Ti Biag ken Ministerio ni Jesus

Ti Baknang ken ni Lazaro Mapadasanda ti Panagbalbaliw

NI Jesus mangisalsalaysay iti maysa nga ilustrasion maipapan iti baknang ken ti napanglaw nga agpalpala a managan Lazaro. Ti tao a nabaknang irepresentarna dagiti relihiuso a papangulo a naparaburan iti naespirituan a pribilehio ken gundaway, ket ni Lazaro iladawanna dagiti gagangay a tattao a mabisbisinan iti naespirituan a taraon. Intuloy ni Jesus ti estoria, a desdeskribirenna ti dramatiko a panagbalbaliw iti kasasaad dagiti lallaki.

“Itan bayat ti panaglabas ti tiempo,” kuna ni Jesus, “ti agpalpalama natay ket impan dagiti anghel iti saklot ni Abraham. Ket natay met di nabaknang ket naitanem. Ket idi adda a matutuok idiay Hades intangadna dagiti matana, ket nakitana ni Abraham iti adayo, ken ni Lazaro iti saklotna.”

Yantangay ti baknang ken ni Lazaro ket saanda a literal a persona no di ket isimbolona dagiti klase ti tattao, nainkalintegan a ti ipapatayda ket simboliko met. Ania ti isimbolo ti ipapatayda, wenno irepresentarda?

Kalkalpas pay laeng ni Jesus nga intudo ti panagbalbaliw iti kasasaad babaen ti panagkunana a ‘ti Linteg ken dagiti Mammadto ket agingga ken Juan a Mammautisar, ngem nanipud idin ti pagarian ti Dios naiwaragawagen.’ Gapuna, babaen ti panangasaba ni Juan ken ni Jesu-Kristo a dagitoy a dua, ti baknang ken ni Lazaro natayda iti dati a sirkumstansiada, wenno kasasaadda.

Dagidiay a napakumbaba, nagbabawi a klase Lazaro natayda iti dati a pannakabisinda iti naespirituan ket dimtengda iti nadiosan a pannakaparabur. Nupay no agpannurayda idi kadagiti relihiuso a papangulo a maipaay iti murkat a maregreg manipud iti naespirituan a lamisaan, itan dagiti Nainkasuratan a kinapudno nga impaay ni Jesus ti mangpempenneken iti naespirituan a kasapulanda. Ngarud naiyegda iti saklot, wenno naparaburan a kasasaad, iti Dadakkel nga Abraham, ni Jehova a Dios.

Iti kasumbangirna, dagidiay a mangbukel iti klase baknang dimtengda iti di pananganamong ti Dios gapu iti kankanayon a dida panangawat iti mensahe ti Pagarian nga insuro ni Jesus. Ngarud natayda iti dati a kasasaadda a kasla naparaburan. Kinapudnona, makuna a dagitoy ti adda iti piguratibo a pannakatutuok. Umimdengkayo bayat ti panagsao ti baknang:

“Ama Abraham, kaasiannak ket ibaonmo ni Lazaro ta babasaenna koma ti ngudo ti ramayna iti danum ket palamiisanna toy dilak, ta addaak a matutuokan iti daytoy a darang.” Dagiti umap-apuy a mensahe a panangukom ti Dios nga inwaragawag dagiti ad-adalan ni Jesus ti mangtutuok kadagiti indibidual nga adda iti klase baknang. Tarigagayanda nga isardeng dagiti adalan ti panangiwaragawagda kadagitoy a mensahe, ket iti kasta maipaayanda iti pannakabang-ar iti pannakatutuokda.

“Ngem kinuna ni Abraham, ‘Anak, laglagipem nga inawatmon dagiti nam-aymo idi panagbiagmo, ket ni Lazaro kasta met inawatna dagiti rigat. Ngem, ita isu maliwliwa ditoy ket sika matutuokka. Ket mainayon pay kadagitoy, adda nagbabaetantayo a maysa a dakkel a yuyeng, iti kasta dagiti agtarigagay nga umallatiw ditoy kadakayo saanda a mabalin, kasta met manipud dita dikay makaallatiw ditoy.’”

Anian a nainkalintegan ken maitutop ti kasta a bigla a pannakabaliktad iti nagbaetan ti klase Lazaro ken ti klase baknang! Ti panagbalbaliw ti kasasaad ket naibanag sumagmamano a bulan kalpasanna idi Pentecostes 33 K.P., idi ti daan a Linteg ti tulag ket sinukatan ti baro a tulag. Idin nalawagen a dagiti adalan ket pinaraburan ti Dios, saan a dagiti Fariseo ken dagiti dadduma a relihiuso a papangulo. Ti “dakkel a yuyeng” a nangilasin ti simboliko a baknang manipud kadagiti adalan ni Jesus ngarud irepresentarna ti di agbalbaliw, nalinteg a panangukom ti Dios.

Ti baknang sumaganad a kalikagumanna a ni “ama Abraham” ibaonna ni Lazaro “iti balay ni amak, ta adda lima a kakabsatko a lallaki.” Ti baknang ngarud ipudnona nga isut’ nasingsinged iti sabali nga ama, nga isu iti kinapudnona ni Satanas a Diablo. Ti baknang kalikagumanna a ni Lazaro pakapuyenna dagiti mensahe ti panangukom ti Dios tapno saan a maikabil dagiti “lima a kakabsatna a lallaki,” dagiti relihiuso a kakaduana, iti “daytoy a lugar a pagtutuokan.”

“Ngem kinuna ni Abraham, ‘Adda kadakuada ni Moises ken dagiti Mammadto; denggenda koma ida.’” Wen, tapno malisian dagiti “lima a kakabsatna a lallaki” ti pannakatutuok, ti laeng aramidenda isu ti panangipangag kadagiti sursurat ni Moises ken dagiti Mammadto a mangilasin ken ni Jesus kas Mesias ken kalpasanna agbalin nga ad-adalanna. Ngem agkedked ti baknang: “‘Saan, ama Abraham, ngem no mapan koma kadakuada ti maysa nga aggapu kadagiti natay, agbabawidanto.’ Ngem kinunana kenkuana, ‘No dida denggen ni Moises ken dagiti Mammadto, didanto met mamati no adda maysa nga agungar kadagiti natay.’” Saan a mangipaay ti Dios kadagiti naisangsangayan a pagilasinan wenno milagro a mangkumbinsir kadagita. Dagiti tattao masapul a basaenda ken iyaplikarda dagiti Kasuratan tapno makagun-odda ti anamongna. Lucas 16:16, 22-31; Juan 8:44.

◆ Apay a ti ipapatay ti baknang ken ni Lazaro masapul a simboliko, ket ania ti inladawan ti ipapatayda?

◆ Ania dagiti panagtutuok a sinagaba ti baknang, ket babaen iti ania a pamay-an a kinalikagumanna ti pannakabang-arda?

◆ Ania ti irepresentar ti “dakkel a yuyeng”?

◆ Sino ti pudno nga ama ti baknang, ket siasino dagiti lima a kakabsatna a lallaki?