SIMEI

[mabalin a napaababa a porma ti Semaias, kaipapananna ti “Dimngeg (Nagimdeng) ni Jehova”].

1. Maikadua a nainaganan nga anak ni Gerson (Gersom); apoko ni Levi. (Ex 6:16, 17; Nu 3:17, 18; 1Cr 6:16, 17) Nagtaud kenkuana ti sumagmamano a Simeita a pamilia dagiti Levita.​—Nu 3:21-26; 1Cr 23:7, 10, 11; Zac 12:13.

2. Maysa a Rubenita a ti kaputotanna a ni Beerah, maysa a panguluen, ket indestiero ni Ari Tilgat-pilneser (Tiglat-pileser III) ti Asiria.​—1Cr 5:1, 4-6.

3. Maysa a Merarita a Levita.​—1Cr 6:29.

4. Maysa a Gersonita a Levita; inapo ni Asaf.​—1Cr 6:39, 42.

5. Maysa a Benjamita a ti siam nga annakna (wenno kaputotanna) ket nagbalin a pannakaulo ti “balbalay dagidi amma” a nagnaed idiay Jerusalem. (1Cr 8:1, 19-21, 28) Agparang a naawagan iti Sema iti 1 Cronicas 8:13, a natukoy sadiay kas pannakaulo ti pamilia idiay Ajalon.

6. Maysa a Simeonita, ti anak ni Zacur; naaddaan iti 16 nga annak a lallaki ken 6 nga annak a babbai.​—1Cr 4:24-27.

7. Maysa kadagiti kakabsat ni David.​—2Sm 21:21; kitaenyo ti SAMMAH Num. 2.

8. Maysa a kaputotan ni Gerson babaen ken Ladan. Bayat ti panagturay ni David, tallo nga annak (wenno kaputotan) ni Simei ti pannakaulo dagiti Levita a pamilia.​—1Cr 23:8, 9.

9. Pannakaulo ti maikasangapulo a grupo dagiti Levita a musikero; anak ni Jedutun.​—1Cr 25:1, 3, 17.

10. Agay-aywan kadagiti kaubasan ni David; maysa a Ramatita.​—1Cr 27:27.

11. Maysa a nasungdo a sumupsuporta ken Ari David a nagkedked a makikadua iti pannakikumplot ni Adonias. (1Ar 1:8) Maipagarup nga isu met laeng ti Simei a nadutokan kas diputado a mangipaay iti taraon ni Ari Solomon manipud iti teritoria ti Benjamin; anak ni Ela.​—1Ar 4:7, 18.

12. Maysa a Benjamita manipud purok ti Bahurim. Iti uneg ti adu a tawtawen kalpasan ti ipapatay ni Saul ken idi naikkat ti kinaari manipud iti balayna, ni Simei nga anak ni Gera (manipud iti maysa a pamilia iti sangakabbalayan ni Ari Saul) ket nagsakit ti nakemna ken David. Nakasarak ni Simei iti gundaway a mangipeksa iti nabayagen nga ing-ingpenna a pungtot idi a ni David ken ti bunggoyna nagtalawda manipud Jerusalem gapu iti panagrebelde ni Absalom. Iti laeng dayaen ti Bantay dagiti Olibo, nakigiddan a nagna ni Simei a mangipurpuruak kadakuada iti batbato ken tapok ken mangilunlunod ken David. Kiniddaw ni Abisai a palubosan ni David tapno papatayenna ni Simei, ngem saan nga immanamong ni David ta ninamnamana a nalabit pagbalinen ni Jehova a maysa a bendision ti lunod ni Simei.​—2Sm 16:5-13.

Iti isusubli ni David, idi nabaliktaden ti kasasaad, ni Simei ken ti sangaribu a sabsabali pay a Benjamita ti immuna a simmabet kenkuana. Nagruknoy ni Simei iti sanguanan ni David ken inyebkasna ti panagbabawina kadagiti basol a naaramidanna. Kayat manen ni Abisai a papatayen ni Simei ngem saan manen nga impalubos ni David, nga iti daytoy a gundaway nagkari ni David a saanna a papatayen ni Simei. (2Sm 19:15-23) Nupay kasta, sakbay ti ipapatay ni David, imbagana ken Solomon nga ‘ipababana dagiti uban ni Simei a sidadara idiay Sheol.’​—1Ar 2:8, 9.

Iti rugi ti panagturay ni Solomon, pinaayabanna ni Simei ket binilinna nga umakar idiay Jerusalem ken saan a pumanaw iti siudad, ket mapapatay no aramidenna dayta. Immanamong ni Simei kadagitoy a kondision, ngem tallo a tawen kalpasanna, pimmanaw iti siudad tapno bawyenna ti dua nga adipenna a nagtalaw a napan idiay Gat. Idi naammuan ni Solomon daytoy nga inaramidna, pinaayabanna ni Simei tapno panungsungbatenna gapu iti saanna a panangtungpal iti sapatana ken Jehova ket binilinna ni Benaias a papatayenna ni Simei.​—1Ar 2:36-46.

13. Maysa a Levita a kaputotan ni Heman a nangsantipikar iti bagina ken timmulong a nangibelleng kadagiti narugit a banag a naikkat iti templo idi rugi ti panagturay ni Ezekias. (2Cr 29:12, 14-16) Nalabit isu met laeng ti Num. 14.

14. Ti Levita a maikadua a makinrebbeng iti pannakaidulin ti nakaad-adu a kontribusion ken apagkapullo a naiyeg iti templo kabayatan ti panagturay ni Ezekias. (2Cr 31:11-13) Nalabit isu met laeng ti Num. 13.

15. Inapo ni Mardokeo; kameng ti tribu ni Benjamin.​—Est 2:5.

16. Kabsat ni Gobernador Zorobabel; kaputotan ni David a kameng ti tribu ni Juda.​—1Cr 3:19.

17. Maysa kadagiti Levita a nangpapanaw iti ganggannaet nga assawada ken annakda idi tinubngar ida ni Esdras gapu ta nangasawada kadagiti ganggannaet a babbai.​—Esd 10:10, 11, 23, 44.

18, 19. Dua nga Israelita; ti umuna ket anak ni Hasum idinto ta ti maikadua ket anak ni Binui. Pinagtalawda met dagiti ganggannaet nga assawada ken annakda.​—Esd 10:33, 38, 44.