Agaramid ti Ad-adda Pay Ngem ti Panagkuna: “Aginudo ken Agbussogkayo”
“No . . . ti maysa kadakayo kunaennanto [kadagiti agkasapulan a kakabsat]: ‘Inkayo a sitatalna, aginudo ken agbussogkayo,’ ngem dikayto ited kadakuada dagiti masapul a maipaay iti bagi, ania ti magunggonana? . . . Ti pammati, no awan dagiti ar-aramidna, isu ti pammati a natay.”—SANTIAGO 2:15-17.
1. Kasano a maysa a kabsat idiay Nigeria ti dimteng iti panagkasapulan?
NAKALKULAR a ni Lebechi Okwaraocha ti naipasngay sakbay ti 1880, gapuna isut’ nasuroken a sangagasut a tawenna. Natawidna ken dinaydayawna ti juju dagiti nagannak kenkuana a taga Nigeria. Kalpasanna, idi agtawenen kadagiti 80’s rinugianna ti makipagadal iti Biblia kadagiti Saksi ni Jehova. Inyaplikarna ti naadalna ket isu ti nabautisaran. Gapuna isut’ maysan a Saksi iti agarup 30 años. Di nagbayag kalpasanna, dagiti panglakayen manipud iti kongregasionna ti simmarungkar kenkuana ken ti 72-años nga asawana nga Anglicano kalpasan ti napigsa a panagtudona. Agpadpada a kasla nadadaelan ti nakemda—ti datar ti kalapawda ti nalayus, ket awan kabkabagianda a makaited ti pagdagusan wenno makatulong kadakuada a mangtarimaan iti kalapawda. No addakay sadiay, ania koma ti inaramidyo? Sakbay a maammuanyo ti napasamak, intay usigen ti sumagmamano kadagiti patigmaan ti Biblia.
2. Apay nga interesadotayo kadagiti “naimbag nga ar-aramid”?
2 Ni Kristo Jesus “inyawatna ti bagina gapu kadatayo tapno . . . manggugor a maipaay kenkuana met laeng ti maysa nga ili a kukuana, a naregta kadagiti naimbag nga ar-aramid.” (Tito 2:14) Dagitoy ket naisentro iti makaisalakan-biag a panangaskasaba ti Pagarian. (Marcos 13:10; Apocalipsis 7:9, 10) Nupay kasta, dagiti “naimbag nga ar-aramid” ti Kristiano ramanenna ti ad-adda pay ngem ti nagpateg a panangaskasaba, ta ni Santiago a kabsat ni Jesus iti ina inlawlawagna: “Ti langa ti panagdaydayaw a nadalus ken awan tulawna iti imatang ti Diostayo ken Ama isu daytoy: sarungkaran dagiti awan ti ammada ken dagiti balo a babbai iti ladingitda, ken agannad nga awan tulaw iti lubong.”—Santiago 1:27.
3, 4. Aniat’ maadaltayo manipud 1 Timoteo kapitulo 3-5 maipapan kadagiti “naimbag nga ar-aramid,” a mangiturong iti ania a salsaludsod?
3 Dagiti kongregasion idi umuna a siglo nairamanda iti agpadpada a kita dagiti “naimbag nga ar-aramid.” Iti 1 Timoteo kapitulo 3, kalpasan ti panangibalabalana kadagiti kualipikasion dagiti manangaywan ken ministerial nga ad-adipen, insurat ni apostol Pablo a “ti kongregasion ti Dios a sibibiag [ket] adigi ken sadiri ti kinapudno.” (1 Timoteo 3:1-15) Impakitana a dagiti Kristiano nga agtalinaed kadagita a pannursuro ti kinapudno maisalakandanto ti bagida ken dagiti met dumngeg kadakuada. (1 Timoteo 4:16) Kalpasanna sinalaysay ni Pablo dagiti ‘naimbag nga aramid’ a panangaywan iti namaterialan a kasapulan dagiti matalek a balo a babbai a, “taltalipungawen.”—1 Timoteo 5:3-5.
4 Gapuna, mainayon iti panagebangheliotayo, rebbeng nga ipaayantay ti atension dagiti “naimbag nga ar-aramid,” kas ti ‘panangaywan kadagiti ul-ulila ken balo a babbai iti ladingitda.’ Aniat’ maaramidan dagiti panglakayen ken ministerial nga ad-adipen iti daytoy a banag, kas “dagiti mangidalan”? (Hebreo 13:17) Kasano a dadduma met kadatayo ti makabadang kadakuada iti daytoy? Ket ania ti personal a maaramidantayo iti daytoy a kita dagiti “naimbag nga ar-aramid”?
Dagiti Panglakayen a Mangidadaulo a Naimbag
5. Kasano a sinango ni Pablo ti maysa a naisangsangayan a pagkasapulan, nga addaan kadagiti ania a moderno a katupag?
5 Idi rimsua ti naisangsangayan a pagkasapulan idiay Judea, ni Pablo, kas maysa a panglakayen, indauluanna ti panangiyurnos ti ministerio ti panangtulong. Ti kasta a panangidaulo ti mangpabassit iti aniaman a gulo; dagiti bambanag ti maiwaras a padapada, sigun iti adda a pagkasapulan. (1 Corinto 16:1-3; Aramid 6:1, 2) Uray met dagiti moderno a panglakayen, indadauluanda dagiti ministerio ti panangtulong kalpasan dagiti makadidigra a layus, ti panagreggaay dagiti pitak, dagiti dadakkel nga allon, alipugpog, wenno dagiti ginggined, iti kasta ‘saan laeng a kitkitaen ti tunggal maysa ti personal a paginteresanna no di ket kasta met kadagiti dadduma.’—Filipos 2:3, 4.
6. Idi napagteng ti maysa a didigra idiay California, E.U.A., aniat’ panagtignay dagiti panglakayen?
6 Ti Awake! iti Oktubre 8, 1986, ti nangted ti maysa a pangarigan iti kasta a Kinakristiano nga agtigtignay. Nagtignay dagiti panglakayen idi bimtak ti maysa a puttot nga isu ti namataud ti panaglayus idiay California, E.U.A. Insigida a sinitar dagitoy a naespirituan a papastor ti arbanda tapno kitaen no asino dagiti mapukpukaw wenno agkasapulan ti medikal a pannakaasikaso, taraon, wenno pagdagusan. Nakitunos dagiti panglakayen iti opisina ti hedkuarters dagiti Saksi ni Jehova. Maysa a komite dagiti tumultulong ti nabuangay, ket idi agsangpet dagiti padada a Saksi a tumulong, nangorganisarda kadagiti bunggoy nga agdalus ken agtarimaan kadagiti nadaddadael a pagtaengan. Inaywanan met dagiti panglakayen ti panaggatang ken panagiwaras kadagiti abasto. Inyilustrar daytoy a no rumsua dagitoy naisangsangayan a pagkasapulan, ‘tunggal adalan maikeddengna iti kabaelanna nga ited wenno maaramidan, ngem nainsiriban ti umuman kadagiti lokal a manangaywan ken umawat ti direksion manipud kadakuada.—Idiligyo iti Aramid 11:27-30.
7. Kadagiti ania pay a gagangay a pagkasapulan ti rebbeng a pagtignayantayo?
7 Nupay dakayo (panglakayen man wenno saan) sagpaminsan makatulongkayo iti dakkel a pagkasapulan kalpasan ti maysa a didigra, addada pay dagiti gagangay a pagkasapulan a napateg met—dagidiay adda iti mismo a kongregasion. Gapu ta dagitoy a pagkasapulan saanda a makapakellaat kas kadagiti dadakkel a didigra, nakalaklaka dagita a maliwayan wenno maikkan ti bassit laeng nga atension. Ngem dagiti lokal a pagkasapulan ti kinapudnona isu daydiay tipo a madakdakamat idiay Santiago 2:15-17. Wen, mabalin a ti kongregasionyo ti makaipaay ti kadadakkelan a karit no ti ‘pammatiyo ket addaan ar-aramid, wenno dayta ti natay.’
8. Kasanot’ mabalin a panangipakita dagiti manangaywan ti kinasirib iti panangtaming kadagiti kasapulan ti kongregasion?
8 Iti panangidaulo, ikagumaan dagiti panglakayen ti agbalin a “masirib ken mannakaammo.” (Santiago 3:13) Babaen ti kinasirib masalaknibanda ti arban a maibusor kadagiti manglimlimo a mapan kadagiti kakabsat (wenno kadagiti kongregasion) nga agbulod ti kuarta wenno agimbentoda kadagiti estoria tapno makaalada ti “tulong.” Dagiti manangaywan ti sisisirib a saan a makipagrikna iti kinasadut, ta ti pagalagadan ti Biblia ket: “No adda madi nga agtrabaho, di met koma mangan.” (2 Tesalonica 3:10-15) Kaskasdi, dida met kayat a ‘punitan ti ruangan ti mismo a kinamanangngaasida’ wenno iturong dagiti kakabsat a kasta met ti aramidenda. (1 Juan 3:17) Ti sabali pay a rason no apay a kasapulan nga ipakitada ti kinasirib a ta ti Biblia dinatay ik-ikkan ti awan patinggana a pagalagadan maipapan ti panangaywan kadagiti agkasapulan ken adda iti pakarigatan. Dagiti kasasaad ti nadumaduma iti kada panawen ken lugar.
9. (a) Kasano a naaywanan dagiti maikari a Kristiano a balo a babbai idi immuna a siglo? (b) Ania a langa ti tulong ti mabalin a pakagunggonaan dagita itatta?
9 Kas pangarigan, idiay 1 Timoteo 5:3-10 sinalaysay ni Pablo dagiti maikari a balo a babbai a “taltalipungawen.” Dagiti manamati a kakabagianda ti kangrunaan a responsable a tumulong kadakuada; ti panangliway iti dayta nga annongen ti makabalin a mangdadael ti panagtakder ti kabagianda iti imatang ti Dios. Ngem, no ti maysa nga agkasapulan ken maikari a balo ket di makagun-od ti tulong iti daytoy a pamay-an, posible ti panangiyurnos dagiti panglakayen iti maipaay a namaterialan a tulong manipud iti kongregasion. Kadagiti nabiit pay a panawen, dadduma a kongregasion ti nakatulong kadagiti nangnangruna nga agkasapulan nga adda iti tengngada. Nupay kasta, kaaduan a dagdaga itan ti addaan iti programa a supsuportaran dagiti buis nga agpaay kadagiti natataenganen, dagiti baldado, wenno dagidiay kayatda ti agtrabaho ngem dida met makasarak ti trabaho. Ngem dagiti panglakayen a Kristiano mabalin a kayatda ti tumulong iti sabali a pamay-an. Dadduma kadagidiay pudpudno nga agkasapulan ken kualipikado a naan-anay a maipaay ti pananggunggona ti publiko saanda nga umaw-awat iti kasta agsipud ta dida ammo no kasano ti panagaplikar wenno mababainda a dumawat. Gapuna mabalin nga agsaludsod dagiti panglakayen kadagiti ahensia ti gobierno wenno makiumanda kadagiti Saksi nga addaan kapadasan kadagitoy a bambanag. Ngarud mabalindanto nga iyurnos ti kakabsat a lalaki wenno babai a makabael a tumulong iti tao nga agkasapulan tapno adda maalada a gunggona.—Roma 13:1, 4.
Panangorganisar a Maipaay ti Praktikal a tulong
10. Bayat ti panangipaspastorda iti arban, rebbeng nga ikkan dagiti panglakayen ti atension ti ania?
10 Masansan a dagiti alerto a manangaywan isuda ti tulbek a mangkita a dagiti napanglaw ken dagiti agkasapulan umawatda ti tulong manipud kadagiti naayat a kakabsat a lallaki ken babbai. Dagiti panglakayen rebbeng nga alertoda koma kadagiti naespirituan ken pisikal a kasapulan bayat nga ipaspastoranda amin nga adda iti arban. Kaawatan, ik-ikkan dagiti panglakayen ti panangipaganetget “ti panagkararag ken ti panangikaskasaba iti sao.” (Aramid 6:4) Gapuna, padpadasenda nga iyurnos dagiti bambanag tapno dagiti naidalit iti pagiddaan wenno dagiti naospital a kamkameng ti arban ket mataraonanda iti naespirituan. Mabalin a dagiti panglakayen irekordda dagiti gimong nga agpaay kadagidiay di makatabuno. Nasarakan dagiti panglakayen ken ministerial nga ad-adipen a ti panagsisinnublatda a mangipan kadagiti tapes ti nakatulong kadagiti panagsarungkarda a mangipaay kadagiti dadduma a naespirituan a sagsagut. (Roma 1:11, 12) Maigiddato iti dayta, makitada pay dagiti agdama a kasapulan ti tao.
11. Iyilustraryo no kasano a maiyurnos ti panangtulong iti maysa a kabsat a babai nga agkasapulan.
11 Mabalin a maawatanda a ti marigatan wenno ti nataenganen a kabsat a babai no maminsan makaumay idiay Kingdom Hall, wenno addaan iti ababa a pannakiraman iti ministerio iti tay-ak, no dadduma kadagiti kakabsat a babbai ti mangpadigos ken mangpelles kadakuada. (Idiligyo iti Salmo 23:1, 2, 5.) Dagiti manangaywan mabalinda pay nga ituding ti maysa kadakuada a mangaramid kadagiti kakasta nga urnos. Kasta met, mabalin nga idawatda iti kongregasion dagiti agboluntario a mangilugan iti marigatan a tao wenno mangkuyog kadakuada. Ti kaadda ti eskediol nga agpaay iti daytoy ti mamagbalin nga ad-adda pay a naur-urnos dagiti bambanag.
12. Kasano a dagiti dadduma a kadua dagiti dadduma a manangaywan makatulongda kadagiti masakit wenno kadagiti natataengan?
12 Mabalin a makapaliiw pay dagiti panglakayen kadagiti dadduma a bambanag a sadiay mabalin a maitukon ti tulong wenno makaaramid kadagiti naayat nga urnos. Kas pangarigan, maysa a kabsat a baket wenno masaksakit saanna a maaywanan ti mismo a balayna a kasla ti ar-aramidenna idi. Mabalin kadi a dadduma kadagiti ministerial nga ad-adipen ken dadduma pay ti makatulong kenkuana? Ti panangarbasda iti ruruot wenno mulmula ti mabalin a mangpasayaat iti panagrikriknana, gapu ta ammonan a ti balay ket saanen a pagtaudan ti pakalalaisan iti sangakaarrubaan. Ti kadi minuyongan kasapulan a madalusan kadagiti ruruot wenno kasapulanna ti pannakasibug? Mabalin kadi a dadduma kadagiti kakabsat a babbai a mapan makitiendaan ti situtulok a kumita iti kabsat ket igatanganna met kadagiti kasapulanna a bambanag? Laglagipenyo, dagiti apostol interesadoda kadagita a praktikal a paset, ket inorganisarda dagidiay makabael iti kongregasion a tumulong.—Aramid 6:1-6.
13. Ania ti bunga ti panangtulong dagiti panglakayen iti kabsat a taga Nigeria a nadakamat a nasapsapa?
13 Ti kasta a Nakristianuan a pannakaseknan ti impakita dagiti panglakayen a nadakamat a nasapsapa a, bayat nga agar-aramidda iti panagsarungkar a panangipastor, nasarakanda ni Lebechi Okwaraocha ken ti asawana nga adda iti nakalkaldaang a kasasaad. Insigida a nagsasaritaan ti bagi dagiti panglakayen dayta a banag ket pinakaammuanda ti kongregasion iti adda a pampanunotenda—patarimaanda manen ti balay. Dagiti nadumaduma a kakabsat a lallaki ken babbai nagidonarda kadagiti materiales ken situtulokda a nakiraman iti proyekto. Iti uneg ti maysa a lawas, nakaibangonda ti maysa a natalged, maysa a bassit a balay a nagatep iti yero. Ti report manipud Nigeria ket:
“Dagiti pumurok nakellaatda ket maigiddato iti dayta sibubulos a nangiyegda iti taraon ken mainum nga agpaay kadagiti kakabsat a lallaki ken babbai nga okupado a nagtrabaho iti nabayag nga or-oras a mangileppas iti trabaho sakbay a dumteng manen ti sumaganad a panagtudona. Adu kadagiti pumurok ti nagreklamo maipapan kadagiti dadduma a narelihiusuan a grupo a, kunada, taktakawanda dagiti tattao imbes a tulonganda dagiti napanglaw. Daytoy a banag ti nagbalin a pagsasaritaan iti ili. Dagiti pumurok nagbalinda a nalaka a mangawat iti kinapudno, ket adu a panangiyadal ti Biblia kadagiti pagtaengan ti narugian.”
Ti Bingayyo Kadagitoy “Naimbag nga Ar-aramid”
14. Rebbeng a maaddaantayo iti ania a panangmatmat iti panagaramid ti “naimbag nga ar-aramid” kadagiti kakabsattayo?
14 Siempre, masansan mabalintay ti agtignay a pribado ken direkta nga agpaay kadagiti kasapulan dagiti natataenganen, masaksakit, dagiti naospital, wenno dagidiay adda a marigrigatan nga adda iti aglawlawtayo. No makakitatay iti pamay-an a panangipamatmat iti pudpudno a Kinakristiano, apay a dikayo agtignay ket padasen ti tumulong? (Aramid 9:36-39) Ti pakatignayantayo ket, saan a ti panangpilpilit manipud kadagiti dadduma, no di ket ti Nakristianuan nga ayat. Ti umuna a rekado ti aniaman a praktikal a tulong isu ti kaadda ti pudpudno nga interes ken pannakipagrikna. Siempre, awan kadatayo ti makabalin a mangisubli ti pagorasan nga agpaay kadagiti natataenganen, mangpaimbag kadagiti saksakit babaen ti milagro, wenno mamagpapada iti kasasaad ti panagbiag dagiti amin nga adda iti kongregasion. Ngem piho a rebbeng a maaddaantay koma iti pannakaseknan ken espiritu ti pannangted. No adda dayta kadatayo, ken agtignaytayo a maiyanatop iti dayta, daytat’ mangpabileg ti singgalut ti ayat iti nagbabaetantayo ken kadagidiay tultulongantayo. Daytat’ napasamak iti nagbaetan da Pablo ken Onesimo, nga isu idi no iyar-arig ket agdadamo pay laeng a Kristiano a ‘timmulong ken ni Pablo iti pannakaibalbaludna.’—Felimon 10-13; Colosas 3:12-14; 4:10, 11.
15. Kasanot’ pannakatulongtayo kadagiti dadduma a maikari iti tulong a pudpudno nga adda iti pagkasapulan?
15 No maminsan mabalintayo ti agtignay a mangipaay iti namaterialan a kasapulan babaen iti naasi a sagut, a mabalin nga ipatulod a di ipakpakaammo ti nangted wenno naited iti pribado. Adda kadi maysa a kabsat a lalaki a naikkat iti panggedanna ket saan a makabirok ti sabali a panggedanna? Naipasango kadi ti maysa a kabsat a babai iti dina namnamaen a paggastuan iti panagpaagas; isu kadi ti naaksidente wenno natakawan? Mabalin a dagiti kakastoy a kasasaad ti rumsua iti aglawlawtayo. No mangaramidtayo ti “sagut ti asi” wenno “limos” ti Amatayo kumitkita iti sekreto ti makapalpaliiw ken anamonganna dayta. (Mateo 6:1-4) Wenno, imbes a mangted ti kuarta, mabalin, kas ken ni Job, makaitedtayo iti kawes nga agpaay kadagiti napanglaw ken taraon wenno ti naluton a sida nga agpaay iti balo a babai wenno kadagiti ul-ulila.—Job 6:14; 29:12-16; 31:16-22.
16. Iti ania a sabali pay a praktikal a pamay-an a mabalin a maited ti tulong?
16 Ti kapadasanyo wenno dagiti am-ammoyo ti mabalin a gubuayan ti praktikal a tulong. Maysa a kabsat ti umut-utang ken ni Kabsat W——. Ti naasi a sungbatna ket: ‘Apay a patiem a mabalin nga addaanak ti sobra a kuarta a maipautang?’ Ti sungbat a naited ket: ‘Agsipud ta nalalaingka a manangaywan iti kuartam.’ Buyogen ti pannakaawat, ni Kabsat W——, a masansan agipabpabulod ti kuarta kadagiti agkasapulan, insingasingna: ‘Nalabit ti pudpudno a kasapulam ket isu ti tulong a mangammo no kasano ti panangaywan ti kuartam, ket siraragsakak a tumulong no kayatmo ti tulongko.’ Dayta a tulong ti nangnangruna nga apresiaren dagiti kakabsat a kasapulan ti panangbalbaliwda iti estandarte ti panagbiagda kadagiti baro a kasasaad wenno situtulokda nga agtrabaho iti nadagsen uray pay iti saan unay a nadayaw a kita ti panggedan. Siempre, no talaga a kasapulan ti umutang, nasayaat ti panangpirma ti aniaman a rekord iti dayta tapno awanto ti rumsua a parikut iti kamaudiananna. Kaskasdi, adu kadagiti kakabsat a dida kayat ti umutang apresiarenda unay ti personal a tulong babaen ti pammagbaga wenno kayatda ti mairamanan kadagiti kapadasan. (Roma 13:8) Iyilustrar daytoy ti maysa a kapadasan manipud West Africa maipapan ken Emmanuel:
Nupay maysa a sanay a barbero ni Emmanuel, mammano dagiti suki, ket isu ti malidayan gaput’ saanna a pannakakita ti maysa a panggedan. Kalpasanna maysa kadagiti alerto a panglakayen iti kongregasionna ti nagsaludsod ken ni Emmanuel no tarigagayanna ti sabali a kita ti trabaho. Wen, dayta ti sungbatna, ta dina kayat a palubosan ti propesional a kinatangsit a makatuben iti dalanna. Ti panglakayen ti nakisarita kadagiti gagayyemna ket nakasarak iti trabaho nga agpaay ken ni Emmanuel kas maysa nga attendant ti ospital. Nagsayaat ti naaramidanna iti daytoy a trabaho ket nakatulong pay met kadagiti dadduma nga adda iti kongregasion.
17. Kasano ti pannakatulongyo ti maysa a kabsat a lalaki nga adda idiay ospital? (Salmo 41:1-3)
17 No ti pada a Kristiano adda iti ospital wenno ti pagtaengan a pagtaraknan, addada dagiti naisangsangayan a gundaway a makatulong. Ditoy manen, nasken ti napasnek nga interes ken pannakaseknan. Mabalin a maipakitayo dagitoy babaen ti kinatulokyo a mangibasa iti pasiente kadagiti makapabileg a Nakristianuan a pagbasaan wenno ti panangisalaysay kadagiti makaparegta a kapadasan. Ngem, addada kadi dagiti pisikal a pagkasapulan a mabalinyo a pakatulongan? Kadagiti dadduma a luglugar, dagiti pagpaagasan nakapompunnoda unay a gapu iti dayta ti maysa a pasiente ket saanen a madigdigos wenno matartaraonan malaksid no daytat’ aramiden ti maysa a bisita. Gapuna, no umanamong dagiti doktor, mabalin nga iyeganyo ida kadagiti makapasalun-at a taraon wenno tulongan ida a makadigos wenno magulgolan ti buokda. Maapresiar kadi ti maysa a nabara a bata de banio wenno tsinelas? (2 Timoteo 4:13) Wenno mabalinyo kadi ti mangitukon iti tulong a mangaywan kadagiti dadduma a bambanag a pagaburiduan ti pasiente? Mabalin a pakaseknanna no kasano ti panangipasukat ti tsekena ken pannakabayad dagiti ut-utangna. Mabalin a makaipaaykayo ti makapabang-ar a tulong babaen ti panagaramid uray kadagiti simple a bambanag nga agpaay kenkuana, kas ti panangipasiguro a dagiti sursurat ket saanda a matambak idiay balayna, a masibugan dagiti mulmulana, wenno uray laeng ti panangiddep iti urno.
18. Aniat’ determinado nga aramidenyo maipapan kadagiti kakabsat nga adda pagkasapulanda?
18 Awan duadua, tunggal maysa kadatayo ti makakita kadagiti pamay-an a mabalin a pangparang-ayantayo iti panangaramid iti ad-adda pay ngem basta panagkuna, “Aginudo ken agbussogkayo.” (Santiago 2:16) Panunotenyo dagiti kakabsat a lallaki ken babbai nga adda iti kongregasionyo. Mabalin kadi nga addada dagiti sumagmamano a maikari a pudpudno a makasapul iti material a banag, masakit, adda pakarigatanna, wenno naidalit iti pagiddaan? Aniat’ maaramidanyo a praktikal a pamay-an a panangtulong kadagitoy nga inay-ayat a kamkameng ti kongregasionyo a nakatayan ni Kristo? Ti kaadda daytoy a kababalin ti makatulong kadakayo a makapagsagana a nasaysayaat nga agtignay nga insigida no rumsua dagiti pakarigatan.
19. (a) Apay a ti kinatimbeng nasken unay iti daytoy a banag? (b) Aniat’ kadadakkelan a pagimbagan a maaramidantayo nga agpaay kadagiti dadduma, ken apay a pudno daytoy? (Salmo 72:4, 16)
19 Babaen ti panangipakattay ti bagbagitayo a mangbadang kadagiti kakabsattayo pampaneknekantayo a ti pammatitayo ket saan a natay. Dayta met laeng a pammati ti mangtignay kadatayo nga agtrabaho a sigagaget iti Nakristianuan a panangasaba. Kasapulan ti intay panangtaginayon ti kinatimbeng iti panangtulong kadagiti dadduma iti namaterialan ken ti regular a pannakiraman iti Nakristianuan a panagebanghelio. (Idiligyo iti Mateo 15:3-9; 23:23.) Ti balakad ni Jesus kada Marta ken Maria iparangarangna dayta a kinatimbeng. Kunana a no ti maysa a tao tingtingitingenna dagiti namaterialan nga abasto a mainaig iti naespirituan a taraon, ti naespirituan a taraon “ti nasayaat a bagi,” a dinto maikkat wenno mapukaw. (Lucas 10:39-42) Dagiti masakit ken dagiti napanglaw ti kanayonto nga adda iti daytoy a sistema dagiti bambanag. Mabalinantayo, ken rebbeng a makaaramidtayo ti naimbag a bambanag nga agpaay kadakuada. (Marcos 14:7) Kaskasdi, ti kasayaatan ken ti napapaut a makaited ti pagimbagan a maaramidantayo isu ti panangisuro kadagiti dadduma maipapan iti pagarian ti Dios. Dayta ti nangipamaysaan ni Jesus. (Lucas 4:16-19) Daytat’ pamay-an a pakaawatanto dagiti napanglaw, dagiti masaksakit, dagiti marigrigatan iti permanente a pakabang-aran. Anian a rag-o ti panangtulong kadagiti kakabsattayo ken kadagiti dadduma a mangisadag ti namnamada iti Dios ken tapno “makakapet a naimbag iti pudpudno a biag.”—1 Timoteo 6:17-19.
Malagipyo Aya?
◻ Aniada dagiti kapapatgan unay a “naimbag nga ar-aramid” a maaramidan ti kongregasion Kristiano?
◻ Kasano a makaipaay dagiti lokal a panglakayen ti natimbeng nga atension kadagiti “naimbag nga ar-aramid” maipapan kadagiti namaterialan a kasasaad dagiti kakabsatda?
◻ Ania dagiti praktikal nga addang a mabalin nga alaen dagiti panglakayen?
◻ Ania dagiti praktikal a bambanag a mabalin nga aramidenyo a mangtulong kadagiti kakabsatyo a lallaki wenno babbai nga adda iti pagkasapulan?
[Kahon iti panid 17]
Adda Panagayat ti Kongregasion
Maysa a pagasawaan nga immakar iti maysa a bassit a kongregasion nga adda kadagiti aw-away ti nangted iti daytoy a report a mamagpanunot:
‘Tallo a tawen ti napalabasen siak ken ni baketko ti nangilako ti pagtaenganmi ket immakarkami iti adayo a kongregasion a kasapulan ti nataengan a tulong gapu ta adda sumagmamano a parikut. Di nagbayag adda uppaten nga akem nga ay-aywanak. Inayatmi dagiti kakabsat ket kayatmi ti makipagtrabaho a kaduada. Iti panaglabas dagiti sumagmamano a bulan rimmang-ay ti espiritu ti kongregasion, ket dua a nagsasayaat a panglakayen ti immakar met.
‘Mangrugi a maaddaan ti parikut maipapan ti salun-at ni baketko, ket idi napan a tawen kasapulanna ti mayor nga operasion. Iti aldaw a simrek iti ospital, nagsakitak met ti hepatitis. Dua a bulan laeng kalpasanna, naikkatak manipud iti trabahok gapu iti panagdakes unay ti ekonomia iti dayta a lugar. Naibusen ti kuartami, awananak iti trabaho, ket agpadpadakami nga agpapaungar pay iti salun-atmi. Maldaanganak gapu ta mapasungadan ti kumbension distrito ket addaanak ti paset iti programa. Addaanak met iti trabaho iti asamblea sirkito iti sumaganad a dua a lawas. Ngem gapu ta awan ti kuartami, awan aniaman a mapanunotko no kasano ti pannakagun-odko kadagitoy wenno uray pay ti panangaywan ti pamiliak. Maysa nga agsapa rimmuar ni baketko iti tay-ak ti pangasabaan, ket nagtugawak tapno repasuek ti adda a kasasaadmi.
‘Idi kumitkitaak iti ruar ti tawa, sinaludsodak ti bagik, Sadino ti yan ti panagtalekko ken ni Jehova? Imbagak ken ni baketko idi a di agdanag, ngem itan siak metten ti mangrugi nga agduadua. Iti dayta inyebkasko ti “bassit a pammatik” ken ni Jehova ket nagpakpakaasiak kenkuana a maipaay iti tulongna. Idi malpasak nga agkararag, maysa a kabsat a lalaki ti timmuktok iti ruangan. Kayatna a kumuyogak kenkuana iti ruar nga agkape. Inlawlawagko a nasaysayaaten a diak a rummuar, ta addaanak ti paset a maipaay ti gimong nga aramidek iti dayta a rabii. Ngem isut’ napilit, a kunana a sumagmamano a minuto laeng. Gapuna napankami. Nagsublikami kalpasan ti kagudua oras, ket idi a rummuarak iti kotsena nasaysayaat bassit ti panagriknak.
‘Idi sumrekak iti balay, nadlawko a ti lamisaan idiay kusina ket napunno kadagiti groseria. Pagarupko no napan naggatang ni baketko. “Ngem aguray, kasano nga aggatang, idinto nga awan ti kuartami.” Kalpasanna nakakitaak ti maysa a sobre. Mabasa iti pammarangna:
‘“Manipud kadagiti kakabsatyo, nga agayat unay kadakayo. Dikayo mangikabkabil iti aniaman iti daytoy iti kahon ti kontribusion. Daytan ti naaywanan nga agpaay kadakayo.”
‘Diak a mamedmedan dagiti luak. Nalagipko “ti bassit a pammatik,” ket dayta ti ad-adda manen a namagsangit kaniak. Kalpasanna simmangpet ni baketko. Intudok latta dagiti taraon ken dagiti dadduma a regalo. Isut’ nakasangit met, agraman dagiti dua a kakabsat a babbai a kimmuyog kenkuana. Pinadpadasmi nga inlawlawag a dikami mabalin nga awaten ti kasta unay a kadakkel, ngem dagiti kakabsat a babbai ti nangibaga kadakami nga awan ti makaammo no asino ti nangted iti ania kadagita. Ti intero a kongregasion addaan ti paset, ket kayatda nga aramiden dayta agsipud ta patienda a sinursuruanmi ida no kasano ti panangted kadagiti dadduma. Daytoy ti nangiyeg ti ad-adu manen a panaglua!’
Kamaudiananna, idi insuratna daytoy a salaysay, simmayaat met laengen ti pagtrabahuan ti kabsat a lalaki. Isu ken ni baketna makiramramanda iti serbisio kas auxiliary a payunir.
[Kahon iti panid 18]
Pammaneknek ti Nakristianuan nga Ayat
Maysa a kongregasion dagiti Saksi ni Jehova idiay lumaud nga Estados Unidos ti naipasango iti naisangsangayan a kasasaad a nangipalubos ti panangiparangarangda iti Nakristianuan nga ayat, kas nairekomendar iti Kasuratan. Idiay teritoriada, ti estado ti nangilukat ti maysa a sentro a mangaywan kadagiti napalalo ti pannakabaldada a biktima iti cerebral palsy. Maysa kadagiti umuna nga agtataeng iti sentro isu ni Gary, 25 años, a saanen a maaywanan iti pagtaenganda. Ti sakit ti namagbalin kenkuana a quadriplegic, ket apektado met ti panagsaona.
Ni Gary maysan a nabautisaran a Saksi iti piton a tawen. Naminsan idiay baro a sentro, kayatna ti tumabuno iti gimong iti lokal a kongregasion. Dagiti dadakkelna ti saan unay nga adayo ti pagtataenganda, ket iti sumagmamano a tiempo isut’ iyegda iti gimong. Ngem gapu iti kalakay ken kabaketdan, dadduma a kakabsat ti kongregasion ti nangrugi a tumulong. Maysa ti addaan ti van. Gapuna isu, ti asawana, ken dagiti dua a babbalasangda agsaganada ket pumanawda iti balayda 45 minutos sakbay ti gimong tapno mabalinda a dagasen ni Gary. Kalpasanna isunto ti isublida idiay sentro, gapuna naladawto metten ti pannakaawidda.
Ngem adda maysa a banag a mapaspasamak idiay sentro. Dadduma kadagiti biktima ti cerebral palsy nangiparangarangda met iti interes iti kinapudno iti Biblia. Di nagbayag addan dua a nangawat iti panagadal ti Biblia. Kamaudiananna, dadduma nangipakitada met ti interes. Kasano ti pannakaiyegda amin iti panaggigimong? Sabali pay a pamilia iti kongregasion ti gimmatang ti maysa a van, ket ti negosio a kukua ti maysa kadagiti lokal a Saksi ti nangipaay iti maikatlo a van. Kaskasdi, dagitoy a pamay-an no maminsan ti saan nga umanay wenno inkumbiniente. Makaaramid pay kadi ti kongregasion ti ad-adu pay?
Napagsasaritaan dagiti panglakayen daytoy ket naisingasing a maysa a dakdakkel a lugan ti magatang a mangipan ken mangiyawid laeng kadagiti marigatan a mapan ken agsubli manipud panaggigimong. Immanamong ti kongregasion ket siraragsak a timmulongda. Dadduma kadagiti Saksi manipud kadagiti arubayan a luglugar nangngegda daytoy a proyekto ket timmulongda met. Nangalada ti maysa a van ket dayta ti tinarimaanda tapno mabalin met a mailugan dagiti wheelchair wenno tugaw nga adda pilidna iti unegna.
Itan, kada bulan nagduduma a Panagadal ti Libro ti Kongregasion ti makiramraman iti panangimaneho iti van a mapan kadagiti gimong ken asamblea. Lima manipud iti sentro ti cerebral palsy ti regular a tumabtabuno. Uppat kadakuadan ti bautisado a Saksi. Isuda ti pagaammo ken inay-ayat dagiti adu a kakabsat a lallaki ken babbai a laklak-amenda ti ragsak ti itutulong. Kasano? Babaen ti panangiggem ti libro a pagkantaan ken panagsapul kadagiti kasuratan bayat dagiti gimong. Kadagiti asamblea sirkito ken kumbension distrito tumulongda pay a mangtaraon ken mangaywan kadagidiay saanda a maaramid daytoy nga agpaay kadagiti bagbagida. Daytoy ti namataud iti ayan-ayat iti maysa ken maysa a pudpudno a makaparagsak. Ket komosta met ni Gary? Itan agserserbin kas maysa a ministerial nga adipen iti daytoy a kongregasion a nangted ti kasta unay a pammaneknek iti ayatda.—Aramid 20:35.