Report dagiti Manangiwaragawag ti Pagarian
Dagiti Napalawaan a Pasdek a Mangbagay iti Idudur-as ti Pagarian
TI ALDAW ti dedikasion iti nabiit pay a napalawaan a pasilidades ti sanga dagiti Saksi ni Jehova ket maysa a nakaragragsak unay nga aldaw idiay isla ti Jamaica sadi Caribbean. Daytoy a panangpalawa ti nagbalin a nesesita gapu iti bendision ni Jehova iti matalek a panagregget dagiti kakabsat iti trabaho a panangikaskasaba ti naimbag a damag iti daytoy nagpintas a tropikal a puro.
Maysa a pagtaengan dagiti misionero ti naipasdek idiay Jamaica idi pay 1946. Babaen iti panangidaulo dagiti misionero iti trabaho, ti idudur-as dagiti agibumbunannag ti nakaparpardas, gapuna iti sangapulo laeng a tawen ti promedio a bilang dagiti Saksi nga agrepreport a binulan ti rimmang-ay manipud 732 agingga iti 3,216. Tapno maaywanan ti idudur-as, nagbalin a nesesita ti panangiyurnos kadagiti baro a pasilidades.
Idi 1954 nagun-odan ti kalalainganna a daga ket nairugi ti panagbangon a maipaay iti natibker a baro a dua-grado a patakder iti naulimek a paset ti Kingston. Daytat’ nakompleto idi Mayo 1958. Dagiti bilang dagiti agibumbunannag iti dayta a tawen ti dimmanon iti kangatuan a bilang a 4,367.
Nagtultuloy ti ‘panagmula’ ken ‘panagsibug’ ket ni Jehova “intedna ti idadakkel,” gapuna idi 1983 ti bilang dagiti agibumbunannag rimmang-ay iti nasurok a 7,000, a nangpartuat ti pannakasapul ti ad-adda manen a panangpalawa. (1 Corinto 3:6) Ti Komite ti Sanga, babaen ti anamong ti Bagi a Manarawidwid, naikeddengda a palawaen dagiti agdama a pasdek. Nasurok a 250 a kakabsat manipud intero nga isla ti immay timmulong. Dagiti nasigo ken di nasigo a trabahador imboluntarioda dagiti serbisioda kas dagiti kantero, karpentero, elektricians, ken tubero. Ti edadda ket manipud 10 ingganat’ 86. Dadduma timmulongda a pinansial iti proyekto, dadduma nangitedda kadagiti taraon a maipaay kadagiti trabahador, ket kaskasdi dagiti dadduma linuktanda dagiti pagtaenganda tapno mangipaay iti pagdagusan dagiti boluntario a naggapu kadagiti adayo a luglugar. Ti maysa a tawen ti proyekto, a buklen iti panangnayon iti maikatlo a grado a lima a kuarto ken ti lugar a paglinglingayan, maysa a kuarto iti maikadua a grado, ken 400 pie kuadrado (37 m kd) a bodega, ti nairingpas, a sisasaganan nga usaren dagiti 11 a miembro ti pamilia ti Bethel.
Ni Milton Henschel, a kameng ti Bagi a Manarawidwid dagiti Saksi ni Jehova ti nangted ti palawag ti dedikasion idi Pebrero 22, 1986. Isut’ nagpalawag maipapan iti tema a “Ti Naballigi a Prosesion.” (2 Corinto 2:14) Dagidiay nagimdeng iti programa ti dedikasion ti nagdagup iti 2,949. Kadagitoy 380 ti adda idiay Kingdom Hall ken iti dadduma a paset ti patakder, ket dagiti dadduma naisilpoda babaen kadagiti telepono ken radio kadagiti dadduma a Kingdom Halls iti siudad ken iti auditorium ti eskuelaan.
Kaaduan kadagiti naawis iti Kingdom Hall idiay sanga ket isu dagiti kakabsat a lallaki ken babai nga addan iti kinapudno bayat iti 30 a tawtawen wenno nasursurok pay. Adu nga ebkas ti panangipateg ti nangngegan gapu iti nagsayaat a nainayon iti patakder. Namnamaenmi nga adu pay ti “dakkel a bunggoy” dagiti “sabsabali a karnero” a maitipon pay iti narang-ay a prosesion bayat a maus-usar dagiti baro a pasilidades ti sanga a mangaywan iti irarang-ay ti Pagarian idiay Jamaica.