Ti Biag ken Ministerio ni Jesus

Sino a Talaga ni Jesus?

IDI a ti bilog a nagluganan ni Jesus ken dagiti adalanna simmanglad idiay Betsaida, dagiti tattao inyegda kenkuana ti maysa a lalaki a bulsek ket dinawatda a sagidenna ti lalaki ken agasanna. Kinibin ni Jesus ti lalaki iti ruar ti purok ket, kalpasan ti panangtuprana kadagiti matana, inimtuodna kenkuana: “Adda makitam?”

“Makitak dagiti tattao,” simmungbat ti lalaki, “a kasda la kaykayo a magmagna.” Ket idi impatayna manen dagiti im-imana kadagiti mata ti lalaki, pinasubli ni Jesus ti panagkitana ket makitanan idi a nalawag dagiti isuamin. Idin pinagawiden ni Jesus ti lalaki a binilinna a di sumrek a pulos iti siudad.

Itan pumanawen ni Jesus ken dagiti adalanna a mapan iti purok ti Cesarea Felipo, iti makin-amianan unay a paset iti Palestina. Dayta ket nawatiwat a sang-aten a saklawenna iti agarup 50 kilometros agingga iti nagpintasan a nagsaadan iti Cesarea Felipo, nga agarup 350 metros iti ngatuen iti patas ti baybay. Ti biahe nalabit ket alaenna ti dua nga aldaw.

Iti dalan, napan nagkararag ni Jesus nga is-isuna. Agarup siam wenno sangapulo a bulan laengen sakbay ti ipapatayna, ket isut’ maseknan kadagiti adalanna. Adu kadakuada ti saanen a simmurot kenkuana. Dadduma ti nalawag a nariribukan ken naupay gapu ta dina inawat ti panangikagumaan dagiti tattao a mangaramid kenkuana nga ari ken gapu ta di nangipaay iti pagilasinan manipud langit, idi isut’ kinarit dagiti kabusorna, a mangpaneknek iti kinaarina. Ania ti pammati dagiti apostolesna maipapan iti kinasiasinona? Idi nakagtengda iti lugar a pagkarkararaganna, nagimtuod ni Jesus: “Asinoak iti panagkuna dagiti tattao?”

Simmungbatda, “Dagiti dadduma kunada ni Juan a Bautista, ket dagiti dadduma ni Elias, ket dagiti sabsabali ni Jeremias wenno maysa kadagiti mammadto.” Wen, pagarupenda ni Jesus a maysa kadagidiay lallaki a napagungar manipud kadagiti natay!

“Ngem, dakayo, asinoak ti panagkunayo?” inimtuod ni Jesus.

Dagus a simmungbat ni Pedro: “Sika ti Kristo, ti Anak ti sibibiag a Dios.”

Kalpasan ti panangiyebkasna iti pananganamong iti sungbat ni Pedro, kinuna ni Jesus: “Ket siak kunak kenka, Sika Pedroka, ket iti daytoy a bato bangonekto ti kongregasionko ket dagiti ruruangan ti Hades saandanto nga agballigi kenkuana.” Ditoy damon nga inyanunsio ni Jesus nga ibangonnanto ti maysa a kongregasion ket uray ni patay saannanto a tenglen a kautibo dagiti miembrona kalpasan ti panagmatalekda ditoy daga. Kalpasanna imbagana ken Pedro: “Itdekto kenka dagiti tulbek ti pagarian ti langlangit.”

Ngarud impalgak ni Jesus a ni Pedro umawatto kadagiti naisangsangayan a pribilehio. Saan, saan a naikkan ni Pedro iti umuna a saad kadagiti apostoles, wenno naaramid a pamuon iti kongregasion. Ni Jesus a mismo ti Bato isu a pakaibangonanto ti kongregasionna. Ngem ni Pedro naikkan kadagiti tallo a tulbek isu a panglukatna, ti kaiyariganna, ti gundaway dagiti grupo dagiti tattao a sumrek iti Pagarian iti langlangit.

Inusar ni Pedro ti umuna a tulbek idi Pentecostes 33 K.P. idi impakitana kadagiti nagbabawi a Judio no ania ti aramidenda tapno maisalakanda. Inusarna ti maikadua a tulbek di nagbayag kalpasanna idi linukatanna kadagiti manamati a Samaritano ti gundaway a sumrek iti Pagarian ti Dios. Kalpasanna, idi 36 K.P. inusarna ti maikatlo a tulbek babaen ti panangilukatna kadagiti di nakugit a Gentil, ni Cornelio ken dagiti gagayyemna, ti isu met laeng a gundaway.

Intultuloy ni Jesus ti pannakisaritana kadagiti apostolesna. Inupayna ida babaen ti panangibagana kadakuada kadagiti panagsagabana ken ipapatayna a di agbayag sanguenna idiay Jerusalem. Gaput’ dida naawatan a ni Jesus mapagungarto iti nainlangitan a biag, innala ni Pedro ni Jesus iti napakni. “Apo, kaasiam ta bagim,” kinunana. “Uray kaanoman saan koma a maaramid kenka daytoy.” Idi simmango, simmungbat ni Jesus: “Pumanawka iti sanguanak, Satanas! Sika ti pakaitibkolak, ta dika pampanunoten dagiti maipapan iti Dios, no di ket dagiti maipapan kadagiti tao.”

Nalawag, dagiti dadduma pay malaksid kadagiti apostoles ti agdaldaliasat a kadua ni Jesus, gapuna inayabanna ida tapno ilawlawagna kadakuada a saan a nalaka ti agbalin a pasurotna. “No sinoman a tao ti mayat nga umay sumurot kaniak,” kunana, “paglikudanna ti bagina ket alaenna ti kayona a pagtutuokan ket surotennak a kankanayon. Ta uray siasino a mayat koma a mangisalakan iti biagna mapukawnanto; ket uray siasino a makapukaw iti biagna gapu kaniak ken iti naimbag a damag maisalakannanto.”

Wen, dagiti paspasurot ni Jesus masapul a naturedda ken managsakripisio no paneknekanda a maikarida iti pananganamongna, kas kunaenna: “Ta uray siasino a mangibain kaniak ken kadagiti saok iti daytoy a kaputotan a naabig ken managbasol, ibainto met ti Anak ti tao inton umay a sidadayag ken ni Ama ken dagiti nasantuan nga anghel.” Marcos 8:22-38; Mateo 16:13-28; Lucas 9:18-27.

◆ Apay a maseknan ni Jesus kadagiti ad-adalanna?

◆ Ania dagiti kapanunotan dagiti tattao maipapan iti kinasiasino ni Jesus?

◆ Ania dagiti tulbek a naited ken ni Pedro, ken kasano a nausarda?

◆ Ania a panangbabalaw ti inawat ni Pedro, ken apay?