Mangisalakan ni Jesus—Kasano?
“Mangisalakan ni Jesus!” “Ni Jesus ti Mangisalakan kadatayo!” Kadagiti adu a pagilian, mabasa dagiti kasta a mensahe kadagiti pader dagiti pasdek ken dadduma pay a publiko a lugar. Sipapasnek a mamati dagiti minilion a tattao a ni Jesus ti Manangisalakan kadakuada. No isaludsodyo kadakuada, “Kasanonatay nga ispalen ni Jesus?” nalabit isungbatda, “natay ni Jesus gapu kadatayo,” wenno “natay ni Jesus gapu kadagiti basoltayo.” Wen, ti ipapatay ni Jesus ti mamagbalin a posible iti pannakaisalakantayo. Ngem kasano a ti ipapatay ti maysa a tao bayadanna ti basbasol ti riniwriw? No isaludsodda kadakayo, “Kasano a maisalakannatayo ti ipapatay ni Jesus?” ania ti kunaenyo?
SIMPLE ngem nalawag ken napnuan iti kaipapanan ti sungbat ti Biblia iti dayta a saludsod. Ngem tapno matarusantayo ti kinapategna, umuna nasken a matmatantayo ti biag ken ipapatay ni Jesus kas solusion iti narikut unay a problema. Satayto la siuumiso a maawatan ti nakapatpateg nga ipapatay ni Jesus.
Idi inyurnosna ti panangisakripisio ni Jesus iti biagna, tamtamingen ti Dios ti maysa a parikut a timmanor idi nagbasol ni Adan. Anian a panangdidigra daydi a basol! Perpekto idi ti umuna a lalaki ken ni Eva nga asawana. Pagtaenganda idi ti nakapimpintas a minuyongan ti Eden. Impaayan ida ti Dios iti nagpateg a trabaho a panangaywan iti minuyongan a pagtaenganda. Aywananda a siaayat dagiti sabsabali pay a parsua ditoy daga. Ken bayat nga umadu ti tao ket punnuenda ti daga iti minilion a kakikitada, pagbalinenda a paraiso ti intero a daga. (Genesis 1:28) Anian a nakaay-ayat ken makapagagar a trabaho ti naited kadakuada! Maysa pay, makapaglinnailoda iti maysa ken maysa. (Genesis 2:18) Adda amin a kasapulanda. Agur-uray kadakuada ti naragsak a biag nga agnanayon.
Narigat a panunoten no apay a nagbasol ni Adan wenno ni Eva. Ngem immalsa ti umuna a natauan a pagassawaan maibusor iti mismo a nangparsua kadakuada—ni Jehova a Dios. Babaen ti panangusarna iti serpiente, ti espiritu a parsua a ni Satanas a Diablo naallilawna ni Eva nga agsukir ken Jehova, ket kimmanunong ni Adan iti asawana.—Genesis 3:1-6.
Ammotayo lattan no ania ti aramiden ti Namarsua kada Adan ken Eva. Impakpakaunana ti ibunga ti panagsukir, a kunkunana: “Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.” (Genesis 2:16, 17) Maysa a saludsod a napatpateg nga amang ti masapul ita a masungbatan.
Sumangsango ti Sangatauan iti Narikut a Problema
Namataud ti immuna a basol iti serioso unay a parikut ti sangatauan. Perpekto a tao ni Adan idi damo. Isu a mabalin a natagiragsak koma dagiti annakna ti perpekto a biag nga agnanayon. Ngem nagbasol ni Adan sakbay a naaddaan iti annak. Awan pay ti natauan a pamilia idi masentensiaan: “Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.” (Genesis 3:19) Isu nga idi nagbasol ken nangrugi a matay ni Adan kas imbaga ti Dios a mapasamak kenkuana, nasentensiaan met a matay ti intero a sangatauan.
Maitutop ti insurat ni apostol Pablo idi agangay: “Babaen iti maysa a tao [ni Adan] simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Wen, gapu iti immuna a basol, dagiti annak a maipasngay koma a perpekto ken mangnamnama iti biag nga agnanayon ti nayanak nga agsakit, lumakay, ken matay.
“Saan a nainkalintegan dayta,” mabalin nga adda mangibaga. “Ni Adan ti nagsukir iti Dios, saan a datayo. Apay koma a mapukawtayo ti namnamatayo a biag nga agnanayon ken kinaragsak?” Ammotayo a no ipabalud ti pangukoman ti maysa nga anak agsipud ta nagtakaw ti amana iti lugan, rasonable nga ireklamo ti anak: “Saan a nainkalintegan dayta! Awan ti inaramidko nga aniaman a dakes.”—Deuteronomio 24:16.
Babaen ti panangsulbogna iti immuna a lalaki ken babai nga agbasol, mabalin a pinanunot ni Satanas nga inkabilna ti Dios iti narikut a kasasaad. Nasapa unay a rinaut ti Diablo ti natauan a pamilia—sakbay nga adda ti maipasngay nga annak. Iti daydi kanito a nagbasol ni Adan, ti napateg a saludsod ket, Ania ti aramiden ni Jehova kadagiti agbalin nga annak da Adan ken Eva?
Inaramid laeng ni Jehova a Dios no ania ti nainkalintegan. Kinuna ti nalinteg a tao a ni Eliu: “Adayo koma iti pudno a Dios nga agtignay a sidadangkes, ken iti Mannakabalin-amin nga agtignay a di nainkalintegan!” (Job 34:10) Ken maipapan ken Jehova, insurat ni propeta Moises: “Ti Bato, naan-anay ti aramidna, ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; isu nalinteg ken napalungdo.” (Deuteronomio 32:4) Saan a napukaw ti gundawaytayo nga agbiag nga agnanayon iti paraiso a daga gapu iti solusion nga impaay ti pudno a Dios a mangrisut iti parikut a pinataud ti basol ni Adan.
Nangipaay ti Dios iti Perpekto a Solusion
Utobenyo ti solusion nga inyurnos ti Dios idi sinentensiaanna ni Satanas a Diablo. Kinuna ni Jehova ken ni Satanas: “Mangikabilakto ti panagginnura iti nagbaetanyo iti babai [ti nailangitan nga organisasion ti Dios] ken iti nagbaetan ti bin-im [ti lubong iti sidong ni Satanas] ken ti bin-ina [ni Jesu-Kristo]. Dunorennakanto [ni Satanas] iti ulo ket dunoremto iti mukod [ti ipapatay ni Jesus].” (Genesis 3:15) Iti daytoy umuna a padto ti Biblia, impasimudaag ni Jehova ti panggepna nga ibaon ditoy daga ti nailangitan nga espiritu nga Anakna tapno agbiag a kas ti perpekto a tao a ni Jesus sa matay— madunor ti mukodna—nga awan basolna.
Apay a kinalikaguman ti Dios ti ipapatay ti maysa a perpekto a tao? Bueno, ania ti pannusa ni Jehova a Dios ken ni Adan no agbasol? Saan aya nga ipapatay? (Genesis 2:16,17) “Dagiti supapak ti basol isu ti ipapatay,” insurat ni apostol Pablo. (Roma 6:23) Inkaro ni Adan ti basolna babaen ti mismo nga ipapatayna. Naipaayan iti biag, ngem pinilina ti agbasol, ket natay kas dusa iti panagbasolna. (Genesis 3:19) Ti ngay pannakakondenar ti intero a natauan a pamilia gapu iti basol? Kasapulan ti ipapatay tapno maabbongan dagiti basolda. Ngem ipapatay ti siasino ti nainkalintegan a mangabbong kadagiti salungasing ti amin a tattao?
Ti Linteg ti Dios iti nagkauna a nasion ti Israel kinalikagumanna ti “kararua iti kararua [wenno, biag iti biag].” (Exodo 21:23) Sigun iti daytoy a legal a pagalagadan, masapul a ti ipapatay a mangabbong kadagiti salungasing ti sangatauan ket katupag ti napukaw ni Adan. Ti laeng ipapatay ti sabali a perpekto a tao ti mangsupapak iti basol. Ni Jesus dayta a tao. Wen, ni Jesus ti “katupag a subbot” a pakaisalakanan ti amin a mabalin a masubbot a kaputotan ni Adan.—1 Timoteo 2:6; Roma 5:16, 17.
Nakapatpateg ti Ipapatay ni Jesus
Awan pateg ti ipapatay ni Adan; maikari a matay gapu iti basolna. Ngem ti ipapatay ni Jesus ket nakapatpateg agsipud ta natay nga awan basolna. Mabalin nga awaten ni Jehova a Dios ti pateg ti perpekto a biag ni Jesus kas subbot agpaay kadagiti natulnog a kaputotan ni managbasol nga Adan. Ket ti pateg ti daton ni Jesus saan laeng nga agpaay a pangsubbot kadagiti naglabas a basoltayo. Awan koma ti masakbayantayo no kasta laeng ti pategna. Agsipud ta naiyinawtayo iti basol, makaaramidtay latta iti kamali. (Salmo 51:5) Anian a yamantayo ta babaen ti ipapatay ni Jesus, naikkantayo iti gundaway a mangtagiragsak iti kinaperpekto nga orihinal a pinanggep ti Dios para kadagiti annak da Adan ken Eva!
Mayasping ni Adan iti maysa nga ama a pimmusay ken nangibati kadatayo iti dakkel nga utang (basol) a ditay pulos kabaelan a bayadan. Iti sabali a bangir, ni Jesus ket kas iti naimbag nga ama a natay ket pinatawidannatayo iti kinabaknang a saan laeng a nangabsuelto kadatayo iti nagdakkelan nga utang nga impabaklay kadatayo ni Adan no di pay ket nangipaay ti makaanay a mangtaginayon iti biagtayo. Ti ipapatay ni Jesus ket saan laeng a basta mangpunas kadagiti napalabas a basoltayo; ngem maysa met dayta a nagsayaat a probision para iti masanguanantayo.
Mangisalakan ni Jesus agsipud ta natay maipaay kadatayo. Ket anian a nagpateg a probision ti ipapatayna! No matmatantayo dayta kas paset ti panangsolbar ti Dios iti narikut a problema a pinataud ti basol ni Adan, mapabileg ti pammatitayo ken Jehova ken iti wagas a panangipamuspusanna iti bambanag. Wen, ti ipapatay ni Jesus ket pamay-an tapno “tunggal maysa a mangwatwat iti pammati” kenkuana ket maispalda iti basol, sakit, panaglakay, ken iti mismo nga ipapatay. (Juan 3:16) Agyamankayo kadi iti Dios gapu iti naayat a panangipamuspusanna iti pannakaisalakantayo?
[Ladawan iti panid 5]
Inyeg ni Adan ti basol ken ipapatay iti sangatauan
[Ladawan iti panid 6]
Nangipaay ni Jehova iti perpekto a solusion