman a balo a babai addaan iti annak wenno appoko, sursuruen koma nga umuna dagitoy ti panangannurot iti nadiosan a debosion iti bukodda a sangakabbalayan ket agtultuloyda a mangibayad iti maiparbeng a pangsubad kadagiti nagannakda ken kadagiti apongda, ta makaay-ayo daytoy iti imatang ti Dios.”—1Ti 5:4, 16.
Adda idi dagiti tiempo a nakipaset dagiti kongregasion Kristiano kadagiti panangtulong iti kakabsatda iti dadduma a lugar. Gapuna, idi impadto ni mammadto Agabo a mapasamak ti dakkel a panagbisin, dagiti adalan iti kongregasion ti Antioquia ti Siria “inkeddengda, tunggal maysa kadakuada sigun iti kabaelan ti asinoman, a mangipatulodda iti tulong a pagserbi kadagiti kakabsat nga agnanaed idiay Judea.” (Ara 11:28, 29) Ti dadduma pay a nayurnos a panangtulong kadagiti marigrigat a kakabsat idiay Judea ket naaramid iti boluntario a pamay-an.—Ro 15:25-27; 1Co 16:1-3; 2Co 9:5, 7.