SIVAN

Kalpasan ti pannakaidestiero, daytoy ti nagan ti maikatlo a lunar a bulan iti sagrado a kalendario dagiti Judio, ngem maikasiam iti sekular a kalendario. (Est 8:9; 1Cr 27:5; 2Cr 31:7) Maibatog iti paset ti Mayo agingga iti nasapa a paset ti Hunio. Di masigurado ti kaipapanan ti nagan.

Mangrugi ti Sivan iti ngudo ti primavera no umad-adanin ti nakaro a pudot ti kalgaw. Tiempo daytoy ti panagani iti trigo ken kasta met ti nasapa a paset ti igaaw, nga agtultuloy agingga iti agarup ngalay ti Oktubre wenno ti lunar a bulan a Bul. (Ex 34:22; Pr 26:1) Di pagduaduaan nga iti daytoy idi a bulan a nagkararag ni mammadto Samuel ken Jehova ket nagbagyo a nabuyogan iti napigsa a tudo uray saanna pay a panawen, a nagbutngan unay dagiti umili. (1Sm 12:16-19) Naan-anayen a naluom dagiti “nasapa a higos” a timpuar kadagiti kaykayo iti arinunos ti nalam-ek a bulbulan. (Isa 28:4; Jer 24:2) Panawen metten dagiti mansanas iti luglugar iti dapnis ti Mediteraneo.​—Sol 2:3; idiligyo ti Joe 1:10-12.

Ti Piesta dagiti Lawas, wenno Pentecostes, narambakan iti maikanem nga aldaw ti Sivan, a nabuyogan iti panangidaton iti umuna a bungbunga ti ani a trigo, iti maika-50 nga aldaw kalpasan ti panangidaton iti umuna a bungbunga ti ani a sebada. (Ex 34:22; Le 23:15-21) Iti daytoy maikanem nga aldaw ti Sivan, iti tawen 33 K.P., a naiparukpok ti nasantuan nga espiritu iti bunggoy ti agarup 120 nga adalan a naguummong iti makinngato a siled idiay Jerusalem. Ti 3,000 a tattao a nabautisaran iti dayta nga aldaw ket naggapu kadagiti bunggoy a naguummong iti siudad maipaay iti piesta.​—Ara 1:15; 2:1-42.

Rinambakan ni Ari Asa iti bulan ti Sivan ti maysa a naindaklan a piesta kalpasan ti panangpasayaat a trabahona iti panangikisapna iti ulbod a relihion manipud Juda, Jerusalem, ken iti dadduma pay a lugar. (2Cr 15:8-10) Dagiti nasiglat nga agitultulod nga imbaon ni Ari Asuero a mangidanon iti mensahe a naipaayan dagiti Judio iti kalintegan nga ikanawada ti bagbagida iti maika-13 nga aldaw ti Adar naibaonda gistay siam a bulan a nasaksakbay, iti maika-23 nga aldaw ti Sivan, tapno mapanda iti 127 a masaksakupan a distrito ti Imperio ti Persia a saklawenna manipud India agingga iti Etiopia.​—Est 8:9-14.