Ti Kumbension a Nangparang-ay ti Talektayo ken ni Jehova

TI AMATAYO a nailangitan, ni Jehova a Dios, pagaammona unay no ania ti kasapulantayo. Ket inkabilna iti is-isip dagiti dedikado nga ad-adipenna a mangiwanwan ti trabahona ditoy daga a mangpennek iti dayta a kasapulan. Maikuna a pudpudno daytoy kadagiti “Agtalek ken Jehova” a Kumbension Distrito, a naangay iti intero a daga manipud Hunio 1987 a nagtultuloy. Pudno a nagserbida a mangpatibker kadagiti Kristiano a maibusor iti kinaawan pammati, panagduadua, ken di panagtalek nga isut’ aglaplapusanan iti lubong.

Ti tema nga “Agtalek ken Jehova” ket nakalalaing a nailaga iti programa. Daytat’ naipaganetget babaen kadagiti sasao a napipigsa ken nalawag a matandaanda iti kinaprangka ken kinadirekta. Amin dagitoy ti nangpabileg iti panagtalek dagiti managdengngeg ken ni Jehova. Mabalinda ti agawid a ti tema ti naipasagepsep un-unay iti puso ken isipda, determinado a babaen kadagiti tigtignay ken sasaoda maiwaragawagda kadagiti isuamin nga agtalekda a naan-anay ken ni Jehova.

“Agtalekkayo ken ni Jehova, Dakay a Tattao”

Dagidiay a sasao a masarakan idiay Isaias 26:4 inyebkasna ti tema a maipaay iti umuna nga aldaw. Maibagay unay, nanglukat ti programa babaen iti palawag nga “Iyallingagyo ti Lapayagyo iti Sasao ti Dios.” Impakita ti nagpalawag a dagitoy a sasao, a nagparang iti namin-ano a daras iti Sao ti Dios, kaipapananna ti panangited iti naan-anay nga atension agpadpada iti isip ken puso iti adda a maibagbaga, nga addaan panggep a panangiyaplikar iti adda a nangngegan. Kaipapanan dayta ti panangwatwat iti panagteppel ken ti panangipamaysa iti adda a maibagbaga, a di palubosan nga agalla-alla ti isip. Babaen laeng iti kasta a panangiyallingag iti lapayagtayo a ti panagtalektayo ken ni Jehova ket mapapigsa babaen iti intay mangngegan ket kalpasanna matignaytayo iti adda a naibaga. Ket saan aya a daytoy koma ti kababalintayo kaanoman a dengdenggentayo a mailawlawag ti Sao ti Dios, kas kadagiti panaggigimongtayo iti kongregasion?

Ti tsirman ti kumbension imparangna ti sumaganad a tema, “Dagidiay Agtaltalek ken Jehova Maragsakanda nga Addada Ditoy.” Intudona a no dakdakkel ti panagtalektayo ken ni Jehova, dakdakkel met ti ragsaktayo. Ti panagtalek ken ni Jehova kaipapananna nga isut’ pananginanama a naan-anay ken sisisiguro kenkuana. Bayat a dakdakkel ti pannakaammotayo ken ni Jehova ken ti panagayattayo kenkuana, napigpigsa met ti panagtalektayo kenkuana. Ti tema ti kumbension ket saan a maysa laeng a replan. Iparangarangtayo ti panagtalektayo ken Jehova kadagiti nagadu a pamay-an, kangrunaanna babaen iti panangipakitatayo iti konsiderasion kadagiti dadduma isu a pagragsakan dagiti isuamin. Iti panagpatingga ti palawagna, imparang ti tsirman ti umuna kadagiti ruar​—maysa a de kolor, praktikal nga instrumento iti panangasaba. Isu dayta ti tracts nga Apay Mabalinyo a Pagtalkan ti Biblia.

Kalpasan ti panangisalaysayna iti nakalalagip nga ulidan ni David idi sinangona ni higante a Goliat, impaganetget ti sumaganad a managpalawag ti “No Kasano ti Panagtalek dagiti Dadduma ken Jehova” kadagiti moderno a tiempo. Kas pangarigan, adda maysa a kabsat a babai nga addaan di manamati nga asawa, a siiiggem iti paltog, a mangbutbuteng kenkuana a papatayenna no isut’ agtultuloy a mapan kadagiti gimong. Dadduma indemostrada ti panagtalekda ken Jehova idi a naibaga kadakuada a ti biagda agpannuray iti panangawatda iti panangiyalison iti dara. Nangted pammaneknek dagiti agtutubo iti panagtalekda ken ni Jehova babaen iti panangparmekda kadagiti panangpilpilit a makiraman kadagiti sports wenno pilien iti nangatngato nga edukasion kalpasan ti panagraduarda iti high school.

Ti programa iti agsapa iti Biernes nagpatingga babaen iti palawag a “Maysa nga Ili a Naisina Manipud iti Lubong.” Ipakpakitatayo nga agtalektayo ken ni Jehova babaen iti intay panangsalimetmet kadagiti kababalintayo iti kasungani a sekso nga awan pakababalawanna, babaen ti panangipalubostayo a dagiti Nakristianuan a prinsipio ti mangiwanwan kadagiti panaglinglingaytayo, ken babaen iti panangliklik kadagiti isuamin a panagkawkawes ken panagbubuok a mamagduadua iti pagdumaantayo kadagiti sekso. Babaen ti panagtalinaedtayo a naisina iti lubong, masansan a maipapaay ti napigsa a pammaneknek, a dadduma agbunga pay iti iyaay dagiti dadduma iti kinapudno.

Iti malem ti Biernes, nangrugi ti programa iti palawag a “Ti Panagpayunir Papartakenna ti Naespirituan a Panagdakkel.” Ket anian a nagpudno dayta! Babaen iti Sao ni Jehova, ti nasantuan nga espirituna, ken ti organisasionna, ipapaay ti Dios ti kasapulantayo a rumang-ay iti “naan-anay a tao,” ngem ti panagpayunir ikabilnatayo iti kasasaad a mangusar a nasaysayaat ken naan-anay pay kadagitoy amin a naespirituan a sagana. (Efeso 4:13) Babaen kadagiti interview, imbaga dagiti payunir no kasano a ti amin-tiempo a ministerio ket nakatulong kadakuada a nangsukay nga ad-adda pay kadagiti bunga ti espiritu ti Dios, tapno maiyebkasda nga ad-adda ti panagayatda kadagiti tattao, tapno agbalinda a nabunga iti ministerio, ken ti panagtalek ken ni Jehova nga ad-adda pay, ket iti kasta maaddaan iti nasingsinged a pannakirelasion kenkuana. Amin daytoy ti nangpapartak iti naespirituan a panagdakkelda.

Simmaruno isu ti kangrunaan a palawag, “Maysa nga Ili nga Agtaltalek a Kanayon ken ni Jehova.” Daytoy makapatignay a diskurso impakitana a naidumatayo manipud iti lubong agsipud ta agtalektayo a naan-anay ken ni Jehova. Naibatay kadagiti nadumaduma a teksto iti libro ni Isaias, impakita ti nagpalawag no kasano ti pannakakitatayo a natungpalen dagitoy makaparegta a padpadto kadagiti Saksi ni Jehova agsipud ta agtalektayo iti Dios. Sitatalek, ur-urayentayo ti tiempo iti asidegen a masanguanan inton iyebkasen ni Jehova ti pungtotna kadagiti isuamin a nasnasion ket iyegnanton ti Paraiso.

Naparegta dagiti kumbensionista nga “Isaknap ti Naimbag a Damag iti Isuamin a Gundaway.” Kalpasan iti pannakaipaganetget ti kinapateg ti panangaramid iti dayta, naipakita ti sumagmamano a demostrasion no kasano a mausar a siepektibo ti baro a tracts nga Apay Mabalinyo a Pagtalkan ti Biblia agpadpada iti pormal ken di-pormal a panangaskasaba. Pudno unay, kayattayo a maadda a kanayon dagitoy a tracts kadatayo, ta ti panangisaknap ti naimbag a damag iti isuamin a gundaway isut’ kababalin ti tunggal saksi ni Jehova ken panangipakita nga agtalektayo Kenkuana.

Ti naapresiar unay isu ti palawag a “Nagannak​—Danonenyo ti Puso ti Anakyo Manipud Kinamaladaga.” Tapno ti ubing dumakkel nga agtaltalek ken ni Jehova, ti pannakasanayna ket masapul a mangrugi iti kinamaladaga ket masapul a dayta ti maipangpangruna. Babaen laeng iti dayta a posible a laksiden amin dagiti dakes nga impluensia ti telebision, ti eskuelaan, ken ti lansangan. ‘Ti kayatyo a pagbalinan ti anakyo palubosanyo a daytat’ makitana kadakayo,’ naibaga kadagiti nagannak. Wen, ti panangipakita iti nasayaat nga ulidan ti kasayaatan a pamay-an a panangdanon iti puso ti ubing. Amin a paset ti sagrado a serbisio ti masapul nga umay a natural ken makaparagsak no kayat a ti atmospera iti pagtaengan ket agbalin a pudpudno a naespirituan. Nikaanoman ditay koma iyimut ti panawen ken panagregget a nairaman. Itultuloyyo met a danonen ti puso ti ubing babaen ti nasayaat a komunikasion. Ipamatmat ti kinainget a buyogen ti ayat, ken umapilar iti panagrason no mangmangted ti disiplina. Itdenyo ti pammadayaw ken gunggona sadinoman a pakaikarianna, ngem nikaanoman dikay koma paspasuksokan ti anakyo.

Ti pannakidangadang iti maysa a nainget a problema kadagiti sumagmamano nga agtutubo a Saksi isu ti palawag nga “Agtutubo​—Agannad Maibusor iti Doble a Panagbiag.” Apay a dadduma padpadasenda a maaddaan iti doble a panagbiag? Agsipud ta kayatda ti anamong dagiti dadakkelda ken ti kongregasion ken kaskasdi agbutengda iti pananglalais dagiti nailubongan a kapatadanda. Wenno pagarupda a maikapkapisda iti dadduma a ragsak nga agsigarilio, agtomar iti droga, wenno makiraman iti maiparit a sekso. Ngem awan a pulos ti pangliklikan iti kinapudno nga amin dagita a doble a panagbiag mangiyeg iti pakaumsian ken ni Jehova, ladingit iti nagannak ti maysa, ken sensennaay iti bagina met laeng. Asinoman nga agmula iti lasag agani iti panagrupsa, ngem ti panangtaginayon iti nasayaat a pannakirelasion ken ni Jehova, agtalek a naan-anay kenkuana, saluadanna ti maysa manipud iti pannakaadda ti doble a panagbiagna.​—Galacia 6:8.

Ti napigsa a nangipaganetget amin kadagitoy a prinsipio isu ti drama a simmaruno nga insigida. Napauluan Ti Nasungdo a Panagpasakop ken ni Jehova ken ti Organisasionna, naglaon iti adu a taraon iti pampanunot bayat nga iladladawanna no kasano a ti maysa a panglakayen nariknana nga inkapilitan bumaba iti responsabilidadna ta ti anakna a babai naibutaktak kas maysa nga addaan doble a panagbiag. Ti drama ti nangtignay ti adu nga entusiastiko nga ebkas ti panagyaman.

“Agtalekka ken ni Jehova ket Agaramidka iti Naimbag”

Naibatay iti Salmo 37:3, daytoy ti tema ti maikadua nga aldaw ti kumbension. Kalpasan ti panangusig iti teksto ti aldaw, nga iramanna ti pammaregta a panangaramid nga inaldaw iti daytoy, intampok ti programa ti tallo-kapaset a simposium a napauluan “Panangiparangarang ti Panagtalektayo ken Jehova.” Impakita ti umuna a nagpalawag ti pannakasapul ti panangaramid iti daytoy “Babaen ti Naanep a Panagadal ti Sao ti Dios.” Daytoy masapul nga aramidentayo tapno maliklikan ti silo ti panagaleng-aleng ken dagiti silo ti materialismo, seksual nga imoralidad, ken apostasia. Ti Sosiedad ket nangipaay iti aglaplapusanan a katulongan iti panagadal ti Biblia, kas ti baro a Watch Tower Publications Index 1930-1985. Babaen laeng ti pananggundaway a naan-anay kadagitoy a probision maaddaantayo ti nasayaat a matalek a pannakirelasion iti nailangitan nga Amatayo ken agbalin nga epektibo kas dagiti saksina.

Ipaganetget ti sumaganad a managpalawag ti kinapudno a ti panagtalek ken ni Jehova maipamatmat “Babaen ti Panangaramid kadagiti Bambanag a Naadalen.” Wen, kayattayo ti agbalin a manangitungpal ti Sao, a maseknan a kanayon iti irarang-ay. Kadagiti ania a paset? Ta, iti pannakirelasiontayo iti dadduma, iti panagkawkawes ken panagbubuoktayo, iti panangsapul nga umuna iti Pagarian ti Dios, ken iti panangparang-ay iti talna ken panagkaykaysa kadagiti kakabsattayo! Tapno maliklikan ti basol iti kinatangsit, masapul nga agannadtayo a salimetmetantayo ti lugartayo iti pamilia ken iti kongregasion. No ngarud iyaplikartayo dagiti bambanag a naadaltayo, agbalinto a nalawag kadagiti isuamin nga agtaltalektayo ken ni Jehova.

Ti simposium nagpatingga iti pannakaisalaysay ti tema a “Panangiparangarang ti Panagtalektayo​—Babaen ti Panagreggettayo iti Tay-ak.” Babaen iti panangaramid iti daytoy, ipakpakitatayo ti ayattayo iti Dios ken iti kaarrubatayo ken salsalaknibantayo ti bagitayo. Mabalin a mapmapnektayo iti apag-anem-em, sinsinan a serbisio, ngem kasta aya ken ni Jehova? Di aya inggunamgunam ti Anakna kadatayo nga agreggettayo a sipipigsa? (Lucas 13:24) Ti panagrang-ay a makitkitatayo kadagiti agibumbunannag, payunirs, ken ti promedio nga oras a mabusbusbos iti tay-ak ti ministerio ti rebbeng a mangparegta kadatayo a personal nga agaramid iti ad-adu pay. Saan kadi a kasta? Babaen ti kasta a naregta a panagtrabaho, mangipakpakitatayo ti nasayaat nga ulidan, idemostratayo ti panagtalektayo ken ni Jehova, ket magun-odantayo ti isem ti anamongna.

Sumaganad immay ti iyaapelar kadagiti konsiensiatayo iti palawag a “Sanayenyo ti Panangted iti Naan-anay a Rukodna.” Anian nga aglaplapusanan ti panangipapaay ni Jehova kadatayo iti naespirituan ken namaterialan! Ipakpakitatayo ti panangapresiartayo babaen ti panangtulad kenkuana agpadpada babaen iti panangaskasaba ken iti itutulong a pinansial iti trabaho a panangasaba. Mabalintay kadi a kissayan dagiti nangingina a pagraragsakan tapno makaitedtayo iti naan-anay a rukodna?

Ti palawag iti bautismo, “Ti Dedikasion ken Bautismoyo Isarmingda ti Panagtalek ken ni Jehova,” impakitana no apay nga agtalektayo iti Dios ket saan a kadagiti tattao. Ipamatmat ti bautismo iti danum ti ipapataytayon kadagiti napalabas a kababalin ken ti pannakaibangontayo iti wagas ti panagbiag a maitunos iti nadiosan a pagayatan. Manipud iti dayta, masapul nga agtultuloytayo nga ‘ipakita ti kinahustisia, kinamanangngaasi, ken naemma a makipagna iti Dios.’ (Mikias 6:8) Maysa kadagidiay nabautisaran isu ti maysa a 8-tawenna nga ubing a babai a mangidadaulo ti dua a panagadal ti Biblia kadagiti kaeskuelaanna, maysa a lakay a 79-años, ken 44-años a baldado.

Nangrugi ti programa iti Sabado babaen iti palawag a “Panangaramid kadagiti ‘Nasken a Bambanag’ a Mangparagsak iti Dios.” Maibatay iti Aramid 15:28, 29, impakitana ti pannakasapul ti panangipakaammo a nasapsapa kadagiti doktortayo iti takdertayo maipapan iti dara sakbay a mapasamak ti medikal a krisis ket mangipaay iti nasayaat a suhestion no kasano ti panangaramid iti daytoy.

Ti palawag a nangtignay kadagiti adu a paborable a komento ket “Ti Responsable a Panagipasngay ti Annak Itoy Panawen ti Panungpalan.” Imparang dayta ti balanse a panangmatmat, nga impakita a nupay ti panagipasngay ti annak ket mangiyeg ti adu a ragsak, mangiyeg met kadagiti adu a responsabilidad ken masansan mangibunga kadagiti pagladingitan, a kas no di umiso ti maturong dagiti annak. Nangnangruna a dagiti inna ti ad-adda nga agsagaba iti naespirituan gapu kadagiti pakarigatan iti panagipasngay.

Kalpasanna immay ti palawag a “Papanglakayen​—Saluadanyo ti Naitalek Kadakayo.” Daytoy a talek isu ti panangipastor iti arban ti Dios​—panangidaulo, panangpakan, ken panangsalaknib iti dayta, kas panangitungpal ti kuna ti Isaias 32:1, 2. Ti panagbalin a nainkalintegan iti panangipapaay kadagiti obligasion ti pamilia bayat nga ay-aywanan met dagiti annongen ti kongregasion ket mangted ti maysa a pudno a karit. Ti panangsaluad dagiti panglakayen ti naitalek kadakuada kaipapananna met ti panangliklik kadagiti silo ti materialismo, aglablabes a panaglinglingay, ken kadagiti maiparit a ragragsak. Maysa kadagidiay napagsaludsodan iti kumbension distrito iti Dortmund sadi Pederal a Republika ti Alemania isut’ maysa a panglakayen a salsaluadannan ti naitalek kenkuana iti 60 a tawtawen.

Ti palawag nga “Agtulnogkayo kadagidiay Mangidadaulo Kadakayo” ti apagpag-isu a simmaruno. Ti ayat tulongannatayo nga agbalin a managpasakop ken natulnog kadagiti manangaywan ti kongregasion ket tulongannatayo a di agbalin nga awan panaganusna agsipud ta saanda a perpekto, ket saantayo met a perpekto. (Hebreo 13:17) Babaen ti panagraem kadagiti panglakayen kadagiti bambanag a dadakkel ken babassit, tultulongantay ida a mangibaklay kadagiti annongenda imbes a naynayonantay ti pakadagsenanda.

Nagpatingga ti programa iti Sabado iti tallo kapaset a simposium a “Ti Sao ti Dios Sibibiag,” a naibatay iti Hebreo 4:12. Impakita ti umuna a nagpalawag a dayta ti sibibiag agsipud ta “Daytat’ Addaan Pannakabalin a Mamagbalbaliw.” Itatta, kas met laeng iti panawen ti Biblia, aduantay kadagiti pangarigan a mangipakpakita no kasano a ti panagtalek iti Sao ti Dios tinignayna dagiti tattao a mangaramid kadagiti dadakkel a panagbalbaliw iti panagbiagda ket pinapigsana ida a mangasaba nga awan butengna.

Ti maikadua a paset daytoy a simposium maipapan iti Sao ti Dios ipakitana a “Dayta Natadtadem Ngem ti Dua ti Tademna a Kampilan.” Tulongannatayo a mangrangrangkay kadagiti Binababilonia nga ulbod a sursuro. Tulongannatayo met a ‘mamagsina iti kararua ken espiritu’ a tulongannatayo a mangilasin kadagiti tigtignaytayo ken kadagiti pudpudno a motibotayo. Babaen ti panangusar ti “kampilan” iti daytoy a pamay-an, agbalintayo nga ad-adda a makaay-ayo ken ni Jehova a Dios ken ad-adda a makikappia kadagiti dadduma ken iti bagitayo met laeng.

Impakita iti pangserra a pasetna a ti Sao ti Dios ket sibibiag agsipud ta “Patibkerenna ken Tignayenna ti Pusotayo.” Idiay Biblia, ti sao a “puso” ket kaaduan a maus-usar iti piguratibo ken tuktukoyenna ti makin-uneg a tao a maiparparangarang kadagiti mental ken emosional a kualidadtayo. Ti Sao ti Dios patibkerenna ti pusotayo babaen ti panangipanayagna kadagiti nakaskasdaaw a kualidadna babaen iti pannakilangenna iti sangatauan. Ti awan-agumna nga ayat ti Dios tignayennatayo a mangtulad kenkuana. Iti pangserra a sasaona, renipaso ti nagpalawag ti rekord ti Watch Tower Society iti panagipablaak kadagiti Biblia ken pinaragsakna dagiti agdengdengngeg babaen iti panangiyanunsio ti pannakairuar ti maysa a napintas a deluxe a pambulsa nga edision ti New World Translation.

“Agtalekka ken ni Jehova iti Amin a Puso”

Daytoy a tema para iti Domingo, a naadaw manipud Proverbio 3:5, ti inusig ti maysa a panglakayen a nangilukat iti programa ket sinalaysayda ti teksto ti aldaw. Kalpasanna simmaruno ti makasukisok-kararua a palawag a “Laglag-anenyo Laeng Aya dagiti Sagrado a Bambanag?” Patien ti lubong nga awan ut-utangna iti Dios, ngem kas dagiti Saksi ni Jehova ammotayo a tapno maaddaantayo iti anamongna, masapul a tuladentayo dagiti matalek a lallaki idi ugma babaen ti panangipakita iti panangipateg kadagiti sagrado a bambanag. Ti nagpalawag sinalaysayna ti 13 kadagitoy, a nairaman kadakuada isu ti nagan ni Jehova, ti Saona, ti nasantuan nga espiritu, ti linlintegna, ti makitkita nga organisasionna, ti pannakirelasiontayo iti Dios, ti panaggigimongtayo, ken dagiti pribilehiotayo iti serbisio. No pudpudno nga ipatpategtayo dagiti sagrado a bambanag, dagita ti ipangpangrunatayo iti biagtayo, agtalektayo a naan-anay ken ni Jehova, ket datayto ti gunggonaanna.

Sumaganad immay ti naaweng a palawag a “Guraen a Naan-anay ti Nakababain a Kurso ti Lubong.” Gapu iti kinadirektana, daytat’ nangpataud kadagiti komento a kas ti, “Daytat’ apagpag-isu a kasapulantayo!” Yantangay ti kinadakes ket gagangayen, masapul a dagiti Kristiano agsiputda a maibusor iti panangpabpabus-ay iti imoralidad ken kinaranggas. (2 Timoteo 3:1-5) Gapuna, ditay koma buyaen wenno denggen dagiti maibrodkas iti TV wenno iti radio, wenno ditay basaen ida kadagiti pagiwarnakan. Kinapudnona, ditay pay koma kayat a pampanunoten ida. ‘Dagiti pudno a Kristiano a tarigagayanda a salimetmetan ti nasayaat a pannakirelasion ken Jehova ket awan a pulos ti pakainaiganda iti pornograpia,’ saan, uray bassit laeng!

Nagpatingga ti programa iti agsapa ti Domingo iti makatengngel-atension a drama ti Biblia nga Ispalen ni Jehova Dagidiay Umawag iti Naganna. Daytat’ maipapan kadagiti sumagmamano a paspasamak iti biag ni Josue. Iti apagpag-isu unay, inladawan dayta no kasano ti panangmatmat dagiti agtataeng iti Jerico iti panagmartsa dagiti mannakigubat ti Israel iti aglikmut ti siudad iti inaldaw-aldaw. Naitampok met ti naindaklan a pammati ni Rahab, a nangibunga iti pannakaispalna ken ti sangakabbalayanna. Iti panagpatinggana, amin nasaludsodan: ‘Addaankay met laeng aya ti natibker a pammati ken panagtalek kas ken Josue ken kadagiti mamaingel a kakaduana? No kasta, mainanamatayo ti makiraman iti maudi a panagbiktoria ni Jehova kadagiti kabkabusorna.’

Ti tampok iti publiko iti “Agtalek ken Jehova” a Kumbension Distrito immay ti palawag a napauluan “Iti Nakabutbuteng a Tiempotayo, Asino ti Pagkammatalkanyo?” Impakitana a silalawag ti kinapudno a ti sangatauan agkasapulan unay ti gubuayan ti panagtalek! Nalawag, impakita dayta ti kinamaag iti panagtalek kadagiti tattao. Gapuna, balakadannatayo ti Sao ti Dios nga agtalek ken ni Jehova ket inikkannatayo kadagiti napigsa a rason iti panangaramid iti kasta. Rebbeng nga agtalektayo kenkuana gapu kadagiti kualidadna ken rekordna a panangispal kadagidiay nagtalek kenkuana, ni Ari Ezekias kas maysa kadagiti naminar a pangarigan. Iti mabiiten ti umas-asping a panangispal ti lak-amento dagidiay ti tigtignayda idemostrada ti panagtalek ken Jehova.

“Agtultuloy nga ‘Agbiag a Sitatalna’” ti tema iti palawag a simmaruno nga insigida. Tapno agbiag a sitatalna kayatna a sawen ti panagbalin nga aktibo a manangitandudo ti talna. Kaipapananna met ti kaadda ti talna iti bagbagitayo gaput’ panangsalimetmet iti nadalus a konsiensia. Babaen ti panangiparangarang kadagiti bunga ti espiritu ti Dios, nangnangruna ti ayat ken panagteppel, mabalinantay ti agbiag a sitatalna kadagiti mismo a pamiliatayo ken kadagiti kakabsattayo a lallaki iti kongregasion.

Awan duadua maipapan iti kinapudno a daytoy a kumbension kinabalannatay amin a “Sumango iti Masanguanan a Buyogen ti Naan-anay a Panagtalek ken Jehova,” ti tema ti pangserra a palawag. Anian a nagsayaat ti pananggupgop dayta iti programa! Impaganetget ti nagpalawag nga inaldaw kasapulantayo ti agtalek ken ni Jehova iti isuamin a pusotayo, nga isu ti pampanunotentayo iti isuamin a daldalantayo, ket bay-antayo nga isu ti mangiturong iti danatayo. (Proverbio 3:5, 6) Inapresiar unay dagiti kumbensionista ti pannakangngeg ti maipapan kadagiti 16 a baro a palawag publiko, dagiti cassette ti The Watchtower, ken ti pannakaimaldit manen ti artikulo maipapan iti dara a nagparang iti Agriingkayo! ket daytanto ti maadda kadatayo nga ipaay kadagiti dodoktortayo. Wen, ken anian a ragsaktayo a nakaammo maipapan iti pannakairuar ti sabali manen a drama iti Biblia iti cassette, ti pannakaimalditto manen ti Watchtower (1960-79), ken ti pannakaipablaak ti tallo pay a tracts!

Amin dagiti timmabuno iti “Agtalek ken Jehova” a Kumbension Distrito napabilegda unay iti naespirituan. Sisasaganada manen a sumango iti masanguanan iti naan-anay a panagtalek iti nailangitan nga Amada. Ket amin maibagbagay a naparegtada iti pangserra a pammagbaga: “Bayat a sanguentayo ti masanguanan, sapay koma ta sangsangkamaysa a paneknekantayo babaen iti panagbiagtayo nga ‘agtaltalektayo ken Jehova.’”

[Tsart iti panid 26]

Dagiti Nadumaduma nga “Agtalek ken Jehova” a Kumbension Distrito

Timmabuno Nabautisaran

Austria 24,686 360

Brazil 442,731 7,626

Islas Britanicas 156,417 1,225

Colombia 82,321 1,852

Denmark 23,029 200

Finlandia 26,144 284

Francia 138,683 2,705

Hong Kong 2,661 49

Irelandia 4,326 61

Italia 221,227 5,496

Jamaica 18,540 184

Japan 232,904 3,416

Korea 82,296 2,013

Malaysia 1,154 15

Norway 12,703 218

Portugal 55,057 1,074

Puerto Rico 49,953 377

España 105,591 2,394

Sweden 30,099 312

Switzerland 19,459 261

Trinidad 10,649 132

Estados Unidos 1,288,313 13,562

Venezuela 100,777 1,664

Zimbabwe 45,544 580

[Dagiti ladawan iti panid 25]

Dagiti mamagpanunot a drama intampokda a masapul ti panagtalek ken ni Jehova

Ni F. W. Franz, kameng ti Bagi a Manarawidwid dagiti Saksi ni Jehova, nga agpalpalawag kadagiti atentibo a managdengngeg iti kumbension

[Ladawan iti panid 26]

Adu ti nangidemostrar ti panagtalekda ken Jehova babaen ti pannakabautisarda a mangisimbolo ti dedikasionda kenkuana