Panagtalinaed a Nasinged iti Organisasion ni Jehova

Kas salaysayen ni John Barr

ADDAAK iti maudin a paset ti isasarungkarko idiay ilimi maysa a tawenen ti napalabas idi napalabas a Hunio, a nagtayab manipud Glasgow nga agturong idiay Aberdeen. Idi kumalay-at a nakangatngato ti eroplanomi iti ngato ti nakaberberde nga Scottish nga aw-away ken iti ngato ti nabannayat ti panagay-ayusna a karayan Clyde, dagiti pampanunotko naggarasugasda a nagsubli idi tawen 1906 ken iti dayta nagbassitan a purok ti Bishopton, a nagsaad iti maysa a disso idiay baba sadiay abagatan ti karayan.

Ammoyo, dayta ti tawen ken lugar a nangrugi ni apongko a baket a ni Emily Jewell a binasa ti libro ni Charles T. Russell a, The Divine Plan of the Ages. Dagdagus nalukatan dagiti matmatana iti kinapudno a ti Biblia dina isursuro ti doktrina ti impierno nga apuy. Di nagbayag dua kadagiti natataenganen a babbalasangna a da Bessie ken Emily (ti maud-udi isu ti nagbalin a nanangko) ti nangrugi metten a makakita ti lawag ti kinapudno a sumingsingising a limsut kadagiti angep ti ulbod a doktrina nga insursuro ti United Free Church of Scotland. Idi 1908 nabautisaran ni apong a baket kas simbolo ti dedikasionna a mangaramid ti pagayatan ti Dios, ket di nagbayag nabautisaran met dagiti babbalasangna.

Ni tatangko ket isu ti eskribiente ti sesion iti isu met laeng nga United Free Church idiay Bishopton. Isu ti kanayon a marigatan a mangawat iti doktrina ti Trinidad, gapuna ti ministro ti simbaan ti nangitukon a mangikasaba iti espesial a sermon a maipaay a pakagunggonaanna iti maysa a Domingo. Ket isu metten dayta! Idi mangngeganna ti nairanta a panangisalaysay, kumbinsido itan ni tatangko a ti doktrina a Trinidad ket ulbod. Isu immikkat manipud iti iglesia ket nabautisaran idi 1912 kas simbolo ti dedikasionna ken ni Jehova. Di nagbayag kalpasanna immakar dagiti dadakkelko idiay Aberdeen a kadua dagiti dua nga annakda, ni Louie ken James, ket naiyanakak sadiay idi 1913.

Dagiti pampanunot maipapan kadagidiay nasapa a tawtawen ken maipapan iti panagregget dagiti dadakkelko a mangpadakkel kadakami a tallo nga ub-ubbing “iti pannursuro ken panangiturong-panunot ni Jehova” ti nagtalinaed kaniak idi a mangrugin nga agpababa ti eroplanomi iti ngato dagiti turturod, dagiti karayan, ken dagiti gingginget a naam-ammuakon nanipud pay kinaagtutubok. (Efeso 6:4) Iti daytoy nagpintas a nakalawlawag nga agsapa, anian ti panagyamyamanko ken ni Jehova a maipaay iti dayta a panangsanay dagiti dadakkelko! Ammok a daytat’ nakatulong iti kankanayonen a panagtalinaedko a nasinged iti organisasion ni Jehova.

Ti Pateg ti Nasapa a Pannakasanay

Ti pamiliami ti kanayon a maysa a naragsak a nagkaykaysa a pamilia. No adda man ti di pagkinnaawatan da Tatang ken Nanang iti panangmatmatda, pinadpadasda a di pulos ipakpakita daytoy iti sanguananmi nga annakda. Daytoy ti namataud saan laeng a panagraemmi kadagiti nagannak kadakami no di ket kasta met ti maysa nga aglawlaw nga addaan ti pudpudno a talna ken talged iti uneg ti pagtaenganmi.

Ti sumagmamano kadagiti il-iliwek a pakalaglagipan ti naisentro iti panagtataripnong ti pamiliami kada rabii. Dakami ti mangipapaay kadagiti bukodmi a paglinglingayan, ar-aramidenmi dagiti bambanag a kas ti panagkanta a mabuyogan dagiti musikal a panangkumpania ken panagay-ayam kadagiti ay-ayam kas ti Monopoly. Kasta met, nupay kasano ti kinaokupado ni Tatang, di pulos napaay a mangbusbos iti sumagmamano a tiempo kadakami iti ngangngani tunggal aldaw, a mangibasbasa a sipipigsa manipud iti Biblia ken kadagiti publikasion ti Watch Tower, agraman kadagiti dadduma a literatura nga agpadpada a nalaka nga awaten ken dagidiay ad-adda pay a serioso a pagbasaan. Amin dagitoy nagserbida a namagtalinaed a nasinged iti pamiliami bayat iti panagdakkelmi.

Dakami met ti kakaisuna a pamilia ti “kinapudno” iti dayta umamianan a deppaar ti Scotland kadagidiay immuna a tawtawen. Kas resultana, ti pagtaenganmi ti nagbalin a nalatak kadagiti adu nga agdaldaliasat a pannakabagi ti Watch Tower Society (a maaw-awagan idi a dagiti pilgrims), kas ken ni Albert Lloyd, Herbert Senior, ken ni Fred Scott. Dadduma naggapuda pay manipud hedkuarters ti Sosiedad sadi Brooklyn, Nueva York, agraman ni W. E. Van Amburgh ken ni A. H. Macmillan. Dagitoy a panagsarungkar iti kasla dagiti miliahe kadagiti immuna a tawtawenko.

Agingga itoy nga aldaw siyayamanak iti pudpudno nga espiritu ti kinamanagpadagos nga impakita dagiti dadakkelko. Daytoy ti nangpabaknang ti panagbiag ti pamiliami, ken nupay agtutuboak pay rinugiakon a palawaen ti panangipategko iti intero nga asosasion dagiti kakabsat. Ay, anian a nagdakkelan ti maaramidan dagiti nagannak a mangsukay iti nabara a singgalut ti ayat dagiti annak ken iti sangalubongan nga asosasion dagiti kakabsatda!

Panangsaranget iti Personal a Parikut

Idi a makagtengakon iti nasapa a kinaagtutubok, nagbalinak a napalalo ti kinamanagbabainko ken ti panagpakpaknik nga ubing. Bayat a dumakdakkelak ad-adda met a rumigrigat ti innak pannakilangenlangen kadagiti tattao ken ti pannakipatpatang kadakuada. Daytoy a kinamanagbabain ti nangted dakkel a lapped kadagiti adu a pamay-an ngem nangnangruna no maipapan iti panangpaneknekko ti pammatik babaen ti panangikaskasaba ti naimbag a damag ti Pagarian.

Di nagbayag kalpasan ti Gubat Sangalubongan I, ni apongko a baket ken ni nanang nagbalinda nga immun-una a Saksi idiay Aberdeen a nakipaset iti trabaho a panagbalaybalay. Dakami nga ub-ubbing ti nakiraman iti panagiwaras kadagiti polieto, ngem ita para kaniak ti aktual a pannakisarita kadagiti tattao kadagiti pagtaenganda​—apay, daytat’ maysa a banag a naiduma! Daytat’ pudpudno a karit. Ngem daytat’ nasarangetko met laeng iti kamaudiananna. Diak pulos maliplipatan dayta a malem ti Domingo idi Nobiembre 1927 idi imbagak ken ni tatangko nga isu ti kuyogek iti ministerio a panagbalaybalay. Daytat’ damdamo a pannakakitak ti lulua kadagiti pingping ni tatangko​—lulua ti ragsak iti daytoy a kaso!

Ti Trahedia ti Pamilia Inapektarannak

Ti kinatalinaay ti panagbiag ti pamiliami ti nawarawara idi rabii ti Hunio 25, 1929, idi agtawenak iti 16. Kalpasan ti maysa nga aldaw iti ministerio, aggangganat nga agawid da nanangko ken ti kabsatko a babai tapno isaganaan ti pangmaleman ni tatang. Kellaat, ti nakaparpartak a motorsiklo ti nangdungpar ken ni Nanang, nga isu ti nangiguyod kenkuana iti lansangan iti agarup 40 yarda (37 m). Nagkaro dagiti pannakadunorna iti ulo ta isut’ di manamnama nga agbiag. Ngem pagyamanan iti adu a bulan a naayat a panangtaraken ni kabsatko a Louie, ket nakalasat. Idi agangay, nabalinan ni Nanang ti naaddaan ti normal a panagbiag agingga iti ipapatayna idi 1952.

Dayta nakalkaldaang a kapadasan ti nakaaramid iti nakapatpateg unay a banag kaniak​—dayta ti nangtignay kaniak a mangmatmat a sisiserioso iti panagbiagko ken no aniat’ ar-aramidek iti dayta. Dayta a kalgaw rinugiak nga adalen a siinget pay ti Biblia ngem kadagiti napalabas​—tinagikuakon ti kinapudno. Daytoy ti dakkel a nagbalbaliwak, ket indedikarko ti biagko iti serbisio ni Jehova. Nupay kasta, idi laeng sumagmamano a tawen iti kamaudiananna a naaddaanak iti gundaway a nangisimbolo iti dedikasionko babaen iti bautismo iti danum.

Iseserrek iti Amin-Tiempo a Serbisio

Iti panagleppasko iti panagadal idi 1932, simrekak iti kurso a panagsanay iti mekanikal ken elektrikal nga enhenieria. Idiay Britania kadagidiay nga al-aldaw, awan ti pammaregta nga adda itatta para kadagiti agtutubo a sumrek iti amin-tiempo a panangaskasaba kas payunir. Kaskasdi, bayat ti panagtultuloy dagiti tawen, ammok no sadino ti rebbengko a pangusaran ti pigsak​—ti amin-tiempo a ministerio.

Malagipko pay a silalawag ti maysa a banag a napagadalanmi idi karrugi iti 1938 a nangipaganetget kaniak kadagiti gunggona iti panagtalinaed a nasinged iti organisasion ni Jehova ken iti personal a panangiyaplikar kadagiti pannursurona. Isu dayta ti ruar ti magasin a Pagwanawanan maipapan ken Jonas a nangilawlawag kadagiti kapadasan a linasatna idi nagtaray manipud iti nakaitudinganna a serbisio. Impapusok a naimbag daytoy a leksion, a naikeddengko iti panunotko a diak pulos tungdayen ti aniaman a maituding kaniak nga aggapu iti organisasion ni Jehova. Bassit ti pamalatpatak iti no kasano ti kaadu dagiti nateokratikuan a serbisio nga agur-uray kaniak iti masanguanan a mangsuot iti daytoy a pangngeddengko.

Nagkararagak iti pannakaiwanwan, ket immay ti sungbat babaen iti maysa a kellaat a surat manipud hedkuarters ti Sosiedad idiay Londres, a salsaludsodendak nga usigek ti panagbalinko a kameng ti pamilia ti Bethel. Sigagagar nga inawatko ti gundaway a sumrek iti dayta dakkel a ruangan nga agturong kadagiti dadakkel a pribilehio iti serbisio. Gapuna, idi Abril 1939 nasarakak ti bagikon a makipagtartrabaho iti sibay ni Harold King, a kamaudiananna nagserbi kas misionero idiay China ket, gapu iti panangaskasabana, nangbusbos iti adu a tawen iti komunista a pagbaludan. Nagtartrabahokami iti panangsangal kadagiti makina a pagirekord kadagiti palawag ken kasta met dagiti ponograpo a nausar a pagpatokaran kadagiti naiplaka a sermon iti ruruangan ti pagtaengan dagiti tattao.

Siak ken ni Harold ti nangar-arapaap kadagiti amin a nagduduma a kita dagiti tattao a makangngegto iti mensahe ti Pagarian babaen iti aruaten nga ar-aramidenmi. Iti daytoy a pamay-an dikam pulos napukpukaw ti pannakakita iti bunga ti trabahomi. Nanipud idin, kadagiti amin a nagduduma a naituding a trabaho nga inawatko idiay Bethel, nagreggetak a sinalimetmetan daytoy a panangmatmat. Daytoy ti namagbalin a pudpudno a ragsak iti trabahok ken kanayon a napnuan kaipapanan a nainaig iti trabaho a panangikaskasaba ti Pagarian.

Dagiti Pribilehio ti Serbisio

Di nagbayag kalpasan ti idadatengko idiay London Bethel, nadutokanak a kas company servant (a maaw-awagan itan ti mamangulo a manangaywan) iti kongregasion nga addaan nasurok 200 nga agibumbunannag. Kasakbayan dayta, maysaak a manangaywan iti kongregasion a sangapulo laeng dagiti agibumbunannag! Kalpasanna siak ti naikabil nga enkargado iti Sound Department a maipaay iti nakaskasdaaw a kumbension iti intero a pagilian a naangay idiay Leicester idi 1941. Agingga iti daytoy a tiempo, addaanak laeng ti limitado a kapadasan maipapan iti sound.

Kalpasanna siak ti naituding iti trabaho nga agdaldaliasat kas adipen kadagiti kakabsat, nga isu itan ti maaw-awagan manangaywan ti sirkito. Addada laeng innem kadagita nga ad-adipen idiay Britania idi Enero 1943. Ti trabahok ti agpaay laeng iti makabulan, ngem daytat’ nagpatingga iti innak panangsarungkar kadagiti kongregasion iti nasurok a tallo a tawen. Kabayatan dagidiay met laeng narigat a tawtawen ti Gubat Sangalubongan II, siak ti nangaywan kadagiti tallo a dadakkel a kumbension​—banag a diak pay naar-aramidan kasakbayanna.

Ti trabaho a panagdaliasat kadagidiay nga al-aldaw ti naiduma bassit manipud iti adda a maar-aramid itatta. Dakami ti kanayon nga umak-akar, ket ti panagdaliasat iti intero a Britania kadagidiay a tawtawen iti gubat ket no maminsan ti nagrigat unay. Iti nasursurok a maysa nga okasion, siak ti agtungpal nga aglugan iti bisekleta iti dadduma a paset ti panagdaliasat iti nagbabaetan dagiti kongregasion. Imbes a mangsarungkar ti maysa a kongregasion iti maysa a lawas, kas ar-aramiden dagiti agdaldaliasat a manangaywan itatta, no dagiti kongregasion ti babassit, dakami ti mangsarungkar ti agingganat’ innem kadakuada iti maysa a lawas!

Adtoy ti maysa nga eskediol iti gagangay nga aldaw: Agriing iti alas singko y media; kalpasan ti panagalmusar, agdaliasaten nga agturong iti sumaganad a kongregasion tapno rugian a sukimaten dagiti rekord ti kongregasion iti alas otso. Ti malem ti masansan mabusbos iti tay-ak ti ministerio, a daytoy ti sarunuen iti maysa-oras a miting iti rabii a kadua dagiti ad-adipen iti kongregasion ken kalpasanna ti palawag ti kongregasion. Mammano a siak ti makapagiddaak iti rabii sakbay ti alas 11, wenno naladladaw pay no isuratko ti report iti dayta nga aldaw maipapan iti kongregasion iti dayta met la a rabii. Tunggal Lunes ti nailasin a mangkompleto ti report nga agpaay iti dayta a lawas, nga agpaay iti personal a panagadal, ken aniaman a trabaho a panagsagana nga ipaay ti sumaganad a lawas.

‘Okupado unay nga eskediol ti lawas,’ kunayo kadi? Wen, pudno dayta, ngem ay, anian a makagunggona a marikna a pabpabilgenmi dagiti kakabsat bayat dagitoy a tawtawen ti gubat idi saan a kanayon nga adda iti isu met laeng a nasinged a pannakaiyasideg iti organisasion! Iti literal unay a kaipapananna, naaddaankam ti pannakapnek iti panagrikna a tultulonganmi ti kongregasion “a mapabileg ti pammati”​—Aramid 16:5.

Panagsubli iti Serbisio Idiay Bethel

Naikalikagum ti panagsublik iti serbisio iti Bethel idi Abril 1946. Maragsakanak a mangaramid iti dayta, ngem mariknak a nabaknang unay ti biagko iti naespirituan kas resulta dagidiay tallo ket kagudua a tawen iti trabahok a panagdaldaliasat. Ti organisasion dakdakkel ti kaipapananna itatta kaniak, ket patiek a kasla ar-aramidek ti nailadawan iti Salmo 48:12, 13: “Sumibsibayka iti Sion, ket likmutem ti ar-arubayanna, bilangem dagiti baluartena. . . . Utobem dagiti palasiona.” Ket ti panagakar-akar nga ad-adda iti tengnga ti ili ti Dios ti nangpadakkel iti panagayatko “iti intero nga asosasion dagiti kakabsat.”​—1 Pedro 2:17.

Kalpasan ti panagsublik idiay Bethel, naaddaanak ti pribilehio a mangaywan iti kaaduan iti panagimaldit a maar-aramid iti pagimalditan idiay Londres ket iti kamaudiananna nakiramanak met iti trabaho a panagar-aramid iti plato a pagimprenta. Kalpasanna, idi Setiembre 1977 naaddaanak ti naisalsalumina a pribilehio nga agbalin a miembro ti Bagi a Manarawidwid dagiti Saksi ni Jehova, idiay Brooklyn, Nueva York, E.U.A.

Aminek a no maminsan kasla mariknak a kayatko ti ‘agtaray koma’ manipud dadduma kadagiti naririkut a trabaho a naited kaniak. Ngem no kasta malagipko ni Jonas ken ti biddut a naaramidanna, ket ulitek iti bagik ti nakaskasdaaw a kari a masarakan iti Salmo 55:22: “Iyallatiwmo ta awitmo ken Jehova, ket saranayennakanto. Dinanto ipalubos a magaraw ti nalinteg.” Anian ti kinapudno iti pannakakitak kadagitoy a sasao!

Ni Jehova nikaanoman di mangidawdawat iti asinoman kadatayo a mangaramid ti banag nga ammona a ditay kabaelan. Nupay kasta, babaen laeng iti pigsana a maaramidantayo ti kalkalikagumanna. Ken maysa pay​—no pudpudno nga inayatyo dagiti kakabsatyo a katrabahuanyo, suportarandakayo ken tulongandakayo, a makipagtrabahoda kadakayo “a situtunos” tapno tulongandakayo a mangitungpal iti naituding a naipabaklay a trabahoyo.​—Sofonias 3:9.

Dagiti Nasudi a Pannakirelasion

Kanayon nga addada sumagmamano a Kristiano a kakabsat nga addaankayo iti nasinged unay a pannakipagrikna. Maysa kadagitoy isu ni Alfred Pryce Hughes, a natay idi 1978. Ti estoria ti panagbiagna nagparang iti Abril 1, 1963, a ruar ti The Watchtower. Iti adu a tawtawen isut’ nagserbi kas ti manangaywan ti sanga, ken kalpasanna kas miembro iti Branch Committee coordinator. Isu ti ingungoten unay dagiti kakabsat iti tay-ak ti Britania gapu iti dakkel a panagraemna iti organisasion ni Jehova ken kinasungdona iti dayta ken ti ayatna kadagiti isuamin a kakabsat. Maysa pay isu ti panagayatna iti tay-ak ti ministerio. Di pulos kimmapuy daytoy iti intero a panagbiagna, agpapan pay aniaman a responsabilidad nga imbaklayna. Ti pannakipagtrabaho a kaasibay dagiti matalek a kakabsat a kas ken ni Pryce dakkel ti kaipapananna kaniak, nga isut’ nangpabileg iti determinasionko nga agtalinaed a nasinged iti organisasion ni Jehova ken agtalinaed nga aktibo iti ministerio.

Idi Oktubre 29, 1960, simrekak iti naisangsangayan a nasudi a pannakirelasion iti maysa a nabayagen a naregta a payunir ken misionero iti maika-11 a klase ti Gilead, nga isu idi ti agserserbi idiay Ireland. Iti dayta a petsa ni Mildred Willett ken siak ti nagasawa, ket nanipud idin isun ti matalek a mangsupsuportar kaniak iti serbisiok iti Bethel.

Sakbay ti ipapatay ti nanang ni Mildred idi 1965, binagbagaanna ti balasangna nga isu koma ti “di agimon ken Jehova.” Kanayon a malaglagip ni Mildred dagiti sasao ni nanangna, ket daytoy ti nakatulong kenkuana iti dina panagbalin a saan a kontento no masansan nga agtrabahoak iti overtime. Daytoy ti nakatulong iti dakkel kaniak a mangaywan a siraragsak iti aniaman a nainayon a trabaho a dimteng kaniak. Agpadpada a tinagiragsakmi unay ti makiramraman kadagiti adu a makagunggona a kapadasan iti ministerio.

Maysa nga agtutubo a pagassawaan a pangiyad-adalanmi iti Biblia, kas pangarigan, ti napartak irarang-ayda agingga iti punto ti dedikasion ken bautismo ken regular a makiramramanda iti ministerio. Maragsakankami unay! Ngem, giddato unay, iti awan gapgapuna, nagsardengdan a makitimtimpuyog. Siak ken ni Mildred ti napaay unay, ket pampanunotenmi no sadino ti nagbiddutanmi iti inkam panangsanay kadakuada. Masansan nga ikarkararagmi ken ni Jehova a luktanna pay koma ti puspusoda tapno mapaneknekanda ti ayatda iti kinapudno. Mailadawanyo aya ti ragsakmi idi immawatkami ti surat manipud iti daytoy a pagassawaan agarup sangapulo a tawen iti kamaudiananna a nangibagbaga nga aktiboda manen a makitimtimpuyog ket itan ti pagtaenganda maysan a sentro ti Panagadal ti Libro?

Nagsurat ti asawa a lalaki a ni Will: “Kayatko ti agyaman kenka kadagiti isuamin a tulong ken kinamanagayat nga impaayyo kadakami . . . Ti panagikayko ket basolko, ti panangapresiar ti pusok ket saan nga umiso . . . Maragsakankami unay iti pannakapagsublimi iti organisasion ni Jehova . . . Buyogen iti nakaay-ayat a laglagip a siak ti agsursurat ita a rabii, sapay koma ta itultuloynakayo a bendisionan ni Jehova iti serbisioyo kenkuana.”

Iti sabali pay a surat, maysa nga ina ti nagsurat maipapan ken barona a Mike: “Maragsakanak ta dagiti anghel ti nangipatugaw kenkuana iti sibayyo.” Ania ti kayatna a sawen? Bueno, kimmuyog ni Mike iti maysa a kumbension a kadua ni Nanangna ken ti ub-ubing pay a kabsatna a lalaki, ngem isu ti saan a talaga nga interesado iti kinapudno. Ni Mildred ti nakakita iti ubing nga agtugtugaw a bukbukodna ket isu ti nakisarsarita kenkuana. Kalpasanna isu ti inawismi ken ti adingna nga umay idiay London Bethel ket kitaenna ti trabaho nga ar-aramidenmi.

Kamaudiananna, immay ni Mike, ket ti nakitana ti nangparissik ti interesna tapno itultuloyna ti panagadalna iti Biblia. Ti resulta? Isu itan ti maysa a panglakayen iti kongregasion, ket ti asawana ken dua nga annak a lallaki aktiboda amin iti ministerio. Di pay nabayag nagsurat ti asawa ni Mike: “Ni [Mike] masansan a dakdakamatenna ti pannakiammona kadakayo a dua . . . Anian ti panagsiddaawna iti kinamanangngaasiyo ken interesyo kenkuana.”

No siak ken ni baketko ti umawat iti surat a panangapresiar manipud iti maysa a kas kada Will wenno ni Mike ta naaddaankami ti pribilehio a tumulong, dagiti puspusomi ti basta aglippias iti panagyaman ken ni Jehova! Anian a nagsudi a gunggona dagita kakasta a sibibiag a “sursurat ti rekomendasion”​—amin pasetda iti rag-o a naawat manipud panagtalinaed a nasinged iti organisasion ni Jehova!​—2 Corinto 3:1-3.

Panagserbi iti Sangalubongan a Hedkuarters

“Maysa a nasion a Kabukbukodanna.” Kasta ti panangiladawan iti editor ti maysa a pagiwarnakan iti Brooklyn Heights iti dakkel a pamilia a nasurok a 3,500 a Saksi nga agtataeng iti sangalubongan a hedkuarters dagiti Saksi ni Jehova sadi Brooklyn, Nueva York, ken iti Watchtower Farms,a masarakan agarup sangagasut a milia (160 km) ti kaadayona idiay makingngato a paset ti Nueva York. Pudno unay, dagiti pinulotan ni Jehova ti maysa a naespirituan a nasion iti imatang ni Jehova! Itatta, umariwekwek manipud kadagiti adu a nainlubongan a nasnasion ti um-umay ken kunaenda kadagidiay adda iti dayta a nasion: “Dakami kumuyogkaminto kenka, ta nangngegmi a ti Dios adda kenka.”​—Zacarias 8:23; 1 Pedro 2:9.

Patienyo aya, no anian ti ragsakko ken ni baketko nga agbalin a permanente a paset daytoy dakkel a pamilia ti Bethel? Kunaek nga awan panagalikakana a dagiti maudi a walo a tawen ti panagbiagko isut’ naisangsangayan pay laeng iti intero a nateokratikuan a kapadasak. Ditoy mariknayo ti pulso ti makitkita nga organisasion ni Jehova; ditoy ti pakaisagsaganaan ti naespirituan a taraon ket kalpasanna maipatulod kadagiti uppat a suli ti daga; ditoyyo a makita ti agtigtignay nga espiritu ni Jehova a mangiwanwanwan kadagiti napapateg a desision a rebbeng a maaramid. Ket ditoyyo a marikna nga ad-adda ngem iti sadinoman ti nagpupunipon a pammaneknek iti bendision ni Jehova iti trabaho a panangikaskasaba ti pagarian ken panagaramid ti adalan. Amin dagitoy nabiit pay a kapadasan ken kapampanunotan ti nangted kaniak iti kanayonan a pammaregta nga ad-adda nga agtalinaed a nasinged iti ili ni Jehova.

Naisalaysayko laeng ti sumagmamano a kapadasan ti panagbiagko. Nupay kasta, mabalin a natulongandakayo a mangawat no apay, idi nga agdisson ti eroplanomi idiay eropuerto ti Aberdeen iti dayta a nakaranranniag nga agsapa ti Hunio, agyamyamanak unay ken ni Jehova a kaskasdi maysaak pay laeng a paset iti naayat a sangalubongan nga asosassion dagiti kakabsattayo. Binusbosko ti panawen iti panagdaliasat iti tangatang a nanglaglagip kadagiti tawtawenko iti kinapudno, ket daytoy ti nangipalagip manen kaniak no kasano a makagunggona ti intay sagpaminsan panangulit kadagiti adu a bembendisiontayo manipud ima ni Jehova.​—Salmo 40:5.

Ni Louie, a kabsatko a babai, adda sadiay a mangabrasa kadakami​—a kaskasdi a matalek, naregta ken nasungdo kalpasan ti nasurok a 60 a tawtawen a dedikado a serbisiona ken ni Jehova. Agyamyamanak ken ni Jehova a maipaay iti dayta kanayonan a bendision, ta saan kadi a kinuna ni apostol Pablo a ti kinamatalek isut’ birbiruken ni Jehova kadagiti isuamin nga “adipenna”? (1 Corinto 4:2) Anian a dakkel a pammaregta ti maited iti maysa a miembro ti pamilia iti sabali babaen ti panagtalinaedna a matalek!

Naminsan inkararag ni Moises: “Iti kasta isuronakami a mangbilang kadagiti al-aldawmi tapno magun-odmi koma ti puso a manakem.” (Salmo 90:12) Bayat nga agmamataengankami ken ni Mildred, kanayon nga apresiarenmi ti pannakasapul ti panagsanggir iti kinasirib ni Jehova tapno mausarmi ti biagmi iti pamay-an a mangidemonstra iti ayatmi kenkuana ken kadagiti kakabsatmi. Siaayat nga ipakpakita ni Jehova kadakami dayta a dalan tapno agtalinaedkami a nasinged iti organisasionna.

[Ladawan iti panid 28]

Ni John Barr (makingkannigid iti sanguanan) idi agarup tawen 1930; a kaduana ti kabsatna a babai, ti kabsatna a lalaki, ken dagiti dadakkelda

[Ladawan iti panid 31]

Ni John Barr itatta, a kadua ni baketna a ni Mildred