“Managpadagoskayo” Kadi?
MAYSA a nadagaang idi nga aldaw. Maysa a grupo dagiti Saksi ni Jehova, agtutubo ken natataengan, ti sigagaget nga agtartrabaho, agdaldalus, agpintura, ken mangar-aramid kadagiti nagduduma a trabaho bayat iti panangtartarimaanda iti maysa a Kingdom Hall. Idi tengnga ti malemen, medio mabambannogandan, ket dadduma kadakuada ti agtugtugaw tapno makainanada bassit.
Pagammuan latta, nagna a simrek dagiti tallo a Saksi a kakabsat a babbai, a sangkaawitda dagiti sandwiches, cookies, kankanen, kape, tsa, ken dadduma pay nga inumen. Anian a makaay-ayo a pannakakellaat para kadagidiay nabannoganen a kararua! Ti gagangay a panangiyebkas iti kinamanagpadagos ken ayat iti biang dagiti tallo a kakabsat a babbai ti saan laeng a nangpabang-ar a pisikal kadagiti trabahador no di ket nakatulong pay iti dakkel iti nabara ken naayat nga espiritu iti intero nga asosasion dagiti kakabsat a lallaki ken babbai iti dayta a malem.
Maysa a Tanda iti Pudno a Kinakristiano
Ti kinamanagpadagos ken ayat, siempre, ket saan a limitado kadagita nga espesial nga okasion. Maipapan kadagiti pudpudno a pasurotna, ti Nangibangon iti pudno a Kinakristiano, ni Jesu-Kristo, kinunana: “Gapu itoy mailasindanto a dakayo dagiti adalak, no adda ayatyo iti maysa ken maysa.” Kasta met, impatigmaan ni apostol Pablo kadagiti padana a Kristiano: “Managpadagoskay koma.” (Juan 13:35; Roma 12:13) Iti sabali a pannao, ti kinamanagpadagos a tinignay ti awan-imutna nga ayat iti dadduma ket wagas biag kadagiti pudno a Kristiano.
Ti kakasta a kualidad, nupay kasta, ket saan nga umay nga automatiko no agbalin ti maysa a Kristiano. Imbes ketdi, masapul a pagreggetan ti maysa a parang-ayen dagita. Daytoy ti nangnangruna a kasta iti daytoy a lubong, a sadiay ti ayat ti kaaduan a tattao ti limmammiisen, a kas impadto ti Biblia. (Mateo 24:12) Ngem anian a pakaigiddiatan idiay ayan ti kas kadagita a kualidad! Iti maysa a nasinged unay a pamilia, tagtagiragsaken ti tunggal kameng iti pannakikadkadua dagiti dadduma ken maragsakanda a mangbusbos nga agkakadua iti panawenda. Umasping met, no dagiti kamkameng ti kongregasion Kristiano regular nga agtitimpuyogda kadagiti paggigimongan, iti tay-ak ti ministerio, ken kadagiti dadduma pay nga okasion, pudno a makapagaammoda iti maysa ken maysa. Agbalinda a pudno a gagayyem, nalabit nasingsinged pay ngem kadagiti kamkameng ti pamilia. (Proverbio 18:24) Daytoy a siggalut ti panaggagayyem iti nagbabaetan dagiti agpapada a saksi ni Jehova ti agserbi kas napigsa nga alad a maibusor iti di makaay-ayo nga impluensia iti lubong.
Ti Paset dagiti Babbai a Kristiano
Numan pay amin dagiti Kristiano ti mabagbagaanda a “managpadagosda koma,” adda nasken a paset dagiti Kristiano a babbai iti dayta a banag. Kinapudnona, saan kadi a masansan a dagiti babbai, nangnangruna dagiti assawa a babbai, ti mangaramid ti kaaduan iti aktual a trabaho maipapan iti panangipakita iti kinamanagpadagos? No mangawis dagiti assawa a lallaki kadagiti sumagmamano iti kongregasion idiay balayda a maipaay iti Kristiano a panaglalangen, saan kadi a ti babai ti masansan nga agdalus iti balay, mangisagana iti taraon ken inumen, ken isu ti agidulin kalpasanna? Nupay ti asawa a lallaki ken dagiti annak makatulongda, ken situtulokda a tumulong, kaskasdi a ti babai ti mangibaklay iti trabaho a mangasikaso a tunggal banag umiso ti pannakaaywanda.
Nagsayaat ta, adu a Kristiano nga assawa a babbai ti situtulok a mangipaay kadagiti bagbagida tapno makaipakita iti pudpudno a kinamanagpadagos kadagiti naespirituan a kakabsatda a lallaki ken babbai. Alaenyo, kas pangarigan, ni Dip Yee, maysa nga amin-tiempo a payunir a ministro idiay Hong Kong a ni lakayna ket maysa a panglakayen iti lokal a kongregasion. Numan pay kaipapananna a dakkel a trabaho para kenkuana no mangawisda kadagiti kakabsat a lallaki ken babbai, no maminsan ti intero a grupo iti panagadal ti libro, idiay pagtaenganda, siraragsak a mangipakpakita ti kinamanagpadagos. “Pagbalbalinenmi a simple laeng ti pannangan,” kunana. “Nasayaat ti pannakakita kadagiti kakabsat a tagtagiragsakenda unay ti panaglalangen, ken ti pannakapagpipinnabileg iti maysa ken maysa gapu iti dayta.” Pudno unay, babaen iti kinamanagpadagosna dagiti Kristiano a babbai dakkel ti pasetda a mangpabileg iti nabara nga espiritu iti kongregasion.
Gapu kadagiti isuamin a ramanen ti panangipakita iti kinamanagpadagos, pudno unay a kasapulanna ti kinagaget ken panagsakripisio iti biang dagiti Kristiano a babbai. Ngem masiguroda a dagiti ar-aramidda iti ayat ti apresiaren unay ti lallakayda ken dagiti dadduma a siyayaman nga immawat iti dayta. Siempre, sagpaminsan mabalin nga adda dadduma a di mangipakpakita ti umiso a panangipateg kadagiti maar-aramidan a maipaay kadakuada, ngem saan a talaga a pakaigapuan iti pannakaupay wenno pagsakitan ti nakem dayta, wenno panagsardengen a mangipakita iti kinamanagpadagos. Laglagipenyo, a nupay makapnek ti panangawat kadagiti ebkas ti panagyaman manipud kadagiti dadduma ken makita a maapresiar unay dagiti panagreggettayo, kayattayo ti mangipakita ti kinamanagpadagos nangnangruna no daytat’ umiso ken naayat nga aramiden. Kangrunaan ngem amin, daytat’ mangparagsak ken Jehova a Dios no ar-aramidentay dayta.
Pannakaadda ti Natimbeng a Panangmatmat
Kadagitoy nga al-aldaw a ngumatngato dagiti presio, mabalin nga agkedked dagiti dadduma a mangipakita iti kinamanagpadagos agsipud ta pagarupenda a saanda a kabaelan nga aramiden dayta. Daytoy ti paset a napateg a maaddaantayo iti natimbeng a panangmatmat iti dayta a banag. Nupay ti kaadda ti espesial a taraon ken inumen makaited iti kanayonan a ragsak iti dayta nga okasion, saan nga isu dayta ti kangrunaan a banag. Nainsiriban ti panangitudo ti Sao ti Dios iti daytoy: “Nasaysayaat ti pangngaldaw a natnateng nga addaan ayat, ngem ti napalukmeg a baka ket gura ti kakuyogna.” (Proverbio 15:17) Ti adda kadatayo wenno ti idasartayo ket saan nga isu ti importante. Ti importante ken maapresiar isu ti makapabileg a panagtitimpuyog ken ti espiritu ti ayat nga ipakitatayo.
Usigentayo ti kaso ni Fung Hing, maysa a kabsat a babai nga adda kadagiti edad a 40’s a bumusbusor ti lakayna. Agnanaed iti maysa a bassit a maysa ti siledna a balay iti maysa kadagiti dadakkel a pagbalayan ti publiko nga estado idiay Hong Kong. Nikaanoman isut’ saan a nabaknang. Kinapudnona, masapul ti inna panagtrabaho iti paset-tiempo tapno masuposupanna met ti pagbirokan ti pamiliana. Kaskasdi, isut’ managparabur iti adda kenkuana. Idi a dagiti Saksi idiay kongregasionna immayda idiay sangakaarrubaanda tapno mangasaba iti balaybalay, masansan nga awisenna ida idiay balayda a maipaay iti bassit a panagrepresko. Ti kasta a kinamanagayat iti biangna saan laeng nga inapresiar dagiti padana a Kristiano no di ket nagserbi pay met a mangipakita a ti maysa ket saan a kasapulan nga isut’ baknang tapno makaipakita iti pudno a kinamanagpadagos.
Agpapan pay padpadasentayo ti agbalin a natimbeng iti panangsangsangailitayo, nupay kasta, kaskasdi a mabalin a makitatayo a nasken ti panangisukotayo kadagiti sumagmamano a bambanag tapno iti kasta makaipakitatayo ti kinamanagpadagos. Maikari aya dayta? Pudno unay, no matignaytayo babaen iti pudpudno a Nakristianuan nga ayat. Ta ania kadi ti ayat no awan ti panagsakripisio? Agpadpada ni Jehova ken ni Jesus impakitada ti ayatda iti sangatauan babaen iti panagaramidda kadagiti dadakkel a panagsakripisio—ni Jehova impaayna ti Anakna, ni Jesus intedna ti mismo a perpekto a natauan a biagna.—Juan 3:16; 15:13.
Dagiti immuna a Kristiano sinurotda met ti naayat a kurso. Maipapan kadagiti kakabsat idiay Macedonia, nagsurat ni apostol Pablo: “Bayat nga adda ti dakkel a pannakasuot iti rigat ti kawadwad ti rag-oda ken ti nauneg a kinapanglawda naglaplapusananda a maipaay iti kinabaknang ti nasayaat a nakemda. Ta saksiak a kas maiyannugot iti nalablabes ngem ti kabaelanda timmulongda a naknakemda laeng, a dinawatda ti nasnekan a kalikagum daytoy parabur a pannakairaman iti ibabadangda.” (2 Corinto 8:2-4) Ti “nauneg a kinapanglawda” ken ti panangaramidda ti “nalablabes ngem ti kabaelanda” pinagbalinna a ti kinamanagparaburda ti ad-adda a pudpudno ken makatukay.
Agpapan pay ti maysa ket napanglaw wenno kalalainganna ti kinabaknangna, nupay kasta, ken agpapan pay kadagiti moderno a pagnam-ayan, kaskasdi a sapulenna ti panawen, pigsa, ken kuarta ti panangipakita iti kinamanagpadagos. Kangrunaanna, ngarud, ti saludsod ket: Situtuloktayo aya nga agregget tapno dagiti dadduma tagiragsakenda met koma dagiti bendision iti Nakristianuan a panaglalangen? Laglagipenyo, “ti managparabur a kararua mapalukmegto,” kuna ti proverbio ti Biblia, “ket ti agsibug isu met laeng masibuganto.” Maliwliwatayo met iti kapanunotan a no mangipakitatayo iti kinamanagpadagos kas panagtulnog iti bilin ni Jehova ken kas panangtulad iti naindaklan nga ulidanna, kayariganna ket “pabulodantayo ni Jehova.”—Proverbio 11:25; 19:17.
Siasino ti Intay Awisen?
“No agaramidka iti pangngaldaw wenno pangrabii,” naminsan kinuna ni Jesus, “dika awisen dagiti pagayammo wenno uray dagiti kakabsatmo wenno uray dagiti kakabagyam wenno uray dagiti kakaarruba a nabaknang.” Apay a saan? “Di la ket ta awisendaka met ket supapakandaka.” (Lucas 14:12) Ti punto nga inaramid ni Jesus ditoy ket saan unay a ti intay koma panangawis kadagiti gagayyem ken kakabagyantayo a maipaay iti maysa a pannangan. Tinagiragsakna met ti pannangan a kadua dagiti gagayyemna no maminsan, kas idiay pagtaengan ni Maria ken ni Marta. Ti panunoten ket ti kinamanagpadagostayo ket saan koma a matignay iti kapanunotan a dakayo ti supapakanda.
Kas intuloy nga impakita ni Jesus, dagidiay immuna nga intay usigen no mangawistayo ket isuda dagidiay ad-adda a magunggonaan manipud iti pannakilangenlangen. (Lucas 14:13) Mabalin nga iramanna dagidiay agkasapulan iti pammaregta, dagidiay baro iti kinapudno, dagidiay managbabain wenno dagidiay managpaspasuli laeng, ken dagidiay natataenganen. Ti makapabileg nga epekto ti kasta a panaglalangen ket makita manipud kadagiti sasao ni Oi Yuk, maysa a kabsat a baket a nakaregregta ngem nakapuy ti salun-atna: “Dagiti kakabsat ti masansan a mangawis kaniak kadagiti panagtataripnongda ket pakpakitaandak iti kaasi iti adu a pamay-an. Daytat’ mangparagsak unay kaniak nga agbalin a paset ti dakkel a pamilia!”
Kaawatan, ti panggep ti kakasta a panagtataripnong ket saan laeng a basta panaglalangen. Imbes ketdi, daytat’ mangpabileg iti maysa ken maysa ken pabilgen ti singgalut ti ayat kadagiti pada a managdaydayaw ken Jehova. Gapuna ti pannakaipaganetget ket adda kona iti panangtaginayon iti makapabileg ken makaparegta nga atmospera imbes ketdi a ti kinaimas dagiti taraon ken inumen. Kasta met, maikkan koma met ti panangpampanunot dagiti ar-aramid ken panagpapatang iti kakasta nga okasion. Nupay saan amin nga ar-aramid masapul a maisentro iti Biblia wenno amin a panagpapatang ket naisentro kadagiti Nainkasuratan a tema, nainsiriban ken kinamanagayat a salimetmetan koma a kanayon a makapabileg ken makaparegta dagita. Dagiti panagsasalisal, dagiti awan mamaayna a panangidanondanon, wenno dagiti makapasakit a sasao ti nalawag a rebbeng koma a liklikan.—Efeso 4:29, 31.
Nabaknang a Gunggona ti Agur-uray Kadagiti Managpadagos
Nupay ti maysa di koma mangipakita iti kinamanagpadagos a pampanunoten nga isu ket masupapakan met, daytoy dina kayat a sawen a dagiti tattao a managpadagos ket awan pulos gunggonada. Maisupadi ketdi, ti panangipakita iti pudno a kinamanagpadagos mangyeg kadagiti adu a gunggona, nupay daytat’ saan a sapsapulen. Daytat’ makatulong iti maysa a makapagaramid kadagiti baro a gagayyem, ken dayta ti mangpabileg kadagiti daanen a pannakisinggalut. Daytat’ mangparayray kadagiti dadduma met a mangsukay iti espiritu ti kinamanagparabur ken kinamanagpadagos. (Lucas 6:38; Proverbio 11:25) Kangrunaan ngem amin, ti managpadagos unay a Persona iti uniberso, ti naayat a Namarsuatayo ni Jehova a Dios, kitaennanto a dagiti pudpudno a managpadagos didanto agsagaba iti aniaman a pagkurangan, agsipud ta apresiarenda dagidiay “managpadagos” a kas kenkuana.