Dagiti Demonio​—Kasano a Masarangettayo Ida?

“Dagiti anghel a saan a nangtaginayon iti nakaisigudan a kasasaadda no di ket pinanawanda ti bukodda nga umiso a lugar a pagnaedan insagana [ti Dios] kadagiti agnanayon a pannakaparaut iti sidong ti napuskol a kinasipnget maipaay iti pannakaukom iti naindaklan nga aldaw.”​—JUDAS 6.

1, 2. Ania a salsaludsod ti tumaud maipapan ken Satanas a Diablo ken kadagiti demonio?

“AGTALINAEDKAYO a sipupuot, managbantaykayo koma,” impakdaar ni apostol Pedro. “Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.” (1 Pedro 5:8) Maipapan kadagiti demonio, kinuna ni apostol Pablo: “Diak kayat nga agbalinkayo a makiramraman kadagiti sairo. Dikay mabalin ti uminum iti kopa ni Jehova ken iti kopa dagiti sairo; dikay mabalin ti makiraman iti ‘lamisaan ni Jehova’ ken iti lamisaan dagiti sairo.”​—1 Corinto 10:20, 21.

² Ngem siasino ni Satanas a Diablo ken dagiti demonio? Kasano ken kaano a timmaudda? Pinarsua kadi ida ti Dios? Kasano kabileg ti impluensiada kadagiti tattao? Iti ania pamay-an, no adda man, a masarangettayo ida?

Kasano a Timmaud ni Satanas ken Dagiti Demonio?

3. Kasano a nagbalin a Satanas a Diablo ti maysa nga anghel ti Dios?

³ Idi rugrugi ti pakasaritaan ti tao, idi nangrugi ti sangatauan iti minuyongan ti Eden, adda anghel ti Dios a nagbalin a rebelioso. Apay? Agsipud ta saan a mapnek iti akemna iti nailangitan nga urnos ni Jehova. Idi naparsua da Adan ken Eva, nakitana nga adda gundaway a mabalinna ida nga impluensiaan nga agtulnog ken agdayaw kenkuana imbes nga iti pudno a Dios. Babaen ti panagrebeldena iti Dios ken babaen ti panangsulisogna iti immuna nga agassawa nga agbasol, daytoy nga anghel pinagbalinna ti bagina a Satanas a Diablo. Idi agangay, kimmappon ti dadduma nga anghel iti iyaalsana. Kasano?​—Genesis 3:1-6; Roma 5:12; Apocalipsis 12:9.

4. Ania ti inaramid ti dadduma a rebelioso nga anghel sakbay ti Layus idi kaaldawan ni Noe?

⁴ Ipakaammo kadatayo ti naipaltiing a Kasuratan nga idi sakbay ti dakkel a Layus idi kaaldawan ni Noe, naaddaan ti dadduma nga anghel iti di maitutop a panaginteres kadagiti babbai ditoy daga. Agpaay iti di umiso a panggep, “ti [nailangitan nga] annak ti pudno a Dios nangrugi a mapaliiwda ti annak a babbai ti tattao, a napipintasda,” kinuna ti Biblia, “ket nangalada iti assawa a maipaay iti bagbagida, awan sabali, dagiti amin a pinilida.” Di naikasigudan dagitoy a panagdenna, isu a naaddaanda iti mestiso nga annak a nagdinamag kas dagiti Nefilim. (Genesis 6:2-4) Gapuna, dagiti espiritu a parsua a simmukir iti Dios nakikaduadan iti iyaalsa ni Satanas maibusor ken Jehova.

5. Ania ti napasamak kadagiti rebelde idi nangyeg ni Jehova iti pannakadadael babaen ti dakkel a Layus?

⁵ Idi inyeg ni Jehova ti Layus iti sangatauan, nadadael dagiti Nefilim ken dagiti tattao nga innada. Kapilitan a pinanawan dagiti rebelde nga anghel dagiti nainlasagan a bagida sada nagsubli iti lugar dagiti espiritu. Nupay kasta, didan makapagsubli iti “nakaisigudan a kasasaadda” a kadua ti Dios. Imbes ketdi, naipupokda iti “napuskol [a naespirituan] a kinasipnget,” a pagaammo kas ti Tartaro.​—Judas 6; 2 Pedro 2:4.

6. Kasano ti panangallilaw dagiti demonio kadagiti tattao?

⁶ Sipud idi napukaw dagiti dakes nga anghel ti “nakaisigudan a kasasaadda,” nagbalindan a demonio a kakadua ni Satanas ket supsuportaranda dagiti dakes a panggepna. Nanipud idi, awanen ti pannakabalin dagiti demonio nga agtagilasag. Nupay kasta, mabalinda a sulisogen dagiti lallaki ken babbai a mangaramid iti nadumaduma a kita ti seksual nga imoralidad. Aktibo met dagiti demonio a mangal-allilaw iti sangatauan babaen iti espiritismo, a pakairamanan dagiti banag a kas iti sinasalamangka nga orasion, voodoo, ken pannakiuman kadagiti espiritu. (Deuteronomio 18:10-13; 2 Cronicas 33:6) Agpapada ti pagtungpalan dagiti dakes nga anghel ken ti Diablo​—agnanayon a pannakadadael. (Mateo 25:41; Apocalipsis 20:10) Ngem kabayatanna, rumbeng nga agtalinaedtayo a sititibker ken sarangtentayo ida. Nainsiriban nga usigentayo no kasano kabileg ni Satanas ken no kasano a sarangtentayo a sibaballigi isuna ken dagiti demoniona.

Kasano Kabileg ni Satanas?

7. Ania a pannakabalin ti ipakpakat ni Satanas iti lubong?

⁷ Iti intero a pakasaritaan ti tao, ni Satanas um-umsienna ni Jehova. (Proverbio 27:11) Kas resultana, naimpluensiaanna ti adu a tattao iti sangatauan. “Ti intero a lubong adda iti pannakabalin daydiay nadangkes,” kuna ti 1 Juan 5:19. Dayta ti makagapu a nabaelan idi ti Diablo a sulisogen ni Jesus babaen ti panangitukonna kenkuana iti autoridad ken dayag ti “amin a pagarian ti mapagnaedan a daga.” (Lucas 4:5-7) Maipapan ken Satanas, kinuna ni apostol Pablo: “Ita, no ti naimbag a damag nga ideklarami ket iti kinapudnona naabbungotan, naabbungotan dayta kadagidiay madaddadael, a kadakuada ti dios daytoy a sistema ti bambanag binulsekna ti pampanunot dagiti di manamati, tapno ti lawag ti nadayag a naimbag a damag maipapan iti Kristo, a ladawan ti Dios, saan koma nga agsilnag.” (2 Corinto 4:3, 4) Ni Satanas ket “maysa a managulbod ken ti ama ti kinaulbod” ngem pagbalbalinenna ti bagina kas “anghel ti lawag.” (Juan 8:44; 2 Corinto 11:14) Adda pannakabalin ken pamay-anna a mangbulsek iti panunot dagiti agtuturay iti lubong ken kadagiti iturturayanda. Babaen kadagiti propaganda ken narelihiosuan a sarsarita ken kinaulbod, naallilawna ti sangatauan.

8. Ania ti kunaen ti Biblia maipapan iti impluensia ni Satanas?

⁸ Ti pannakabalin ken impluensia ni Satanas ket nabatad idi kaaldawan ni mammadto Daniel, agarup lima a siglo sakbay ti Kadawyan a Panawentayo. Idi imbaon ni Jehova ti maysa nga anghel tapno mangparegta ken Daniel, dayta nga anghel ket sinaranget “ti [espiritu a] prinsipe ti naarian a pagturayan ti Persia.” Duapulo ket maysa nga aldaw a nataktak ti matalek nga anghel agingga nga immay timmulong kenkuana “ni Miguel, maysa kadagiti kangrunaan a prinsipe.” Nadakamat iti dayta met la a salaysay “ti [demonio a] prinsipe ti Grecia.” (Daniel 10:12, 13, 20) Iti met Apocalipsis 13:1, 2, nailadawan ni Satanas kas “ti dragon” a mangmangted iti atap nga animal iti “pannakabalinna ken ti tronona ken dakkel nga autoridad.”

9. Kadagiti siasino a makidangdangadang dagiti Kristiano?

⁹ Di pakasdaawan a kastoy ti insurat ni apostol Pablo: “Addaantayo iti pannakigubal, saan a maibusor iti dara ken lasag, no di ket maibusor kadagiti gobierno, maibusor kadagiti autoridad, maibusor kadagiti agturay iti lubong daytoy a kinasipnget, maibusor kadagiti nadangkes nga espiritu a puersa kadagiti nailangitan a disso.” (Efeso 6:12) Uray iti kaaldawantayo, ti puersa dagiti demonio iti sidong ti panangkontrol ni Satanas a Diablo ti di makita a mangisungsungsong ken mangim-impluensia kadagiti agtuturay a tattao ken iti kaaduan iti sangatauan, a durduroganna ida a mangaramid kadagiti nakaro a panangikisap, terorismo, ken panangpapatay. Usigentayo ita no kasano a sibaballigi a masarangettayo dagitoy nabileg nga espiritu a puersa.

Kasanotay a Sarangten Dagiti Demonio?

10, 11. Kasanotay a masaranget ni Satanas ken dagiti dakes nga anghelna?

¹⁰ Ditay masaranget ni Satanas ken dagiti dakes nga anghelna babaen iti kabukbukodantayo a bileg, pisikal man wenno mental. Balakadannatayo ni Pablo: “Itultuloyyo a gun-oden ti pannakabalin iti Apo ken iti kinabileg ti pigsana.” Masapul nga agkiddawtayo iti pannalaknib iti Dios. Kinuna pay ni Pablo: “Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan ti Diablo . . . Alaenyo ti naan-anay a kabal manipud iti Dios, tapno mabalinanyo ti sumaranget iti nadangkes nga aldaw ket, kalpasan a naan-anay a naaramidyon ti amin a bambanag, makapagtakderkayo a sititibker.”​—Efeso 6:10, 11, 13.

¹¹ Namindua a pinaregta ni Pablo dagiti padana a Kristiano nga isuotda ti “naan-anay a kabal manipud iti Dios.” Ti sao a “naan-anay” kaipapananna a saan nga umdas ti nakapuy a panangsaranget kadagiti panangraut dagiti demonio. Ania ngarud ngay dagiti napateg a paset ti naespirituan a kabal a naganat a kasapulan dagiti Kristiano tapno masarangetda dagiti demonio?

“Agtakderkayo a Sititibker”​—Kasano?

12. Kasano a dagiti Kristiano mabariksanda dagiti lomoda iti kinapudno?

¹² Inlawlawag ni Pablo: “Agtakderkayo a sititibker a dagiti lomoyo nabariksan iti kinapudno, ken sikakapet ti kabal ti barukong nga isu ti kinalinteg.” (Efeso 6:14) Ti dua a kabal a natukoy ditoy ket ti barikes ken ti kabal ti barukong. Ti maysa idi a soldado ket nasken a sibabarikes a naimbag tapno masalaknibanna dagiti lomona (padingpading, sellang, ken pus-ongna) ken tapno maawitna ti kampilanna. Umasping iti dayta, ti kinapudno iti Biblia ket nasken a naibarikes a naimbag kadatayo, no ar-arigen, tapno makapagbiagtayo a maitunos iti dayta. Adda kadi eskediultayo a mangbasa iti Biblia iti inaldaw? Ar-aramidentayo met laeng kadi dayta a sangapamiliaan? Regular kadi a suksukimatentayo ti teksto iti inaldaw kas sangapamiliaan? Kanayonanna, basbasaentayo kadi dagiti panangilawlawag kadagiti publikasion nga ipapaay “ti matalek ken masirib nga adipen”? (Mateo 24:45) No kasta, ikagkagumaantayo nga iyaplikar ti balakad ni Pablo. Addaantayo met kadagiti video ken DVD a makaipaay iti Nainkasuratan a panangiwanwan. Ti panangpetpet a naimbag iti kinapudno ti makatulong kadatayo a mangaramid kadagiti nainsiriban a desision ken mangsalaknib kadatayo manipud iti di umiso nga aramid.

13. Kasanotay a masalakniban ti piguratibo a pusotayo?

¹³ Ti literal a kabal ti barukong ket mangsalaknib iti barukong, puso ken dadduma pay a napapateg a lalaem ti maysa a soldado. Masalakniban ti maysa a Kristiano ti piguratibo a pusona​—ti kinataona​—babaen ti panangparayrayna iti panagayatna iti kinalinteg ti Dios ken babaen ti panangannurotna kadagiti nalinteg a pagalagadan ni Jehova. Ti piguratibo a kabal ti barukong ti mangsalaknib kadatayo manipud iti panangtagilag-antayo iti Sao ti Dios. Bayat a ‘guraentayo ti dakes, ket ayatentayo ti naimbag,’ mailikliktayo dagiti sakatayo “manipud tunggal dakes a dana.”​—Amos 5:15; Salmo 119:101.

14. Ania ti kaipapananna a ‘dagiti sakatayo ket sapatosantayo iti alikamen ti naimbag a damag ti kappia’?

¹⁴ Dagiti soldado a Romano ket kadawyan a nakasapatosda iti nalagda tapno nakasaganada a magna iti ginasut a kilometro iti nadumaduma a kalsada iti imperio ti Roma. Para kadagiti Kristiano, ania ti kaipapanan ti sasao a “dagiti sakayo nasapatosan iti alikamen ti naimbag a damag ti kappia”? (Efeso 6:15) Kaipapananna a nakasaganatayo nga agtignay. Nakasaganatayo a mangiranud iti naimbag a damag ti Pagarian ti Dios iti tunggal maitutop a gundaway. (Roma 10:13-15) Ti panagbalintayo nga aktibo iti Nakristianuan a ministerio ket maysa a salaknib maibusor kadagiti “pangallilaw a pamuspusan” ni Satanas.​—Efeso 6:11.

15. (a) Ania ti mangipakita a nakapatpateg ti dakkel a kalasag ti pammati? (b) Ania dagiti “sumsumged a gayang” a mabalin a mangdangran iti pammatitayo?

¹⁵ “Kangrunaan iti amin,” intuloy ni Pablo, “alaenyo ti dakkel a kalasag ti pammati, a babaen iti dayta mabalinanyonto a depdepen amin dagiti sumsumged a gayang daydiay nadangkes.” (Efeso 6:16) Ti balakad nga isuottayo ti dakkel a kalasag ti pammati a nairugi babaen ti sasao a “kangrunaan iti amin,” ipasimudaagna a nakapatpateg daytoy a kabal. Rumbeng nga awan pagkurangan ti pammatitayo. Kas iti dakkel a mangsalaknib a kalasag, ti pammatitayo ket masalaknibannatayo manipud kadagiti “sumsumged a gayang” ni Satanas. Ania ti mabalin nga irepresentar dagitoy iti kaaldawantayo? Mabalin a dagiti nakaro a pananginsulto, panangpardaya, ken dagiti impormasion a mangilibak iti naan-anay a kinapudno nga irakrakurak dagiti kabusor ken apostata a nairanta a mangpakapuy iti pammatitayo. Dagitoy a “gayang” ket mabalin met a dagiti pakasulisogan tapno agbalintayo a materialistiko, isu a makumikomtayonton nga aggatang iti adu a produkto ken magargaritayo pay a makiinnartap kadagidiay naparammag ti estilo ti panagbiagda. Nalabit nangipuonanda kadagiti daddadakkel ken napimpintas a balay ken lugan wenno ipasindayagda dagiti nangingina nga alahas ken kabaruan nga uso a kawesda. Aniaman ti ar-aramiden ti dadduma, masapul nga umdas ti kinabileg ti pammatitayo a sumiasi kadagitoy a “sumsumged a gayang.” Kasanotay a mapapigsa ken mataginayon ti pammatitayo?​—1 Pedro 3:3-5; 1 Juan 2:15-17.

16. Ania ti makatulong kadatayo tapno bumileg ti pammatitayo?

¹⁶ Mabalintay ti umadani iti Dios babaen ti regular a personal a panagadal iti Biblia ken napasnek a panagkararag. Mabalintay nga iyararaw ken Jehova a pabilgenna ti pammatitayo ken agbiagtayo a maitunos kadagiti kararagtayo. Kas pagarigan, agsagsaganatayo kadi a naimbag para iti linawas a Panagadal iti Pagwanawanan tapno mabalintayo ti makipaset? Bumileg laeng ti pammatitayo no adalentayo ti Biblia agraman dagiti publikasion a naibasar iti dayta.​—Hebreo 10:38, 39; 11:6.

17. Kasanotay a mabalin nga ‘awaten ti kabal ti ulo ti pannakaisalakan’?

¹⁷ Ingngudo ni Pablo ti panangdeskribirna iti naespirituan a kabal babaen daytoy a balakad: “Awatenyo ti kabal ti ulo ti pannakaisalakan, ken ti kampilan ti espiritu, a dayta ti, sao ti Dios.” (Efeso 6:17) Ti helmet ti mangsalsalaknib iti ulo ken utek ti soldado, ti sentro ti panangaramid iti desision. Umasping iti dayta, ti Nakristianuan a namnama ti mangsalaknib iti pannakabalin ti isiptayo. (1 Tesalonica 5:8) Imbes a punnuentayo ti panunottayo kadagiti nailubongan a kalat ken materialistiko nga arapaap, rumbeng nga isentrotayo ti panunottayo iti inted-Dios a namnamatayo, kas iti inaramid ni Jesus.​—Hebreo 12:2.

18. Apay a rumbeng a ditay liwayan ti programatayo a regular a panagbasa iti Biblia?

¹⁸ Ti maudi a salaknibtayo maibusor iti impluensia ni Satanas ken dagiti demoniona ket ti Sao ti Dios, wenno ti mensahena a nailanad iti Biblia. Daytoy ti kanayonan a rason a ditay koma liwayan ti programatayo a regular a panagbasa iti Biblia. Ti nauneg a pannakaammo iti Sao ti Dios ti mangsalaknib kadatayo kadagiti kinaulbod ken dinedemonio a propaganda agraman kadagiti pammadakes dagiti apostata.

“Itultuloyyo ti Agkararag iti Espiritu iti Amin a Gundaway”

19, 20. (a) Ania ti asidegen a mapasamak ken ni Satanas ken kadagiti demoniona? (b) Ania ti mangpabileg iti espiritualidadtayo?

¹⁹ Asidegen nga agpatingga ni Satanas, dagiti demoniona, ken ti nadangkes a lubong. Ammo ni Satanas nga “ababan ti periodo ti tiempona.” Makaunget ken gubgubatenna dagidiay “mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apocalipsis 12:12, 17) Nasken a sarangtentayo ni Satanas ken dagiti demoniona.

²⁰ Anian a yamantayo iti pammagbaga nga isuottayo ti naan-anay a kabal manipud iti Dios! Ingngudo ni Pablo ti panangilawlawagna iti naespirituan a kabal babaen daytoy a balakad: “[Babaen] iti amin a langa ti kararag ken araraw itultuloyyo ti agkararag iti espiritu iti amin a gundaway. Ket iti dayta a panggep agtalinaedkayo a siririing buyogen ti isuamin a kinatibker ken buyogen ti araraw maigapu iti amin a sasanto.” (Efeso 6:18) Ti kararag mapabilegnatayo iti naespirituan ken matulongannatayo nga agtalinaed a nasalukag. Ipapusotayo koma ti imbaga ni Pablo ken itultuloytayo ti agkararag, ta daytoy ti makatulong kadatayo a mangsaranget ken Satanas ken kadagiti demoniona.

Ania ti Naadalyo?

• Kasano a timmaud ni Satanas ken dagiti demoniona?

• Kasano kabileg ti Diablo?

• Ania dagiti pamay-an a masarangettayo ni Satanas ken dagiti demoniona?

• Kasano a maisuottayo ti naan-anay a kabal manipud iti Dios?

[Dagiti Ladawan iti panid 26]

“Ti annak ti pudno a Dios nangrugi a mapaliiwda ti annak a babbai ti tattao, a napipintasda”

[Ladawan iti panid 28]

Mainaganan ken mailawlawagyo kadi ti innem a paset ti naespirituan a kabaltayo?

[Dagiti Ladawan iti panid 29]

Kasano a ti pannakipaset kadagitoy a trabaho ket maysa a salaknib maibusor ken Satanas ken kadagiti demoniona?