Adda Aya Panangipategyo ken Jehova?
TI AYAT addaan adu a “rupa.” Maysa a napasnek nga agtutubo a lalaki ti mabalin nga agayat iti maysa a napintas a babai. Adda met ti ayat ti ina iti anakna. Ket adda met ti ayat a mamagkaykaysa kadagiti Kristiano iti manglikmut iti lubong a panagkakabsat.
Amin daytoy ket “ayat,” ngem dagiti Griego addaanda kadagiti nagsisina a sasao a maipaay iti nagduduma a kita iti ayat. Ti éros ket ayat a mainaig iti pannakaawis iti sekso. Ti storgé ipamatmatna ti ayat a naibatay iti relasion iti dara. Ket ti agápe—ti awan agumna nga ayat a naibatay iti prinsipio—isu ti ayat nga adda iti ummong dagiti pudno a Kristiano iti isuamin a daga.—Juan 13:34, 35.
Aginnayat
Nupay kasta, no tarigagayantayo nga ipaganetget ti ayat iti naisangsangayan unay ti kinabarana ken panangipategna, dagiti mannurat iti Kristiano a Griego a Kasuratan inusarda ti sao a philía. Dayta ipamatmatna ti nabileg, nabara, personal a pannakaisinggalut, kas ti adda iti nagbabaetan dagiti pudno nga aggagayyem. Ni Jehova addaan iti kasta a naisangsangayan a panangipateg iti bugbugtong nga Anakna. Gapuna kinuna ni Jesus iti bagina met laeng: “Ti Anak saanna a mabalin ti agbukbukod nga agaramid iti uray ania no di ket ti makitana nga aramiden ti Ama. Ta amin nga aramiden ti Ama dagitoy ti Anak aramidenna met a kasta. Ta ti Ama ipatpategna ti Anak ket ipakitana kenkuana dagiti amin nga aramidenna.” Ken, kasta met, maipapan kadagiti pudno a paspasurotna, kinuna ni Jesus: “Ta ni met laeng Ama ipatpategnakayo, gapu ta dakayo ipatpategdak ket pinatiyo a naggapuak iti Dios.”—Juan 5:19, 20; 16:27.
Idiay Kristiano a Griego a Kasuratan, ti “panangipateg” tuktukoyenna ti nabara, personal a kita iti ayat. Daytoy ket nalawag manipud iti kinapudno a masansan iti patarus dayta ti mapakuyogan iti sao a “nadungngo.” Kas pangarigan, ni apostol Pablo balakadanna dagiti Kristiano: “Iti nainkabsatan nga ayat maaddaankayo iti nadungo a panangipateg iti maysa ken maysa.” (Roma 12:10) Kasta met, ti adalan a ni Santiago isitarna ti panagibtur ni Job ken ti nagbanagan nga impaay ni Jehova kas pammaneknek “a ni Jehova nadungngo iti panangipateg ken naasi.”—Santiago 5:11.
Posible Kadi ti Panangipateg ken Jehova?
Gapuna ni Jehova mabalin a maaddaan iti nadungngo a panangipateg kadagiti mangsalimetmet-kinatarnawda—nupay imperpekto—a tattao. Ngem agsipud ta ti panangipateg kaipapananna ti maaddaan iti nasinged, nabara a panagayat iti maysa, posible kadi para kadagiti imperpekto a tattao ti maaddaan iti panangipateg iti Unibersal a Soberano, ni Jehova?
Wen, daytoy ket posible. Maysa a naisangsangayan nga ulidan iti maysa a tao a naaddaan iti nabara a panangipateg ken ni Jehova isu ni David. Daytoy ket makita manipud kadagiti adu a salmona. Inapresiarna a naimbag ti naayat a panangaywan ni Jehova kas maysa a Pastor.—Salmo 18:1; 23:1-6.
Mabalin nga agbalin a nakasingsinged, nakapudpudno, ni Jehova kadatayo ta mabalintayo ti maaddaan iti personal a panangipateg, wenno panagayat, kenkuana. Kinapudnona, ti pannakasapul ti maaddaan itoy nasinged, nabara a panangipateg iti Nangaramid kadatayo ket nalawag manipud iti umuna ken kadadakkelan a bilin. Sigun iti dayta, masapul nga ‘ayatentayo ni Jehova iti isuamin a puso, iti isuamin a kararua, iti isuamin nga isip ken iti isuamin a pigsa.’—Marcos 12:29, 30.
Panangsukay iti Nabara a Panangipateg ken ni Jehova
Kasano, ngarud, a sukayentayo daytoy a nabara a panangipateg ken ni Jehova? Babaen ti panangpataud iti kumarkaro a panangapresiar iti naayat, manangipateg a nailangitan nga Ama. Maaramidtayo daytoy babaen ti panangipaay iti tiempo a mangbasa iti Saona, ti Biblia, a kankanayon. Nangnangruna a masarakantayo a makagunggona ti mangbasa iti kakasta a paspaset a kas iti Salmo, dagiti Ebanghelio ken dagiti sursurat dagiti apostol.
Ti sabali pay a dakkel a tulong iti panangsukay iti nabara a panangipateg ken Jehova isu ti panangsukay iti espiritu iti panangapresiar ken panagiaman kadagiti adu a bembendisionna. Usigenyo amin dagiti naimbag a bambanag a naggapu kenkuana, ta, kinapudnona, “isuamin a sagut a nasayaat ken isuamin a sagut a naan-anay . . . bumaba nga aggapu iti Ama ti lawag.” Kinapudnona, dagiti Nainkasuratan a balakad nga agiaman iti Dios ket aduda, nangnangruna iti libro dagiti Salmo ken dagiti sursurat ni Pablo. Gagangayen dagiti sasao ti apostol a: “Babaen iti nagan ni Apotayo a Jesu-Kristo [agiamankayo] nga agnanayon iti Dios ken Ama.”—Santiago 1:17; Efeso 5:20.
Kasta met makatulong met kadatayo a rumang-ay iti panangipateg isu ti kararag—ti naimpusuan, napasnek ken napakumbaba a panagdawdawat ken ar-araraw a naiturong iti naayat a nailangitan nga Ama. Iti kararag pampanunotentayo dagiti nagsayaatan a kualidad ni Jehova, ti kinaimbagna kadatayo amin ken ti pannakasapultayo kenkuana. Ket iti kararag agpakpakaasitayo kenkuana a pakawanenna dagiti basbasoltayo, kas ken ni David idiay Salmo 51. Kaawatan ngarud, amin daytoy ti mamagbalin kadatayo a nasingsinged ken Jehova ket pabilgennatayo iti panangipategtayo kenkuana.
No Kasano a Tulongannatayo ti Panangipateg ken ni Jehova
No sukayentayo daytoy nabara, personal a panangipateg ken ni Jehova a Dios, a pudno ti panagayatayo kenkuana iti isuamin a puso, kararua, isip ken pigsatayo, ania ngarud? Daytoy ti tumulong kadatayo a magna iti dalan a makaay-ayo iti Dios ket salaknibannatayo met kadagiti adu a rigat ken sakit ti nakem. Dagidiay Kristiano a naadaan iti parikut babaen iti nakro a pananglabsing kadagiti nalinteg a linlinteg ti Dios mabalin a saanda s sinukay daytoy nabara a relasion iti nailangitan nga Ama.
Kas pangarigan, adda maysa nga agtutubo a Kristiano, nga awan pay kasagiti tawtawen iti kinatin-edyerna, nga addaan iti pribilehio iti amin-tiempo a serbisio. Ngem isu saan a naannad no maipapan kadagiti “ar-aramid iti lasag” ket masapul a madisiplina. (Galacia 5:19-21) Idi a naipasagepsep kenkuana ti kinaserioso ti inaramidna, isut’ sipapasnek a nagbabawi. Kaskasdi nalipatanna ti kangrunaan koma a pinampanunotna, nga isu, ti pannakaibabain ti nagan ni Jehova gapu iti dakes a dalanna. No koma no daytoy nga agtutubo a lalaki naaddaan iti nabara, personal a relasion iti nailangitan nga Amana, mabalin a dayta koma ti nanglapped kenkuana.
Inimtuod ni Jesus ni Pedro no isut’ saan laeng a mangayat kenkuana no di ket mangipateg iti Apona. Idi simmungbat ni Pedro, kinuna ni Jesus, “Pakanem dagiti babassit a karnerok.” (Juan 21:15-17) Dayta ket umasping iti panangipategtayo ken ni Jehova. Ti kasta a panangipateg tulongannatayo a maseknan iti panangay-ayo iti Dios babaen ti panangsalimetmettayo iti bilbilinna. Daytoy ti mamagbalin kadatayo a maseknan a ditay mangipaay iti dina pannakaay-ayo, a ditay saktan ti rikriknana. Kas ipalagip ni apostol Pablo kadatayo, no agsanudtayo nga agaramid iti pagayatan ni Jehova, Isut’ di maay-ayo kadatayo. Pudno a ditay kayat a mapasamak dayta kadatayo, saan kadi? (Hebreo 10:38, 39) Anian a nasaysayaat ti maaddaan iti pudno a nabara a panangipateg iti naayat a Diostayo!
Ngarud, sukayentayo ti nabara a panangipateg ken Jehova a Dios. Maaramidtayo ti kasta babaen ti panangbasatayo iti Saona, babaen ti panangpampanunot iti kinaimbagna iti espiritu iti panagiaman, babaen ti panagtalinaed iti panagkararag ken babaen ti panangsapul iti panangay-ayo kenkuana babaen iti kababalintayo ken ti naregta a ministerio iti panangiwaragawag iti nagan ken pagarianna.