Addanto Aya Aniaman nga Aramiden ti Dios iti Kinakillo?

“DAYTAT’ saan a nainkalintegan.” Nakamimminar a ti agtutubo nga estudiante ket mapulkokan, makapungtot unay kalpasan pannakapasarna a personal ti nabatad a pannakaibaddek ti kinahustisia. “No pudno met laeng nga adda Dios,” kinuna ti babai, “kasanot’ panangipalubosna ti kasta a kinakillo?” Nakipagriknakay met aya koma itoy a balasang? Nalabit a kasta. Ngem nabalinanyo aya koma a sinungbatan ti suppiatna?

Idi maysakay nga ubing, nalabit no maminsan mariknayo nga impalubos dagiti nagannak kadakayo a matratokayo a di nainkalintegan. Ngem dayta a kasla kinakillo narigatna a paneknekan ti kinaawanda, saan kadi? Kasta met, ti panangipalubos ti Dios iti kinakillo saanna met a paneknekan ti kinaawanna.

Simmungbat ti agtutubo nga estudiante, nupay kasta, a medio naiduma daytoy a banag. Kinunana a ti imperpekto a natauan nga ama mabalin nga isut’ nakillo met bassit. Wenno gapu ta dina ammo amin dagiti bambanag, mabalin saanna a malasin ti kinakillo no makitana dayta. Mainayon pay, gapu kadagiti pagkurangan ti tao, mabalin nga isut’ awan gawayna a mangaramid ti aniaman maipapan kaagiti kinakillo a makitkitana. Awan iti daytoy, irasonna, ti agaplikar iti Dios a nalinteg a makaammo iti isuamin ken mannakabalin-amin.

Uray dakayo mabalin a patienyo met a ti pammalubos iti kinakillo ket di maiyataday kadagiti nadiosan a kualidad. Kaskasdi, gaput’ naan-anay a kinasiribna, di aya adda nainkalintegan a rason ti Dios iti panangipalubosna ti kinakillo iti nawadwad bassit a tiempo?

Dagiti mannurat ti Biblia ibilbilangda ti Dios kas “ayatenna ti kinasingpet ken kinalinteg.” “Amin a dalanna kinalinteg. Maysa a Dios ti kinamatalek, ken awanan dauka,” insurat ni Moises.​—Salmo 33:5; Deuteronomio 32:4; Job 37:23.

Malaksid ti panangmatmat ken Jehova kas nalinteg a Dios a dina pagragsakan ti kinakillo, umanamong dagiti mannurat ti Biblia a maysa nga aldaw iwaksinanton dayta. Ni Isaias, kas pangarigan, impadtona daytoy a kasasaad: “Adtoy! Maysa nga ari agarinto iti kinalinteg; ken dagiti prinsipe, agturaydanto kas prinsipe iti mismo a kinahustisia. Iti kasta ti kinahustisia agtaengto iti let-ang, ket ti kinalinteg agtaengto iti nabunga a talon.” (Isaias 32:1, 16) Ngem kaano? Ken no tarigagayan ti Dios a dalusan ti lubong iti kinakillo, apay nga idi damo impalubosna pay la dayta?

Kinakillo​—Apay Napalubosan?

Adda idi tiempo nga awan kinakillo iti uniberso. Idi laeng iyaalsa ni Adan ken Eva gaput’ panangpilit ni Satanas a Diablo a naammuan ti kinakillo iti sangatauan. Saan a dagdagus a nadadael ni Satanas idi tiempo ti yaalsa. Agpaay iti mismo a naimbag a panggepna, nangipalubos ti Dios ti tiempo a makapagaramid ti tao kadagiti kinakillo, ket agpaay daytoy iti panggep a panangsuot kadagidiay addaan debosion Kenkuana, no paneknekanda met laeng ti kinamatalekda Kenkuana. Ti panangpilida kas manangsalimetmet ti kinatarnaw kaipapananna ti panangilibak iti abilidad ni Satanas a mangpatallikud iti amin a natauan a parsua laban iti Dios. Inton naalangonen ti kinasoberano ti Dios, madadaelton dagiti ar-aramid ni Satanas, ken amin a kinakillo maikkatton.

Kabayatanna, no koma piliten ti Dios a lapdan dagiti tattao manipud nakillo nga ar-aramidda, taktakawanna ngarud ida ti wayawayada nga agpili. Maysa pay, babaen panangipalubosna kadagiti tattao a makarikna kadagiti di nainkalintegan a bunga dagiti di umiso a tigtignay dagiti dadduma, inyilustrar ti Dios no kasano a makadangran kada Adan ken Eva ti di nainkalintegan nga iyaalsada kontra kadagiti nadiosan a pagannurotan, a sinukatan dagitoy kadagiti kabukbukodanda a nakapkapuy a pagalagadan. Babaen ti panangipalubosna iti sangatauan nga apiten ti immulada, tultulongan ti Dios dagiti nasingpet a tattao a malasin ti kinatan-ok ti panagaramid kadagiti bambanag sigun iti pamay-anna.​—Jeremias 10:23; Galacia 6:7.

Mainayon pay, dagiti ar-aramid ti kinahustisia wenno kinakillo mangteddat’ makaipanayag a pammaneknek. Dagitoy nga ar-aramid mangtedda iti Dios iti umiso a pangibatayan iti panangikeddengna no asino dagidiay maikari nga agbiag ditoy daga iti maysa a baro a lubong inton maisublin ti naan-anay a kinahustisia. Mangisingsingasing iti dayta, mabasatayo: “Ngem no ti nadangkes paglikudanna dagiti amin a basbasolna nga inaramidna ket tungpalenna amin dagiti linlintegko ket aramidenna daydiay a maiyannugot iti linteg ken umiso, isu agbiagto a di bumurong.”​—Ezequiel 18:21.

Kaanonto nga Agpatingga ti Kinakillo?

Ti pannakilangen ni Jehova a Dios iti sangatauan ket kanayon a nalinteg ken tinandaan ti naayat a kinamanangaasi. Kas panangiyilustrar iti dayta, idi ti matalek nga adipen ti Dios a ni Abraham saanna a matarusan no apay a mapaspasamak ti maysa a banag, kinunana iti Dios: “Adayo koma kenka ti panagaramid ti kasta a patayem ti nasingpet a maikanunong ti nadangkes nga iti kasta ti nasingpet maipada met ti nadangkes! Adayo koma dayta kenka. Saan aya a ti Ukom ti amin a daga agaramid iti nalinteg?” (Genesis 18:25) Iti iyaay ni Kristo, naitan-ok dagiti kualidad ti Dios a kinahustisia ken naayat a kinamanangaasi. Ti urnos ti daton a subbot babaen ken Kristo Jesus linuktanna ti dalan para iti tunggal maysa, agpadpada ti Judio ken saan a Judio, tapno magun-odanda ti biag nga agnanayon. Daytoy ti nangiturong ken apostol Pedro a nagkuna: “Kinapudnona a makitak a ti Dios saan a mangidumduma kadagiti tao, no di ket uray ania a nasion dagiti agbuteng ken agaramid ti kinalinteg makaay-ayoda kenkuana.”​—Aramid 10:34, 35.

Dagiti Saksi ni Jehova aktiboda a mangiwarwaragawag a ti Mesianiko nga Ari ti Dios nangrugin nga agturay ket ti tiempo asidegen inton ti kinahustisia maisublinton a naan-anay ditoy daga.a Maaramidto daytoy inton ti Ari dadaelenna ti agdama a nakillo a lubong ken bungtolenna ti pannakabalin ti di makita a diosna, ni Satanas a Diablo. Ipakpakita ti Biblia a maaramidto daytoy iti mabiiten inton “gubat iti dakkel nga aldaw ti Dios a Mannakabalin-amin,” a kaaduanna maaw-awagan Armagedon.​—Apocalipsis 16:14, 16.

“Ti Dios saanto a nakillo inton ipariknana ti pungtotna,” gapuna ti Armagedon nalintegto a gubat. (Roma 3:5) Kalpasanna, ni Kristo Jesus ken dagiti kaduana nga agturay, kas kadagiti apostol, agturaydanto manipud langit iti sangaribo a tawen. (Apocalipsis 20:4) Minilion a tattao a nagsagaba iti kinakillo iti napalabas mapagungardanto iti nalinteg a sistema ditoy daga, ti orihinal a pagtaengan ti sangatauan, tapno lak-amendanto ti perpekto a kinahustisia a damdamona iti intero a panagbiagda.

“Adda Aya Kinakillo iti Biang ti Dios?”

Insaludsod ni apostol Pablo dayta maipapan iti maysa kadagiti pannakilangen ti Dios. Ti sungbat? “Ni kaanoman,” insurat ni Pablo. Iti panangiyaspingna kadagiti tattao iti damili a sinukog ti agdamdamili nga aramiden ida kas basehas a maikari iti pungtot wenno iti asi, inlawlawag ni Pablo: “Nupay ti Dios sisasagana a mangipakita ti pungtotna ken ipakaammona ti pannakabalinna, kaskasdi inanusanna dagiti tattao a namagpungtot kenkuana, uray no kasanot’ pannakaikarida unay a madadael koma. Inanusanna ida a maipaay kadagiti dadduma a tattao, a kayatna a kaasian, tapno ipakaammona ti kinabaknang ti dayagna.”​—Roma 9:14, 20-24, The Jerusalem Bible.

Kas iti daydiay agtutubo nga estudiante a nadakamat a nasapsapa, mabalin a no dadduma makitayo a narigat a tarusan no apay palpalubosan ti Dios ti kinakillo nga en heneral wenno ti dadduma a masinunuo a kinadakes. Ngem asinotay aya​—a kas damdamili iti imana​—a pagduaduaan ti anus ken siribna a mangar-aramid ti kasta? Ni Jehova a Dios kinunana ken ni Job: “Aw-awanemto laeng aya ti panangukomko? Pabiddutennakto aya tapno mapalintegka koma?”​—Job 40:8.

Ditay koma kayat ti agbasol a mangaramid ti kasta. Imbes ketdi, tarigagayantayo ti agragsak a nupay ti kinakillo kaskasdi adda pay laeng kadatayo, ti Dios ti kinahustisia ikkatennanton dayta iti mabiit manipud intero a daga.

[Dagiti Footnote]

[Ladawan iti panid 23]

Ti pannakaipalubos ti kinakillo nikaanoman di mabalin nga usaren a pangpaneknek iti kaawan ti Dios

Mapabasol aya ti Dios no ti tsuper a nabartek madina nga usaren dagiti kualidad ti sentido komon, panagteppel, ken konsiderasion?

Ti tiempo asidegen inton ti naan-anay a kinahustisia ket maisublinton ditoy dagatayo