Dagiti Saludsod Manipud Kadagiti Managbasa
◼ Yantangay kinuna ni Daniel nga isut’ saan nga umawat ti sagsagut manipud ken Ari Belsasar gaput’ panangipatarusna ti surat ti ima iti diding, apay a kalpasanna nakita met laeng nga isut’ nakasuot ti pagan-anay ken ti kuintas?
Sakbay la unay a pinarmek dagiti Medos ken Persas ti Babilonia, ni Ari Belsasar ken ti kortena addada idi iti tengnga ti maysa a dakkel a rambak. Kabayatan ti rambak inserrekna dagiti al-alikamen a naggapu iti templo ni Jehova ket inusarda dagitoy a paginumanda ti arak, nga idaydayawda dagiti didiosen ti Babilonia. Ngem ti rambak ti giddato a nasinga idi maysa a napigpigsa ngem tao nga ima ti nangisurat kadagiti karkarna a bambanag iti diding.—Daniel 5:1-5.
Dagiti mamasirib ken astrologo ti Babilonia saanda a maipatarus ti surat, uray no inkari ni Belsasar a mangted ti balitok a kuintas ken kinatan-ok iti gobierno iti asinoman a makabasa ken makailawlawag iti karkarna a surat ti ima.—Daniel 5:7-9.
Idi iti kamaudianan ket naiserreken ti Hebreo nga agnagan Daniel, inulit ti ari ti tukonna—a kawesanna ni Daniel ti purpura, nga iyukkorna kenkuana ti balitok a kuintas, ken pagbalinenna nga isut’ maikatlo nga agturay iti pagarian. Sidadayaw a simmungbat ti mammadto: “Mabati koma dagiti sagsagutmo a maipaayda kenka met laeng, ket itedmo dagiti panggunggonam iti sabali. Nupay kasta, basaekto ti surat iti ari, ket ipakaammokto kenkuana ti katarusanna.”—Daniel 5:17.
Gapuna saan a kasapulan ni Daniel a mapasuksokan wenno mabayadan a mangted ti katarusanna. Mabalin a salimetmetan ti ari a bukbukodna ti sagut wenno itedna dayta iti sabali. Ipaay ni Daniel ti katarusanna, saan a gapu iti gunggona, no di ket gapu ta isut’ naikkan ti pannakabalin a mangaramid iti dayta manipud ken Jehova, ti pudno a Dios, a ti pannusana ti agur-urayen iti Babilonia.
Kas mabasatayo idiay Daniel 5:29, kalpasan a nabasa ken impatarus ni Daniel dagiti sasao kas kunana nga aramidenna, imbilin ti ari a dagiti gunggona ti maited pay met latta ken ni Daniel. Saan a ni Daniel ti mismo a nangisuot ti pagan-anay ken ti kuintas. Isuda ti nangikabil iti dayta kenkuana babaen iti bilin ti agturay iti isuamin, ni Ari Belsasar. Ngem saan a sumuppiat daytoy iti Daniel 5:17, nga impabatad ti mammadto a ti motibona ket saan nga inaagum.
Kinuna ni Jesus iti kamaudiananna “ti umawat ti maysa a mammadto iti nagan ti mammadto, umawatto ti gunggonaen ti mammadto.” (Mateo 10:41) Adayo nga agaplikar dayta ken Belsasar, gapu ta isut’ saan a mangtartrato ken Daniel a siaasi wenno sidadayaw gapu ta pagraraemanna daytoy matalek a lalaki kas mammadto ti pudno a Dios. Mayat latta ni Ari Belsasar a mangited kadagitoy met laeng a sagut iti asinoman a makasolbar iti misterio ti surat ti ima, uray pay iti maysa a pagano nga astrologo. Naala ti ari ti maiyanatup a gunggona, daydiay maitunos iti naimpadtuan a surat iti diding: “Iti dayta a rabii ni Belsasar nga ari dagiti Caldeos napapatay ket ni Dario a Medo inawatna ti pagarian.”—Daniel 5:30, 31.