Patibkerenyo ti Panagtalekyo ken Jehova

Maisiksikat ti maysa a pammapatay. Nagnunumuan dagiti amin a nangato nga opisial ti daga a mangipaulog iti maysa a baro a linteg. Kayatda a ti asinoman a makiraman iti panagdayaw a di anamongan ti Estado ket madusa iti ipapatay.

PAMILIAR kadi daytoy kadakayo? Ti historia ket napno kadagiti ehemplo ti tattao a nangbalabala iti dakes babaen ti linteg. Ti nadakamat iti ngato ket napasamak idi kaaldawan ni propeta Daniel idiay Imperio ti Persia. Kastoy ti sagudayen ti linteg nga impaulog a mismo ni Ari Dario: “Siasinoman nga agdawat iti asinoman a dios wenno tao bayat ti tallopulo nga aldaw malaksid iti ari maipisokto iti abut dagiti leon.”​—Daniel 6:7-9.

Ania ti inaramid ni Daniel idi nagpeggad ti biagna gapu iti dayta? Intuloyna ngata ti nagtalek ken Jehova a Diosna, wenno nakikompromiso ketdi ket inaramidna ti imbilin ti ari? Ibaga kadatayo ti rekord: “Ni Daniel, apaman a naammuanna a napirmaanen ti surat, simrek iti balayna, ket, dagiti tawa iti siledna iti pangatepan silulukatda maipaay kenkuana a sumango idiay Jerusalem, mamitlo pay ketdi iti maysa nga aldaw nga isu agparparintumeng ken agkarkararag ken mangidatdaton iti daydayaw iti sanguanan ti Diosna, kas iti regular nga ar-aramidenna sakbay daytoy.” (Daniel 6:10) Ammotayon ti tuloy ti salaysay. Naipisok ni Daniel iti abut dagiti leon gapu iti pammatina, ngem ni Jehova ‘inapputna ti ngiwngiwat dagiti leon’ ket inispalna ti nasungdo nga adipenna.​—Hebreo 11:33; Daniel 6:16-22.

Tiempo Tapno Usigentay ti Bagitayo

Itatta, agbibiag dagiti adipen ni Jehova iti maysa a naranggas a lubong, a sangsanguenda ti adu a pisikal ken naespirituan a peggad. Kas pagarigan, iti brutal nga ibebettak ti panaggiginnura dagiti puli iti sumagmamano a pagilian, adu a Saksi ti napapatay. Iti dadduma a lugar, sarsarangten dagiti adipen ni Jehova ti kinakirang ti taraon, rigat iti ekonomia, natural a didigra, nakaro a sakit, ken dadduma pay a kasasaad a mamagpeggad iti biag. Mainayon pay, kasapulan nga ibturanda ti pannakaidadanes, panangpilit dagiti katrabahuan, ken nadumaduma a pakasulisogan nga agaramid iti dakes, a mamagpeggad iti naespirituan a salun-atda. Talaga a determinado ni Satanas, ti dakkel a Kabusor, a mangdadael kadagiti adipen ni Jehova babaen ti aniaman a wagas a kabaelanna nga usaren.​—1 Pedro 5:8.

No maipasangotay kadagita a kasasaad, ania ti aramidentayo? Nupay gagangay laeng ti agamak no agpeggad ti biagtayo, mabalintay a panunoten ti makaliwliwa a sasao ni apostol Pablo: “[Ni Jehova] kinunana: ‘Saankanto a pulos panawan ket saankanto a pulos baybay-an.’ Iti kasta mabalintayo ti agtalged ket sawentayo: ‘Ni Jehova ti katulongak; saanakto nga agbuteng. Ania ti maaramidan kaniak ti tao?’” (Hebreo 13:5, 6) Makapagtalektay a kasta met laeng ti panagrikna ni Jehova kadagiti adipenna itatta. Nupay kasta, agduma ti basta panangammo iti kari ni Jehova ken ti panagbalin a kombinsido nga agtignay ti Dios maigapu kadatayo. Nasken ngarud nga usigentayo no ania ti nakaibatayan ti panagtalektayo ken Jehova ket aramidentayo ti aniaman a mangpatibker ken mangtaginayon iti dayta a panagtalek. No kasta ti aramidentayo, ‘ti talna ti Dios a mangringbaw iti isuamin a panunot saluadannanto dagiti pusotayo ken dagiti pannakabalin ti isiptayo babaen ken Kristo Jesus.’ (Filipos 4:7) Ket no dumteng dagiti pakasuotan, nalawagto ti panagpampanunottayo ken nainsiriban a matamingtay dagita.

No Apay nga Agtalek ken Jehova

Sigurado nga adu dagiti rasontayo nga agtalek iti Namarsua kadatayo, ni Jehova. Umuna, ni Jehova ket naayat a Dios a pudpudno a maseknan kadagiti adipenna. Di mabilang dagiti pagarigan iti Biblia a mangipakita iti naayat a panangaywan ni Jehova kadagiti adipenna. Idi dineskribirna no kasano a trinato ni Jehova ti pinilina nga ili, insurat ni Moises: “Isu nasarakanna iti let-ang a daga, ken iti ongaong, nataguob a desierto. Rinugianna a palawlawan, tapno taripatuenna, tapno saluadanna kas iti alintatao ti matana.” (Deuteronomio 32:10) Kadagitoy moderno a panawen, agtultuloy a tartaripatuen ni Jehova dagiti adipenna, kas grupo man wenno indibidual. Kas pagarigan, idi nagsagaba ti sumagmamano a Saksi iti nakaro a kinakirang ti taraon kabayatan ti gerra sibil idiay Bosnia, sinigurado ni Jehova nga umawatda iti kasapulan unay a suplay babaen ti natured a panangikagumaan dagiti kakabsatda manipud Croatia ken Austria. Inrisgoda ti biagda babaen ti panagdaliasatda iti nakapegpeggad a teritoria tapno maiyegda ti material a tulong kadagiti kakabsatda.a

Yantangay Mannakabalin-amin ni Jehova a Dios, awan duadua a masalaknibanna dagiti adipenna aniaman ti kasasaad. (Isaias 33:22; Apocalipsis 4:8) Ngem uray no ipalubos ni Jehova a paneknekan ti dadduma nga adipenna ti kinamatalekda agingga ken patay, saranayenna latta ida ken tulonganna ida a mangtaginayon iti kinatarnawda, tapno makapagtalinaedda a di maisin, naragsak, ken kalmado agingga iti kamaudianan. Makapagtalektay met ngarud a kas iti salmista: “Ti Dios maysa a kamang ken pigsa maipaay kadatayo, maysa a saranay a sisasagana a masarakan bayat dagiti riribuk. Dayta ti makagapu a saantayto nga agbuteng, uray no ti daga agpasar iti panagbalbaliw ken uray no agdiwengdiweng dagiti bantay nga agturong iti puso ti nakalawlawa a baybay.”​—Salmo 46:1, 2.

Ipalgak met ti Biblia a ni Jehova ket Dios ti kinapudno. Kaipapanan daytoy a kanayon a tungpalenna dagiti karina. Kinapudnona, isut’ deskribiren ti Biblia kas Dios “a saanna a mabalin ti agulbod.” (Tito 1:2) Yantangay maulit-ulit nga inyebkas ni Jehova ti situtulok a panangsalaknib ken panangispalna kadagiti adipenna, naan-anay a makasiguradotayo a saanna laeng a kabaelan no di ket sidadaan pay a mangtungpal kadagiti karina.​—Job 42:2.

No Kasano a Mapatibker ti Panagtalektayo

Nupay aduantay iti rason nga agtalek ken Jehova, ditay koma tagtagilag-anen daytoy. Ti lubong bassit ti pammatina iti Dios, ket ti kasta a kababalin nalakana a pakapuyen ti panagtalektayo ken Jehova. Ikarigatantay ngarud a patibkeren ken taginayonen dayta a panagtalek. Pagaammo ni Jehova daytoy, ket nangipaay iti tulong tapno maaramidantay dayta.

Umuna iti amin, impaayna ti naisurat a Saona, ti Biblia, a nakailanadan ti nakaad-adu a nakaskasdaaw nga inaramidna agpaay kadagiti adipenna. Panunotenyo laengen, kasano kadakkel ti kompiansayo iti maysa a ti laeng naganna ti ammoyo? Nalabit a bassit laeng, wenno awan pay ketdi. Saan kadi a kasapulan pay nga ammuenyo dagiti pamay-an ken ar-aramidna sakbay nga agkompiansakayo kenkuana? Bayat a basbasaen ken ut-utobentay dagita a salaysay ti Biblia, umad-adu ti pannakaammotayo ken Jehova ken kadagiti nakaskasdaaw a pamay-anna. Maapresiartay nga ad-adda ti kinamapagtalkanna. Gapuna, mapatibker ti kompiansatayo kenkuana. Nagsayaat nga ulidan ti impasdek ti salmista idi nasged nga inkararagna iti Dios: “Lagipekto ti ar-aramid ni Jah; ta lagipekto ti nakaskasdaaw a gapuanam iti nabayagen a tiempo. Ket pudno unay a mennamennaekto ti isuamin nga aramidmo, ket kadagiti pannakilangenmo maseknanakto.”​—Salmo 77:11, 12.

Malaksid iti Biblia, addaantayo iti nawadwad a gubuayan ti naespirituan a taraon babaen kadagiti publikasion a naibatay iti Biblia nga ipapaay ti organisasion ni Jehova. Masansan a naglaon dagitoy a publikasion kadagiti makatukay rikna a salaysay maipapan kadagiti adipen ti Dios kadagitoy moderno a panawen, a mangipakita no kasano a nangipaay ni Jehova iti saranay ken bang-ar idi naipasangoda kadagiti narigat a kasasaad. Kas pagarigan, ni Martin Poetzinger, nga idi agangay nagbalin a miembro ti Bagi a Manarawidwid dagiti Saksi ni Jehova, ket nagsakit iti nakaro bayat ti panagpayunirna idiay Europa kadagiti lugar nga adayo iti pagilianna. Awan kuartana, ket awan ti doktor a mayat a mangasikaso kenkuana. Ngem saan a binaybay-an ni Jehova. Kamaudiananna, nakasaritada ti senior consultant ti ospital iti dayta a lugar. Yantangay maysa a napinget a manamati iti Biblia, daytoy a naasi a tao tinaripatona ni Kabsat Poetzinger a kasla anakna, a di nagpabayad. No mabasatay dagiti kasta a personal a kapadasan, sigurado a mapatibker ti panagtalektayo iti nailangitan nga Amatayo.

Ti pribilehio ti kararag ti sabali pay a di magatadan a tulong nga ipapaay ni Jehova tapno mapatibker ti panagtalektayo kenkuana. Siaayat nga ibaga kadatayo ni apostol Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” (Filipos 4:6) Ti “amin a banag” iramanna dagiti rikna, kasapulan, pagam-amkan, ken pakadanagantayo. No kanayon ken nasged nga agkararagtayo, ad-adda a tumibker ti panagtalektayo ken Jehova.

Idi adda ni Jesu-Kristo ditoy daga, pasaray mapan nga agmaymaysa iti naiputputong a disso tapno agkararag a di masinga. (Mateo 14:23; Marcos 1:35) Sakbay a nangaramid kadagiti nadagsen a desision, nagpatpatnag pay ketdi a nagkararag iti Amana. (Lucas 6:12, 13) Saan a pakasdaawan a kasta unay ti panagtalek ni Jesus ken Jehova ta uray la nabaelanna nga inibturan ti kaaalinggetan a suot a mapasaran ti asinoman. Ti maudi a sasaona idi adda iti kayo a pagtutuokan ket: “Ama, kadagita imam italekko ti espirituk.” Dayta nga ebkas ti kompiansa ipakitana a di kimmapuy ti panagtalekna ken Amana agingga iti kamaudianan, nupay saan a bimmallaet ni Jehova tapno ispalenna.​—Lucas 23:46.

Ti sabali pay a pamay-an a mapabilegtayo ti panagtalektayo ken Jehova isu ti regular a pannakitimpuyog kadagidiay sipapasnek nga agtalek kenkuana. Binilin ni Jehova ti ilina nga agtataripnongda a regular tapno ad-adu ti masursuroda maipapan kenkuana ken tapno makapagpipinnaregtada. (Deuteronomio 31:12; Hebreo 10:24, 25) Ti kasta a timpuyog pinatibkerna ti panagtalekda ken Jehova, ket naibturanda dagiti nakaro a pakasuotan ti pammati. Iti maysa a pagilian idiay Africa a maiparit ti panangasaba, napaidaman dagiti Saksi ni Jehova iti pannalaknib ti polisia, dokumento tapno makapagdaliasat, sertipiko ti panagkasar, pannakaagas iti ospital, ken panggedan. Idi bimtak ti gerra sibil iti maysa a lugar, ti 39 a kameng ti kabangibangna a kongregasion, a pakairaman dagiti ubbing, ket nagnaed iti sirok ti maysa a nababa a rangtay iti desierto iti uneg ti uppat a bulan tapno malisianda ti pannakabomba ti ilida. Kadagiti kasta a nakaro a kasasaad, ti inaldaw a panangusigda iti maysa a teksto ti Biblia ken dadduma pay a gimong ti nangipaay kadakuada iti dakkel a pammabileg. Iti kasta, naibturanda ti pakasuotan a dida inkompromiso ti espiritualidadda. Daytoy a kapadasan nalawag nga ipakitana ti pateg ti regular a pannakigimong iti ili ni Jehova.

Kamaudiananna, tapno mapatibkertay ti panagtalektayo ken Jehova, masapul nga aktibotayo a mangikasaba iti Pagarian, a kanayon a sisasagana a mangiranud iti naimbag a damag kadagiti sabali. Pinaneknekan daytoy ti makatukay-rikna a kapadasan ti maysa a naregta nga agtutubo nga agibumbunannag idiay Canada nga addaan iti din maagasan a leukemia. Iti laksid ti nakaro a sakitna, kayatna ti agbalin nga amin-tiempo a ministro kas regular pioneer. Idi simmayaat bassit ti salun-atna, nabaelanna a binusbos ti maysa a bulan iti ministerio kas auxiliary pioneer. Kalpasanna, dimmegdeg ti kasasaadna, ket natay kalpasan ti sumagmamano a bulan. Kaskasdi, nagtalinaed a napigsa iti naespirituan agingga a natay, ket di pulos kimmapuy ti panagtalekna ken Jehova uray apagkanito koma laeng. Malagip pay ni nanangna: “Agingga a nauyos ti biagna, ad-adda a maseknan kadagiti sabsabali ngem iti mismo a bagina. Pinaregtana ida nga agadal iti Biblia, a kunkunana kadakuada, ‘Agkakaduatayto idiay Paraiso.’”

Panangpaneknek iti Panagtalektayo ken Jehova

“No kasano a ti bagi nga awanan espiritu ket natay, kasta met a ti pammati nga awanan ar-aramid natay.” (Santiago 2:26) Ti kinuna ni Santiago maipapan iti pammati iti Dios ket maikuna met maipapan iti panagtalektayo Kenkuana. Uray kasano ti panangibagatayo nga agtalektayo iti Dios, awan serserbina no ditay iparangarang dayta a panagtalek babaen kadagiti aramidtayo. Naan-anay a nagtalek ni Abraham ken Jehova ket pinaneknekanna dayta a panagtalek babaen ti awan panagkedkedna a panagtulnog kadagiti bilin ti Dios, nga uray la nakasagana pay a mangidaton iti anakna a ni Isaac. Gapu iti kasta a naisangsangayan a panagtalek ken panagtulnog, naawagan ni Abraham kas gayyem ni Jehova.​—Hebreo 11:8-10, 17-19; Santiago 2:23.

Saanen a kasapulan nga urayentay a dumteng kadatayo ti sumagmamano a nakaro a suot sakbay nga agtalektayo ken Jehova. Imbaga ni Jesus kadagiti adalanna: “Ti tao a matalek iti kabassitan matalek met iti adu, ket ti tao a nakillo iti kabassitan nakillo met iti adu.” (Lucas 16:10) Sursuruentay koma ti agtalek ken Jehova iti amin nga inaldaw nga aktibidadtayo, nga agtulnogtay kenkuana uray kadagiti banag a kasla bassit ti pategna. No makitatayo dagiti gunggona ti kasta a panagtulnog, mapatibker ti panagtalektayo iti nailangitan nga Amatayo, ket mabaelantay a sanguen ti dakdakkel wenno narigrigat a pakasuotan.

Bayat nga umad-adani ti makadidigra a panungpalan ti lubong, sigurado nga ad-adu pay a suot ken peggad ti mapasaran ti ili ni Jehova. (Aramid 14:22; 2 Timoteo 3:12) No mapatanor ti natibker ken naan-anay a panagtalek ken Jehova itan, manamnamatay nga addatayto iti inkarina a baro a lubong​—babaen ti sibibiag nga ilalasat iti dakkel a rigat wenno babaen ti panagungar. (2 Pedro 3:13) Pulos a ditay koma palubosan nga agkurangtayo iti panagtalek tapno saan a madadael ti napateg a relasiontayo ken Jehova. Iti kasta, maikunanto met kadatayo ti naikuna maipapan ken Daniel kalpasan a naispal iti abut dagiti leon: “Awan a pulos pannakadangran a nasarakan kenkuana, agsipud ta nagtalek iti Diosna.”​—Daniel 6:23.

[Footnote]

[Ladawan iti panid 9]

Makapabileg iti pammati ti panangbasa kadagiti salaysay maipapan kadagiti matalek nga adipen ni Jehova, kas ken Martin Poetzinger