Tagtagiragsaken ti Pamilia ni Jehova ti Napateg a Panagkaykaysa
“Kitaenyo! Nagimbagen ken anian a makaay-ayo ti panagtitimpuyog dagiti agkakabsat iti kinamaymaysa!”—SALMO 133:1.
1. Aniat’ kasasaad ti adu a pamilia ita?
ADDA krisis ita ti pamilia. Iti adu a pamilia, agngangabiten dagiti singgalut ti panagasawa. Agbalbalin nga ad-adda a gagangay ti diborsio, ket adu nga annak dagiti agassawa a nagdiborsio ti agsagsagaba iti nakaro a kinaliday. Riniwriw a pamilia ti naliday ken nasinasina. Nupay kasta, adda maysa a pamilia a makaammo iti pudpudno a rag-o ken napudno a panagkaykaysa. Daytat’ sapasap a pamilia ni Jehova a Dios. Iti dayta, linaklaksa a di makita nga anghel ti mangitungtungpal kadagiti naituding a trabahoda maitunos iti pagayatan ti Dios. (Salmo 103:20, 21) Ngem adda kadi pamilia ditoy daga a mangtagtagiragsak iti kasta a panagkaykaysa?
2, 3. (a) Asino ita ti paset ti sapasap a pamilia ti Dios, ken iti aniat’ mabalin a pangyaspingantayo iti amin a Saksi ni Jehova ita? (b) Ania dagiti saludsod a salaysayentayo?
2 Insurat ni apostol Pablo: “Agparintumengak iti Ama, isu a nakautangan ti tunggal pamilia idiay langit ken iti daga ti naganna.” (Efeso 3:14, 15) Iti Dios ti nakautangan ti tunggal pamilia ditoy daga iti naganna gapu ta isut’ Namarsua. Nupay awan dagiti natauan a pamilia idiay langit, iti piguratibo a panagsao nayasawa ti Dios iti nailangitan nga organisasionna, ken maaddaanto ni Jesus iti naespirituan a nobia a maikaykaysa kenkuana idiay langit. (Isaias 54:5; Lucas 20:34, 35; 1 Corinto 15:50; 2 Corinto 11:2) Paset itan ti sapasap a pamilia ti Dios dagiti matalek a napulotan ditoy daga, ken dagiti “sabsabali a karnero” ni Jesus, nga addaan naindagaan a namnama, isuda ti manamnama a kamengna. (Juan 10:16; Roma 8:14-17; Ti Pagwanawanan, Enero 15, 1996, panid 31) Nupay kasta, amin a Saksi ni Jehova ita mayaspingda iti nagkaykaysa a pamilia iti sangalubongan.
3 Pasetnakayo kadi ti nakaskasdaaw nga internasional a pamilia dagiti adipen ti Dios? No pasetnakayo, tagtagiragsakenyo ti maysa kadagiti naindaklan a bendision a magun-od ti asinoman. Riniwriw ti mangpaneknek a ti sangalubongan a pamilia ni Jehova—ti makitkita nga organisasionna—ket maysa a nadam-eg a lugar ti talna ken panagkaykaysa iti nailubongan a disierto ti riribuk ken pannakasinasina. Kasanot’ mabalin a pannakailadawan ti panagkaykaysa ti sangalubongan a pamilia ni Jehova? Ken ania dagiti banag a mangitantandudo iti kasta a panagkaykaysa?
Nagimbagen ken Anian a Makaay-ayo!
4. Iti bukodyo a sasao, kasanoyo nga iyebkas ti kuna ti Salmo 133 maipapan iti nainkabsatan a panagkaykaysa?
4 Inapresiar unay ni salmista David ti nainkabsatan a panagkaykaysa. Napaltiingan pay ketdi a mangikanta iti dayta! Iladawanyo isuna agraman ti arpana bayat a kankantaenna: “Kitaenyo! Nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa! Arig la napateg a lana iti ulo, a nagayus iti iming, wen iti iming ni Aaron, a nagpababa agingga iti baraybay dagiti kawesna. Kas linnaaw sadi Hermon a bumaba kadagiti bantay ti Sion. Ta sadiay inkumit ni Jehova ti bendision, ken biag iti agnanayon.”—Salmo 133:1-3.
5. Maibatay iti Salmo 133:1, 2, ania a panamagdilig ti mabalin nga aramiden iti nagbaetan dagiti Israelita ken dagiti adipen ti Dios iti agdama a panawen?
5 Nagaplikar dagita a sasao iti nainkabsatan a panagkaykaysa a tinagiragsak ti nagkauna nga ili ti Dios, dagiti Israelita. Idi addada sadi Jerusalem maipaay iti tallo a tinawen a piestada, talaga a nagtitimpuyogda a sangsangkamaysa. Nupay naggapuda iti nadumaduma a tribu, maymaysada a pamilia. Adda nasayaat nga epektona kadakuada ti panagtitimpuyogda, a kas iti mangpabang-ar a pangpulót a lana a makaay-ayo ti sayamusomna. Idi naibukbok iti ulo ni Aaron ti kasta a lana, nagayus dayta iti imingna agingga iti baraybay ti kawesna. Kadagiti Israelita, ti panagtitimpuyogda naaddaan iti nasayaat nga impluensia a nangapektar a sangsangkamaysa kadagiti naguummong a tattao. Narisut dagiti di panagkikinnaawatan, ken naitandudo ti panagkaykaysa. Adda met kasta a panagkaykaysa iti sangalubongan a pamilia ni Jehova ita. Adda nasayaat a naespirituan nga epekto kadagiti miembrona ti regular a pannakitimpuyog. Maikkat dagiti aniaman a di pagkikinnaawatan wenno parikut no mayaplikar ti balakad ti Sao ti Dios. (Mateo 5:23, 24; 18:15-17) Apresiaren unay dagiti tattao ni Jehova ti panagpipinnaregta a bunga ti nainkabsatan a panagkaykaysada.
6, 7. Kasano a ti panagkaykaysa iti Israel mayasping iti linnaaw ti Bantay Hermon, ket sadinot’ pakasarakan ita iti bendision ti Dios?
6 Kasano a ti panagtitimpuyog ti Israel iti panagkaykaysa umasping met iti linnaaw ti Bantay Hermon? Bueno, tangay ti pantok daytoy a bantay ket nasurok a 2,800 metro ti kangatona manipud iti patas ti baybay, gistay intero a makatawen a naabbungotan dayta iti niebe. Ti niebe iti pantok ti Hermon ti makagapu iti pannakabukel dagiti alibungubong iti rabii ket iti kasta mamataud iti nawadwad a linnaaw a mangpalangto iti mulmula kabayatan ti nawatiwat a tikag. Ti pul-oy ti nalamiis nga angin manipud iti kabambantayan ti Hermon maiyegna ti kakasta nga alibungubong agingga iti ungto nga abagatan kas ti lawa ti Jerusalem, a sadiay agbalin dagitoy kas linnaaw. Gapuna siuumiso a naikuna ti salmista ti maipapan ‘iti linnaaw sadi Hermon a bumaba iti Bantay Sion.’ Anian a nagsayaat a pammalagip iti makapabang-ar nga impluensia a mangitandudo iti panagkaykaysa ti pamilia dagiti managdaydayaw ken Jehova!
7 Sakbay a naipasdek ti kongregasion Kristiano, ti Sion, wenno Jerusalem, isut’ sentro idi ti pudno a panagdaydayaw. Gapuna, sadiay nga imbilin ti Dios a maiyeg ti pamendision. Tangay ti Gubuayan amin a bendision ket piguratibo a nagtalinaed iti santuario idiay Jerusalem, sadiay nga agtaud dagiti bendision. Nupay kasta, gapu ta ti pudno a panagdayaw saanen nga agpannuray iti maysa a lugar, ti bendision, ayat, ken panagkaykaysa dagiti adipen ti Dios ti masarakan ita iti intero a daga. (Juan 13:34, 35) Ania ti sumagmamano a makagapu iti daytoy a panagkaykaysa?
Dagiti Banag a Mangyeg iti Panagkaykaysa
8. Aniat’ maadaltayo maipapan iti panagkaykaysa a nadakamat iti Juan 17:20, 21?
8 Naibatay ti panagkaykaysa dagiti managdaydayaw ken Jehova iti panagtulnog iti Sao ti Dios a natarusanen a siuumiso, a pakairamanan dagiti pannursuro ni Jesu-Kristo. Iti panangibaon ni Jehova iti Anakna ditoy lubong tapno mangpaneknek iti kinapudno ken matay iti sakripisio nga ipapatay, naluktan ti ruangan maipaay iti pannakaipasdek ti nagkaykaysa a kongregasion Kristiano. (Juan 3:16; 18:37) Nagbalin a nabatad nga addanto napudno a panagkaykaysa kadagiti kamengna idi inkararag ni Jesus: “Agkiddawak, saan a maipapan laeng kadagitoy, no di ket maipapan met kadagidiay addaan iti pammati kaniak babaen iti saoda; tapno maymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata, tapno ti lubong patienna koma a sika imbaonnak.” (Juan 17:20, 21) Nagun-odan dagiti pasurot ni Jesus ti umasping a panagkaykaysa nga adda iti nagbaetan ti Dios ken ti Anakna. Napasamak daytoy gapu ta nagtulnogda iti Sao ti Dios ken kadagiti sursuro ni Jesus. Ti kasta a kababalin isut’ maysa a kangrunaan a makagapu iti panagkaykaysa ti sangalubongan a pamilia ni Jehova ita.
9. Aniat’ akem ti nasantuan nga espiritu iti panagkaykaysa ti ili ni Jehova?
9 Ti maysa pay a banag a mamagkaykaysa iti ili ni Jehova isut’ kaadda kadatayo ti nasantuan nga espiritu, wenno aktibo a puersa ti Dios. Tulongannatayo a mangtarus iti naipalgak a kinapudno ti Sao ni Jehova ket iti kasta makapagserbitayo kenkuana a sangsangkamaysa. (Juan 16:12, 13) Tulongannatayo ti espiritu a mangliklik iti kakasta a mamagsisina nga aramid ti lasag kas ti ringgor, imon, dagiti irarasuk ti unget, ken rinnupir. Imbes ketdi, tignayennatayo ti espiritu ti Dios a mangpataud kadagiti mamagkaykaysa a bunga ti ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, ken panagteppel.—Galacia 5:19-23.
10. (a) Ania a panamagdilig ti mabalin nga aramiden iti nagbaetan ti ayat nga adda iti nagkaykaysa a natauan a pamilia ken iti ayat a makita kadagidiay nasungdo ken Jehova? (b) Kasanot’ panangyebkas ti maysa a kameng ti Bagi a Manarawidwid iti kaririknana maipapan iti pannakitaripnong kadagiti naespirituan a kakabsatna?
10 Agiinnayat dagiti kameng ti nagkaykaysa a pamilia ken naragsakda nga agtitimpuyog. Umasping iti dayta, dagidiay karaman iti nagkaykaysa a pamilia dagiti managdaydayaw ken Jehova ay-ayatenda isuna, ti Anakna, ken dagiti kapammatianda. (Marcos 12:30; Juan 21:15-17; 1 Juan 4:21) Kas iti naayat a natauan a pamilia a mangtagtagiragsak iti pannangan a sangsangkamaysa, dagidiay nasungdo iti Dios maragsakanda a presente kadagiti Nakristianuan a gimong, asamblea, ken kombension tapno magunggonaan iti naimbag a panagtitimpuyog ken nasayaat a naespirituan a taraon. (Mateo 24:45-47; Hebreo 10:24, 25) Kinuna naminsan ti kameng ti Bagi a Manarawidwid dagiti Saksi ni Jehova maipanggep iti daytoy a banag: “No kaniak, ti pannakitimpuyog kadagiti kakabsat ket maysa kadagiti kadakkelan a ragsak iti biag ken gubuayan ti pammaregta. Pagay-ayatko ti mairaman kadagidiay umuna a dumteng iti Kingdom Hall, ken maudi a pumanaw, aginggat’ mabalbalin. Maragragsakanak no makisarsaritaak kadagiti tattao ti Dios. No kalanglangenko ida kasla addaak iti bukodko a pagtaengan a kaduak ti pamiliak.” Kasta kadi ti panagriknayo?—Salmo 27:4.
11. Iti ania a trabaho a nangnangruna a pagragsakan dagiti Saksi ni Jehova, ken ania dagiti bunga ti panangipamaysa iti panagbiagtayo ti panagserbi iti Dios?
11 Maragsakan ti nagkaykaysa a pamilia a mangaramid kadagiti banag a sangsangkamaysa. Umasping iti dayta, dagidiay karaman iti pamilia dagiti managdaydayaw ken Jehova agrag-oda iti nagkaykaysa a panangaramidda iti trabahoda a panangikasaba iti Pagarian ken panagaramid iti adalan. (Mateo 24:14; 28:19, 20) Ti regular a pannakipaset iti dayta pagbalinennatay a nasingsinged kadagiti sabsabali a Saksi ni Jehova. Maparang-ay met ti espiritu ti pamilia no ipamaysatay iti panagbiagtayo ti panagserbitayo iti Dios ken suportarantayo amin nga aramid ti ilina.
Napateg ti Nateokratikuan nga Urnos
12. Ania dagiti pakailasinan ti naragsak ken nagkaykaysa a pamilia, ken ania nga urnos ti nangyeg iti panagkaykaysa kadagiti kongregasion Kristiano idi umuna a siglo?
12 Manamnama nga agkaykaysa ken naragsak ti maysa a pamilia nga addaan natibker ngem naayat a panangidaulo ken naurnos. (Efeso 5:22, 33; 6:1) Ni Jehova ket maysa a Dios ti natalna nga urnos, ket amin a karaman iti pamiliana ibilangda kas “ti Kangatuan.” (Daniel 7:18, 22, 25, 27; 1 Corinto 14:33) Bigbigenda met a dinutokanna ti Anakna, ni Jesu-Kristo, nga agtawid iti amin a banag ken intedna kenkuana amin nga autoridad idiay langit ken ditoy daga. (Mateo 28:18; Hebreo 1:1, 2) Tangay ni Kristo ti Ulo dayta, ti kongregasion Kristiano ket naurnos, nagkaykaysa nga organisasion. (Efeso 5:23) Tapno maiwanwan ti ar-aramid dagiti kongregasion idi umuna a siglo, adda bagi a manarawidwid a buklen dagiti apostol ken dadduma pay a “lallakay” a nataengan iti naespirituan. Tunggal kongregasion addaan kadagiti nadutokan a manangaywan, wenno papanglakayen, ken ministerial nga ad-adipen. (Aramid 15:6; Filipos 1:1) Nangyeg iti panagkaykaysa ti panagtulnog kadagidiay mangidadaulo.—Hebreo 13:17.
13. Kasano a tignayen ni Jehova dagiti tattao, ket aniat’ ibunga daytoy?
13 Ngem amin kadi daytoy nga alagaden ipaspasimudaagna a ti panagkaykaysa dagiti managdaydayaw ken Jehova ket maigapu iti nainget, awan pakainaiganna a panangidaulo? Sigurado a saan! Awan aniaman a banag a di kinamanagayat iti Dios wenno iti organisasionna. Tignayen ni Jehova dagiti tattao babaen ti panangipakita iti ayat, ket ginasut a ribu tunggal tawen ti situtulok ken sirarag-o nga agbalin a paset ti organisasion ni Jehova babaen ti panagpabautisar kas simbolo ti naimpusuan a panagdedikarda iti Dios. Umasping ti espirituda ken ni Josue, a nangidagadag kadagiti padana nga Israelita: “Agpilikayo ita nga aldaw no siasino ti pagserbianyonto . . . Ngem siak ken ti balayko, agserbikamto ken Jehova.”—Josue 24:15.
14. Apay a maikunatayo a teokratiko ti organisasion ni Jehova?
14 Kas paset ti pamilia ni Jehova, saantay laeng a naragsak no di ket natalgedtay met. Kasta nga agpayso gapu ta teokratiko ti organisasionna. Ti Pagarian ti Dios ket maysa a teokrasia (manipud iti Griego a the·osʹ, dios, ken kraʹtos, maysa a turay). Turay ti Dios dayta, nga inordenan ken impasdekna. Ti “nasantuan a nasion” a pinulotán ni Jehova agpasakup iti panangiturayna ket iti kasta teokratiko met. (1 Pedro 2:9) Gapu ta ti Naindaklan a Teokrata, ni Jehova, kas Ukomtayo, Mangmangted iti Linteg, ken Ari, addaantay iti amin a panggapuan tapno makarikna iti talged. (Isaias 33:22) Ngem, kasano no adda tumanor a panagsusupiat ket pagpeggadenna ti rag-o, talged, ken panagkaykaysatayo?
Agtignay ti Bagi a Manarawidwid
15, 16. Ania a supiat ti timmanor idi umuna a siglo, ken apay?
15 Tapno mataginayon ti panagkaykaysa ti pamilia, sagpaminsan mabalin a kasapulan a risuten ti panagsusupiat. Ipapantayon nga, idi, maysa a naespirituan a parikut ti kasapulan a marisut tapno mataginayon ti panagkaykaysa ti pamilia dagiti managdaydayaw iti Dios idi umuna a siglo K.P. Ania ngaruden? Nagtignay ti bagi a manarawidwid, a nangeddengda kadagiti naespirituan a bambanag. Adda Nainkasuratan a rekordtayo iti kasta a panagtignay.
16 Idi agarup 49 K. P., naguummong ti bagi a manarawidwid idiay Jerusalem tapno risutenda ti nakaro a parikut ket iti kasta mataginayon ti panagkaykaysa ti “sangakabbalayan ti Dios.” (Efeso 2:19) Agarup 13 a tawen sakbayna, kinasabaan ni apostol Pedro ni Cornelio, ket dagiti immuna a Gentil, wenno tattao dagiti nasion, nagbalinda a nabautisaran a manamati. (Aramid, kapitulo 10) Kabayatan ti immuna a panagdaliasat ni Pablo kas misionero, adu a Gentil ti nangabrasa iti Kinakristiano. (Aramid 13:1–14:28) Kinapudnona, maysa a kongregasion dagiti Kristiano a Gentil ti naipasdeken idiay Antioquia, Siria. Namati ti sumagmamano a Kristiano a Judio a dagiti nakomberte a Gentil rumbeng nga agpakugit ken tungpalenda ti Linteg Mosaiko, ngem simmupiat dagiti dadduma. (Aramid 15:1-5) Daytoy a supiat nangiturong koma iti naan-anay a pannakasinasina, a pakabuklan pay iti agsina a kongregasion ti Judio ken Gentil. Dagus ngarud a nagtignay ti bagi a manarawidwid tapno mataginayon ti Nakristianuan a panagkaykaysa.
17. Ania a natunos a nateokratikuan a wagas ti nailadawan iti Aramid kapitulo 15?
17 Sigun iti Aramid 15:6-22, “dagiti apostol ken dagiti lallakay naguurnongda a sangsangkamaysa tapno tamingenda daytoy a banag.” Adda met idi a presente dagiti dadduma, a pakairamanan dagiti delegado manipud Antioquia. Inlawlawag nga immuna ni Pedro a ‘babaen ti ngiwatna dagiti tattao iti nasnasion nangngegda ti naimbag a damag ket namatida.’ Iti kasta “ti intero nga umariwekwek” nagimdeng bayat nga insalaysay da Bernabe ken Pablo “dagiti adu a pagilasinan ken tanda nga inaramid ti Dios babaen kadakuada iti nagtetengngaan dagiti nasion,” wenno dagiti Gentil. Simmaganad insingasing ni Santiago no kasano a marisut ti parikut. Kalpasan a nangeddeng ti bagi a manarawidwid, naibaga kadatayo: “Dagiti apostol ken dagiti lallakay agraman ti intero a kongregasion inanamonganda a maibaon idiay Antioquia dagiti napili a lallaki manipud kadakuada a kumuyogda kada Pablo ken Bernabe.” Dagidiay “napili a lallaki”—da Judas ken Silas—inawitda ti makaparegta a surat kadagiti pada a manamati.
18. Ania a pangngeddeng ti inaramid ti bagi a manarawidwid maipanggep iti Linteg Mosaiko, ken kasano a nakaapektar daytoy kadagiti Kristiano a Judio ken Gentil?
18 Ti surat a mangipakpakaammo iti pangngeddeng ti bagi a manarawidwid nangrugi kadagiti sasao: “Dagiti apostol ken dagiti lallakay, kakabsat, kadagidiay kakabsat idiay Antioquia ken Siria ken Cilicia a naggapu kadagiti nasion: Dagiti kablaaw!” Adda sabsabali pay a timmabuno iti daytoy a nakallalagip a gimong, ngem nalawag a ti bagi a manarawidwid buklen dagiti “apostol ken lallakay.” Inwanwan ida ti espiritu ti Dios, ta kuna ti surat: “Ti nasantuan nga espiritu ken dakami met laeng inanamonganmi ti di manginayon iti kanayonan a dadagsen kadakayo, malaksid kadagitoy nasken a bambanag, nga itultuloyyo ti umadayo kadagiti bambanag a naisakripisio kadagiti didiosen ken iti dara ken kadagiti bambanag a nabekkel ken iti pannakiabig.” (Aramid 15:23-29) Saan a nakalikaguman a makugit dagiti Kristiano ken agtungpal iti Linteg Mosaiko. Timmulong daytoy a pangngeddeng kadagiti Kristiano a Judio ken Gentil tapno agtignay ken agsaoda buyogen ti panagkaykaysa. Nagrag-o dagiti kongregasion, ket nagtultuloy ti napateg a panagkaykaysa, a kas iti maar-aramid ita iti pamilia ti Dios iti intero a daga iti sidong ti naespirituan a panangiwanwan ti Bagi a Manarawidwid dagiti Saksi ni Jehova.—Aramid 15:30-35.
Agserbi iti Nateokratikuan a Panagkaykaysa
19. Apay a naparayray ti panagkaykaysa iti pamilia dagiti managdaydayaw ken Jehova?
19 Rumayray ti panagkaykaysa no agtitinnulong dagiti kameng ti pamilia. Pudno met dayta iti pamilia dagiti managdaydayaw ken Jehova. Gapu ta teokratiko, dagiti panglakayen ken dadduma pay iti kongregasion idi umuna a siglo nagserbida iti Dios buyogen ti naan-anay a pannakitinnulong iti bagi a manarawidwid ken inawatda dagiti pangngeddengna. Iti tulong ti bagi a manarawidwid, ‘inkasaba [dagiti panglakayen] ti sao’ ket dagiti kameng ti kongregasion iti pakabuklan ‘nagsaoda a sangsangkatunos.’ (2 Timoteo 4:1, 2; 1 Corinto 1:10) Gapuna kakasta met laeng a Nainkasuratan a kinapudno ti naidatag iti ministerio ken kadagiti Nakristianuan a gimong, idiay man Jerusalem, Antioquia, Roma, Corinto, wenno iti sadinoman. Adda ita ti kasta met laeng a nateokratikuan a panagkaykaysa.
20. Tapno mataginayon ti Nakristianuan a panagkaykaysatayo, aniat’ masapul nga aramidentayo?
20 Tapno mataginayon ti panagkaykaysatayo, amintayo a paset ti sangalubongan a pamilia ni Jehova masapul nga agregget a mangipakita iti nateokratikuan nga ayat. (1 Juan 4:16) Kasapulan nga agpasakuptayo iti pagayatan ti Dios ken ipakitatay ti napasnek a panagraem iti ‘matalek nga adipen’ ken iti Bagi a Manarawidwid. Kas iti panagdedikartayo iti Dios, ti panagtulnogtayo, siempre, ket situtulok ken sirarag-o. (1 Juan 5:3) Anian a maitutop unay a pinagnaig ti salmista ti rag-o ken panagtulnog! Inkantana: “Idaydayawyo ni Jehova! Nagasat ti tao nga agbuteng ken Jehova a maragsakan unay kadagiti bilbilinna.”—Salmo 112:1.
21. Kasanotayo a maipaneknek a teokratikotayo?
21 Ni Jesus, ti Ulo ti kongregasion, ket naan-anay a teokratiko ken kanayon nga ar-aramidenna ti pagayatan ni Amana. (Juan 5:30) Gapuna, surotentayo ti Pagulidanantayo babaen ti nateokratikuan ken nagkaykaysa a panangaramid iti pagayatan ni Jehova buyogen ti naan-anay a pannakitinnulong iti organisasionna. Iti kasta maiyallungogantayo ti kanta ti salmista buyogen ti naimpusuan a rag-o ken panagyaman: “Kitaenyo! Nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa!”
Kasanoyo a Sungbatan?
◻ Kasano a ti Nakristianuan a panagkaykaysatayo mainaig iti Salmo 133?
◻ Ania ti sumagmamano a banag a mangyeg iti panagkaykaysa?
◻ Apay a napateg ti nateokratikuan nga urnos iti panagkaykaysa ti ili ti Dios?
◻ Kasano a nagtignay ti bagi a manarawidwid idi umuna a siglo tapno mataginayon ti panagkaykaysa?
◻ Aniat’ kaipapanan ti panagserbi iti nateokratikuan a panagkaykaysa kadakayo?
[Ladawan iti panid 13]
Nagtignay ti bagi a manarawidwid tapno mataginayon ti panagkaykaysa