Panangbiruk ti Tulbek iti Nainkabsatan a Panangipateg
“Inayonyo iti . . . nadiosan a debosionyo ti nainkabsatan a panangipateg.”—2 PEDRO 1:5-7.
1. Ania ti maysa kadagiti kangrunaan a rason no apay a makaparagsak nga okasion dagiti panagtataripnong ti ili ni Jehova?
DIMMAR-AY ti maysa a mangngagas a saan a Saksi ni Jehova iti panagturpos ti anakna a babai iti Watch Tower Bible School of Gilead, a nagsanayanna kas misionera. Nasdaaw iti kasta unay iti kinaragsak ti tallaong ket patienna a manmano la ketdi kadagitoy a tattao ti addaan iti sakit. Apay a nakaragragsakda? Malaksid iti dayta nga okasion, ania ti mamagbalin kadagiti amin a panagtataripnong ti ili ni Jehova, kadagiti kongregasion, kadagiti asamblea sirkito, ken kadagiti kumbension distrito, a naragsak nga okasion? Saan kadi a ti nainkabsatan a panagpipinnategda? Awan duadua a ti nainkabsatan a panangipateg ti maysa a rason no apay a naikuna nga awanen sabali pay a relihiuso a grupo a makagungun-od iti naruay a rag-o, ragsak, ken pannakapnek manipud iti relihion a kas kadagiti Saksi ni Jehova.
2, 3. Ania dagiti dua a Griego a sao a tumukoy iti rumbeng a panagriknatayo iti maysa ken maysa, ket ania ti nagdumaanda?
2 Namnamaentayo a maimatangan ti kasta a nainkabsatan a panangipateg no panunotentayo ti sasao ni apostol Pedro idiay 1 Pedro 1:22: “Ita ta ginugoranyon dagiti kararuayo babaen ti panagtulnogyo iti pudno a nagbanag iti awan panaginsisingpetna a nainkabsatan a panangipateg, agiinnayatkayo iti nasged manipud iti puso.” Ti maysa kadagiti kangrunaan a paset ti Griego a sao ditoy a naipatarus a “nainkabsatan a panangipateg” ket phi·liʹa (panangipateg). Agkanaig unay ti kaipapananna ken ti kaipapanan ti a·gaʹpe, ti sao a kadawyan a maipatarus nga “ayat.” (1 Juan 4:8) Nupay masansan a mapagsinnukat ti pannakaaramat ti nainkabsatan a panangipateg ken ti ayat, adda nagdumaan dagitoy. Ditay koma ipagarup a maymaysa ti kaipapananda, a kas iti panangipapan ti adu a managipatarus iti Biblia. (Iti daytoy nga artikulo ken iti sumaganad, salaysayentayo ti tunggal maysa kadagitoy a sao.)
3 No maipapan iti nagdumaan dagitoy a dua a Griego a sao, kinuna ti maysa nga eskolar a ti phi·liʹa ket “maysa a sao a mangipasimudaag iti kinabara ken kinadekket ken panangipateg.” Iti sabali a bangir, ti a·gaʹpe ad-adda a nainaig iti panunot. Isu a nupay naibaga nga ayatentayo (a·gaʹpe) dagiti kabusortayo, awan panangipategtayo kadakuada. Apay nga awan? Ngamin, “dagiti dakes a pannakikadua dadaelenda dagiti nasayaat a kababalin.” (1 Corinto 15:33) Ti maysa pay a mangipakita nga adda nagdumaanda isu dagiti sasao ni apostol Pedro nga: “Inayonyo . . . iti nainkabsatan a panangipategyo ti ayat.”—2 Pedro 1:5-7; idiligyo ti Juan 21:15-17.a
Dagiti Ulidan ti Naisangsangayan Unay a Nainkabsatan a Panangipateg
4. Apay nga addaan da Jesus ken Juan iti naisangsangayan a panangipateg iti maysa ken maysa?
4 Ikkannatayo ti Sao ti Dios iti adu a nasayaat nga ulidan ti naisangsangayan unay a nainkabsatan a panangipateg. Saan a bunga ti isip daytoy naisangsangayan a panangipateg no di ket naibatay iti panangapresiar kadagiti naidumduma a talugading. Ti panangipateg ni Jesu-Kristo ken ni apostol Juan ti kalatakan la ketdi nga ulidan. Awan duadua nga addaan ni Jesus iti nainkabsatan a panangipateg kadagiti amin a matalek nga apostolna, ket adda naimbag a rason iti panangipakitana iti kasta a panangipateg. (Lucas 22:28) Impakitana daytoy idi binugguanna dagiti sakada, a nangituyang iti ulidan ti kinapakumbaba. (Juan 13:3-16) Ngem addaan ni Jesus iti naisangsangayan a panangipateg ken ni Juan, a naulit-ulit a dinakamat ni Juan. (Juan 13:23; 19:26; 20:2) No kasano nga adda panggapuan ni Jesus a mangipakita iti panangipateg kadagiti adalanna ken kadagiti apostolna, inikkan la ketdi ni Juan ni Jesus iti rason a mangipakita iti naisangsangayan a panangipateg kenkuana gapu iti naun-uneg a panangapresiarna ken ni Jesus. Makitatayo daytoy kadagiti sinurat ni Juan, agpadpada iti Ebangheliona ken kadagiti naipaltiing a suratna. No mano a daras a dinakamatna ti ayat kadagidiay a sinurat! Maanninaw ti dakdakkel a panangapresiar ni Juan kadagiti naespirituan a galad ni Jesus iti insuratna iti Juan kapitulo 1 ken 13 agingga iti 17, kasta met iti maulit-ulit a panangtukoyna iti kasasaad ni Jesus sakbay a timmao.—Juan 1:1-3; 3:13; 6:38, 42, 58; 17:5; 18:37.
5. Ania ti maikunatayo maipapan iti naisangsangayan a panagpinnateg da Pablo ken Timoteo?
5 Kasta met, ditay liwayan ti naisangsangayan unay a nainkabsatan a panagpinnateg da apostol Pablo ken ti Kristiano a kaduana a ni Timoteo, a naibatay la ketdi iti panangapresiar kadagiti kababalin ti tunggal maysa. Kadagiti suratna, pinadayawan ni Pablo ni Timoteo, a kunkunana: “Awan kaniak ti sabali a kanaknakemna a pudpudno a mangisakit kadakayo. . . . Ammoyo ti pammaneknek nga intedna maipapan iti bagina, a kas iti anak ken amana, kasta ti pannakipagserbina kaniak a maipuon iti naimbag a damag.” (Filipos 2:20-22) Kadagiti surat ni Pablo ken ni Timoteo, namin-adu a daras a personal a tinukoyna ni Timoteo a mangipakita iti nasged a panangipategna kenkuana. Kas pangarigan, imutektekanyo ti 1 Timoteo 6:20: “O Timoteo, aywanam ti naitalek kenka.” (Kitaenyo met ti 1 Timoteo 4:12-16; 5:23; 2 Timoteo 1:5; 3:14, 15.) No idilig dagiti surat ni Pablo ken ni Timoteo iti suratna ken ni Tito, nalawag a makita ti naisangsangayan a panangipategna iti daytoy nga agtutubo. Sigurado a kasta met laeng ti panagrikna ni Timoteo maipapan iti panaggayyemda, kas ipasimudaag ti sasao ni Pablo idiay 2 Timoteo 1:3, 4: “Malagipka kadagiti di agressat nga ararawko, . . . idinto a laglagipek dagiti luluam tarigagayak unay a makitaka, tapno mapnoak iti rag-o.”
6, 7. Ania a rikna ti impakita da David ken Jonatan iti maysa ken maysa, ken apay?
6 Mangipaay met ti Hebreo a Kasuratan kadagiti nasayaat nga ulidan, kas iti panagpinnateg da David ken Jonatan. Mabasatayo a kalpasan ti panangpapatay ni David ken ni Goliat, “ti kararua ni Jonatan naisinggalut iti kararua ni David, ket ni Jonatan nagayat kenkuana a kas iti kararuana met laeng.” (1 Samuel 18:1) Ti panangapresiarna iti regta ni David a maipaay iti nagan ni Jehova ken ti kinaturedna a nakiranget ken ni higante a Goliat ti awan duadua a nakatignayan ni Jonatan a mangipakita iti naisangsangayan a panangipateg ken ni David.
7 Kasta unay ti panangipateg ni Jonatan ken ni David ta impustana ti biagna iti panangsalaknibna ken ni David manipud ken Ari Saul. Saan a pulos a nagsakitan ti nakem ni Jonatan ti panangpili ni Jehova ken ni David a kas sumaruno nga ari ti Israel. (1 Samuel 23:17) Addaan met ni David iti nasged a panangipateg ken ni Jonatan, kas nalawag a makita iti imbagana idi dinung-awanna ni Jonatan: “Mapaladingitak a gapu kenka, kabsatko a Jonatan, makaay-ayoka unay idi kaniak. Ti ayatmo kaniak idi nakaskasdaaw, a ringbawanna ti ayat dagiti babbai.” Wen, nauneg ti panangapresiarda iti maysa ken maysa.—2 Samuel 1:26.
8. Siasino dagiti dua a babbai a nangipakita iti naisangsangayan a panagpinnateg, ken apay?
8 Ikkannatay met ti Hebreo a Kasuratan iti nasayaat nga ulidan ti naisangsangayan a panagpinnateg ti dua a babbai, da Noemi ken ti balo a manugangna a ni Ruth. Lagipenyo ti kinuna ni Ruth ken ni Noemi: “Dimo koma ipakpakaasi a panawanka, ken agsubliak manipud iti isusurot kenka; ta sadinoman a papanam, mapanakto, sadinoman a pagnaedam, pagnaedakto. Ti ilim isunto ti ilik, ket ti Diosmo isunto ti Diosko.” (Ruth 1:16) Saan kadi a maikunatayo a gapu iti kababalin ni Noemi ken ti panangisarsaritana maipapan ken Jehova, natignay ni Ruth a mangipateg kenkuana?—Idiligyo ti Lucas 6:40.
Ti Ulidan ni Apostol Pablo
9. Ania ti mangipakita a mapagulidanan ni Pablo no maipapan iti nainkabsatan a panangipateg?
9 Kas nakitatayon, addaan ni apostol Pablo iti naisangsangayan unay a nainkabsatan a panangipateg ken ni Timoteo. Ngem nangituyang met iti nagsayaat nga ulidan ti panangipakita iti nabara a nainkabsatan a panangipateg kadagiti amin a kakabsatna. Imbagana kadagiti panglakayen a taga-Efeso nga “iti bayat ti tallo a tawen, [isut’] saan a nagsardeng a namagbaga iti tunggal maysa iti rabii ken aldaw, a binuyogan dagiti lulua.” Nabara a nainkabsatan a panangipateg? Awan duadua! Ket kasta met ti panagriknada ken ni Pablo. Idi mangngegda a saandanton a makita, “isuda amin nagsangitda ti adu, ket inappungolanda ti tengnged ni Pablo ken sidudungngo nga inag-agkanda.” (Aramid 20:31, 37) Nainkabsatan a panangipateg a naibatay iti panangapresiar? Wen! Maanninaw met ti nainkabsatan a panangipategna iti sasaona idiay 2 Corinto 6:11-13: “Dagiti ngiwatmi naluktanda kadakayo, taga-Corinto, ti pusomi limmawa. Saankayo a mailetan kadakami, ngem mailetankayo iti nadungngo a panangipategyo. Gapuna, kas panangsubad—kasaokayo a kas annak—lumawakay met koma.”
10. Ania a kinaawan ti nainkabsatan a panangipateg ti nangiturong ken Pablo a mangisarita kadagiti pakasuotan a napasaranna a nailanad iti 2 Corinto kapitulo 11?
10 Nalawag, adu kadagiti taga-Corinto ti awanan iti nainkabsatan a panangipateg a buyogen ti panangapresiar ken ni apostol Pablo. Iti kasta, inreklamo dagiti dadduma: “Nadagsen ken napuersa dagiti suratna, ngem ti panagparangna a sibabagi nakapuy ket ti saona nanumo.” (2 Corinto 10:10) Isut’ gapuna a tinukoy ni Pablo dagiti “naisangsangayan nga apostol[da]” ken natignay a mangisarita kadagiti pakasuotan nga inibturanna, kas nailanad idiay 2 Corinto 11:5, 22-33.
11. Ania ti mangpaneknek nga ipatpateg ni Pablo dagiti Kristiano idiay Tesalonica?
11 Nalawag a makita ti nabara a panangipateg ni Pablo kadagidiay pinagserbianna iti sasaona idiay 1 Tesalonica 2:8: “Gapu iti nadungngo a panangipategmi kadakayo, naragsakankami unay a nangipaay kadakayo, saan laeng a ti naimbag a damag ti Dios, no di pay ket dagiti mismo a kararuami, ta nagbalinkayo a patgenmi unay.” Kinapudnona, kasta unay ti panangipategna kadagitoy a kabbaro a kakabsat ta idi saan a makaibturen—ta magagaran unay a makaammo iti sasaadenda iti sidong ti pannakaidadanes—imbaonna ni Timoteo, a nangyeg iti naimbag a padamag a nangparegta iti kasta unay ken ni Pablo. (1 Tesalonica 3:1, 2, 6, 7) Mayanatup la unay ti kuna ti Insight on the Scriptures: “Nasged ti nainkabsatan a panagpinnateg da Pablo ken dagidiay pinagserbianna.”
Panangapresiar—Ti Tulbek iti Nainkabsatan a Panangipateg
12. Ania dagiti rason nga ipakitatayo ti nabara a panangipateg kadagiti kakabsattayo?
12 Nalawag, ti tulbek iti nainkabsatan a panangipateg isu ti panangapresiar. Di met aya addaan amin dagiti dedikado nga adipen ni Jehova kadagiti talugading nga apresiarentayo, a pakatignayantayo a mangipateg ken maay-ayo kadakuada? Ipangpangrunatayo amin ti Pagarian ti Dios ken ti kinalintegna. Situtured a makirangrangettayo amin kadagiti tallo a kabusortayo: ni Satanas ken dagiti demoniona, ti nadangkes a lubong a tengtenglen ni Satanas, ken dagiti natawid nga inaagum a pagannayasan ti managbasol a lasag. Saan kadi a rumbeng a kanayon a panunotentayo nga ar-aramiden dagiti kakabsattayo ti amin a kabaelanda iti laksid ti kasasaadda? Tunggal maysa ditoy lubong ket mabalin nga adda iti dasig ni Jehova wenno iti dasig ni Satanas. Dagiti dedikado a kakabsattayo a lallaki ken babbai addada iti dasig ni Jehova, wen, iti dasigtayo, isut’ gapuna a maikarida iti nainkabsatan a panangipategtayo.
13. Apay a rumbeng nga ipakitatayo ti nabara a panangipateg kadagiti panglakayen?
13 Ti met ngay panangapresiar kadagiti panglakayentayo? Saan kadi a rumbeng nga ipategtay ida gapu iti kinagagetda nga agserbi a maipaay iti pagimbagan ti kongregasion? Kas kadatayo, manggedda met a maipaay iti bagida ken iti pamiliada. Addaanda kadagiti isu met laeng a rebbengen a kas kadatayo nga agadal a personal, tumabuno kadagiti gimong ti kongregasion, ken makiraman iti ministerio iti tay-ak. Maysa pay, adda rebbengenda a mangisagana kadagiti paset kadagiti gimong, mangipaay kadagiti palawag publiko, ken mangtaming kadagiti parikut a tumaud iti kongregasion, a no dadduma sapulenna ti panangusig iti adu nga oras. Wen, ‘patpatgen[tayo] dagiti kasta a lallaki.’—Filipos 2:29.
Panangipakita iti Nainkabsatan a Panangipateg
14. Ania dagiti kasuratan a mangibilin nga ipakitatayo ti nainkabsatan a panangipateg?
14 Tapno maay-ayo ni Jehova, masapul nga ipakitatayo ti nabara a nainkabsatan a panangipateg kadagiti kapammatiantayo, a kas iti inaramid ni Jesu-Kristo ken ni Pablo. Mabasatayo: “Iti [nainkabsatan a panangipateg] maaddaankayo iti nadungngo a panangipateg iti maysa ken maysa.” (Roma 12:10, Kingdom Interlinear) “No maipapan iti [nainkabsatan a panangipateg], saanyo a masapul ti mangisurat kadakayo, ta insuronakayo a mismo ti Dios nga agiinnayatkayo.” (1 Tesalonica 4:9, Int) “Mataginayon koma ti [nainkabsatan a panangipategyo].” (Hebreo 13:1, Int) Maay-ayo la ketdi ti nailangitan nga Amatayo no ipakitatayo ti nainkabsatan a panangipateg kadagiti annakna ditoy daga!
15. Ania dagiti sumagmamano a wagas a mayebkas ti nainkabsatan a panangipateg?
15 Idi panawen dagiti apostol, ugali dagiti Kristiano ti agkikinnablaaw iti “nasantuan nga agek” wenno “agek ni ayat.” (Roma 16:16; 1 Pedro 5:14) Pudno a maysa dayta nga ebkas ti nainkabsatan a panangipateg! Itatta, iti kaaduan a paset ti daga, ad-adda a maitutop ti napasnek a nainggayyeman nga isem ken nairut a panangalamano. Kadagiti pagilian iti Latin America, kas iti Mexico, adda ugalida nga agkikinnablaaw babaen ti panangarakup, maysa a napaypayso nga ebkas ti panangipateg. Ti kastoy a nabara a panagpipinnateg dagitoy a kakabsat mabalin nga isu ti maysa a makagapu iti dakkel nga irarang-ay a mapaspasamak kadagiti pagilianda.
16. Kadagiti ania a gundaway a maipakitatayo ti nainkabsatan a panangipateg no addatayo iti Kingdom Hall?
16 No sumrektayo iti Kingdom Hall, sireregget met laeng kadi nga ipakpakitatayo ti nainkabsatan a panangipateg? Tignayennatay dayta a mangisawang kadagiti makaparegta a sasao, nangruna kadagidiay malmalday. Naibaga kadatayo a “liwliwaen[tayo] dagiti malmalday a kararua.” (1 Tesalonica 5:14) Awan duadua a maysa dayta a wagas a mayebkastayo ti nabara a nainkabsatan a panangipateg. Ti maysa pay a wagas ket babaen ti panangiyebkas ti panangapresiar iti nasayaat a palawag publiko, iti nasayaat pannakaiparangna a paset, iti panangipakat ti maysa nga estudiante iti amin a kabaelanna iti Teokratiko nga Eskuelaan ti Panagministro, ken dadduma pay.
17. Kasano a nagun-od ti maysa a panglakayen ti panangipateg ti kongregasion?
17 Ti met ngay panangawis kadagiti dadduma iti maysa a pannangan iti pagtaengantayo wenno agmerienda kalpasan ti gimong no la ketdi nasapa pay? Saan kadi a rebbeng a surotentayo ti balakad ni Jesus idiay Lucas 14:12-14? Naminsan, nadutokan ti maysa a dati a misionero a kas mangidaulo a manangaywan iti maysa a kongregasion a dagiti kamengna naggapuda iti nadumaduma a puli. Nadlawna a kurang ti nainkabsatan a panangipategda, isu nga impamuspusanna nga ilinteg ti situasion. Kasano? Dinomingo nga awisenna dagiti nadumaduma a pamilia iti maysa a pannangan. Iti ngudo ti makatawen, ipakpakitan ti amin ti nainkabsatan a panangipateg kenkuana.
18. Kasanotay a maipakita ti nainkabsatan a panangipateg kadagiti masakit a kakabsattayo a lallaki ken babbai?
18 No masakit ti maysa a kabsat a lalaki wenno babai, adda man iti pagtaengan wenno iti ospital, tignayennatayo ti nainkabsatan a panangipateg a mangiparikna kenkuana a maseknantayo. Wenno dagiti met ngay agnanaed kadagiti balay a pagtaraknan? Apay a dikay sarungkaran ida, kasarita iti telepono, wenno mangipatulod iti kard a mangiyeb-ebkas iti nabara a karirikna?
19, 20. Kasanotay a maipakita a limmawa ti nainkabsatan a panangipategtayo?
19 Iti panangiyebkas ti nainkabsatan a panangipateg, mabalintay a saludsodan ti bagitayo, ‘Adda kadi idumduma ti nainkabsatan a panangipategko? Adda kadi pakainaigan ti kolor ti kudil, adal, wenno material a sanikua iti panangipakitak iti nainkabsatan a panangipateg? Masapul kadi a lumawaak iti nainkabsatan a panangipategko, kas iti indarirag ni apostol Pablo nga aramiden dagiti Kristiano idiay Corinto?’ Ti nainkabsatan a panangipateg tignayennatay a maaddaan iti positibo a panangmatmat kadagiti kakabsattayo, a mangapresiar kadakuada gapu kadagiti nasayaat a kababalinda. Ti nainkabsatan a panangipateg tulongannatay met nga agrag-o iti irarang-ay ti kabsattayo imbes nga umapal.
20 Ti nainkabsatan a panangipateg gutugotennatay met a siaalibtak a tumulong kadagiti kakabsattayo iti ministerio, kas iti kuna ti maysa kadagiti kantatayo (Numero 92):
“Nakapuy tulongantay ida,
Ket sibibileg ng’agsaoda.
Di met baybay-an ti ub-ubbing,
Tapno inda mapaksiat ti buteng.”
21. Ania ti namnamaentayo a supapak no ipakitatayo ti nainkabsatan a panangipateg?
21 Isu a ditay koma liplipatan nga iti panangiyebkas ti nainkabsatan a panangipateg, agaplikar ti prinsipio nga imbaga ni Jesus iti Sermonna iti Bantay: “Iyugaliyo ti mangted, ket dagiti tattao mangteddanto kadakayo. Ibukbokdanto kadagiti saklotyo ti nasayaat a sukat, napempen, nasedsed ken agliplippias. Ta ti rukod a pangrukodyo, isunto met ti pangrukodda kadakayo.” (Lucas 6:38) Magunggonaantayo no ipakitatayo ti nainkabsatan a panangipateg, a yebkastayo ti panangilala kadagiti adipen ni Jehova a kas iti bagitayo. Dagiti pudpudno a naragsak isu dagidiay maragsakan a mangipakita iti nainkabsatan a panangipateg!
[Footnote]
a Kitaenyo ti sumaruno nga artikulo nga: “Ayat (Agape)—Ti Dina Kaipapanan ken Ti Kaipapananna.”
Kasanoyo a Sungbatan?
◻ Ania dagiti Griego a sao a tumukoy kadagiti riknatayo, ket ania ti nagdumaanda?
◻ Ania ti tulbek iti nainkabsatan a panangipateg?
◻ Ania dagiti Nainkasuratan nga ulidantayo iti naisangsangayan a nainkabsatan a panangipateg?
◻ Apay a rumbeng nga ipakitatayo ti nabara a panangipateg kadagiti kakabsattayo ken kadagiti panglakayen?
[Ladawan iti panid 15]
Indagadag ni apostol Pedro kadagiti kakabsatna nga inayonda ti nainkabsatan a panangipateg iti pammatida ken kadagiti dadduma pay a Nakristianuan a kababalin