Dagiti Kadi Saksi ni Jehova Dadaelenda ti Relasion ti Agassawa?
“NO TI maysa nga asawa baliwanna ti relihionna, madadael ti relasionda nga agassawa.” Kasta ti kuna ti adu a tattao. No dadduma, daytoy ti ipakdaarda iti asawa a mangikeddeng nga agbalin a Saksi ni Jehova. Ngem kanayon kadi a pudno dayta a pagarup?
Natural laeng a no ti maysa nga asawa ket aginteres iti relihion wenno baliwanna ti nabayagen a patpatienna, narigat nga akseptaren dayta ti asawana. Mabalin a madanagan, maupay, ken agsakit pay ketdi ti nakemna.
Masansan a ti asawa a babai ti umun-una a makarikna a kasapulanna a balbaliwan ti relihionna. No ni baketmo ket makipagad-adal iti Biblia kadagiti Saksi ni Jehova, ania ti mabalin nga epektona iti relasionyo kas agassawa? No maysaka nga asawa a babai a makitimtimpuyog kadagiti Saksi ni Jehova, ania ti mabalinmo nga aramiden tapno makissayan ti panagdanag ni lakaymo?
Ti Komento ti Maysa nga Asawa a Lalaki
Ni Mark, a taga-Australia, ket naasawaanen iti 12 a tawen idi rinugian ni baketna ti makipagadal iti Biblia kadagiti Saksi ni Jehova. “Naragsak ti biagmi nga agassawa ken addaanak iti makapnek unay a trabaho,” kuna ni Mark. “Nagsayaat idi ti biagmi. Pagammuan, inkeddeng ni baketko ti makipagadal iti Biblia kadagiti Saksi ni Jehova. Iti panagriknak, kasla agbaliwen ti panagbiagko. Idi damo, madanaganak iti panaginteres ni baketko iti Biblia. Ngem ad-adda a nariribukanak idi imbagana nga agpabautisaren kas maysa a Saksi ni Jehova.”
Nadanagan ni Mark di la ket ta ti baro a relihion ni baketna ti pakaigapuan ti panagsinada. Napanunotna a pasardengennan nga agadal iti Biblia ken paritannan a makitimpuyog kadagiti Saksi. Ngem imbes a sidadarasudos a nagtignay, pinalabasna pay ti sumagmamano a tiempo. Ania ti nagbanagan ti relasionda?
“Makaparagsak ta natibtibker itan ti relasionmi,” kuna ni Mark. “Nagtultuloy a simmayaat dayta sipud idi nabautisaran ni baketko kas maysa a Saksi ni Jehova 15 a tawenen ti napalabas.” Ania ti nakatulong tapno agballigi ti panagasawada? “No lagipek ti napalabas,” kuna ni Mark, “dakkel ti naaramidan ti panangyaplikar ni baketko kadagiti nagsayaat a balakad a masarakan iti Biblia. Kanayon a raemennak.”
Balakad Dagiti Nagballigi nga Assawa a Babbai
No maysaka nga asawa a babai a makitimtimpuyog kadagiti Saksi ni Jehova, ania ti mabalinmo nga aramiden ken ibaga tapno makissayan ti panagdanag ni lakaymo? Usigem ti komento dagitoy nga assawa a babbai manipud iti nagduduma a paset ti lubong.
Sakiko, Japan: “Naasawaanakon iti 31 a tawen ken addaanak iti tallo nga annak. Adda 22 a tawenkon kas Saksi ni Jehova. No dadduma, nagrigat ti makikabbalay iti asawa a di kapammatian. Ngem ikarkarigatak nga iyaplikar ti balakad ti Biblia nga agbalin a ‘nasiglat no iti panagdengngeg, nainayad no iti panagsao, nabannayat no iti panagpungtot.’ (Santiago 1:19) Ikagkagumaak ti agbalin a nasingpet kenni lakayko ken agtungpal iti kayatna no la ket ta saan a maisalungasing kadagiti prinsipio ti Biblia. Daytoy ti namagballigi iti panagasawami.”
Nadezhda, Russia: “Naasawaanakon iti 28 a tawen ken bautisadoakon a Saksi iti 16 a tawen. Idi saanak pay a nagadal iti Biblia, diak ibilang ni lakayko kas ulo ti pamiliami. Kaykayatko ti agdesision a bukbukodko. Nupay kasta, in-inut a natarusak a ti panangyaplikarko kadagiti prinsipio ti Biblia ket mangted iti talna ken kinaragsak iti pamiliami. (1 Corinto 11:3) In-inut a nasursurok ti agpasakup, ket nadlaw ni lakayko dagitoy a panagbalbaliwko.”
Marli, Brazil: “Dua ti annakko ken naasawaanakon iti 21 a tawen. Adda 16 a tawenkon a Saksi. Naadalko a pagayatan ni Jehova a Dios a saan koma nga agsina ti agassawa. Isu nga ikagkagumaak ti agbalin a naimbag nga asawa, nga agsao ken agtignay iti wagas a makaay-ayo kenni Jehova ken iti asawak.”
Larisa, Russia: “Idi nagbalinak a Saksi ni Jehova agarup 19 a tawenen ti napalabas, naamirisko a ti kapatgan a banag isu ti panangbalbaliwko iti biagko. Nakita ni lakayko no kasano a nakatulong ti Biblia tapno agbalinak a nasaysayaat nga asawa ken ad-adda pay a mangipateg kenkuana. Idi damo, agduma ti pamay-an ti panangisuromi kadagiti annakmi, ngem narisutmi dayta. Impalubos ni lakayko nga ikuyogko dagiti annakmi kadagiti narelihiosuan a gimong a tabtabunuak gapu ta bigbigenna a pagimbaganda ti maad-adalda sadiay.”
Valquíria, Brazil: “Adda maysa nga anakko ken naasawaanakon iti 19 a tawen. Nagbalinak a Saksi ni Jehova 13 a tawenen ti napalabas. Idi damo, saan a kayat ni lakayko a makiramanak iti trabaho a panangasaba. Nasursurok a siaalumamay nga ilawlawag kenkuana dagiti pagam-amkanna ken no kasano a nagbalinak a nasaysayaat nga asawa gapu iti Biblia. In-inut a naawatan ni lakayko no kasano kapateg kaniak ti pannakiraman iti trabaho a panangasaba. Ita, naan-anay a supsuportarannak kadagiti naespirituan nga aktibidadko. No mapanak mangyadal iti Biblia iti away, itulodnak pay babaen iti kotsena ket siaanus nga aguray agingga a malpas ti panangyadalko.”
Mangyeg iti Gunggona
No ti asawam ket makitimtimpuyog kadagiti Saksi ni Jehova, awan ti rumbeng a pagdanagam. Saan a madadael ti relasionyo nga agassawa. Kas napaneknekan ti adu nga assawa a lallaki ken babbai iti intero a lubong, ti Biblia ket mangyeg iti gunggona iti panagasawa.
Sipupudno nga inamin ti maysa nga asawa a lalaki a saan a Saksi ni Jehova: “Idi damo, nariribukanak gapu ta nagbalin ni baketko a Saksi ni Jehova. Ngem ita, napaneknekak a pagimbaganmi gayam dayta a pangngeddengna.” Kuna ti sabali pay a lalaki maipapan ken baketna: “Ti kinamatalek, determinasion, ken kinatarnaw ni baketko ti nangpatanor kaniak iti dakkel a panagraem kadagiti Saksi ni Jehova. Nagunggonaan unay ti panagasawami gapu iti narelihiosuan a patpatienna. Nagbalinkami a mannakaawat iti maysa ken maysa ken imbilangmi ti panagasawami kas tungpal biag a panagkadua.”
[Kahon/Ladawan iti panid 13]
Ania ti Panangmatmat Dagiti Saksi ni Jehova iti Panagasawa?
Dagiti Saksi ni Jehova bigbigenda ti Biblia kas naipaltiing a Sao ti Dios. Gapuna, ipapusoda ti ibagbagana maipapan iti panagasawa. Imutektekanyo no ania ti kuna ti Biblia kas sungbat kadagiti sumaganad a saludsod:
▪ Dagiti kadi Saksi ni Jehova iparegtada kadagiti miembroda nga isinada ti asawada a saan a Saksi? Saan. Insurat ni apostol Pablo: “No ti asinoman a kabsat a lalaki addaan iti di mamati nga asawa, ket kaskasdi isu umanamong a makipagnaed kenkuana, saanna koma a panawan; ket ti maysa a babai nga addaan iti di mamati nga asawa, ket kaskasdi isu umanamong a makipagnaed kenkuana, saanna koma a panawan ti asawana a lalaki.” (1 Corinto 7:12, 13) Tungtungpalen dagiti Saksi ni Jehova daytoy a bilin.
▪ Maidagadag kadi iti asawa a babai a Saksi ni Jehova a salungasingenna dagiti kiddaw ni lakayna no nagdumada iti pammati? Saan. Insurat ni apostol Pedro: “Dakayo nga assawa a babbai, agpasakupkayo kadagiti bukodyo nga assawa, tapno iti kasta, no ti asinoman saan a natulnog iti sao, mabalin a magun-od ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo agraman ti nauneg a panagraem.”—1 Pedro 3:1, 2.
▪ Isursuro kadi dagiti Saksi ni Jehova a naan-anay ti autoridad ti asawa a lalaki? Saan. Kinuna ni apostol Pablo: “Kayatko a maammuanyo a ti ulo ti tunggal lalaki isu ti Kristo; ket ti ulo ti babai isu ti lalaki; ket ti ulo ti Kristo isu ti Dios.” (1 Corinto 11:3) Ti Kristiano a babai raemenna ni lakayna kas ulo ti pamiliada. Ngem saan a naan-anay ti autoridad ti asawa a lalaki. Adda sungsungbatanna iti Dios ken ni Kristo. Gapuna, no kiddawen ti lalaki nga aramiden ni baketna ti maysa a banag a maisalungasing iti linteg ti Dios, ti Kristiano a babai ket ‘agtulnog iti Dios kas agturay imbes a kadagiti tattao.’—Aramid 5:29.
▪ Isursuro kadi dagiti Saksi ni Jehova a maiparit ti agdiborsio? Saan. Kinuna ni Jesu-Kristo: “Kunak kadakayo a ti siasinoman a mangidiborsio iti asawana a babai, malaksid no maibatay iti pannakiabig [seksual nga imoralidad], ket mangasawa iti sabali makaaramid iti pannakikamalala.” (Mateo 19:9) No kasta, dagiti Saksi ni Jehova bigbigenda ti kinuna ni Jesus a mabalin ti agdiborsio no maibatay iti pannakikamalala. Ngem siiinget met a patienda a saan a rumbeng nga agdiborsio ti agassawa gapu laeng kadagiti simple a rason. Paregtaenda dagiti miembroda nga annurotenda ti kinuna ni Jesus: “Ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag. . . . Gapuna, ti pinagsinnangol ti Dios saan koma a pagsinaen ti tao.”—Mateo 19:5, 6.