Salimetmetan ti Positibo a Kababalin
DAYTAT’ nakasapsapa iti maysa a bigat ti kalgaw. Ngem ti init idiay Makintengnga a Daya ti nakalawlawagen idi nga inawat ti maysa nga ama ti maysa a nakalkaldaang a damag. Ti inauna nga anakna a lalaki, a 22 años, natay iti maysa nga aksidente iti lugan iti napalabas a rabii.
Kasano koma ti panagriknayo iti dayta a damag? Agsipud ta dagiti kamkameng ti pamilia nakasingsingedda, kas kadagiti dadduma idiay Makintengnga a Daya, dagiti nagannak ti pudno a maladingitan unay. Kasla gagangay koma kadakuada ti makapungtot unay kas sungbat iti daytoy biglaan a didigra. Kaskasdi, kas pagsiddaawan ti komunidad, nangipakitada ketdi iti positibo a kababalin, uray iti dayta umuna nga aldaw. Numan pay maldaanganda iti kasta unay, addaanda ti naan-anay a panagtalek iti abilidad ni Jehova a mangpagungar iti anakda iti naituding a Tiempona. Kumitkitada iti masanguanan iti inkari ti Dios a baro a sistema a sadiay “awanton ni patay.” (Apocalipsis 21:4) Uray pay itatta, a sumagmamano a tawen iti kamaudiananna, dagiti tattao a makaammo iti dayta a pamilia kaskasdi a pagsasaritaanda ti kababalin dagiti nagannak ken ti mapaguadan a pammatida.
Aniat’ kaipapanan ti kaadda ti positibo a kababalin? Ti tao a positibo salimetmetanna ti bagina a natimbeng agpapan pay kadagiti agbaliwbaliw a kasasaad. Uray pay iti sidong dagiti makasuot a kasasaad isut’ di mariribukan, a palubosanna dagiti negatibo a kapanunotan a mangdominar. Kasano a posible daytoy? Tapno maaddaan kadagiti sumagmamano a sungbat, usigentayo dagiti sumagmamano a pangarigan iti Biblia.
No Maipasango iti Panagbuteng iti Tao
Idi tawen 1512 K.K.P., idi a ti nasion ti Israel adda idiay let-ang ti Paran, nangibaon ni Moises ti 12 nga espia a mangsimisim iti Naikari a Daga. (Numeros 7:17-20) Amin dagiti espia isuda dagiti papangulo ti triboda—lallaki a naimpluensia a maipagarup a naimbagda a pagulidanan. (Numeros 13:1, 2) Ngem anian a nakababain! Kalpasan ti 40 nga al-aldaw, sangapulo kadakuada ti nangted ti dakes a report a gapu itoy dagiti Israelitas immalsada a maibusor iti panangiwanwan ni Jehova ket kayatdan ti agsubli idiay Egipto! “Dagiti tattao nga agnaed iti daga napigsada,” kuna dagiti espia. “Ditayto mabalin ti sumang-at a bumusor kadagiti tattao.”—Numeros 13:28, 31.
Anian a negatibo a kababalin! Ket anian a pannakaigiddiat ti makita iti positibo a kababalin da Josue ken Caleb, dagiti natda a dua nga espia: “Ti daga a linasatmi a sinimisiman isu ti maysa nga aglablabes ti imbagna a daga. No ni Jehova kaay-ayonatayo, iyegnatayto ngarud iti daytoy a daga ket itednanto kadatayo, maysa a daga nga agayus ti gatas ken diro.” (Numeros 14:7, 8; 13:30) Agpadpada a nakita dagiti grupo dagiti isu met laeng a bambanag bayat a simsimisimanda ti daga. Ngem anian a nagduma ti kababalinda! Ti negatibo a kababalin dagiti sangapulo nga espia ti nangapektar ti intero a nasion ket nangrugida nga agtanabutob. Daytat’ nangibanag a dagidiay amin nasurok a 20 añosnan ti natnatay idiay let-ang. Ni laeng Josue ken Caleb, gapu iti positibo a panagtalekda ken ni Jehova, ti naaddaan iti pribilehio a simrek idiay naikari a daga. (Numeros 14:22-30) Ti ulidanda ti rebbeng a mangparegta kadatayo iti daytoy nga aldaw nga agtalinaed a matalek ken salimetmetan ti positibo a kababalin no umay wenno umadu ti ibubusor wenno pannakaidadanes.
Iti maysa a pagilian nga adda iti sidong ti pannakaiparit ti adu a tawtawen, maysa nga espesial a payunir ti naibalud ket nagdakes ti pannakatratona. Malaglagipna pay: “Bayat nga umuy-uyong dagiti opisial, nasingsinged met ti panagriknak ken Jehova. Nagkantaak kadagiti kankanta ti Pagarian. Linaglagipko amin dagiti kasuratan nga ammok. Nabigbigko a, numan pay ipalubos ni Jehova a mapasamak daytoy, mabalinanna—iti aniaman a kanito—ti mangwayawaya kaniak. Amin daytoy ti nangtulong kaniak a maaddaan iti positibo a kababalin. Kas kadagiti apostol, maragsakanak a makabkabil a maigapu iti mannakabalin-amin a nagan ni Jehova. Kanayon nga agkarkararagak a papigsaennak ni Jehova. Isu ti nangbadang kaniak, a ti laeng umuna a panangkabilda ti nasakit. Us-usarek ti tunggal gundaway a mangaskasaba kadagiti dadduma a balud.”
Kalpasan ti pannakawayawaya manipud pagbaludan, kuna daytoy a Kristiano: “Yantangay indedikartay ti biagtayo ken Jehova ken inkaritayo nga agmatalektayo kenkuana, rebbengna nga agtultuloytayo nga agserbi kenkuana agpapan pay aniaman dagiti rigrigat. Isut’ maikari iti panagdayaw ken naan-anay a debosiontayo.”
Datayo met, mabalin a maipasangotayo kadagiti umas-asping nga ibubusor iti masanguanan. Sapay koma ta agbalintayo met a determinado nga awanan panagbuteng kadagiti tattao. Salimetmetan ti positibo a kababalin, ket kas iti kaso da Josue ken Caleb, adu a bendision ken gunggona ti maited kadatayo.
No Mapukaw dagiti Pribilehio iti Serbisio
Ni Moises, kas pangulo iti nasion ti Israel, isu ti nangibaon kadagidiay 12 nga espia. Isut’ nangiturong iti nasion a rimmuar iti Egipto ket awan duadua a manamnama nga isut’ mangidaulo kadakuada a sumrek idiay Naikari a Daga. Nupay kasta, napukaw ni Moises dayta a pribilehio idi, iti maysa a kanito ti panagpungtotna, saanna a naitan-ok ti nagan ni Jehova. (Numeros 20:2-13) Kasanot’ panagrikna ni Moises? Iti maysa a kanta a pinutarna iti kamaudiananna, kunana: “Ta ti nagan ni Jehova iyawagkonto . . . Ti Bato, naan-anay ti aramidna, ta amin a dalanna kinalinteg. Maysa a Dios ti kinamatalek, ken awanan damka, isu awan pagkuranganna ken nalinteg.” (Deuteronomio 32:3, 4) Anian a positibo a kababalin ti adda ken Moises, nupay napukawna ti maysa a nagpateg a pribilehio ti serbisio!
No maipasangotayo met iti umas-asping a kasasaad, ti pananglagip iti daytoy a kapadasan ni Moises makatulongto kadatayo. Mabalin a daytat’ mapasamak no ti bagi dagiti panglakayen iti maysa a kongregasion irekomendarda ti pannakaikkat ti maysa a panglakayen wenno ministerial nga adipen, nalabit gapu ta isu ti agkurang iti maysa wenno ad-adu pay kadagiti Nainkasuratan a kualipikasion a makalikaguman iti daytoy a pribilehio ti serbisio. Mabalin a marikna ti kabsat a di maikari iti pannakaikkat, mariribukan, ken mabalin a mangpataud kadagiti di nasken a panangriribuk. Gapu iti negatibo a kababalin, mabalin a rugianna ti agtanabutob, a kumita met iti biddut dagiti dadduma, nga agidanondanon pay. Kamaudiananna, mabalin nga isardengna payen ti makigimong ken makiraman iti panangasaba. Anian a nagdakes a kababalin ti nagtungpalanna! Anian a nasaysayaat koma ti panangtaginayonna iti positibo a kababalin ket ibilangna ti pannakaikkatna kas disiplina wenno panangsanay nga agbalin a nasaysayaat nga adipen ni Jehova. Mabalinna pay ketdi koma nga alaen dayta a gundaway a makapagadal ken agmennamenna iti Sao ti Dios tapno mapasublina dagiti kasapulan a kualipikasion a maipaay iti panagserbi Kenkuana a naan-anay. Adu kadagiti nangaramid iti kasta iti kamaudiananna ti nabendisionan kadagiti daddadakkel pay a pribilehio iti serbisio.—Hebreo 12:11.
No Mapasamak dagiti Di Ninamnama a Panagbalbaliw
Ti biag napnapno kadagiti di namnamaen a panagbalbaliw a dagitoy ti mabalin a pakaupayan dagiti dadduma ket iti kasta maaddaanda iti negatibo a kababalin. Kasano idi ti panagriknayo idi maudi nga adda maysa a banag a di nagtungpal a kas iti ninamnamayo? Uray dagiti babassit a bambanag makaupayda kadatayo no palubosantay ida. Ngem ditay liplipatan: Ti panangsalimetmet iti positibo a kababalin ti makatulong kadakayo a mangsango a nasaysayaat iti nagbalbaliw a kasasaad.
Maysa a naimbag nga ulidan a nagtalinaed isu ni Ruth. Gaput’ pannakabalona iti nasapa pay a paset ti panagbiagna, isut’ nagsubli idiay Israel a kadua ti katuganganna, ni Noemi, idi bimmasiten ti panagbisin sadiay. Gapu ta awananen ti asawa a lalaki a mangipaay uray pay kadagiti kangrunaan a kasapulan, nupay kasta sinalimetmetan ni Ruth ti positibo a kababalin. Siraragsak, isut’ napan nagadas idiay kataltalonan a sumarsaruno kadagiti agan-ani tapno isu ken ni katuganganna a baket ti maaddaan iti kanen. Ti narigat a trabaho saan a nangupay kenkuana. Isut’ saan a naaddaan iti negatibo a kababalin, a nagladingitanna ti kinapudno a napukawna ni lakayna ket itan nakaad-adayon manipud pamiliana ken gagayyemna. Ket kas ipakita ti rekord, ni Jehova ti sibabaknang a nanggunggona kenkuana gapu iti nasayaat a kursona.—Ruth 4:13-17.
No Kasano ti Panangsalimetmet iti Positibo a Kababalin
Ti panangsalimetmet iti positibo a kababalin narigat para kadagiti dadduma. Dagiti panagagawa iti panagbiag, nangnangruna kadagiti panawen a nariribuk a pagbibiagantayo ti mangikkat iti rag-o ti maysa—nangnangruna no agtultuloy dagitoy mangparurod a parikut. Ngem, uray pay kadagiti di nasayaat a kasasaad, mabalin a mataginayon ti maysa ti positibo a kababalin. Adun ti nakaaramid iti dayta uray kadagiti nagrigat a kasasaad. Kasanotayo met a maaramidan dayta?
Dikay padpadasen ti agtaeng kadagiti negatibo a bambanag. Uray pay bayat dagiti dadakkel a pakarigatan, mabalin met ti makakita pay kadagiti positibo a pasetna. Masansan a maidaddadanes wenno maibalbalud dagiti apostol, ngem kaskasdi a naragsakda ta makapagdaydayawda ken ni Jehova. (Aramid 13:50-52; 14:19-22; 16:22-25) Mabalintay a mennamennaen dagiti naar-aramidanda ken dagiti dadduma a matalek nga ad-adipen ni Jehova kadagiti tiempo ti pannakasusuotda ket maaddaantay ti leksion a maipaay iti mismo a panagbiagtayo. Apay a naragsak ken positiboda? Agsipud ta naan-anay ti panagtalek ken pammatida ken ni Jehova. Nagtalekda iti abilidadna a mangpagungar ken manggunggona kadakuada. (Apocalipsis 2:10) Kasta met, masalimetmetanyo a silalawag kadagiti pampanunotyo ti namnama ti nalinteg a baro a sistema ni Jehova.—Idiligyo ti Hebreo 12:2.
Kanayontay met koma a suksukimaten dagiti bagbagitayo, di la ket ta makastrek dagiti negatibo a panagpampanunot ket agramutda iti puspusotayo. Anian a makagunggona ti iyaadani ken ni Jehova ket ikararag ti tulongna no maup-upaytayo! (Salmo 62:8) Mabalin met a makita dagiti makapabileg a tulong kadagiti panglakayen. Sukayenyo ti espiritu ti kinapakumbaba ken kinatulnog. (Salmo 119:69, 70) Mangikeddeng kadagiti makaay-ayo, maragpat a kalkalat iti panagbiag. Amin dagitoy a singasing ti makatulong kadatayo a mangsalimetmet iti positibo a kababalin ket maaddaan iti “talna ti Dios” a ‘mangaywan iti puso ken panunottayo.’—Filipos 4:6, 7.
Pudno, saan a kanayon a nalaka a maaddaan iti positibo a kababalin. Nupay kasta, babaen iti nagaget a panangikagumaan ken pannakatignay babaen iti napigsa a pammati, ti kasta a kababalin mabalin a masukayan. Gapuna, aniaman dagiti kasasaadtayo, agbalintay koma amin a determinado a mangsalimetmet iti positibo a panangmatmat. Pulos a dinanto kaipapanan ti aniaman a pukaw dayta kadatayo no di ket, daytanto ti mangyeg iti adu a makaay-ayo a gunggona agpada itan ken iti masanguanan.
[Ladawan iti panid 29]
Salimetmetan ti positibo a kababalin, ket adunto a bendision ken gunggona ti dumteng kadakayo