Report dagiti Manangiwaragawag ti Pagarian
Ti Kinapudno ti Pagarian Agsabsabong Idiay Sri Lanka
SRI LANKA, kaipapananna “Naraniag a Daga,” isut’ kadaanan a nagan a naisubli iti daytoy nakaay-ayat nga isla a pagaammo pay laeng kadagiti adu babaen iti kolonial a naganna a, “Ceylon.” Gapu iti lugarna iti Indian Ocean, naawagan met Tedted ti Lua iti India; ngem dagiti lulua ket saan amin a lulua iti ragsak kadagiti nabiit pay a tiempo bayat ti panagbettak dagiti etniko a kinaranggas, nga isut’ agar-aramid kadagiti ulo ti damdamag iti sangalubongan.
Kaskasdi, uray ditoy met agsabsabong ti kinapudno ti Pagarian. Dagiti Buddhista, Hindu, Muslim, Parsi, ken dagiti makunkuna a Kristiano ket masursuruanda a ti laeng Pagarian ni Jehova babaen ken Kristo Jesus ti makaiyeg iti agnanayon a pannakaagas dagiti etniko ken napolitikaan a sugsugat a mamagbibingay kadagiti il-ili. Dagiti sumaganad a kapadasan ipakitada ti panagsabong ti kinapudno ti Pagarian iti dayta “Naraniag a Daga.”
◻ Napadakkel ni Salimoon a mamati a ti Qurʼan isut’ Sao ti Dios. Ngem nikaanoman saanna a maakseptar a naan-anay a ti manangngaasi-amin a Dios ket tutuokenna dagiti tattao iti sumsumged nga impierno. Maysa nga aldaw dagiti Saksi ni Jehova ti nangawis kenkuana iti maysa a gimong. Gaput’ dagus a mabigbigna ti kinapudno, isut’ saanen a timmaltaliaw iti likudan, ket itan isut’ siraragsak nga agserserbi kas maysa a panglakayen iti kongregasion Kristiano.
◻ Ni Harry, maysa a nabayagen a Buddhista a nangidemostra iti narelihiusuan a pammatina babaen ti pampannagnana kadagiti sumsumged a beggang, ket saanna a masurot dagiti prinsipio a linaon ti pannursuro a Buddhist iti nagkawalo a dalan: (1) umiso a pannakaawat; (2) umiso a panagpanunot; (3) umiso a panagsao; (4) umiso a panagtignay; (5) umiso a panagbiag; (6) umiso a panagregget; (7) umiso a pananglaglagip, ken (8) umiso a konsentrasion. Dagitoy ti rebbeng a mangpunno ti tunggal paset ti panagbiag ti maysa a tao. Nupay patienna ti bagina a maysa a naimbag a Buddhist, ti panagsigariliona, panagin-inumna, ken dadduma pay a di umiso a kababalin ti namataud ti parikut iti pamiliana. Kamaudiananna, naikeddengna nga adalen ti Biblia. Kaskasdi, awan ti nangitukon iti panagadal kenkuana. Nangngegna ti maipapan kadagiti Saksi ni Jehova a mayatda, gapuna timmabuno iti gimong idiay Kingdom Hall, ket naiyurnos ti panagadal. Maysa kadagiti Saksi nga addaan Muslim a nalikudan ti nangtulong kenkuana a nangammo no ania ti isursuro ti Biblia. Itan, nasarakannan ti bileg manipud ken Jehova a mangsurot a sibaballigi iti dana dagiti umiso a prinsipio. Isut’ siraragsaken nga agserserbi kas ministerial nga adipen ken agpalplanon a sumrek iti payunir a ministerio.
Gapuna ti kinapudno ti Pagarian nagsabong idiay Sri Lanka, ket itan addan 1,086 a Saksi iti daytoy nagpintas a daga. Daytoy a panagdakkel kaipapananna a kasapulan ti dakdakkel a sanga nga opisina, ket agsapsapuldan ti lugar nga agpaay iti daytoy. Dagiti kakabsat ket agbangbangonda met kadagiti baro a Kingdom Hall. Idiay Puttalam maysa a kongregasion a buklen ti sangapulo a pamilia naikeddengda ti mangibangon ti maysa a Kingdom Hall ket aramidenda a dakkel bassit dayta tapno mausarda nga agpaay kadagiti asamblea sirkito. Nalpas ti paggigimongan nga apag-isu para iti asamblea sirkito, a sadiay 107 ti timmabuno. Itatta dandani doblen ti kongregasion, nga addaan nasurok a 75 a tumabtabuno kadagiti gimong a maang-angay nga agpadpada iti Tamil ken Sinhalese. Ket kaskasdi nga adu pay ti lugar a maipaay iti kanayonan a panagrang-ay.
Dagiti matungtungpalen a padpadto ti Biblia itudtudoda ti kinapudno nga iti mabiiten tunggal lua ti ladingit ket punasenton ti Dios manipud amin a matmata kas naikari. Uray pay dagiti pampanunot ti etniko a kinaranggas ket saanton a malagipen. (Apocalipsis 21:4; Isaias 65:17) Ket iti daytoy nakaay-ayat a “tedted ti lua” iti maysa nga isla, dagiti lua ti rag-o ket agaruboston bayat a dagiti epekto ti natalna a bunga ti Pagarian ti Dios agtultuloyto a tagiragsaken dagiti isuamin nga agpaay iti agnanayonen.