Agtakder a Sititibker Kontra kadagiti Panangallilaw ni Satanas

“Ikawesyo ti amin a kabal manipud iti Dios tapno mabalinyo ti agtakder a sititibker kadagiti pangallilaw [Griego, “nasikap nga ar-aramid”] ti Diablo.”​—EFESO 6:11.

1. Ania nga ebidensia ti ipaay ti pannakasulisog ni Jesus nga adda a biag ni Satanas?

TALAGA aya nga adda ni Satanas? Ikalintegan ti dadduma a tattao nga idiay Biblia, matuktukoy laeng ni “Satanas” nga isu ti kinadakes nga adda iti uneg ti tao. Ilibakda ti kaaddana kas maysa a parsua. Ngem aniat’ kunaen ti Kasuratan kadatayo? Ipakita ti salaysay ti Ebanghelio ni Mateo ken ni Lucas a ni Kristo Jesus ti direkta a tallo a daras a sinulisog ni Satanas, ket kada beses ni Jesus ti nangilaksid kenkuana, nga us-usaren ti Kasuratan. Apay a ni Jesus ti nangsungbat kenkuana manipud Hebreo a Kasuratan? Agsipud ta ni Satanas ti immay kenkuana a di umiso ti panangiyap-aplikarna kadagidiay a Kasuratan tapno isu ti pagbasolenna ket mapaay kas Anak ti Dios, ti naikari a Bin-i.​—Mateo 4:1-11; Lucas 4:1-13.

2. Kasanotay nga ammo a di inar-arapaap laeng ni Jesus dagitoy a pannakirupirna ken Satanas?

² Nalawag, a ni Jesus, maysa a perpekto a tao, ket saanna nga inarapaap dagitoy a panagsinnangoda. (Hebreo 4:15; 7:26) Isu ti sinango ti isu met laeng a pannakabalin nga adda iti likudan ti uleg idiay Eden, ti dati nga angheliko a kabsatna nga immalsa iti di mabilbilangen a panawen sakbayna ket itan rantana a tungdayen ti kaitungpalan ti Genesis 3:15. Kayat ni Satanas a dadaelen ti kinatarnaw ti naikari a Bin-i. Nasiribanna ti sinisikap nga ar-aramidna, sititibker a linaksid ni Jesus ti Mannulisog. Ania idi ti reaksion ni Satanas? “Ket idi nalpas ti amin a pannulisog, ti Diablo pimmanaw kenkuana agingga iti sabali manen a kumbiniente a tiempo.” Nalawag, saan a pimmanaw ni Jesus iti bagina met laeng! Ni Satanas, a napaay, isut’ pimmanaw kenkuana, “ket, adtoy! dagiti anghel dimtengda ket nagserbida kenkuana [ni Jesus].”​—Lucas 4:13; Mateo 4:11.

3. Aniat’ kinuna ti maysa a historiador maipapan ti kinapateg ti kaadda ti Diablo iti Kinakristiano?

³ Nainkalintegan, inkomento ti maysa a historiador: “Ti panangilibak ti kaadda ken sentral a kinapateg ti Diablo iti Kinakristiano ket maikontra iti apostoliko a pannursuro ken iti historikal nga irarang-ay ti Nakristianuan a doktrina. Yantangay ti panangdepinar ti Kinakristiano kadagiti termino malaksid kadagitoy ti literal nga away kapapay-anna, agsisimparat a kapanunotan ti panangikalintegan iti maysa a Kinakristiano a laksidenna ti Diablo. No ti Diablo ket awan, no kasta ti Kinakristiano ti dakkel a kamali maipapan iti sentral a punto manipud pay idi pangrugian.”a Dayta a konklusion ti mangipresentar ti karit para iti tunggal tao ditoy daga itatta. Malasinyo aya ti kaadda ti maysa a di makita a kabusor a rantana a dadaelen ti kinasoberano ti Dios ken ti kinasungdo ti tao?

Ti Pudno a Pakailasinan ni Satanas

4. Kasano a ti maysa a perpekto nga espiritu a parsua nagbalin a Satanas?

⁴ Ni Satanas ket maysa a mannakabalin nga espiritu a parsua, a pinarsua ti Dios idi punganay kas maysa nga anghel, maysa nga espiritu nga anak a mabalinna ti sumango iti nailangitan a korte ni Jehova. (Job 1:6) Nupay kasta, winatwat ni Satanas ti wayawayana nga agpili a maibusor iti Dios; ket buyogen ti kinasikap insungsongna ni Eva ken, babaen ken Eva, ni Adan iti isusukir ken ipapatay. (2 Corinto 11:3) Gapuna, isut’ nagbalin a Satanas, kayatna a sawen “Kabusor”​—maysa a rebelde, demonio, mammapatay, ken maysa nga ulbod. (Juan 8:44) Anian a maiyanatup ti sasao ni Pablo a “saan a nakaskasdaaw ta uray ni Satanas agbalin a kasla anghel ti lawag,” idinto a ti aktual a kinapudno isu ti ‘agturay iti lubong daytoy a sipnget’! (2 Corinto 6:14; 11:14; Efeso 6:12) Babaen ti pananggargarina kadagiti dadduma nga anghel nga umalsa, inruarna ida iti lawag ti Dios iti kabukbukodanna a kinasipnget. Isut’ nagbalin a “ti pangulo dagiti demonio.” Isu met ti impabigbig ni Jesus kas “ti agturay daytoy a lubong.” Kaawatan, a tapno agbalin nga agturay, isut’ rebbeng nga adda kas naparsua nga espiritu a persona.​—Mateo 9:34; 12:24-28; Juan 16:11.

5. Kasano kalawag ti pannakaipabigbig ni Satanas iti Kristiano a Griego a Kasuratan?

⁵ Nupay natakkon ti pannakadakamat ni Satanas iti Hebreo a Kasuratan, impasiguro ti nasantuan nga espiritu ti Dios nga isut’ maibutaktak a naan-anay iti Kristiano a Griego a Kasuratan​—a gapu itoy madalapustayo ti nagan a Satanas sadiay iti 36 daras ken ti sao a Diablo, 33 a daras. (Kitaenyo ti Comprehensive Concordance of the New World Translation of the Holy Scriptures.) Isu met ti mabigbigbig kadagiti dadduma a nagan ken titulo. Dua kadagitoy ti inusar ni Juan idiay Apocalipsis 12:9: “Ket naigarangugong daydi dakkel a dragon, daydi uleg a kadaanan, nga isu ti managan ti Diablo ken Satanas, isu a mangallilaw iti isuamin a mapagnaedan a daga.”​—Kitaenyo met ti Mateo 12:24-27; 2 Corinto 6:14, 15.

6. Ania ti kaipapanan ti sao a “Diablo”?

⁶ Ditoy Apocalipsis agparang ti Griego a sao a di·aʹbo·los, a naipatarus a “Diablo.” Sigun iti Griego nga iskolar a ni J. H. Thayer literal a kaipapanan dayta ti “maysa a mamadpadakes, ulbod a manangidarum, manangpardaya.” (Idiligyo iti 1 Timoteo 3:11; 2 Timoteo 3:3, Kingdom Interlinear.) Dineskribir ni W. E. Vine ti Diablo kas ti “nagdakes a kabusor ti Dios ken tao.”b

7. Apay a maipamaysa ni Satanas dagiti panagreggetna iti ili ni Jehova?

⁷ Ti naindaklan a Kabusor ket saan nga agpalpallailang. (1 Pedro 5:8) Nalabit daytat’ makagapu no apay a maysa a proverbio kunana, “Ti Diablo maisarakanna ti trabaho dagiti ima nga awan ar-aramidenna.” Isu ti desidido a mangdadael kadagiti isuamin a pudno a Kristiano. (2 Timoteo 3:12) Ket mabalinna nga ipamaysa iti ili ni Jehova a maipaay iti maysa a simple laeng a rason​—adda iti sidong ti pannakabalinnan ti intero a lubong! (1 Juan 5:19) Ti lubong itatta ket isut’ lubong ni Satanas. Isu ti agturayna ken diosna, bigbigen man dayta dagiti tattao wenno saan. (Juan 12:31; 2 Corinto 4:4) Kas bungana, isut’ agtungpal iti isuamin a makaallilaw wenno nasikap nga aramid wenno panangisingasing tapno dadaelenna ti ili ni Jehova, indibidual man wenno sangsangkamaysa. Sukimatentayo ti sumagmamano kadagiti pamay-an nga us-usarenna.​—Marcos 4:14, 15; Lucas 8:12.

Dagiti Tuso ken Nasikap nga Ar-aramid ni Satanas

8. Iti ania a bentaha nga agtigtignay ni Satanas maibusor kadatayo?

⁸ Ni Satanas ti naaddaan nakaun-unday a tiempo a mangadal ti natauan a sikolohia, tapno maanalisarna ti kababalin ti tao agraman amin a depekto a naikasigudan ken nagunggun-odanna. Ammona no kasano a gundawayan dagiti pagkapuyan ken kinapangpangastayo. Ita, ania ti situasion no ti kabusoryo ammona dagiti pagkapuyanyo ket dakay a maismo saanyo ida a nailasin? No kasta saankayo a nakasagana a mangidepensa ti bagiyo, yantangay saanyo a pagaammo dagiti lamat iti naespirituan a kabalyo wenno kalasagyo. (1 Corinto 10:12; Hebreo 12:12, 13) Anian a maiyanatup ti sasao ti bumiberso nga Scottish: ‘O adda koma pannakabalin a mangted ti sagut kadatayo a makakita ti bagbagitayo kas ti pannakakita dagiti dadduma kadatayo! Daytat’ mangwayawaya kadatayo manipud adu a panagkamali.’

9. Ania koma ti nakalkaldaang a resultana no napaaytayo a nangsukimat ti bagbagitayo ken nagbalbaliw?

⁹ Kayattayo aya a makita ti bagbagitayo kas pannakakita dagiti dadduma kadatayo​—nangnangruna kas ti mabalin a pannakakita ti Dios wenno ni Satanas kadatayo? Kalikaguman dayta ti napudno a panangsukimat ti bagi ken panangtimbang ken ti pakinakem nga agaramid ti panagbalbaliw. Naglaka ti panangallilawtay ti bagbagitayo. (Santiago 1:23, 24) Anian a no maminsan pampanunotentayo a palpalintegen dagiti tigtignaytayo! (Idiligyo iti 1 Samuel 15:13-15, 20, 21, 24.) Ken anian a naglaka a kunaen, “Ammoyo, awan asinoman a perpekto!” Daytat’ pagaammo ni Satanas, ket gunggundawayanna ti kinaimperpekto. (2 Samuel 11:2-27) Anian a nakalkaldaang a madanon ti katengngaan ti kinanataengan ket santo malasin a gapu iti kinauyong, di personal, wenno di naasi a pamay-an a pannakilangen ti maysa kadagiti dadduma kadagiti naglabas a tawtawen, ti maysa nagbalin nga awanen gagayyemna; wenno tapno mailasin a ti maysa bassit naaramidanna wenno awan pulos naaramidanna a mangparagsak ti dadduma a tattao. Babaen iti kinasikap nalabit inturongnatayo ni Satanas iti intero a panagbiag nga inus-usar dagiti nakaisigudantayo a kinaagum a nangbulsek kadatayo. Napaaytayo a nangkayaw iti kababagas ti pudno a kapanunotan ni Kristo​—ti ayat, dungngo, ken kinamanangaasi.​—1 Juan 4:8, 11, 20.

10. Ania a salsaludsod ti imtuodentay iti bagbagitayo, ken apay?

¹⁰ Ngarud, tapno maparmek ni Satanas, masapul a sukimatentay ti bagbagitayo. Addaankay aya ti pagkapuyan a mabalin a gundawayan ni Satanas wenno gunggundawayanna itattan? Addaankay aya ti problema iti kinatangsit? Masapul kadi a kanayon nga agbalinkayo a bida? Ti kadi kinatangsit ti nakalemmeng a puersa a mangtigtignay kadakayo? Ti aya panagimun, apal, wenno ayat ti kuarta ti mangbalbaliw ti personalidadyo? Nalakakay aya nga agpungpungtot? Nalamiis aya ti pannakilanglangenyo ken nauyaw? Wenno arsagidkay unay no adda mangted suhestion wenno pammabalaw kadakayo? Kagurayo aya wenno diyo pay awaten ti pammagbaga? No ammotay ti bagitayo, mabalintay nga ihusto dagita a problema, la ketdi no napakumbabatayo. Ta no saan, baybay-antay ti bagitayo a silulukat ken Satanas.​—1 Timoteo 3:6, 7, 11; 1 Pedro 5:6-8.

11. Babaen kadagiti ania a sinisikap a pamay-an a padpadasen ni Satanas a pakapuyen ti espiritualidadtayo?

¹¹ Pakapuyen met ni Satanas ti espiritualidadtayo iti nasikap, nalimed a pamay-an. Nalabit mariribukantayo kadagiti pannakaar-aramid dagiti bambanag iti uneg ti kongregasion wenno ti organisasion. Masansan awan kadatayo amin dagiti kinapudno, ngem naglakatayo a lumagto kadagiti konklusion. No ti pannakirelasiontayo ken ni Jehova ti nakapuy, no kasta daytat’ ababa laengen nga addang nga agturong iti negatibo a panagpampanunot ken panagduadua maipapan iti kinapudno. Mabalin a dadduma agbirokdan ti panangikalinteganda ti bagida a makalapsut kadagiti responsabilidad a sapsapulen ti kinapudno. Iti kasta ikabkabil ni Satanas ti di panagsungdo ken kinatraidor iti puspusoda. Din agbayag agbalindanton a biktima ti apostasia, ket maragsakan ni Satanas.​—Lucas 22:3-6; Juan 13:2, 27; 2 Juan 9-11.

12. (a) Kasano a ni Satanas pinapigsana ti nakem dagiti dadduma? (b) Kasanot’ panangsilo ni Satanas kadagiti adu iti imoralidad?

¹² Dadduma ti pinatured ni Satanas saan laeng nga agaramid kadagiti nakaro a basol a maikari ti pannakailaksidda no di ket agtungpalda pay kadagiti panagulbod ken panangallilaw tapno malokoda dagiti panglakayen ti konggregasion. Kas ken Ananias ken Safira, impatoda a mabalinda nga allilawen dagiti anghel ken nasantuan nga espiritu ti Dios. (Aramid 5:1-10) Rinibribo kadagiti nabiit pay a tawtawen ti natnag iti silo ti imoralidad ni Satanas. Ammo ti Diablo a dagiti seksual a rikrikna ti sangatauan ti nakapigpigsa, ket babaen iti nailubongan a sistemana, itamtampokna, ballikogenna, ken tiritirenna ti paset ti seksualidad. (Numeros 25:1-3) Dagiti di kasado a Kristiano ti mabalin masulisogda a makiabig wenno kadagiti dadduma pay a seksual a panangabuso. (Proverbio 7:6-23) No dagiti kasado a Kristiano palubosanda nga agalla-alla ti is-isip ken puspusoda, naglakada a matnag iti kinatraidor a kababalin, a liputanda ti asawa a nangikarianda ti kinamatalekda.​—1 Corinto 6:18; 7:1-5; Hebreo 13:4.

13. (a) Kasano a mabalin a moldien ti telebision ti panagpampanunottayo? (b) Kasanotay a maparmek ti kasta nga impluensia?

¹³ Agbibiagtayo iti maysa a lubong a sadiay ti kinaulbod, panagkusit, ken narungsot a panagpungpungtot gagangayen. Us-usaren a naan-anay ni Satanas ti pagiwarnakan tapno mailawlawagna a naimbag daytoy nagdakes a mentalidad. Dagiti television serials wenno soap operas ti mangipabpabuya kadagiti makaatrakar-langana a tattao nga agbibiag iti saput ti panagkusit ti agsumbangir. No palubosantay dayta a kapanunotan a mangapektar kadatayo, di agbayag mangrugitayon a sumuksuko kadagiti “babassit” a basbasol, nga isut’ agbalin a ti akikid nga igid ti kalso a maipaay kadagiti “daddadakkel” a basbasol. Dagiti nalamuyot a panangisingasing ni Satanas ti naglaka a mangiparikna ti bagbagina iti panagpampanunottayo. Kasanotay a maparmek ti kakasta nga impluensia? Pulos “dikay ikkan ti lugar ti Diablo,” imbalakad ni Pablo. Dayta kaipapananna met ti inkay panangkontrol ti inkay palpalubosan a sumrek iti pagtaenganyo babaen iti telebision. Di aya rebbeng a kaguratayo ti iseserrek ti narungsot, imoral, dakes panagngiwngiwatna a tattao a mangiyeg ti polusion iti pagtataengantayo?​—Efeso 4:23-32.

Kasanotay a Maparmek ni Satanas ken Agtalinaed a Matalek iti Dios?

14. Ania a nagkadua a pangngeddeng ti kasapulan tapno maparmektayo ni Satanas, ken aniat’ sapulen daytoy?

¹⁴ Gapu iti kasta a mannakabalin, nagpigsa ngem tao a kabusor a naipasango kadatayo nga imperpekto a natauan a parparsua, kasanotay a masalimetmetan ti kinatarnawtayo? Ti tulbek ket masarakan kadagiti sasao ni Santiago: “Paiturayankay ngarud iti Dios; ngem makibakalkayo iti Diablo, ket isu agtalawto kadakayo.” (Santiago 4:7) Kitaenyo ta ti balakad ni Santiago ti nagkadua. Bayat a busbusorentayo ti Diablo ken ti pagayatanna, masapul nga ipasakoptay ti bagitayo iti pagayatan ti Dios. Ramanen met dayta ti panangayattayo ti pagayatan ti Dios ken pananggura iti pagayatan ni Satanas. (Roma 12:9) Gapuna, kunaen ni Santiago: “Umadanikayo iti Dios ket isu umasidegto kadakayo. Dalusanyo dagiti im-imayo, dakayo a managbasol, ket guguranyo dagiti puspusoyo, dakay a nagkaddua ti nakemyo.” (Santiago 4:8) Wen, iti panangsarangettayo ken Satanas, awan lugar ti panagpangpangadua ti puso wenno di makapagdesision. Ditay mabalin nga irisgo ti kinatarnawtayo babaen ti intay panangkita no kasano kaasideg ti pannakaadanitayo iti linea a pagbeddengan iti kinadakes. Masapul a naan-anay a “guraenyo ti dakes.”​—Salmo 97:10.

15. Apay a ti “kabal a naggapu ti Dios” ti nasken? Iyilustrar.

¹⁵ Ti naisangsangayan a balakad a panangparmek ken Satanas ket masarakan idiay Efeso kapitulo 6. Kasanot’ panangikuna ni Pablo a panangparmektayo kadagiti “kinasikap,” “gakgakat,” wenno “taktika” ni Satanas? (Efeso 6:11, Phillips, New International Version, The Jerusalem Bible) “Ikawesyo ti amin a kabal a naggapu iti Dios,” imbalakadna. Daytoy ebkas nga “amin a kabal” awan ibatina a lugar a maipaay iti kinaawan-annadna a kababalin iti Kinakristiano, kas ti soldado a Romano saanna a mabalin ti agbalin a di naannad no agsagsagana iti pannakigubat. Kasanonto ngatat’ kasasaad ti maysa a soldado no insaganana amin a kabalna malaksid ti kalasag ken ti helmetna? Mabalin a pinanunotna koma, ‘Talaga a nagdakkel a kalasag dayta, ken ti helmet ti nakadagdagsen. Nakabambantotda, ken diak met talaga a kasapulan ida.’ Panunotenyo ti situasion​—maysa a soldado a Romano nga armadon a makidangadang ngem awanan met kadagiti kangrunaan a bambanag a pagdepensana.​—Efeso 6:16, 17.

16. (a) Kasanot’ masapul a panangsurottay ti ulidan ni Jesus iti panangusar iti “kampilan”? (b) Kasanotay a salimetmetan ti panagsalukagtayo kadagiti “dumardarang a gayang,” ni Satanas ket ania ti resultana?

¹⁶ Panunotenyo pay met, ti maysa a soldado nga awanan kampilanna. “Ti kampilan ti espiritu” ket nagsayaat a depensa, ta daytat’ maus-usar a mangteppas kadagiti igam nga iyeg ni Satanas kontra iti Kristiano. Ti “kampilantayo” ti masapul a sisasagana a kanayon. Daytat’ kanayon a sisasagana no ditay liwliwayan ti personal ken pampamilia a panagad-adaltayo ti Biblia. Ngem kangrunaan ti isuamin, daytoy “kampilan. . . ti Sao ti Dios” ti instrumentotayo iti iraraut. Daytat’ inusar ni Jesus iti dua a pamay-an. (Mateo 4:6, 7, 10; 22:41-46) Kastatay met koma. Masapul a salimetmetantayo a natadem a kankanayon ti panangipategtayo iti kinapudno. Saantay a masalimetmetan ti espiritualidadtayo babaen laeng kadagiti intay naadal kadagiti umuna a bulan wenno tawentayo iti kinapudno. No ditay pabpabaruen dagiti naespirituan a sirkito wenno konkoneksion iti isiptayo, ti naespirituan a panagkitatayo ti kumudrep. Ti regtatayo iti pudno a panagdayaw ken Jehova ti bumaba. Agbalintayto nga aglaladut iti naespirituan. Ditayto mabalinen a sanggaen ti panangatakar dagiti kakabagian, gagayyem, kakkakuyog, ken dagiti apostata a mangibunton ti pananglais iti pampammatitayo. Ngem ispalennatayo ti Dios manipud iti Diablo ken kadagiti “dumardarang a gayang[na]” no itultuloytay a kabalan ti bagbagitayo iti “amin a kabal a naggapu iti Dios.”​—Isaias 35:3, 4.

17, 18. Maibusor iti siasino ti pannakidangadangtayo, ken kasanotay nga agballigi?

¹⁷ Wen, impaganetget ni Pablo ti peggad a ramanen ti pannakidangadang ti Kristiano idi a nagsurat: “Ta ti pannakidangadangtayo ket saan a maibusor kadagiti natauan a kabkabusor, no di ket kadagiti kosmiko a pannakabalin, maibusor kadagiti agtuturay ken papangulo daytoy nasipnget a lubong, a maibusor kadagiti napigpigsa ngem tao a puersa ti kinadakes idiay langit.” (Efeso 6:12, The New English Bible) Kasanotayo a nagkapsut a tattao ti makaparmek ken mangabak iti kasta a saan a timbang a laban? Iyunay-unay ni Pablo ti puntona: “Gapuna alaenyo ti amin a kabal a naggapu iti Dios, tapno mabalinyo ti sumarikedked inton dakes nga aldaw ket, inton naisaganayon amin, agtakderkayo a sititibker.” (Efeso 6:13) Ti kangrunaan a sasao ket: “Inton naisaganayon amin.” Ditoy manen awan lugar a maipaay iti kagkaguduat’ puso wenno nabingay a Kinakristiano.​—1 Juan 2:15-17.

¹⁸ Gapuna, agtakdertayo koma a sititibker iti kinapudno, nga ayaten ti kinalinteg ni Jehova, nga ikaskasaba ti naimbag a damag ti talna, a petpetan a naimbag ti napigsa a pammati iti panangisalakan nga itden ni Jehova baeten ken Kristo Jesus, bayat nga agpampannuraytayo iti Sao ti Dios kas kangrunaan a sadiritayo. (Efeso 6:14-17) Laglagipenyo, nga ay-ayatennatayo ti Dios, ket tulongannatayo nga agballigi kadagiti pakasusuotan ken pagdandanagan a maipasango kadatayo iti sistema dagiti bambanag ni Satanas. Sapay koma ta ipangagtay amin ti pakdaar nga: “Agparbengkayo, agsalukagkayo. Ti Diablo, a kabusoryo, kasla leon a ngumerngernger, magmagna iti sibayyo nga agsapsapul ti alun-unenna.” Wen, “isu sarangtenyo ngarud babaen iti nabileg a pammati.”​—1 Pedro 5:6-9.

19. (a) Ania pay a kanayonan a nasken a sagana ti masapul nga usarentayo tapno maparmektayo ni Satanas? (b) Iti agangay anianto ti mapasamak ken ni Satanas?

¹⁹ Ditay koma liplipatan ti nasken a kanayonan ti “kabal.” Kunana: “Nga agdawdawatkayo a kankanayon babaen ti espiritu kadagiti dawdawat ken karkararag. Ket agsalukagkayo ti maipaay itoy a mabuyogan ti amin a panagtalinaed ken panangidawdawat kadagiti isuamin a sasanto.” (Efeso 6:18) Ti di makita a kabusortayo ti nakapigpigsa a kasapulantayo “dagiti dawdawat ken karkararag.” Ngarud, anian a masapul a dagiti karkararagtayo ti napudno ken agdudumaduma! Ti naan-anay a panagpannuraytayo ken Jehova ti nasken no kayattayo ti agballigi iti pannakidangadang ken mangsalimetmet ti kinatarnawtayo. Isut’ kakaisuna a makaipaay “ti naindaklan a pannakabalin ngem ti gagangay” a mabalintay a pangparmek iti awan-asina a Kabusortayo. Anian a makaliwliwa a maammuan a ti naindaklan a Kabusortayo ket dandanin a maigarangugong iti mangliwengliweng ket iti kamaudianan isut’ maikisap nga agnanayonen!​—2 Corinto 4:7; Apocalipsis 20:1-3, 10.

[Dagiti Footnote]

Masungbatanyo Aya?

▫ Kasanotay nga ammo a ni Satanas maysa a pudpudno a persona?

▫ Apay a maibagbagay ti dadduma a nagnagan ken titulo ni Satanas?

▫ Ania a pananganalisar ti bagbagitayo ti makatulong kadatayo a mangparmek iti nasikap nga iraraut ni Satanas?

▫ Ania a balakad ti makatulong iti panangparmek ken ni Satanas, ken apay?

[Ladawan iti panid 15]

Maysa a pamay-an ti panangparmek iti impluensia ni Satanas isu ti panagbalin nga aleniada, manangtulong, naayat

[Ladawan iti panid 16]

Agannadtayo a ditay agbalin kas ken Ananias ken Safira, a timmulokda ken ni Satanas

[Ladawan iti panid 17]

Tapno masarapa dagiti gayang ni Satanas, ditay mabalin a baybay-an ti aniaman a paset ti naespirituan a kabaltayo