Ti Kaiyulogan dagiti Damdamag
Maikari a Tuladen
Ti nabiit pay a surat a naipablaak idiay New Haven Register, maysa a periodiko idiay Connecticut, ti nangitukon ti sumagmamano a naimbag panggepna a panangmatmat kadagiti kumbension nga angangayen dagiti Saksi ni Jehova. Naiturong iti editor, kuna ti surat: “Kakkalpas nga inangay dagiti Saksi ni Jehova ti tinawen a kumperensiada idiay Coliseum. Kadagiti amin nga agparparang a grupo, awan ti maab-abrasa unay wenno birbiruken no di isuda. Ti Coliseum ket nadaldalusto nga amang, ngem iti sakbay ti panagtataripnongda, wenno nakalinlinis inton panawanda kas iti maudi nga ibibisitada.”
Iti panangtukoyna ti kumbension nga inangay dagiti Saksi sumagmamano a tawen ti napalabasen, innayon ti nagsurat a “75,000 a Saksi ti nagtataripnong idiay Yankee Stadium, nga adda nasurok pay a 20,000 nga adda iti ruar nga agdengdengngeg kadagiti loudspeakers iti maysa a piesta ti panagdaydayaw a nangkellaat iti Nueva York. Dua gasut a polis ti naibaon iti umuna nga aldaw, ti kadawyan a bilang a maitudtuding iti kasta nga umariwekwek. Dua laengen ti naibaon kadagiti sumaganad nga al-aldaw tapno agiturong laengen. Dagiti sanidad, managpakan, polisia ken dagiti bombero ti imbaon ti Siudad ti Nueva York a mangadal iti daytoy kasla di patpatien nga episiente nga operasion ken tapno makaadalda manipud iti dayta. Awan uray maysa a murkat ti taraon wenno basura ti makita kalpasan ti ipapanawda, agpapan pay panangpakanda kadagiti miembroda. Manamatikay man iti dadduma a langa ti teolohikal a mistisismo wenno laksidenyo ida amin,. . . dayawenyo ti dedikasionda, ti kinamannakaayayoda, ti naisalsalumina nga ulidanda iti natauan a kababalin ken nasalun-at a panagbibiagda. Pagsayaatantay amin a suroten ken aramiden dagiti nakaskasdaaw a galad nga ipakpakita dagitoy nanumo ken napeklan a tattao.”
Nupay adut’ mangmatmat ti kababalin dagiti Saksi ni Jehova kas naisalsalumina, dagiti Saksi a mismo ammoda a dagiti pudno a Kristiano masapul nga ‘agbiagda gapu iti espiritu’ ken masapul a “magna[da] met koma gapu iti espiritu.” Ti espiritu ti Dios ti mangpatpataud kadakuada ti bunga ti “ayat, rag-o, talna, mabayag a panagitured, kinamanangaasi, kinaimbag, pammati, kinaemma, panagteppel.” Dagita a kualidad ket pudno a maikari a tuladen.—Galacia 5:22, 23, 25.
Balangat a Pakaitibkolan
Ginasgasut nga umili ti Málaga, España, ti nangsuportar ti koleksion publiko tapno pangaramid iti maysa a nalabor a korona a balitok para ti popular a lokal a birhen, ti “Nuestra Señora de Esperanza.” “Maysa a gramo a balitok para iti [birhen]” ti replan a binukelda dua a tawen ti napalabasen tapno maiyulit-ulitna dagiti kontribusion. Nanipud idin, dagiti aritos, medalion, singsing iti kasar, ken uray pay dagiti balitok a ngipen ti naidondonar. Dagitoy a bambanag ti tinunawda a pinagbalin a 1.5 kilo a puro a balitok, nga umdas a mangaramid ti solido a korona a balitok agpaay iti imahen.
Iti nakasansanto a seremonia, nga indauluan ti papal nuncio ken sumagmamano a nalatak nga obispo ti España, nakoronaan ti “Nuestra Señora de Esperanza” idi Hunio 1988. Nupay kasta, saan a bassit a Katoliko ti addaan serioso a panagduadua maipapan iti daytoy a koronasion. Ti periodiko nga Español nga El País ti nangipadamag nga iti maysa a silulukat a surat agarup 20 a seminarista ti agsalsaludsod: “Saantay kadi a kaskasdi a bato a pakaitibkolan kadagiti manamati ken di mammati gapu kadagiti kawaw a serseremoniatayo?” Dadduma a Katoliko a grupo ti mangtuktukoy iti nabiit pay nga enciclikal ti papa a mangirekrekomendar a dagiti matalek “iyallatiwda koma dagiti gupgupitda kadagiti napanglaw.” Gapu iti daytoy, inyebkas dagitoy a Katoliko ti “di maikkat nga isusuppiat ti konsiensiada maipapan iti naipablaak a nakarangranga a seremoniada” ken iti “nakangingngina a korona.”
Saanen a nakaskasdaaw a makita dagiti napasnek a tattao a ti panangarkos ti awan-biagna nga imahen ket saanda a maawat. Kasta met ti rikna ti Dios mismo. Adu a siglo ti napalabasen, kinastigona dagiti Israelita gapu itoy met laeng nga aramid. Kuna ni Jehova babaen ken Ezequiel a mammadtona: “Pinagpasindayagda ti pintas dagiti al-alahasda, ta kadagidiay nagaramidda kadagiti ladawan dagiti kinarimonda ken dagiti bambanagda a makarurod.” (Ezequiel 7:20, The Jerusalem Bible) Gapu itoy a rason, dagiti managayat ti kinapudno nainsiriban nga ipangagda ti naintiempuan a balakad ti Biblia nga “umadayukayo iti ladladawan.”—1 Corinto 10:14.