Dagiti Saludsod Manipud Kadagiti Managbasa
◼ Ti Hebreo 3:1-6 sasawenna ni Moises, ni Jesus ken ni Jehova a Dios a maitunos iti maysa a “balay,” ngem ania a “balay” ti tuktukoyenna?
Kangrunaanna, tuktukoyen ni apostol Pablo ti ili ti Dios wenno kongregasion, kas maysa a “balay.”
Mabasa ti Hebreo 3:1-6: “Gapuna, kakabsat a sasanto, a mairaman iti pannakaawis a nailangitan, pampanunotenyo ti apostol ken kangatuan a padi ti pammatitayo—nga isu ni Jesus. Isu a nagtalkan daydi nangituding kenkuana, a kas met ken Moises iti isuamin a balayna. Ta daydi naibilang a maikari iti dakdakkel a dayaw ngem ni Moises, a kas ti nangbangon iti balay dakdakkel ti dayawna ngem iti balay. Ta amin a balay adda nangbangon, ngem ti nangbangon kadagiti isuamin a bambanag isu ti Dios. Ket ni Moises kinapudnona a napagtalkan idi iti isuamin a balayna, kas maysa nga adipen a maipaay a pammaneknek kadagidiay banag a maipakaammonto idi, ngem ni Kristo kas maysa nga anak nga agaywan iti balayna. Ket datayo ti balayna, no taginayonentayo ti wayawayatayo ti panagsao ken ti ragsak ti pananginanamatayo agingga iti panungpalan.”
Immun-una, kinuna ni Pablo a ni Jesus, kas Anak ti Dios, tinawidna ti maysa a nagan a natantan-ok ngem kadagiti anghel. Intudo pay met ti apostol a no ti sao ti Linteg nga inted ti Dios ken Moises baeten kadagiti anghel maikari iti atension, ad-adda pay ngarud met ti sasao a naiyebkas babaen iti Anak. (Hebreo 1:1-4; 2:1-4) Kalpasanna, idiay Hebreo kapitulo 3, intuloy ni Pablo nga ipaganetget ti kinatan-ok ni Jesus.
Kas ti nalikudan, laglagipen a kalpasan ti panagtanabutob ni Miriam ken Aaron iti kangrunaan nga akem ni Moises idiay Israel, inawagan ti Dios ni Moises ‘ti adipenko a nangtalkak (“matalek iti,” Griego a Septuagint Version) iti balayko.’ (Numeros 12:7) Yantangay ni Aaron kas nangato a padi makastrek iti tabernakulo (uray pay agingga iti Kasasantuan Unay), mabalin a tuktukoyen ti Dios ti nasion, wenno ti kongregasion ti Israel kas “balayna” a ti adipenna isu ni Moises. Nalawag a ni Pablo insingasingna daytoy idiay Hebreo 3:2. Kunana a ni Jesus ket matalek iti Dios, kas ken Moises “iti isuamin a balayna.” Ngem kalpasanna insurat ni Pablo a ni Jesus ket “naibilang a maikari iti dakdakkel a dayaw ngem ni Moises.” Apay?
Inrason ni Pablo a “kas ti nangbangon iti balay dakdakkel ti dayawna ngem iti balay.” Asino man a tao a nangbangon ti literal a balay umanamong iti dayta. Ngarud, ibagbaga ni Pablo, a ni Jesus, ti Anak ti Dios, ti maikari iti dakdakkel a dayaw ngem ni Moises agsipud ta ni Jesus ti nangbangon iti balay, idinto a ni Moises ti saan. Binigbig ni Pablo, siempre, a ti ultimo a dayaw ti isuamin a bambanag agturong iti Dios.—Hebreo 3:3, 4.
No inatnat pay iti linea ti panagrason, kuna ni Pablo a ni Moises ket maysa a mapagtalkan a ‘katulong idi iti isuamin a balayna.’ (Hebreo 3:5) Wen, ni Moises mismo adda iti uneg wenno paset ti kongregasion, wenno “balay,” ti Israel. Ngem kumustanto met Daydiay umay iti kamaudiananna: ti Mesianiko a mammadto nga inladawan ken impadto ni Moises? (Deuteronomio 18:18, 19; Juan 1:21, 25; Aramid 3:22, 23) Dayta a mammadto ti dakdakkelto ngem ti matalek a katulong iti balay ti Israel. Insurat ni Pablo a ni Kristo ket “maysa nga Anak nga agaywan iti balayna,” ni Jehova a Dios. Agaywan iti balay ti Israel? Saan, adda a silalagip ni Pablo iti banag a dakdakkel.
Nupay nagserbi ni Moises iti “balay” sigun iti Linteg ti tulag, inkari ni Jehova iti nasaysayaat nga urnos iti sidong ti “baro a tulag.” (Hebreo 8:7-13; Jeremias 31:31-34) Ti baro a tulag ket adda iti balay, wenno nasion, ti naespirituan nga Israel. (Galacia 6:16) Gapuna kuna ni Pablo: “Datayo ti balayna, no taginayonentayo ti wayawayatayo ti panagsao.”—Hebreo 3:6; idiligyo iti 1 Timoteo 3:15; 1 Pedro 2:5; Mateo 16:18.
Gapuna ti “balay” a nagserbian ni Moises isu ti nainlasagan a kongregasion ti Israel, ngem ti “balay” a binangon ni Jesus ken nagserbianna kas manangaywan isu ti kongregasion ti naespirituan nga Israelitas a mangtagtaginayon ti “pananginanamatayo agingga iti panungpalan.”—Hebreo 3:6.