Makipagkaykaysa iti Namarsua ti Sapasap nga Organisasion
“Kitaenyo! Nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa!”—SALMO 133:1.
1, 2. (a) Ania a makariribuk a banag ti nagparang 6,000 a tawtawen ti napalabasen? (b) Aniat’ panangawag ti Biblia iti daytoy a traidor, ket kasano a pinadpadasna a pagbalinen ti bagina kas ti Kangatuan?
TI NAMARSUA ti sapasap nga organisasion tinarigagayanna a salimetmetan dayta a nadalus, nalinteg, ken nagkaykaysa. Ngem di nagbayag kalpasan ti panangrugi ti kaadda ti sangatauan agarup 6,000 a tawtawen ti napalabasen, maysa a makariribuk a banag ti nagparang iti uniberso. Napasamak daytoy idi a ti napigpigsa ngem tao a sumusuppiat ti simmina manipud iti organisasion ti Namarsua ket nangrugi a mangbukel iti kabukbukodanna nga agwaywayas nga organisasion.
2 Gapu ta daytoy a traidor binusorna ti Namarsuana, ti Biblia ti nangawag kenkuana a Satanas, kayatna a sawen “Sumusuppiat.” Isu ti naindaklan a sumusuppiat ni Jehova, ti nainkalintegan a Soberano ti uniberso. (Job 1:6, 7) Gapu ta ambisioso a kayatna a pagbalinen ti bagina a kaasping ti Kangatuan iti pannakaadda ti kabukbukodanna nga organisasion, ti Sumusuppiat saan a nagsardeng a mangpadpadas nga agtignay kas ti karibal nga organisador ken dios. Gapuna pinagbalin ni Satanas ti bagina a nakapimpintas ti langana. Ti kababalin ni Satanas ti naisarming iti dinastia ken ti naraniag a nainlubongan a posision nga innala ti “ari ti Babilonia,” a maiyanatup a nakaitedan dagiti termino a “baggak” ken “Lucifer.” (Isaias 14:4, 12-14; King James Version; An American Translation) Agingga iti daytoy nga aldaw, ngem babaen laeng iti panangipalubos ni Jehova, ni Satanas isu “ti dios daytoy a sistema dagiti bambanag.”—2 Corinto 4:4.
3. (a) Iti ania a paset ti organisasion ni Jehova ti umuna a rinaut daytoy a sumusuppiat? (b) Ania a paspasamak ti nangibunga ti panagbalin ti Diablo nga agturay kadagiti demonio?
3 Awan duadua tapno pakapuyen ti organisasion ni Jehova, immuna a rinaut ni Satanas ti kababaan a paset dayta, ni Adan, ti nadutokan nga ulo ti natauan a pamilia. (Genesis 3:1-24; Salmo 8:3-5; Roma 5:12) Kamaudiananna, adu kadagiti anghel ti sisusukir a pinanawanda ti “nakaisigudanda a kasasaad,” wenno ti umiso a pagtaenganda idiay langit, ket naglasagda tapno mangasawada ket makidennada kadagiti napipintas, nupay imperpekto a babbai. (Judas 6) Dagiti mistiso nga annakda, nga abnormal ti kadakkel ken kapigsada naawaganda Nephilim. Daytoy a termino, a mapapati a kaipapananna “dagiti natnag,” ti maiyanatup agsipud ta nalawag nga isudat’ nangpataud iti pannakatnag dagiti tattao babaen iti kinaranggas. Idi panawen ti Layus, dagiti nasukir nga anghel ti nanguksob manen ti nailasagan a bagida ket nagsublida iti espiritu a kasasaad. (Genesis 6:1–7:23) Babaen ti panangisinada ti bagbagida manipuid organisasion ni Jehova, pinagbalinda ti bagbagida a demonio, ket ni Satanas nagbalin nga agturayda.—Deuteronomio 32:17; Salmo 106:37; Mateo 12:24; Lucas 11:15-19.
4. Aniat’ inaramid dagiti tattao a nakalasat iti Layus, ngem aniat’ rinugian nga aramiden ni Satanas, ken aniat’ panggepna?
4 Iti dayta a pamay-an, nangibangon ni Satanas ti di makita, napigpigsa ngem tao nga espiritu a paset ti organisasionna. Dagiti nakalasat iti Layus, ni Noe ken ti pamiliana, nagtalinaedda a nakipagkaykaysa iti di makitkita a nailangitan nga organisasion ni Jehova. (Genesis 6:9; 8:18-21) Ngem rinanta manen ni Satanas a buraken ti panagkaykaysa dagiti matalek a kapuonan ni Noe. Aniat’ panggep ti Diablo? Apay, ti panangipasdekna met ti makitkita a paset ti nadangkes nga organisasionna!
5. Kasano nga insingasing ti The Watch Tower ti Mayo 1, 1921, a ni Satanas adda organisasionna?
5 Nabayag bassit sakbay a naawatan ti International Bible Students a ni Satanas addaan ti organisasion ngem ti The Watch Tower iti Mayo 1, 1921, kunana: “Di napnek ti naaramidannan, ginargari ni Satanas dagitoy nailangitan a buybuyot ket pinadakesda ti sangatauan ket pinunnoda ti daga iti kinaranggas. Isut’ nangorganisar ti maysa a sistema a di makita ti natauan a matmata, agraman ti maysa a sistema ditoy daga a makita dagiti natauan a matmata, ket nagreggetanna a palsipikaduen ti tunggal paset ti naipanayagen a plano ti Dios.”
6. Aniat’ kuna ti The Watch Tower iti Disiembre 1, 1922 maipapan iti panggep ni Satanas?
6 “Ti Panggep ni Satanas” isut’ maysa a subtitulo nga iti Sidong dayta ti The Watch Tower iti Disiembre 1, 1922, silalawag a kinunana: “Addatayon kadagiti dakes nga al-aldaw. Ti dangadang iti nagbaetan ti organisasion ni Satanas ken ti organisasion ti Dios nangrugin. Daytat’ maysa a napeggad unay a panagdangadang. Panggep ni Satanas a dadaelen ti regta ti organisasion ti Apo ken, no mabalin, tapno dadaelen dagiti kamkameng ti balay dagiti annakna. Gapu itoy isut’ agtungpal iti isuamin a posible a gakatna.”
7, 8. (a) Kasano a makatulong ti pannakaawat kadagiti dua nga agkalaban nga organisasion? (b) Idiay The Watch Tower iti Marso 1, 1925, aniat’ naipakita a bumusbusor iti piguratibo nga “anak a lalaki”?
7 Ti pannakaawat kadagiti dua nga agkalaban nga organisasion ti nakatulong a nanglawlawag kadagiti adu a pannursuro ken padto ti Biblia. Kas pangarigan, ti Apocalipsis kapitulo 12 saan a siuumiso a natarusan agingga a ti artikulo a “Pannakaipasngay ti Nasion” ket nagparang idiay The Watch Tower iti Marso 1, 1925. Ti temana a teksto (Apocalipsis 12:5, KJ) ti mabasa: “Ket inyanakna ti maysa nga anak a lalaki, a mangiturayto kadagiti isuamin a pagpagarian babaen ti maysa a sarukod a landok: ket daydi anakna naitayab agingga iti Dios, idiay tronona.”
8 Kadagiti panid 67 ken 68 kuna daytoy nga artikulo:
“Aniat’ naisangsangayan a paset ti nasantuan a plano bayat dagiti pampanawen? . . . Ti pannakaipasdek ti pagarian nga insuro ni Jesus a kararagentayo. Kaipapanan dayta ti pannakaipasngay ti baro a nasion a mangiturayto ken mangbendisionto iti amin a pamilia ti daga. . . . Ania met ti bumusbusor a pannakabalin a nangsalimetmet kadagiti tattao iti kinakuneng daytoy nadayag a baro a nasion ken kadagiti bendision nga iyegnanto kadakuada? . . . Ni Satanas a diablo, ken ti organisasionna. . . . Ti pudpudno a panagdangadang isu ti Dios a maibusor iti diablo, ti pagarian ti kinalinteg a mangparmekto iti pagarian ti kinadakes ken kinasipnget, ken maisandi iti dayta ti pannakaipasdek ti pagarian ti kinapudno. . . . Kalpasan ti 1918 ti organisasion ti Disblo, ti pinansial, politikal ken eclesiastikal, nangnangruna ti maud-udi, ti sipapanayag a nangidian iti Apo ken ti pagarianna; ket iti dayta ti pungtot ti Dios a maibusor kadagiti nasnasion ti nangrugin a maiyebkas. Manipud iti dayta a tiempo ti bakal nangrugin. Kasakbayan dayta ti panagdangadang ti naaramid idiay langit.”
9. Idi 1925, aniat’ nailawlawag a kaipapanan ti “babai” iti Apocalipsis kapitulo 12?
9 Sibibiddut ti pannakaawatda nga agpadpada ti Isaias 66:7 ken Apocalipsis 12:5 ti nangipadto ti pannakaipasngay ti isu met laeng nga “anak a lalaki.” (KJ) Gapuna ti naadaw iti ngato a Watch Tower kunana manen:
“Ti ‘babai’ ti kasla nalawag nga isimsimbolona dayta a paset ti Sion, ti organisasion ti Dios, a nangipasngay iti baro a gobierno wenno nasion a mangiturayto kadagiti nasnasion ken il-ili iti daga babaen iti sarukod a landok ken iti kinalinteg. . . . (Galacia 4:26) Iti sabali a pannao ti Sion wenno Jerusalem, ti organisasion ti Dios, ket isu ti ina a nangipasngay iti baro a nasion, wenno dagiti mangituray a bambanag. Dagiti napulotan ditoy daga ket paset ‘ti babai’, ket sigurado nga isudat’ mangibagbagi kenkuana. Ti babai ‘a sikakawes iti init’ kaipapananna ti Sion idiay langit ken dagiti naanamongan ditoy daga iti organisasion ti Dios idi panawen a ti Apo immay iti templona. . . . Ita iti templona a nanglikmut iti klase templo wenno nangkawes kadakuada babaen iti kawesna iti kinalinteg, ti organisasionna a nangpataud ti baro a nasion, iti sabali a pannao nainaganan a Sion, ti agsilnag kas ti init.”
10. Aniat’ napasamak iti espiritu a paset ti organisasion ni Satanas, ket ania a gubat itan ti ar-aramidenda?
10 Ti “dragon,” a matartarusan itan kas ni Satanas a Diablo mismo, ti napaay a nangalun-on iti “anak a lalaki,” ti Mesianiko a Pagarian a naipasngay idiay langit idi panungpalan ti Panawen Gentil idi 1914. (Lucas 21:24, KJ) Kabayatan ti gubat a simmaruno idiay langit, ti espiritu a paset ti organisasion ni Satanas ti naitappuak iti kaparanget ti daga, a nikaanoman saanton a makastrek idiay langit ken mangwatwat iti manangdadael panagkaykaysa nga impluensiana sadiay. Dayta naipababa nga organisasion itan ti mangkamkamat iti makitkita a paset ti sapasap nga organisasion ni Jehova, nga awan sarday a gubgubatenna dagiti “natda iti kapuonanna a mangsalimetmet kadagiti bilbilin ti Dios ken addaanda iti pammaneknek ni Jesus.”—Apocalipsis 12:17.
Nagkaykaysa a Serbisio
11. (a) Iti asino ti pagaplikaran dagiti sasao ni Pablo maipapan iti “Jerusalem sadi ngato” itatta? (b) Aniat’ kuna ni David maipapan iti naindagaan a Jerusalem, a nakaipasdekan ti balay a pagdaydayawan ken Jehova?
11 Ti piguratibo a “babai” a kukua ti Dios ti naiyarig iti napili a siudad ti Jerusalem, a maaw-awagan Sion babaen ti dandaniw. Gapuna, dagiti sasao ni Pablo maipapan iti siwayawaya a “Jerusalem sadi ngato” ti mabalin a maiyaplikar itan iti “natda iti kapuonanna” nga isut’ “gubgubaten” ti “dragon,” ni Satanas a Diablo. (Galacia 4:26) Ti naindagaan a Jerusalem ti naibangon a sipipigsa ken nasinged ti panagkaykaysana idi kaaldawan ni David, a nagkuna: “Naragsakanak iti kinunada kaniak: ‘Intayon idiay balay ni Jehova.’ Dagiti saksakami agtatakderda iti uneg dagiti ruanganmo, O Jerusalem. Jerusalem a nabuangay a kas sangsangkanayon nga ili a natibker a sangsangkamaysa, isu a pagsang-atan dagiti tribo, dagiti met la tribo ni Jah, iti maysa a pagbilinan ken Israel tapno agyamanda iti nagan ni Jehova.”—Salmo 122:1-4.
12. (a) Iti ania a panagkaykaysa ti pagaplikaran ita dagiti sasao idiay Salmo 122:1-4? (b) Ti Jerusalem ken ti sagrado a tabernakulo sadiay ti addaan ania a kaipapanan iti panagkaykaysa dagiti tribo ti Israel?
12 Anian a makaay-ayo a ladawan ti panagkaykaysa iti sapasap nga organisasion ni Jehova! Nangnangruna a makita ti panagkaykaysa kadagiti nasional a pipiestada, inton dagiti 12 a tribo ti Israel sangsangkamaysada iti panagdayaw ken Jehova idiay sagrado a tabernakulo ti Jerusalem. Ken bayat ti panagturay ti ari a pastorda a ni David, dagiti tribo nagtalinaedda a sangsangkamaysa saan laeng a gapu iti nailasagan a singgalutda no di ket nangnangruna gapu ti organisado a panagdaydayawda iti Diosda. Wen, ti Jerusalem isut’ nasantuan pannakaanamongna a sentro ti panagkaykaysa, organisado a panagdayaw iti sidong ti maymaysa a kinapadi a naala manipud tribo ni Levi ken ti pamilia ti immuna a nangato a padi ti Israel, ni Aaron, ti inauna a kabsat ni mammadto Moises. Mainayon pay, amin dagiti 12 a tribo ti adda iti dayta a maymaysa a Linteg ti tulag a nangilasin kadakuada manipud amin kadagiti nasnasion a managdaydayaw kadagiti demonio.
13. Aniat’ kinuna ni David maipapan ti panagkaykaysa a tinagiragsak dagiti Israelitas idi ugma?
13 Anian a mamagkaykaysa a bambanag amin dagitoy idi! Sinalimetmetanna ti ili ti Dios kas maysa a nasional nga organisasion a maipaay iti kinatalged ken pakabendisionanda. Kastoy ti panangiladawan ni David iti dayta: “Kitaenyo! Nagimbagen ken anian a nakaay-ayo iti panagtitimpuyog dagiti agkakabsat iti kinamaymaysa! Arig la napateg a lana iti ulo, a nagayus iti iming, wen iti iming ni Aaron, a nagpababa agingga iti baraybay dagiti kawesna. Kas linnaaw sadi Hermon a bumaba kadagiti bantay ti Sion. Ta sadiay inkumit ni Jehova ti bendision, ken biag iti panawen a di nakedngan.”—Salmo 133:1-3.
14. (a) Babaen ti siasino a matultulad ita ti nasional a panagkaykaysa ti Israel? (b) Sadino ti nailadawan a pagtaktakderan dagiti naespirituan nga Israelita, ket ania a “kanta” ti sangsangkamaysa a kankantaenda?
14 Ti nasional a panagkaykaysa a nangtignay iti kasta a naimpusuan a balbalikas ti madama a madobdoble itatta. Babaen iti siasino? Babaen ti “Israel ti Dios,” dagiti naespirituan nga Israelitas a ti maymaysa a kinaina ti impalagip ni Pablo babaen ti panagkunana: “Ngem ti Jerusalem sadi ngato agwayawaya, isu nga inatayo.” (Galacia 6:16; 4:26) Saanna nga inkabil dagiti annakna a napulotan iti espiritu iti sidong iti pannakakayaw iti Linteg ti tulag. Numan pay “ti Israel ti Dios” ket mailadladawan a buklen ti 12 ket dua a tribo, amin dagiti 144,000 a kamkameng dayta ti “naselioanda babaen iti isu met laeng a selio ti Dios a sibibiag,” ket aminda mailadladawan kas agtaktakder iti maymaysa a nailangitan a “Bantay Sion.” (Apocalipsis 7:1-8; 14:1-4) Anian a maysa a grupo ti kumakanta ti buklenda bayat a sangsangkamaysa a kantaenda “ti kanta ni Moises nga adipen ti Dios ken ti kanta ti Kordero,” a ni Jesu-Kristo! (Apocalipsis 15:3, 4; Juan 1:29, 36) Dayta a “kanta” ti mangparagsak iti Dios ken ipamatmat dayta ti panagballigi!
15. (a) Ti 144,000 naorganisarda nga agpaay iti ania malaksid ti panagkanta? (b) Kasano a ti mismo a sao nga “organisasion” ipamatmatna ti panagkaykaysa?
15 Ti 144,000 ken ti Mamangulo kadagiti kumakanta, “ti Kordero,” ti ad-adda nga organisadoda pay ngem iti panangpaaweng laeng kadagiti langlangit kadagiti kankantada. Ti naarian nga organisasionda nga agturay iti sangaribo a tawtawen ket alangonennanto ti sapasap a kinasoberano ni Jehova ken mangbendision kadagiti amin a sangatauan. (Apocalipsis 20:4-6) Ti sao nga “organisasion,” a kasungani ti “disorganisasion,” ket mainaig iti urnos dagiti bambanag a tunggal pasetna naikabilda iti maiparbeng a puestoda ket naikkanda tunggal maysa ti naituding a trabaho tapno aminda sangsangkatunosda nga agandar a mangyeg iti maymaysa a resulta wenno bunga. Gapuna, ti organisasion mangpataud ti panagkaykaysa, panagtutunos, urnos, ken harmonia—saan a rinnisiris.
16. Sigun iti Efeso 4:8, 11-16, ania a kalat ti naipasdek nasurok a 19 a siglo ti napalabasen, ket aniat’ naragpat dagiti Saksi ni Jehova?
16 Ti kalat ti Nakristianuan a panagkaykaysa naikeddengen 19 a siglo ti napalabasen, idi a “dagiti sagsagut iti lallaki” naitedda iti langa dagiti apostol, mammadto, managebanghelio, papastor, ken mannursuro. Idi nangrugi a maipablaak ti Watch Tower idi 1879, nangted met ti Dios kadagiti naespirituan a “papastor ken mannursuro.” Daytoy a sagana ti nangiyeg kadagiti Saksi ni Jehova iti agdama a “panagmaymaysa ti pammati ken ti pannakaammo iti Anak ti Dios.” (Efeso 4:8, 11-16) Anian ti panagyamantayo nga inaramid daytoy ni Jehova kalpasan amin dagiti sangalubongan a narelihiusuan a pannakariribuk ken disorganisasion kadagiti amin a siglo!
17. Kasanotay nga ammo a ti Dios pampanunotenna ti ad-adda pay ngem ti panagkaykaysa dagiti napulotan a Kristiano, ken iti daytoy a banag aniat’ impadto ni Jesus?
17 Nalawag, a pampanunoten ti Dios ti ad-adda pay ngem ti panagkaykaysa dagiti napulotan a Kristiano, ta “pinanggepna kenkuana a maipaay ti pannakaisagana ti pannakatungpal dagiti naituding a panawen, tapno mapagkaykaysa dagiti amin a bambanag ken Kristo, dagiti adda sadi langit ken dagiti met adda iti rabaw ti daga.” (Efeso 1:9, 10) Maipapan iti daytoy, impadto ni Jesus: “Adda met sabsabali a karnerok a saanda a naitipon itoy a pagtaraknan; dagidiay masapul nga iyegko ket denggendanto ti timekko, ket addanto maymaysa nga arban ken maymaysa a pastor.”—Juan 10:16.
18. (a) Asinoda dagiti nairaman iti “bambanag nga . . . adda iti rabaw ti daga” a masapul a maurnong? (b) Idi 1935, kasano a naited ti naisangsangayan nga atension kadagiti “sabsabali a karnero”?
18 Dagitoy a “sabsabali a karnero” nairamanda kadagiti “amin a bambanag nga adda iti rabaw ti daga” a masapul a maurnong. Gapuna, iti sidong ti impluensia ti espiritu ti Dios, agarup 21 años kalpasan ti panangrugi a panagturay ni Jesu-Kristo idi 1914, nangrugi a maited ti naisangsangayan nga atension kadagiti “sabsabali a karnero.” Bayat ti kumbension dagiti Saksi ni Jehova idiay Washington D.C., idi 1935, ti presidente ti Watch Tower Society inlawlawagna a ti “umariwekwek” isuda dagiti “sabsabali a karnero” nga urnongento ti Naimbag a Pastor, ni Jesu-Kristo. (Apocalipsis 7:9-17, KJ) Nangurnong kadi ni Jesus ti aniaman a “sabsabali a karnero” iti dayta a nakapatpateg iti historia a kumbension? Wen, ta 840 a kumbensionista ti nangbigbigen kadagiti bagbagida nga inurnong ti Naimbag a Pastor ket nagbautisarda kas simbolo iti dedikasionda ken Jehova a Dios.
19. (a) Agingga ita, kasano kadakkelen ti nagbalinan ti “umariwekwek”? (b) Babaen ti panagkaykaysa ti makitkita nga organisasion ni Jehova, ti “umariwekwek” ti immay a nakipagkaykaysa iti siasino, ket ania ti adda a determinasionda?
19 Iti dayta a nangrugi laeng ti pannakaurnong ti “umariwekwek” dagiti “sabsabali a karnero,” a ti bilangdan ket nasurok a 2,800,000. Babaen iti pannakipagkaykaysada a kadua ti makitkita a paset ti organisasion ni Jehova—kayatna a sawen, kadua ti natda ti “bassit nga ipastoran” nga adda iti “daytoy a pagtaraknan” ti Naimbag a Pastor—dagitoy ti nakipagkaykaysa met iti Naindaklan a Namarsua iti sapasap nga organisasion. Ken determinadoda a mangtaginayon iti dayta a panagkaykaysa iti intero a biagda nga agnanayon idiay Paraiso a daga nga ipaayto ti Kangatuan a Pastor, ni Jehova, kadakuada.—Lucas 12:32; 23:43.
20. Bayat a pampanunoten ti napulotan a natda ken ti “umariwekwek” no aniat’ naaramidan ti Kangatuan a Pastor nanipud 1914, ania a balbalikas ti nakatignayanda nga aramiden?
20 Bayat a pampanunoten ti napulotan a natda ken ti dumakdakkel a bilang ti “umariwekwek” amin dagiti naaramidan ti Kangatuan a Pastor iti sapasap nanipud pay ti panagpatingga ti Panawen Gentil idi 1914, ti naimpusuan a panagyaman ti nangtignay kadakuada nga agkanta a sangsangkamaysa iti engrande a salmo ti Aleluya: “Idaydayawyo ni Jah, dakayo nga il-ili! Idaydayawyo ti Dios iti santuariona. Idaydayawyo iti tangatang ti pannakabalinna. Idaydayawyo gapu kadagiti mannakabalin a gapuananna. Idaydayawyo kas maiyallubog iti mangnibinibi a kinadakkelna. Idaydayawyo iti aweng ti tangguyob. Idaydayawyo a madanggayan iti salterio ken arpa. Idaydayawyo iti pandereta ken sala. Idaydayawyo kadagiti pagtokaran a kuenirdasan ken pito. Idaydayawyo kadagiti piangpiang a naaweng. Idaydayawyo kadagiti piangpiang a nakalangiking. Amin nga adda angesna idaydayawda koma ni Jah. Idaydayawyo ni Jah, dakayo nga il-ili!”—Salmo 150:1-6.
21. (a) Kaano nga idaydayawto “amin nga adda angesna” ni Jehova? (b) Iti siasino ken iti ania a panggep nga agtrabahonton amin a kamkameng ti sapasap nga organisasion?
21 Iti di mabayagen dagiti agdama a “langlangit” ken ti “daga” marunawdanto iti tengnga “ti gubat ti dakkel nga aldaw ti Dios a Mannakabalin-amin,” ket ti nabayagen nga ur-urayen a “baro a langlangit ken ti baro a daga” ti sititibkerton a maipasdek. (2 Pedro 3:7-13; Apocalipsis 16:14, 16) Ket, iti daytan, “amin nga adda angesna” a makalasat nga agturongen iti daytoy nadalusan a daga idaydayawdanto ni Jah, ti Naindaklan a Namarsua iti sapasap nga organisasion iti kinalinteg. Amin a kameng dayta nga organisasion idiay langit ken ditoy daga ti mangidayawton a sitatan-ok ken ni Jehova ket sisisungdoda ken siayatda a makipagtrabahonto kenkuana a maipaay iti agnanayon a pannakaalangon ti sapasap a kinasoberanona ken ti pannakasantipikar ti napateg unay a naganna. O anian a nagngayed a panagkaykaysa ti ipakita amin daytoy!
Kasano ti Isusungbatyo?
◻ Ania a paspasamak ti nangiturong iti panagbalin ni Satanas nga agturay kadagiti demonio?
◻ Kasano a nakatulong ti pannakaawat iti nagbaetan dagiti dua a dadakkel nga organisasion?
◻ Ti Salmo 122:1-4 agaplikar iti ania a panagkaykaysa ita?
◻ Apay a maikuna a ni Jehova pampanunotenna ti ad-adda pay ngem ti panagkaykaysa dagiti napulotan a pasurot ni Jesus?
◻ Kaano nga “amin nga adda angesna” idaydayawdanto ni Jehova a Dios?
[Ladawan iti panid 17]
Ti ili ni Jehova ti agnanayon nga addaan panagkaykaysa iti maysa ken maysa ken iti Namarsua ti sapasap nga organisasion