“Isuamin nga Israel” Naisalakan a Mangbendision iti Sangatauan
1. Apay a di rebbeng a namnamaen ti Republika ti Israel a gapu ta kameng ti Naciones Unidas ket daytanto ti pamay-an a pangbendisionan ti Dios ti sangatauan?
NI Jehova inkarina ken Abraham nga amin a pamilia ken nasnasion ti daga aglak-amdanto ti bendision gapu iti bin-i dayta matalek a patriarka. (Genesis 12:3; 22:17, 18) Ngem dagidiay a kari naaramid idi maika-20 a siglo sakbay ti Kadawyan a Panawentayo dina kayat a sawen a bendisionan ti Dios ti Naciones Unidas, ti nangsuno ti daydi nagawanen a Liga ti Naciones. Gapu ta ti agdama a Republika ti Israel ket miembro ti NU, gapuna, di koma namnamaen dayta nga usaren ti Dios ti kadaanan nga Israel a mangbendision iti sangatauan. Ti NU kinaagpaysuananna nakaserra iti dalan ti Pagarian ti Dios babaen ti “bin-i” ni Abraham. Gapuna, dayta ti agdama a “makarimon a mamagwalangwalang.” (Mateo 24:15) Saan, ti NU saan a maysa a bendision, numan pay dagiti relihiuso a klero ti Kakristianuan ken dagiti rabbi ti kina-Judio ikarkararagda ti pammendision ti langit iti dayta nga organisasion. Kinapudnona dayta “ti ladawan ti atap nga animal,” a dayta nga “atap nga animal” isu ti makitkita, napolitikaan, nakomersialan nga organisasion “ti dios daytoy a sistema dagiti bambanag,” ni Satanas a Diablo. Gapuna iti mabiiten ti NU madadaelen a kadua dayta inaanimal nga organisasion.—Apocalipsis 13:1-18; 2 Corinto 4:4.
2. Iti panagtignayna, kasano a ti natda ti “isuamin nga Israel naiduma manipud ti Republika ti Israel?
2 Kabayatanna, ti Republika ti Israel ti makidangdangadang a maipaay ti biagna a maibusor kadagiti dadduma a miembro ti NU. Ngem ti natda ti “isuamin nga Israel” saanna a tultuladen ti Republika ti Israel. (Roma 11:26) Di daydayawen dayta a natda “ti ladawan ti atap nga animal.” Imbes ketdi, ibutbutaktak ti naespirituan nga Israelita ti kinaagpaysuananna iti NU sigun iti panangmatmat ti Dios iti dayta—maysa a palsipikado a mangal-allukoy ti tattao nga agsanggir iti NU imbes a ti Pagarian ni Jehova baeten ken Jesu-Kristo. Gapu itoy a rason ti natda ti “isuamin nga Israel” agtalinaed a paset ti sapasap nga organisasion ni Jehova. Itan mapampaneknekanen ti natda ti naespirituan a ‘bin-i ni Abraham’ a bendision ti isuamin a nasion ken pamilia ti sangatauan. Gapuna dagiti napropetikuan a karkari ni Jehova napaneknekandan a pudno.
3, 4. Agarup 2,700 a tawtawen sakbay 1914, aniat’ impaltiing ni Jehova nga isurat ni Isaias maipapan ti “isuamin a nasnasion”?
3 Iti nasurok a 2,700 a tawtawen ti napalabasen, intudo ni Jehova a Dios iti masakbayan iti panawen inton dagiti asero a pakigubat a tanke ken eroplano ti mausarda iti damdamo unay iti panaggugubat, ken inton dagiti panaggugubat kadagiti trensera ket agbalinen a naisangsangayan wenno naidaddaduma unay, a dagiti soldado agusardanto kadagiti gas mask, ken kadagiti adayo ti madanonna a kanyon kas ti “Big Bertha” mausardanto iti naan-anay a panaggugubat. Wen, agarup 27 a siglo sakbay ti Gubat Sangalubongan I, pinaltiingan ni Jehova a Dios ni mammadto Isaias a mangiladawan iti naisangsangayan a banag a mapasamakto iti dayta a tiempo, a kunkunana:
4 “Ti sirmata a nakita ni Isaias nga anak ni Amos a maipapan iti Juda ken Jerusalem: Ket maaramidto kadagiti maud-udi nga al-aldaw, a ti bantay ti balay ni Jehova mabangonto iti rabaw dagiti bambantay, ket maibayogto a nangnangruna ngem kadagiti turturod; ket isuamin a nasion agayusdanto agingga kenkuana. Ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova, iti balay ti Dios ni Jacob [Israel]; ket isuronatayonto kadagiti dalanna, ket magnatayonto kadagiti danana.’ Ta iti Sion ti rummuaranto ti linteg, ket iti Jerusalem ti rummuaranto ti sao ni Jehova. Ket isu pagukomannanto dagiti nasnasion ket kedngannanto ti maipapan kadagiti adu nga inilin-ili. Ket pandayendanto dagiti kamkampilanda a pagbalinen a dingding ti arado ket dagiti pikpikada pandayendanto a kumkumpay. Ti maysa a nasion saannanto nga itag-ay ti kampilanna a maibusor iti nasion, ket didanto met adalenen iti pannakigubat uray kaano. O balay ni Jacob, umaykayo, ket magnatayo iti lawag ni Jehova.”—Isaias 2:1-5.
5. Iti imatang ti panagtignay ti Republika ti Israel, manipud ania a punto de vista a mamatmatan ti padto ni Isaias maipapan “ti balay ni Jehova”?
5 Ita ditay makitkita a matungtungpal daytoy nakaskasdaaw a padto idiay Jerusalem iti Makintengnga a Daya, ti kabisera ti Republika ti Israel. Idiay dati a maaw-awagan Bantay Sion, awan makitkitatayo a templo ni Jehova, no di ket, ti Muhamadano a Dome of the Rock ken maysa a mosque a naidedikar ken Allah. Dagiti turista manipud adu a nasnasion bisbisitaenda daytoy relihiuso a disso, saan a tapno agdayawda, no di ket tapno buyaen laeng daytoy nagpintas a pasdek ti Islamiko. Di mailibak, ngarud, nga itan “iti maud-udi nga al-aldaw” daytoy dandanin matayen a masaksakit a sistema dagiti bambanag, ti padto ni Isaias saan a pulos a matungtungpal iti kaso ti moderno nga estado ti Israel. Daytat’ saan a nairanta nga agbalin nga “isuamin nga Israel” a maisalakan a pakabendisionan ti sangatauan, a kaitungpalan ti kari ni Jehova ken Abraham. Gapuna, ti propetiko a sasao a “ti bantay ti balay ni Jehova” ti masapul a mamatmatan manipud iti naespirituan a panangmatmat maipapan iti “Israel ti Dios.”—Galacia 6:16.
6. (a) Kasano nga impakita ni Pedro no ania a kita ti nasion “ti Israel ti Dios”? (b) Kabayatan ti ania a paspasamak ti lubong nga “isuamin a nasnasion” mangrugidan nga agayus iti “balay ni Jehova”?
6 Daytoy nga “Israel ti Dios” ket maysa a naespirituan a nasion, kas impamatmat ni apostol Pedro iti suratna: “Ngem dakayo ti ‘napili a kaputotan, ti naarian a kinapadi, nasantuan a nasion, ili a kukua ti Dios, tapno ipaduyakyakyo dagiti kinatan-ok’ daydiay nangayab kadakayo manipud kinasipnget inggana iti nakaskasdaaw a lawagna.” (1 Pedro 2:9) Ti agdama a natda daytoy a “nasantuan a nasion” ti agtaktakder kas simbolo ti “balay ni Jehova” ket bukbuklenda ti pannakasentro itatta dagiti Saksi ni Jehova. Addan 21 años iti uneg dayta a “maud-udi nga al-aldaw”—idi a ti facismo a Romano Katoliko ken Nasismo ni Hitler ti agrurupakda idiay Europa—idi nga “amin dagiti nasnasion” mangrugidan nga agayus nga agturong iti naespirituan a “balay ni Jehova” a ti kaiyariganna, maitantan-okdan iti ngatuen dagiti bambantay, babaen kadagiti Saksi ni Jehova.
7. Apay a nagpateg a banag idi a dagiti nasion mangrugidan nga agayus iti “balay ni Jehova”?
7 Daytoy nagpateg a panangrugi ti tinandaan ti maysa a kumbension heneral iti maud-udi a paset ti primavera idi 1935 idiay Washington, D.C., ti kabisera a siudad ti Estados Unidos ti America. Kabayatan ti nagpateg a palawag iti dayta a kumbension, maysa a miembro ti “isuamin nga Israel”—ni J. F. Rutherford, a presidente idi ti Watch Tower Bible and Tract Society—kinorehirna iti di umiso a pannakaawat nga adda idi kadagiti International Bible Students. Intudona a ti “umariwekwek,” wenno “dakkel a bunggoy,” a maurnong manipud amin a paset ti sangatauan ken agdaydayawto iti Dios iti naespirituan a templona (yantangay ti material a templo idiay Jerusalem ti dinadaelen dagiti Romano idi 70 K.P.) ket maysa a naindagaan a klase. (Apocalipsis 7:9-17, Authorized Version) Daytoy a klase ti addaan namnama a makalasat iti Har-Magedon ken sumrek iti baro a sistema dagiti bambanag bayat dayta umad-adanin a Sangaribo a Tawen a Panagturay ni Jesu-Kristo, nga agturturayen kadagiti langlangit manipud pay 1914.
8. (a) Ania a makaaramid historia a pasamak ti naaramid idiay Washington, D.C., a kumbension ti 1935? (b) Apay a maikuna nga “isuamin a nasion” agay-ayusdan iti “balay ni Jehova”?
8 Ti sungbatda iti daytoy naipanayag a lawag ti nakaaramid historia. Iti dayta dramatiko nga asamblea, 840 a kumbensionista ti nabautisaran kas simbolo ti dedikasionda ken Jehova a Dios baeten ken Jesu-Kristo. No mano a nasnasion ti mairepresentar iti dayta a grupo ti di masierto, ngem sipapanunotda iti naindagaan a Paraiso a namnama. Ita, nasuroken a 49 años kamaudiananna, agbilangen dagiti Saksi ni Jehova iti adayo a nasursuroken ngem ti “isuamin nga Israel.” Aktibodan kadagiti 205 a dagdaga iti intero a globo. Iti dakdakkel a termino, ngarud, ti “isuamin a nasnasion” ti agay-ayusdan iti dayta naitan-ok a balay ni Jehova a pagdaydayawan.
Dagiti Saksi ni Jehova—Ania a Kita dagiti Tattao?
9. Saan a kas ti Republika ti Israel, innala dagiti Saksi ni Jehova ti ania a kurso kas kaitungpalan ti Isaias 2:4?
9 Iti kasta a nalikudan ti Republika ti Israel, ania a kita ti tattao ti pakakitaantayo ita kadagiti Saksi ni Jehova? Kas iti dayta a republika, armadoda aya a mangituloy iti maysa a nainlasagan a pannakigubat a maibusor kadagidiay mamegpeggad iti kaaddada? Saan! Imbes ketdi, eksakto nga isuda ti kita dagiti tattao a naipadto iti Isaias 2:4. Agsipud ta intan-okda ti panagdayaw ken Jehova iti naespirituan a balay ti Dios, iti makailadawan a pamay-an pinandaydan dagiti kampilanda a pinagbalin a tadtadem ti arado ken ti pikpikada kas kumkumpay. Nagtalekda ken Jehova a Dios kas ti Mannalaknibda kas panangtuladda iti Liderda, a ni Jesu-Kristo. Nupay naggapuda iti ngangngani amin a nasnasion iti daga, dida palubosan dagiti nasionalistiko a guranggura a mangkontrol kadakuada; ken dida met makibibiang iti nailubongan a politika. Iti pudpudno a kaipapananna, insardengdan nga ad-adalen ti arte ti nailasagan a pannakigubat. Tagtaginayonenda iti neutral a kababalinda kadagiti nailubongan a supsuppiat ken politika. Kinaagpaysuananna, sinardengandan ti panagusar iti nainlasagan nga ig-igam a pagdepensa ken pangraut. Mamatida iti kuna ni Jesu-Kristo—a ti Pagarianna “saan a paset daytoy a lubong.” Ta no saan, dagiti adalanna makidangadangda iti dayta babaen kadagiti adelantado a namilitariaan a tipo dagiti nainlasagan nga ig-igam.—Juan 18:36.
10. (a) Iti ania laeng a pannakidangadang ti pakiramramanan dagiti Saksi ni Jehova? (b) Ania a “baro a bilin” ti pagtultulnogan dagiti Saksi, ken kasano nga ar-aramidenda dayta?
10 Imbes ketdi, dagiti Saksi ni Jehova ti makiramraman laeng iti naespirituan a pannakidangadang. Ti pannakidangadangda ket maibusor kadagiti espiritu ti kinadakes kadagiti langlangit. Gapuna dagiti ig-igamda saan a nainlasagan, makaibuyat ti dara. (Efeso 6:10-18) Ti pannakidangadangda saan a maibusor iti sangatauan, ket nalawag a saanda a makidangadang kadagiti naespirituan a kakabsatda iti uneg ti organisasion ni Jehova. Agtultulnogda iti bilin ni Jesu-Kristo nga ayaten dagiti naespirituan a kakabsatda, kas ti panangayatna kadatayo, agingga iti punto nga impaayna ti natauan a biagna a maipaay kadagiti adalanna. Maitunos daytoy iti “baro a bilin” nga inted ni Jesus kadagiti pasurotna, nga agayan-ayatda iti maysa ken maysa kas panangayatna kadakuada.—Juan 13:34.
11. Ti ayat nga impamatmat dagiti Saksi ni Jehova tungtungpalenna ti ania a linteg?
11 Matigtignay dagiti Saksi ni Jehova babaen iti daytoy a kita ti ayat a mangtungtungpal iti Linteg a naited baeten ken mammadto a Moises. Ti kasta nga ayat ti di mangdangran ti asinoman ken ad-adda pay ngem basta “charity,” sigun iti maika-20 a siglo a kaipapanan dayta a termino. Idiay Biblia, dagiti sasao a Hebreo ken Griego a maipaay iti “ayat” ti mangiladladawan ti ad-adda pay ngem basta “charity.”—Kitaenyo ti 1 Corinto, kapitulo 13, King James Version; Katoliko a Douay Version.
Agpaay a Pangbendision, Saan a Pangilunod
12. Nasken kadi a ti naan-anay a kameng ti “isuamin nga Israel” addadan idiay langit sakbay a mangrugi ti pannakabendision ti “isuamin a nasion”?
12 Manipud naisalaysayen makitatayo nga agpaay a pakabendisionan ti isuamin a pamilia ken nasnasion a mangrugi babaen iti “bin-i” ti Dakdakkel nga Abraham, a ni Jehova a Dios, saanen a kasapulan para iti natda ti “isuamin nga Israel” a sumrek idiay langit ken makikadua iti Kangrunaan iti dayta a “bin-i,” a ni Jesu-Kristo. Iti ngangngani kagudua a siglo itan, ti kameng dagiti pamilia ken nasion ti daga umaw-awatdan kadagiti bendision manipud iti naikari a “bin-i” ni Abraham. Nasuroken a dua ket kagudua milion kadagiti “sabsabali a karnero” ti naurnongen a mangbukel ti “maymaysa nga arban” a kadua ti natda dagiti naiyanak iti espiritu a kimmarnero a paspasurot ti Naimbag a Pastor nga addaan nailangitan a namnama.—Juan 10:16.
13. Immay ni Jesus iti templo nga aniat’ panggepna agpaay iti “sabsabali a karnero,” ket kasano a ti kababalinna kadakuada ti maitampok iti mabiiten?
13 Ti nabendisionan a “sabsabali a karnero” ti naparaburanda babaen iti namnama a mangtawid, manipud pangrugian, ti Paraiso a naisublin iti daga bayat ti Milenio a panagturay ni Kristo nga Ari. Gapuna idi a ni Jesu-Kristo, kas “mensahero ti tulag” ni Jehova, immayen iti naespirituan a templo a mangukom, immay a mangbendision, saan a mangilunod, kadagiti “sabsabali a karnero.” (Malakias 3:1-3) Daytoy a panangbendision matampokanto babaen iti pannakaitalimengda iti dayta umad-adanin a “gubat ti dakkel nga aldaw ti Dios a Mannakabalin-amin” a maibusor kadagiti naindagaan a kabusorna a maur-urnong iti “Har-Magedon.” (Apocalipsis 16:14, 16) Idi ugma ti siudad ti Megido isu iti disso dagiti panagballigi a maipaay ken Jehova a Dios. (Josue 17:11; Zacarias 12:11) Iti simboliko a Har-Magedon balangatanto ti Dios ti bagina iti naindaklan a panagballigi, nga agpaay iti agnanayon a dayawna. Sadiay ti naitan-ok nga Anakna, a ni Jesu-Kristo, isunto ti agbalin a Mariskal de Kampona.—Apocalipsis 19:11-21.
14. (a) Adda rason nga agragsak dagiti “sabsabali a karnero” iti pannakaisalakan ti siasino? (b) Manon ti bilang dagiti “sabsabali a karnero”?
14 Masaluadanto dagiti “sabsabali a karnero” a makalasat iti dayta naisangsangayan unay a demonstrasion ti nadiosan a pannakabalin ken kinaranga. Anianton ti ragsak amin dagiti makalasat a makabuya iti dayta makaikeddeng a panagsuppiat gapu iti kinapudno a ti natda ti “isuamin nga Israel” ket “maisalakan” bayat iti periodo ti kinatalna iti nagbaetan iti Gubat Sangalubongan I ken Gubat Sangalubongan II! Manipud primavera ti 1935 agtultuloy adda a mainaynayon iti daytoy naisalakan nga Israel ti “umariwekwek” nga awan iti masinunuo a bilangna. Kas “sabsabali a karnero” ti Naimbag a Pastor, ni Jesu-Kristo, ti bilangda itan dandanin tallo a milion. Isudat’ rumrummuar manipud “amin a nasion ken tribo ken il-ili ken pagsasao” ti sangatauan, kas kaitungpalan ti kari nga inaramid ni Jehova a Dios iti daydiay nangiladawan kenkuana, awan sabali, ni “gayyemna” nga Abraham. (Apocalipsis 7:9-17; Santiago 2:23) Ket ti pannakaur-urnong dagitoy “sabsabali a karnero” ti saan pay a nalpas. No manonto iti kamaudianan a bilangda inton mairingpasen ti Naimbag a Pastor ti panangumong kadakuada sakbay ti pannakadadael ti Babilonia a Dakkel ken ti gubat ti Dios a maibusor kadagiti napolitikaan a kaayan-ayatna inton Armagedon ditay ammo.—Apocalipsis 17:1-18:24.
15. Ti pannakitimtimpuyog ti “sabsabali a karnero” iti natda ti “isuamin nga Israel” ket pangrugian ti ania a bendision?
15 Ti pannakitimtimpuyog ti “sabsabali a karnero” a kadua ti natda ti “isuamin nga Israel” iti “maymaysa nga arban” iti sidong ti Naimbag a Pastor, a ni Jesu-Kristo, ti kangrunaan iti “bin-i” ni Abraham, ti napaneknekan a pangrugian iti maysa a banag. Iti ania? Isut’ pangrugian ti naan-anay a bendision a kaskasdi nga ipaayto pay ti “isuamin nga Israel” kadagidiay “sabsabali a karnero” bayat iti Milenio a Panagturay ni Jesu-Kristo, nga isu ti pakailasatandanto pay iti sidong ti nadiosan a pannalaknib.
16. Apay a determinado dagiti “sabsabali a karnero” nga agtultuloy nga agserbi ken Jehova iti dasig ti natda ti “isuamin nga Israel”?
16 Kas kaitungpalan ti Apocalipsis 7:14-17, dagiti “sabsabali a karnero” ket “binuguanda dagiti pagan-anayda ket pinapudawda ida iti dara ti Kordero.” Isut’ gapuna a napalubosanda nga agdaydayaw iti Dios iti “aldaw ken rabii iti templona,” iti naespirituan a panagsao. Wen, “ti Kordero ti Dios,” a ni Jesu-Kristo, ti mangpakpakan kadakuadan iti naespirituan a taraon tapno “didanto agbisinen.” (Juan 1:29) Mainayon pay, ti matalek a Pastorda ti mangiturturong kadakuadan “kadagiti ubbog ti danum ti biag,” kayatna a sawen, ti biag iti Paraiso a daga. Gaput’ panagyamanda kadagiti amin a bendision nga aw-awatendan babaen ti natda ti “isuamin nga Israel,” ti “dakkel a bunggoy” agtultuloyda nga agserbi ken Jehova iti dasig daytoy matalek a natda. Dagitoy a “sabsabali a karnero” aramidenda dayta iti “maymaysa nga arban” iti sidong ti “maymaysa a pastor” agpaay a paginteresan ti Pagarian ti Dios baeten ken Jesu-Kristo. Daytoy ti determinado nga aramidendanto agingga nga amin a kabusor ti Pagarian ti maikisapdanton manipud ti rupa ti “pagbatayan” ti Dios, nga isu ti daga.—Isaias 66:1; Mateo 5:34, 35; Aramid 7:49.
Kasanoyo a Sungbatan?
◻ Apay a ti Republika ti Israel saan nga isut’ pamay-an ni Jehova a pangbendisionan ti sangatauan?
◻ Apay a maikuna nga “amin a nasnasion” agay-ayusdan iti “balay ni Jehova”?
◻ Kasano a tungtungpalenen dagiti Saksi ni Jehova ti Isaias 2:4?
◻ Aniat’ kababalin ti adda ken Jesu-Kristo kadagiti “sabsabali a karnero,” ket kasanonto a matampokan dayta iti mabiiten?
◻ Ania a bendision ti addaan pangrugian iti pannakitimpuyog dagiti “sabsabali a karnero” iti natda ti “isuamin nga Israel”?
[Ladawan iti panid 16, 17]
“Ket babaen iti bin-im mabendisionanto ti isuamin dagiti nasnasion ti daga agsipud ta tinungpalmo ti timekko.”—GENESIS 22:18.
[Ladawan iti panid 19]
Dagiti Saksi ni Jehova addaanda ti ayat iti maysa ken maysa ket ‘pinandaydan dagiti kampilanda a tadtadem ti arado’