Report dagiti Manangiwaragawag ti Pagarian
Ti Panangiwanwan dagiti Anghel iti Ministeriotayo
MASANSAN nga ipakpakita dagiti kapadasan a ti Nakristianuan a ministerio ti addaan panangiturong dagiti anghel. (Apocalipsis 14:6, 7) Saan kadi a maysa nga anghel ti nangiturong ken Felipe iti maysa a napasnek nga Etiope nga eunuko a kayatna a matarusan ti Biblia? (Aramid 8:26, 27) Ket idi a daydi nalinteg panagpuspusona a Gentil a ni Cornelio napasnek a nagkararag iti Dios a maipaay iti tulong, saan kadi a maysa nga anghel ti naibaon a mangtulong kenkuana? (Aramid 10:3-33) Ti sumaganad a kapadasan manipud Denver, Colorado, E.U.A., tulongannatayo a mangapresiar a ti ministeriotayo itatta ti addaan met panangiturong dagiti anghel bayat a sapsapulentayo dagidiay napasnek panagpuspusona.
◻ Iti ministerioda a panagbalaybalay, dua kadagiti Saksi ni Jehova ti nagkunaan ti maysa a babai a bumalay nga isut’ okupado. Ti maysa kadagiti Saksi nagimtuod kenkuana no pinampanunotnan no mabalinna ti makisao iti maysa a natay? Dagiti Saksi naawisda nga umuneg ket nabasa dagiti kasuratan maipapan ti makagapu iti ipapatay, ti kasasaad dagiti natay, ken ti namnama ti panagungar. (Eclesiastes 9:5, 10; Juan 5:28, 29) Ti babai ket interesado ket maysa a panagadal ti Biblia ti maiyurnos. Kalpasan ti tallo a bulan a panagad-adal insaludsodna no dagiti Saksi iti masanguanan mabalinda ti umay iti alas 4:30 iti malem a maipaay iti panagadal. Daytoy inanamonganda.
Iti sumaganad a lawas ti babai ken ni lakayna ti agur-uray kadagiti Saksi ta tarigagayan ti asawa a lalaki a maammuan no aniat’ ad-adalen ti asawana. Adut’ salsaludsod ti lalaki, a maysa kadakuada isu daytoy: “Asino ti antikristo ken ti tao ti kinadakes?” Daytoy a saludsod ti nasungbatan dagiti Saksi iti makapnek unay manipud iti Biblia, ket kalpasanna inkalikagumna a maaddaan ti innem pay a kopia iti libro a Ti Kinapudno a Mangiturong iti Biag nga Awan Inggana, nga impablaak dagiti Saksi ni Jehova.
Iti sumaganad a lawas ti lalaki ken ti asawana, agraman innem nga annakda, ti presente a maipaay iti panagadal. Dagiti annak nagsayaat ti pannakasanayda ken natulnogda. Di nagbayag aminda nangrugidan a tumabuno iti panaggigimong dagiti Saksi ni Jehova idiay Kingdom Hall.
Ti lalaki ti nangidawat kadagiti Saksi a sarungkaranda koma ti naasawaanen nga anakna a babai ken ti lakayna ken kasta met ti ikitna ken ti anakna a babai. Naaramid daytoy ket naiyurnos dagiti panagadal iti Biblia agpada kadagiti dua a pamilia.
Kalpasan ti makatawen a panagadal iti Biblia, daytoy a lalaki, ti asawana, ken dagiti dua nga annakna a babbai a tin-edyer indawatdan a mabautisaranda a kas simbolo ti dedikasionda ken Jehova. Iti dayta naammuanda a daytoy a lalaki ket dati a ministro ti Metodista. Ngem kalpasan ti dua a bulan a panagad-adal ti Biblia a kadua dagiti Saksi, isu ken ti pamiliana pinanawandan ti iglesiada. Naammuan met nga idi umuna a panagsarungkarda, implano ti asawa a babai a kettelenen ti biagna ket nagkararag iti Dios nga aywananna koma ti pamiliana kalpasan dayta.
Manipud iti daydiay damo a panagsarungkar, sangapulo a tattaon ti nangawat iti kinapudno. Ti lalaki ket maysa itan a panglakayen, maysa kadagiti annakna a babbai ti payunir, ket ti manugangna a lalaki ti maysan a ministerial nga adipen.
Nalawag nga addaan panangiturong dagiti anghel iti ministerio dagidiay dua a Saksi. Itan dagiti sangapulo a tattao a natulongan iti pannakaammo iti kinapudno siraragsakdan nga agserserbi ken Jehova, a siwayawaya manipud iti panangibalud ti ulbod a relihion.