Salimetmetan ti Positibo a Kababalin
1 Anian a ragsaktayo a makabasa maipapan ti nakaskasdaaw a panagrang-ay iti nagduduma a pagilian! Kaskasdi, mailasin nga iti dadduma a deppaar dagiti agibumbunannag ti Pagarian ket masansan a masabetda iti kinaaleng-aleng wenno panangsupring iti panangasaba a trabahotayo. Kasanotayo nga agpositibo no isu daytoy ti kaso iti teritoriatayo? Kasano a malapdan ti negatibo a kababalin a mangagaw iti rag-o wenno mangpalubed iti regta a maipaay iti pangaramid ti disipulo a trabaho?
2 Ti positibo a kababalin ti tumulong kadatayo iti kinabalansetayo. Uray iti sidong dagiti pakasuotan, ditay palubosan ti negatibo a pampanunot a mangdominar iti langatayo. Nangted ni Jesus iti perpekto nga ehemplo kadatayo. Sumagmamano laeng a tattao ti immawat kenkuana. Adu ti naitibkol iti sursurona. Insikat dagiti relihioso a pangulo a patayen. Tinupraanda, inumsida, kinabilda, kamaudiananna pinatayda. Kaskasdi, nagragsak iti trabahona. Apay? Nabigbigna ti importansia iti panagaramid ti pagayatan ti Dios, ket saan a natungday.—Juan 4:34; 13:17; Heb. 12:2.
3 Salimetmetan ti Umiso a Panangmatmat iti Ministeriotayo: Tapno maaramid daytoy, masapul a laglagipen nga addaantayo iti damag a kangrunaan a busoren wenno di ikaskaso dagiti tattao. (Mat. 13:14, 15) Nupay dagiti apostol ket opisial a napakdaaranda a sumardengda a mangisuro babaen iti nagan ni Jesus, nagtalinaedda a nangasaba, ket nagtultuloy ti panagani. (Ara. 5:28, 29; 6:7) Ammotayo a sigud nga, iti dadduma a teritoria, sumagmamano a tattao laeng ti dumngeg. (Mat. 7:14) Ngarud, adda gaputayo nga agrag-o uray maysa laeng a tao idiay teritoriatayo ti dumngeg iti damagtayo. Laglagipenyo pay, nga uray dagidiay bumusor maipaayanda met iti gundaway a dumngeg. (Ezek. 33:8) Dadduma a bumusbusor ti agbalbaliw inton agtanoy ket agbalinda a managdayaw ken Jehova. No matmatan a siuumiso, ngarud, ti ministeriotayo ket mangyeg ti pannakapnek, nupay bassit ti dumngeg. Ti mismo a kaaddatayo kadagiti ruangan nga addaan ti damag iti Pagarian ti Dios ket maysa a kita ti panangsaksi.—Ezek. 2:4, 5.
4 Addaantayo ti naimbag a rason nga agpositibo iti panangmatmat. Ti panagrangpaya iti sangalubongan a trabaho ken ti kaasideg iti dakkel a rigat ti manggutugot kadatayo nga aramiden ti kabaelantayo. (2 Ped. 3:11, 14) Kayattayo met dagiti agdadamo a katimpuyog nga agpositibo a mangusar iti naadalda. No dadduma kadagiti estudiantetayo ti Biblia ket nagprogresoda iti panagbalin a di bautisado nga agibumbunannag, ti Agosto isut’ nasayaat a tiempo a panangrugida.
5 Agserbitayo man nga agibumbunannag wenno payunir, nasayaat a salimetmetan iti panunot a no ania ti dawaten ni Jehova kadatayo ket saan a makapadagsen. (1 Juan 5:3) Inkarina a badangannatayo. (Heb. 13:5b, 6) Iti sidong ti kinaaleng-aleng, masapul nga agpositibotayo ken salimetmetan iti panangasaba agsipud ta pagayatan ti Dios nga aramidentayo dayta.—1 Tim. 2:3, 4.