Dagiti Saludsod Manipud Kadagiti Managbasa
◼ Kuna ni Jesus, “No bulsekkay koma, awan koma ti basolyo.” (Juan 9:41) Kayatna kadi a sawen a dadduma a tattao ti awan basolda?
Saan, amin a tattao itatta ti managbasolda, kas met laeng amin idi umuna a siglo, malaksid ken Jesus mismo. Kadagitoy a sasao manipud Juan 9:41 tuktukoyen ni Jesus ti maysa a kita ti basol.
Ti maymaysa nga inapotayo a ni Adan pinadagsenanna amin a kaputotanna iti basol. Naparsua ni Adan a perpekto, awan basolna. (Deuteronomio 32:4; 2 Samuel 22:31) Idi sinukirna dagiti pamunganayan a bilbilin ni Jehova, nagbalin nga imperpekto ni Adan. Ti panagbasol kangrunaan a kaipapananna ti “pannakaikapis iti marka.” Pudpudno nga inaramid ni Adan dayta. Gapuna babaen ti panangsalungasing iti bilin ti Dios, nagbalin ni Adan a managbasol.
Apektadotay amin agsipud ta naggaputay amin ken Adan. Mabalinyo nga iyilustrar daytoy babaen iti kastoy a pamay-an: Maysa a tao a naiyanak nga addaan ti maysa a genetico a depekto mabalin a maipasana dayta kadagiti amin a putotna; matawidda ti isu met laeng a depekto. Mabalinan a madeterminar dagiti moderno a sientista itatta no adda dagiti chromosomal a depekto iti maysa a sikog wenno kappasngay, ngem ad-adda pay ti maaramidan ni Jehova. Impalgakna a ti nadagdagsen a depekto ti dimteng gapu ken Adan ket dayta ti naipasana kadatay amin. Daytoy a depekto isu ti basol. “Gapuna no kasano ti iseserrek ti basol ditoy lubong gapu iti maymaysa a tao [ni Adan] ken ti ipapatay gapu iti basol, ket iti kasta ti ipapatay immay kadagiti isuamin a tattao, agsipud ta isuda nagbasolda amin.” (Roma 5:12) Daytoy sibabasol a kasasaad ti nangikabil ti tao nga awan pannakitunosna iti Namarsua, a mainayon iti panangiyegna kadakuada ti sakit ken ipapatay. Awan tao malaksid ken Jesus ti perpekto ken siwayawaya manipud pannakakondenar ken patay.—Roma 5:18-21; 6:23; 2 Cronicas 6:36.
Iti Biblia, nupay kasta, no maminsan dagiti indibidual ti masasaoda a “managbasol” agsipud ta agdindinamagda kas naisangsangayan a managaramid ti basol wenno ti maysa a kita ti nakaro a basol. (Lucas 19:2-7; Marcos 2:16, 17; 14:41) Dayta, nupay kasta, dina kayat a sawen a ti dadduma kadagiti tattao ti perpektoda, awan basolda. Ta no koma awan basolda, saanda koma metten a limmakay ken natay iti kamaudiananna.
Ti salaysay idiay Juan kapitulo 9 ramanenna ti maysa a lalaki a naiyanak a bulsek ngem pinaimbag ni Jesus ti panagkitana. Saan a personal a nabasa ti lalaki dagiti Kasuratan, ngem isut’ addaan limitado a pannakaammo. Ammona a saan a denggen ti Dios ti dawat dagiti sipapakinakem a managbasol. Ti kinapudno nga inted ni Jehova ti pannakabalin ken ni Jesus nga agaramid ti milagro a mangted pannakakita pinaneknekanna a ni Jesus maysa a mammadto. Dagiti natangsit a Pariseo, nupay kasta, dida kayat nga awaten ti nainkalintegan a pammaneknek daytoy a lalaki, ket isut’ pinapanawda.—Juan 9:13-17, 26-34.
Kalpasan daytoy, kinuna ni Jesus: “Siak immayak ditoy lubong a maipaay iti panakaukom: tapno dagiti saan a makakita makakitada, ket dagiti makakita agbalinda a bulsek.” (Juan 9:39) Wen, maipuon iti panangaskasabana, dagiti dadduma nga ar-aramidna, ken papelna iti pangpanggep ti Dios, dagiti indibidual makagun-odda ti naespirituan a panagkita ken makapagnada iti lawag wenno maaddada iti naespirituan a kinasipnget. (Isaias 9:1, 2; 42:6, 7; Mateo 4:13-17; 6:23; 2 Pedro 1:9; 2 Corinto 4:4) No dagiti narelihiusuan a papangulo ket dagidiay koma kurang ti pannakaammoda a Judio nga addaan ti gagangay a babantot ti natauan a basol, ti saanda a panangawat iti Mesias ti mapalabas laeng koma. Ngem isuda, nga agkunkuna a “makakitada,” wenno makaawatda, ti nangnangruna a nakabasol agsipud ta addaanda ti dakdakkel a pannakaammo iti Linteg ken iti propetiko a Sao ti Dios. Gapuna ti pananglaksidda ken ni Jesus ti maysa a nainget a basol a nangkondenar nga ad-adda kadakuada ngem iti gagangay laeng a natauan a kinaimperpekto ken basol. Gapuna, kinuna ni Jesus kadagiti Pariseo: “No bulsekkay koma, awan koma ti basolyo. Ngem ita kunayo, ‘Makakitakami.’ Iti kasta ti basolyo mataginayon.”—Juan 9:41.