Ti Sao ti Dios Nabiag

Ti Tao a Baknang ken ni Lazaro​—Ania ti Leksion?

MASANSAN ni Jesu-Kristo ti nangisursuro ti maysa a leksion babaen iti panangibagana ti maysa nga estoria. Adtoy ti maysa no kasanot’ panangirugi ni Jesus ti nalatak nga estoria: “Adda idi maysa a tao a nabaknang ket nagpagan-anay ti purpura ken lupot a napateg, ket mangan a sibubuslon iti inaldaw. Ket maysa nga agpalpalama a managan Lazaro a napno kadagiti derder adda idi a nagsadag iti ruanganna, ket tarigagayanna ti mabussog kadagiti murkat nga agtinnag iti panganan di baknang. Wen, ket dagiti aso umayda ket dildilanda ti derderna.”

Gapuna basta kinuna ni Jesus a maysa a tao a nabaknang, a nagpagan-anay ti nagkakapateg ken mangan a sibubuslon, bayat a ni Lazaro ti mabisbisin, ken napunno kadagiti derder ken dildildilan dagiti aso. Estoria kadi daytoy maipapan kadagiti pudno a tattao? Saan. Ti Katoliko a Jerusalem Bible iti footnotena inlawlawagna a daytoy ket maysa a “pangngarig iti langana nga estoria nga awan tuktukoyenna nga aniaman a persona iti historia.” Ammuenyo no apay, manipud sumaganad a sawen ni Jesus:

“Ket naaramid a daydi agpalpalama natay ket impan dagiti anghel iti saklot ni Abraham. Ket natay met di baknang ket naitanem. Ket idi adda a matutuok idiay Hades, intangadna dagiti matana ket nakitana ni Abraham iti adayo ken ni Lazaro iti saklotna. Ket isu nagikkis, ket kinunana, ‘Ama Abraham, kaasiannak ket ibaonmo ni Lazaro ta babasaenna koma ti ngudo ti ramayna iti danum ket palamiisanna toy dilak, ta addaak a matuokan iti daytoy a darang.’”​—Lucas 16:19-24.

Kas makitkitayo, awan kinuna ni Jesus maipapan ti panagbibiag di tao a baknang a dakes a panagbiag a maikari iti umap-apuy a pannakadusa; ti nakaupayan ti tao ket isut’ saanna a panangpakan ti napanglaw. Mainayon pay, awan kinuna ni Jesus maipapan ti panagaramid ni Lazaro kadagiti naimbag a bambanag, bambanag a nalawag a maikari ti ipapanna koma idiay langit, nga isut’ kuna dagiti dadduma nga iglesia a kaipapanan ti pannakaipanna iti saklot ni Abraham. Mainayon pay, ni Abraham, kas ken David, ket natayen ken adda iti tanemna, gapuna iti literal saan a maipan dagiti anghel ni Lazaro iti saklotna. (Aramid 2:29, 34; Juan 3:13) Ket no di tao a baknang adda iti literal nga apuy, sigurado a ni Lazaro ti di makagunggona kenkuana gapu laeng ti sangatedted a danum!

Asino, ngarud, ti iladladawan ti tao a baknang ken asino ti iladladawan ni Lazaro? Aniat’ irepresentar ti ipapatayda? Daydi tao a baknang iladladawanna dagiti agpapaimportante a relihiuso a papangulo a saanda a tinartaraonan dagiti tattao ti naespirituan, ket ni Lazaro iladladawanna dagiti gagangay a tattao a nangawat ken Jesu-Kristo. Ti ipapatayda irepresentarna ti panagbalbaliw ti kasasaadda.

Daytoy a panagbalbaliw, wenno ipapatay iti dati a kasasaad daydi tao a baknang ken ni Lazaro, ti napasamak idi a ni Jesus tinaraonanna dagiti naliwayan a kas ken Lazaro a tattao iti naespirituan. Gapuna, immayda iti pabor ti dakdakkel nga Abraham, a ni Jehova a Dios. Maigiddato ti dayta, dagiti agpapaimportante a narelihiusuan a papangulo a Judio “natayda” maipapan iti kaaddada ti pabor ti Dios ket immayda iti pannakatutuok babaen kadagiti pannursuro ni Kristo ken ti paspasurotna. Kas pangarigan, idi imbutaktak ida ni Esteban iti publiko, “nasakitan ti pusoda ket ngarngaretngetenda dagiti ngipenda . . . inapputda dagiti lapayagda.” Natuokanda.​—Aramid 7:51-57.

Imbes ngarud a mangisursuro iti pannakatutuok iti umap-apuy nga impiemo kalpasan ipapatay, ti estoria ni Jesus iladladawanna ti panagbalbaliw ti kasasaad a maaramidan ti pannursurona kadagiti dua a klase dagiti tattao.

[Dagiti ladawan iti 8]

Asino ni “Lazaro”?

Asino ti “tao a baknang” nga agtutuok?