Naibilang a Nalinteg “Maipaay iti Biag”

“Gapu iti maysa nga aramid ti kinalinteg . . . nagpaay a pakapalinteganda iti biag.”​—ROMA 5:18.

1. Asino dagiti mabisin ken mawawan iti kinalinteg, ken kasano a mapennek ti tarigagayda?

“NARAGSAK dagiti mabisin ken mawaw iti kinalinteg, ta mapnekdanto.” (Mateo 5:6) Ti kasta a panagwaw maipaay iti kinalinteg ti mapnekto a naan-anay saan laeng nga agpaay kadagidiay “kukuada ti pagarian ti langit” no di ket kasta met kadagidiay “tawidendanto ti daga.” (Mateo 5:10; Salmo 37:29) Agpadpada a dagitoy a klase makiramanda iti namnama nga inyebkas ni apostol Pedro idi nga insuratna: “Ngem kas mayannurot iti karina [ti Dios], datayo urayentayo dagiti babbaro a langlangit ken ti maysa a daga a baro, isuda a pagtaenganto ti kinalinteg.” (2 Pedro 3:13) Wen, nangikari ni Jehova a Dios ti maysa a nalinteg a baro a nailangitan a gobierno, “ti pagarian dagiti langlangit,” ken ti maysa a nalinteg a “baro a daga,” wenno natauan a sosiedad iti maysa a paraiso a daga.

2. Ania a relasion ti adda iti nagbaetan ni Jehova, ti kinalinteg, ken ti namnamatayo a maipaay iti natalna a Baro nga Urnos?

² Ngem ania nga eksakto iti maawatan babaen iti nalinteg a baro a langlangit ken ti nalinteg a baro a daga? Kaipapananna nga agpadpada a ti baro a nailangitan a gobierno ken ti sangatauan ditoy daga nga iturayanto dayta masapul a bigbigenda dagiti pagalagadan ti Dios iti umiso ken dakes. Ni Jehova isu ti “pagnaedan ti kinalinteg.” (Jeremias 50:7) Ti kinalinteg isu ti pammuon ti kinasoberano, wenno ti tronona iti uniberso. (Job 37:23, 24; Salmo 89:14) No maadda iti talna iti uniberso, masapul a bigbigen dagiti parparsua ni Jehova ti kalinteganna a mangikeddeng kadagiti pagalagadan no ania ti nalinteg ken no ania ti dakes. Iti kasumbabangirna, ti namnamatayo iti maysa a nalinteg a Baro nga Urnos agpannuray iti panangsalimetmet ni Jehova kadagiti pagalagadanna.​—Salmo 145:17.

3. Gapu iti naan-anay a kinalinteg ni Jehova, ania a saludsod ti umay iti panunottayo?

³ Ngarud tumaud ti saludsod no kasano a ti nasantuan ken nalinteg a Dios a ni Jehova ket maaddaan iti pannakilangen iti di nalinteg a managbasol. (Idiligyo iti Isaias 59:2; Habacuc 1:13.) Kasanona a, bayat nga agtalinaed a matalek kadagiti naitan-ok a pagalagadanna ti kinalinteg, pilienna manipud kadagiti managbasol dagidiay makiraman iti nalinteg a gobierno a “baro a langlangit” ken akseptaren kas gagayyemna dagidiay agbalin a paset ti nalinteg a “baro a daga”? Tapno masungbatan daytoy, masapul a matarusantayo ti doktrina ti Biblia a pannakapalinteg wenno pannakaibilang a nalinteg.

Naasi nga Urnos ti Pannakapalinteg

4. Apay a ti natnag a sangatauan ti siuutang a naimbag iti Dios, ken apay a ditay mapalag-anan ti bagbagitayo iti daytoy nga utang?

⁴ Kadagiti Kasuratan, dagiti basol maiyar-arigda kas utang. (Kitaenyo ti Mateo 6:12, 14; 18:21-35; Lucas 11:4.) Amin a tattao managbasolda ket, ngarud, siuutangda unay iti imatang ti Dios. “Ta dagiti supapak ti basol isu ni patay.” (Roma 6:23) Yantangay “nalakoda iti biang ti basol” babaen ken amada nga Adan, awan maaramid dagiti kaputotanna a mangpalag-an iti bagbagida iti daytoy makapadagsen nga utang. (Roma 7:14) Ti laeng ipapatay ti nakautang ti mabalin a mangpunas iti dayta, “ta ti natayen gapu iti basol adda a naluk-atanen iti basol.” (Roma 6:7) Awan aniaman a naimbag nga ar-aramid a naaramidan bayat ti panagbiag ti maysa a managbasol ti makagatang iti napukaw ni Adan, wenno makaited kenkuana iti nalinteg a panagtakderda iti imatang ti Dios.​—Salmo 49:7, 9; Roma 3:20.

5. Kasano a nakaipaay ni Jehova ti pakabang-aran agpaay ti managbasol a sangatauan a kaskasdi pagraraemanna pay met laeng ti perpekto a kinahustisiana?

⁵ Kasano a makaited ni Jehova ti pakabang-aran iti managbasol a sangatauan a dina ikomkompromiso dagiti mismo a pagalagadanna ti kinalinteg? Ti sungbat ipaganetgetna ti kinasirib ken di kaikarian a kinamanangaasi ni Jehova. Nagpintas ti panangilawlawag ni apostol Pablo iti daytoy iti suratna kadagiti Taga Roma. Insuratna: “Idinto a maibilangda [dagiti managbasol] a nalinteg nga awan ti baybayadna gapu iti di kaikarian a kinamanangaasina, a maaramat iti pannakasubbot nga adda ken Kristo Jesus. Isu nga impaay ti Dios a daton iti pannakikappia gapu iti pammati iti darana. Tapno maiparangarang ti kinalintegna, ta gapu iti kinaanus ti Dios pinalabasna dagiti basbasol a naaramid idi; tapno ti kinalintegna maiparangarang iti agdama a tiempo, tapno maipakita a nalinteg ken mangpalinteg iti adda pammatina ken Jesus.”​—Roma 3:24-26.

6. (a) Kasano a dagiti pagalagadan ni Jehova ti kinahustisia mapennek babaen ti daton ni Kristo, ket ania ti situtulok nga aramiden ni Jehova? (b) Kasano nga ibilang ti Dios a nalinteg ti maysa a tao nga addaan pammati?

⁶ Babaen iti di kaikarian a kinamanangaasina, inawat ni Jehova ti daton ni Jesus a maipaay kadagiti kaputotan ni Adan. (1 Pedro 2:24) Dayta ti maysa a katimbang wenno katupag, a daton a mangkita a, kas maysa a perpekto a tao, ginatang ni Jesus ti napukaw daydi perpekto a tao a ni Adan. (Kitaenyo ti Exodo 21:23; 1 Timoteo 2:6.) Gapu iti pannakapenneken ti kinahustisia, ni Jehova buyogen iti ayat situtulok a “mangpunas,” wenno ‘mangpukaw,’ iti basbasol a maisingir iti kuenta “iti tao nga adda pammatina ken Jesus.” (Isaias 44:22; Aramid 3:19) No agtalinaed matalek ti kasta a tao, ni Jehova sanna laeng nga ikkaten ti ‘panangibaklay ti basolna’ no di ket Isut’ aktual a mangibilang kenkuana a nalinteg. (2 Corinto 5:19) Gapu iti daytoy naasi nga urnos ti pannakapalinteg, ‘adu dagiti maibilangto a nalinteg.’ (Roma 5:19) Maysa a paset daytoy ti pannakapalinteg, ti aramid ti Dios a sadiay ti maysa a tao maibilang nga awan basolna. (Aramid 13:38, 39) Asinoda dagidiay napalinteg, wenno naibilang a nalinteg, bayat iti daytoy a sistema dagiti bambanag?

144,000 a “Sasanto”

7. Iti ania a pamay-an a naibilang a nalinteg ni Kristo, ket ania ngarud ti nagbalin a posible?

⁷ Natural, di kasapulan a mismo ni Kristo ti pannakaibilang a nalinteg, yantangay isu ti pudno a nalinteg. (1 Pedro 3:18) Gapu ta napaneknekan a matalek agingga ken patay kas perpekto a tao (“ti maudi nga Adan”) ken insakripisiona ti kalinteganna nga agbiag ditoy daga, ni Jesus pinagungar ni Amana, a ni Jehova. Ni Jesus “naibilang a nalinteg iti espiritu,” kayatna a sawen, naiyebkas a nalinteg iti bukodna a merito ken napagungar kas “maysa nga espiritu a mambiag.” (1 Corinto 15:45; 1 Timoteo 3:16) Babaen iti sakripisio nga ipapatayna, nangted ti pakaibatayan a maibilang ni Jehova a kinalinteg kadagiti lallaki ken babbai ti pammati.​—Roma 10:4.

8, 9. (a) Asino dagiti immun-una a nagunggonaan iti panakaibilang a nalinteg, ken apay? (b) Asinoda ti mangbukel ti “baro a langlangit,” ken iti ania ti pagturayanda?

⁸ Nainkalintegan laeng, dagidiay pinili ni Jehova a mangbukel ti nalinteg a “baro a langlangit,” wenno iti gobierno ti Pagarian iti sidong ni Ari a Jesu-Kristo, isuda ti umuna a magunggonaan a naan-anay manipud iti daytoy naasi nga urnos iti daytoy a sistema dagiti bambanag. Inladawan ti libro ni Daniel ti seremonia idiay langit a sadiay ni Kristo, ti Anak ti tao, naikkan ti “panagturay ken dayag ken maysa a pagarian,” gapuna “amin dagiti il-ili, nasnasion, ken pagsasao [ditoy daga] agserbida koma kenkuana.” Kalpasanna impakita ni Daniel a “ti pagarian ken ti panagturay” naitedda “kadagiti sasanto ti Kangatuan,” ni Jehova.​—Daniel 7:13, 14, 18, 27; idiligyo iti Apocalipsis 5:8-10.

⁹ Ti bilang dagita a “sasanto” a napili a makipagturay ken Kordero a ni Jesu-Kristo iti nailangitan a Bantay Sion ti naiparangarang kas 144,000, “isuda a nagatang manipud sangatauan.” (Apocalipsis 14:1-5) Dagitoy, kaduada ni Kristo, ti mangbukel ti nalinteg a “baro a langlangit” ti baro a sistema dagiti bambanag ni Jehova.

Naibilang a Nalinteg​—Kasano ken Apay?

10. (a) Ania a libro ti Biblia ti nalawag unay maipapan iti pannakapalinteg, ken agpaay ti siasino ti nakaisuratanna? (b) Siasino dagiti kangrunaan a nairaman iti doktrina ti Biblia ti pannakapalinteg?

¹⁰ Awan duadua a ti libro ti Biblia a kalalawagan unay maipapan ti panangibilang ti Dios kadagiti tattao a nalinteg isu ti surat ni Pablo kadagiti Taga Roma. Makapainteres, inturongna daytoy a surat kadagidiay “naawis nga agsanto.” (Roma 1:1, 7) Daytoy ti mangilawlawag no apay a ti doktrina ti “pannakapalinteg,” wenno pannakaibilang a nalinteg, kas imbalabala ni Pablo, ket nausar maipapan kadagiti 144,000 a “sasanto.”

11. Ania ti relasion ti pammati, ar-aramid, ken ti pannakapalinteg?

¹¹ Ti puersa ti panagrason ni Pablo kadagiti Taga Roma a ta awan Judio wenno Gentil a makagun-od iti nalinteg a panagtakder iti imatang ti Dios babaen kadagiti ar-aramid, numan pay dagitoy ti maaramid a maitunos iti Linteg Mosaiko wenno gapu laeng iti panagraem iti nainkasigudan a linteg a moral. (Roma 2:14, 15; 3:9, 10, 19, 20) Agpadpada a ti Judio ken Gentil ti maibilang a nalinteg gapu laeng iti pammati iti daton a subbot ni Kristo. (Roma 3:22-24, 29, 30) Nupay kasta, ti balakad kadagiti pangserra a kapitulo ti Roma (12-15) ipakitana a ti kasta a pammati masapul a mapaneknekan babaen kadagiti nadiosan nga ar-aramid, kas inlawlawag met ni Santiago. (Santiago 2:14-17) Dagita nga ar-aramid ti mangpaneknek laeng a ti napalinteg a Kristiano addaan ti pammati nga isu ti umuna a kasapulan agpaay iti pannakapalinteg iti Dios.

12, 13. (a) Apay a kasapulan a maibilang a nalinteg dagiti 144,000 a “sasanto”? (b) Ania iti aramidendanto iti kalintegan ti biag nga inawatda?

¹² Kaskasdi, agpaay iti ania a napilit a rason a dagiti Kristiano a “naawis nga agsanto” ket kasapulan a maibilangda a nalinteg? Ditoy ti pakaikuentaan itan ti maikadua a paset ti pannakapalinteg, awan sabali, ti panangibilang ti Dios iti maysa a tao a maikari iti biag kas ti perpekto a natauan nga anakna. Gapu iti akem nga isut’ nakaawisanda nga aramiden iti nalinteg a “baro a langlangit,” masapul a tallikudan ken isakripisio nga agnanayonen dagiti 144,000 iti aniaman a namnama iti biag nga agnanayon ditoy daga. (Salmo 37:29; 115:16) Iti daytoy a pannakaawat matayda iti maysa nga ipapatay kas daton. ‘Ipasakopda ti bagida iti ipapatay a maiyasping ken Kristo.’​—Filipos 3:8-11.

¹³ Ita, maitunos iti prinsipio a naibalabala iti Linteg Mosaiko, aniaman a daton a maidatag ken Jehova ti masapul nga awan depektona. (Levitico 22:21; Deuteronomio 15:21) Dagiti 144,000 a “sasanto” masasaoda kas “dagiti nalinteg a naaramidda nga awan pagkurangandan.”​—Hebreo 12:23.

Naaramid Kas Naespirituan nga Annak

14, 15. (a) Ania a panagbalbaliw maipapan iti basol ti lasaten dagiti 144,000? (b) Iti ania a pamay-an a maibangondanto iti “baro a panagbiag”?

¹⁴ Bayat a sibibiagda pay laeng iti lasag, dagitoy a “nalinteg” aglasatda iti simboliko nga ipapatay. Inlawlawag ni apostol Pablo: “Datayo a natay iti basol, kasano ti panagbiagtayo pay laeng kenkuana? Dikay ammo aya a datayo amin a nabautisaran ken Kristo Jesus, nabautisarantayo iti ipapatayna? Naitanemtayo ngarud a naikanunong kenkuana gapu iti pannakabautisar iti patay, tapno, kas iti panagungar ni Kristo kadagiti natay gapu iti dayag ti Ama, kasta met a magnatayo koma iti baro a panagbiag . . . ta ammotayo a ti daan a kinataotayo nailansa a naikanunong kenkuana, tapno mapukaw iti bagi ti basol, tapno ditayo patagabun iti basol. Ta ti natayen gapu iti basol adda a naluk-atanen iti basol.”​—Roma 6:2-7.

¹⁵ Bayat iti natauan a panagbiagda, dagiti 144,000 a “sasanto,” nga adda laengen bassit a natda kadakuada ditoy daga iti daytoy panawen ti panungpalan, ‘natayda iti basol.’ Kalpasan iti simboliko nga ipapatayda, dagidiay “naawis nga agsanto” mapagungarda iti “baro a panagbiag.” Agsipud ta naibilangdan a nalinteg, ni Jehova ti adda iti posisionen a mangpulot kadakuada babaen iti espirituna nga agbalin kas dagiti naespirituan nga “annakna.” Isuda “naiyanakda manen” ken maibilang kas “annak ti Dios.” (Juan 3:3; Roma 8:9-16)a Agbalindan a naespirituan nga Israelitas ket maiserrekda iti baro a tulag.​—Jeremias 31:31-34; Lucas 22:20; Roma 9:6.

Makipagtawid iti Kinapadi ken Kinaari

16. Iti ania ti pagbalinanto dagiti 144,000 a “sasanto” a makipagtawid?

¹⁶ Kas dagiti natagibin a naespirituan nga “annak” ti Dios, dagiti 144,000 a “sasanto” agbalinda met a ‘makipagtawid.’ (Galacia 4:5-7) Nagsurat ni Pablo kadagiti padana a naiyanak iti espiritu a Kristiano: “Ket no annak, agtawid met, agtawid iti Dios, ken makipagtawid ken Kristo, no kasta makipagsagabatayo kenkuana, tapno makipagloriatayo met kenkuana.” (Roma 8:17) Ania ti tawid ni Kristo? Ni Jehova ti namagbalin kenkuana nga Ari-Padi “kas iti kinapadi nga agnanayon ni Melkisedec.” (Hebreo 6:19, 20; 7:1) Kas kadagiti “makipagtawid” ken Kristo, dagiti naiyanak iti espiritu a Kristiano ti pinulotan met ni Jehova kas naespirituan a papadi. (2 Corinto 1:21; 1 Pedro 2:9) Mainayon pay, maysa kadagiti ultimo a panggep ti pannangibilang ni Jehova kadakuada a nalinteg isu ti panagbalindanto iti kamaudiananna a “makipagari iti biag gapu iti sabali, nga isu ni Jesu-Kristo.”​—Roma 5:17.

17. (a) Numan pay naibilangdan a nalinteg, ania ti kasapulan nga aramiden nga inaldaw dagiti napulotan a Kristiano? (b) Kasano ti panangawatdanto ti gunggona?

¹⁷ Bayat ti kaaddada ditoy daga, dagitoy napulotan a Kristiano, numan pay naibilangdan a nalinteg, kaskasdi a makidangadangda kadagiti panagannayasda iti panagbasol. (Roma 7:15-20) Kasapulanda ti dara ni Kristo a manggugor kadakuada manipud inaldaw-aldaw a panagbasolda iti kinaimperpekto. (1 Juan 1:7; 2:1, 2) No agtalinaedda a matalek aginggana iti panungpalan iti naindagaan a panagbiagda, literal a matayda ken mapagungarda “a di agrupsa ken awan tulawna ken saan a magango” kas paset ti nalinteg a “baro a langlangit.”​—1 Pedro 1:3, 4; 2 Pedro 3:13.

“Ur-urayenna ti Pannakaiparangarang dagiti Annak ti Dios“

18, 19. (a) Ania ti ur-urayen ti natauan a “sangaparsuaan”? (b) Kasano a ‘maiparangarang’ dagiti “annak ti Dios,” ken apay a ti natauan a “sangaparsuaan” agbibiagda a siiinanama iti daytoy?

¹⁸ Kasano ti panangapektar amin daytoy kadagidiay​—adayo a dakdakkel ti bilangda ngem kadagiti 144,000 a naespirituan nga “annak ti Dios”​—nga agbisin ken mawawan iti kinalinteg ngem ti namnamada ket isu ti panagtawiddanto iti daga? Maipapan kadagitoy, insurat ni apostol Pablo: “Ta ti nasged a tarigagay ti sangaparsuaan ur-urayenna ti pannakaiparangarang dagiti annak ti Dios. Ta ti sangaparsuaan ti naiturayan iti kinaubbaw . . . a ti met laeng sangaparsuaan maluk-atanto iti pannakaadipen iti panagrupsa a maipaay iti nadayag a wayawaya dagiti annak ti Dios.”​—Roma 8:19-21.

¹⁹ Ti kasta a natauan a “sangaparsuaan” a ti namnamada ket agbiag nga agnanayon iti maysa a paraiso a daga agbibiagda a “siiinanama” iti panawen​—nga asideg unayen​—inton ni Ari a ni Jesu-Kristo ken dagiti napagungar nga “annak ti Dios” ‘maiparangarangdanto’ iti pannakadadael ti agdama a dakes a sistema dagiti bambanag ket kalpasan dayta agturaydanto kas ar-ari ken papadi “iti sangaribo a tawen.” (Apocalipsis 20:4, 6) Bayat iti Milenio a Panagturay ni Kristo, ti natauan a “sangaparsuaan maluk-atanto iti pannakaadipen iti panagrupsa.”

20. Anianto pay ti mausig iti sumaganad nga artikulo?

²⁰ No kasano a dagiti tattao nga agbibiag iti nalinteg a “baro a daga” ket magun-odanto iti kamaudianan “ti nadayag a wayawaya dagiti annak ti Dios,” ken no kasano a ti doktrina ti Biblia a pannakapalinteg apektaranna ida uray itan, ti mausigto iti sumaganad nga artikulo.

[Dagiti Footnote]

Maipapan iti panangibilang ti Dios kadagiti tattao a nalinteg​—

◻ Aniat’ kayat a sawen ti Biblia babaen kadagiti nalinteg a baro a langlangit ken nalinteg a baro a daga?

◻ Apay a ti sangatauan kasapulan a mapalintegda ken Jehova?

◻ Kasano a mapennek dagiti pagalagadan ni Jehova iti kinalinteg?

◻ Apay a dagiti 144,000 ti umuna maibilang a nalinteg, ket aniat’ aramidenda iti awatenda a kalintegan nga agbiag?

◻ Iti ania ti pagbalinan dagiti 144,000 a makipagtawid ken Kristo?