Dagiti Saludsod Manipud Kadagiti Managbasa
◼ Aniat’ kayat a sawen ni Jesus iti panagkunana a “ti danum” nga ipaayna ket agbalinto nga “ubbog ti danum nga agburayok a maipaay iti biag nga agnanayon”?
Kinuna ni Jesus iti Samaritano: “Isuamin nga uminum itoy a danum [idiay bubon ni Jacob] mawawto manen. Ngem siasinoman nga uminum iti danum nga itdekto kenkuana uray kaano saanto a mawawen, no di ket ti danum nga itdekto kenkuana agbalinto kenkuana nga ubbog ti danum nga agburayok a maipaay iti biag nga agnanayon.”—Juan 4:13, 14.
Insentro a nangnangruna ni Jesus ditoy dagiti naespirituan a gunggona a dumteng iti maysa a tao a mangawat kadagiti sasaona ket agbalin a dalan ni Kristo. Ti kasta a tao a nagtultuloy a gumun-od iti umiso a pannakaammo maipapan ken Jehova a Dios ken ni Jesu-Kristo ket nagtignay a maitunos iti daytoy a buyogen iti pammati ket addaanto ti gundaway a makagun-od iti biag nga agnanayon. (Juan 17:3) Inyarig ni Jesus daytoy a pamay-an iti isip ken puso ti maysa a tao kas maysa nga ubbog nga agburayok kadagiti gunggona, nga agtultuloy a mangpabileg iti pammatina ken mangiwanwan kadagiti panagaddangna nga agturong iti dalan ti biag nga agnanayon.
Nupay ti panangipaganetget idiay Juan 4:14 ket addaan kadagiti gunggona a magun-odan a mismo ti maysa a tao, ti adalan a Kristiano nga addaan iti aglaplapusanan kadagitoy naespirituan a dandanum gagangay laeng a tarigagayanna nga iranud ida nga awan im-imutna kadagiti dadduma. Kayatna a mangngegan dagiti dadduma ti Nakristianuan a mensahe ket maaddaanda met kadakuada iti ubbog nga agburayok kadagiti isu met laeng a naespirituan a gunggona a mangiturong iti biag nga awan inggana. Daytoy a panangiranud iti pammati kadagiti dadduma kasla isut’ kapanunotan nga adda iti likudan ti kinuna ni Jesus idiay Juan 7:37-39: “‘No adda mawaw, umay kaniak ket uminum. Ti mamati kaniak kas kunaen ti Surat, “Karkarayan ti danum a nabiag ti agayusto manipud iti unegna.”’ Ngem, sinaona daytoy a maipapan iti espiritu nga awatento dagiti mamati kenkuana.”
Natignay babaen ti mamapigsa a puersa ti espiritu ti Dios, a naawat manipud Pentecostes 33 K.P. ken nagtultuloy, nakaskasdaaw dagiti naaramidan dagiti apostol ken ad-adalan ni Jesus iti panangiyeg ti danum ti biag kadagiti dadduma. Ti espiritu ti Dios addaan met nasken a paset iti panangkabal ken panangtignay kadagiti ad-adalan ni Jesus itatta, agpadpada kadagiti napulotan ken ti “dakkel a bunggoy” dagiti “sabsabali a karnero,” tapno ipaay dagiti makaited-biag a danum iti nawawan a sangatauan, bayat nga ikaskasabada ti naimbag a damag ti Pagarian ti Dios iti sangalubongan. Gapuna rebbeng a dagidiay mawawan ti umay iti daydiay ar-aramaten ti Dios a mangipapaay iti danum ti kinapudno a mangiturong iti biag nga agnanayon.—Mateo 24:14; 28:19, 20; Juan 7:37; 10:16; Apocalipsis 7:9.