ARUATEN
Nakalawlawa ti pakayaplikaran ti Hebreo a termino a keliʹ ken mabalin a tumukoy kadagiti aruaten (Ge 24:53; Ex 3:22; 25:39; 27:3, 19; 30:27, 28; 31:7-9; Le 13:49, 52, 57-59; 15:4, 6), ramramit (Ge 27:3), sanikua (Ge 31:37), pagkargaan (Ge 42:25; 43:11; Le 6:28), alikamen (Ge 45:20; Ex 25:9), gamigam (Ge 49:5), pagtokar (1Cr 15:16), basehas (Le 11:32-34), lupot (De 22:5), igam (Uk 9:54; 18:11, 16, 17), gargaret (1Sm 10:22; 17:22), supot (1Sm 17:40, 49), bagi (1Sm 21:5), ken rimienta (1Ar 6:7).
Ti keliʹ masansan a tumukoy iti nadumaduma nga aruaten a naaramat mainaig iti santuario. Dagitoy nga aruaten ramanenda ti bambanag a kas kadagiti pinggan, harra, suplad, malukong, tinidor, pagikkan iti apuy, pagiddep, pangarsang, palanggana, ken kopa. (Ex 25:29, 30, 39; 27:3, 19; 37:16, 23; 38:3; 1Ar 7:40-50; 2Cr 4:11-22) Yantangay naaramat maipaay iti sagrado a panggep, “nasantuan” dagitoy nga aruaten. (1Ar 8:4) Gapuna, yantangay dagiti Judio a pimmanaw idiay Babilonia idi 537 K.K.P. naaddaanda iti pribilehio a mangawit kadagiti sagrado nga aruaten nga innala ni Ari Nabucodonosor manipud Jerusalem, kasapulan a pagtalinaedenda ti bagbagida a nadalus iti narelihiosuan a pamay-an ken iti moral. Nagaplikar kadakuada ti naimpadtuan a bilin: “Pumanawkayo, pumanawkayo, rummuarkayo [manipud Babilonia], dikay sagiden ti aniaman a narugit; rummuarkayo iti tengngana, pagtalinaedenyo a nadalus ti bagbagiyo, dakayo nga agaw-awit kadagiti aruaten ni Jehova.” (Isa 52:11) Kinalikaguman daytoy ti ad-adda pay ngem seremonial a makinruar a kinadalus. Kinasapulan dayta ti kinadalus ti puso. Ni apostol Pablo, idi nagsurat kadagiti taga Corinto, inyaplikarna ti sasao ti Isaias 52:11 iti panangipakitana a dagiti Kristiano masapul met a siwayawayada iti pakatulawan iti lasag ken iti espiritu.—2Co 6:14-18; 7:1.
Ti namunganay iti Kristianidad, ni Jesu-Kristo, impasdekna ti pagulidanan iti daytoy a banag babaen ti panagtalinaedna a “nasungdo, awanan allilaw, di natulawan, naisina kadagiti managbasol.” (Heb 7:26) Bayat ti kaaddana ditoy daga, imparangarangna ti regta iti panangtaginayon iti kinasagrado ti templo ni Jehova, kas iti namindua a panangdalusna iti dayta iti komersialismo. (Jn 2:13-25; Mt 21:12, 13; Mr 11:15-17; Lu 19:45, 46) Mainaig iti maikadua a pannakadalus ti templo, ipadamag ni Marcos a ni Jesus saanna idi nga “ipalubos nga adda asinoman a mangiserrek iti aruaten idiay templo.” (Mr 11:16) Gapuna, nabatad a saan nga impalubos ni Jesus nga adda asinoman a mangkissay iti kinasagrado ti paraangan ti templo babaen ti panangusar iti dayta kas panglintegan laeng no mangip-ipanda iti bambanag iti sabali a paset ti Jerusalem.