Ti Kadi Kinaimbag ti Dios Allukoyennakayo?
ADDAANKAY aya ti nasinged a gayyem? No wen, pinampanunotyon aya no aniat’ nangallukoy kadakayo iti dayta a tao? Ti kadi kinaguapona wenno kinapintasna? Gapu kadi ta paginteresanyo dagiti isu met laeng a bambanag? Wenno dagiti kadi naun-uneg a kualidad, kas ti kinamanangaasi wenno kinasirib? No ti kualidad a nangpatibker ti panaggayyemyo ket kinaimbag, no kasta pudno nga addaankay ti nabaknang a relasion. Ti pudpudno a kinaimbag ket natakkon a masarakan itatta nga, iti kaaduanna, dagiti tattao “gumurgurada iti naimbag.”—2 Timoteo 3:3.
Iti maysa a Kristiano, ti kapapatgan unay a relasion iti biag ket saan nga iti sabali a tao no di ket iti Dios. Gapuna no pampanunotenyo daytoy a relasion, pinampanunotyon aya: ‘Ania kadagiti kualidad ti Dios ti ad-adda a mangallukoy kaniak iti Dios?’
Dagiti Kangrunaan a Galad ti Dios
Kinapudnona, salaysayen ti Biblia dagiti adu a naisangsangayan a kualidad ti Dios. Masansan dagiti uppat a maitamtampok isuda ti ayatna, ti kinahustisiana, ti kinasiribna, ken ti mannakabalin-amin a puersana. (Deuteronomio 32:4; Job 12:13; Salmo 147:5; 1 Juan 4:8) No agpilitayo kadagitoy uppat a naisangsangayan a kualidad, nalabit maikunatay a ti ayat ti Dios ti ad-adda a mangallukoy unay kadatayo. Ti sisisinged a nainaig iti ayatna, nupay kasta, isut’ aglaplapusanan a kinaimbagna. Dagiti mannurat ti Biblia nagsuratda a silalaing maipapan iti daytoy, ket ti kasta a kinaimbag maallukoyna dagiti tattao iti nasalun-at, makaay-ayo a pannakirelasion iti Namarsuada.
Kas pangarigan, idi tartarudi ti maikanem a siglo K.K.P., impukkaw ni mammadto Zacarias maipapan ken Jehova: “Ta anian a nagdakkel ti imbagna, ken anian a nagdakkel ti imnasna!” (Zacarias 9:17) Adu a tawen sakbay ni Zacarias, ni Isaias ti umar-arngi a nangidayaw iti Dios idi a nagsurat: “Siak saritaekto dagiti kinamanagayat ni Jehova, . . . ken ti dakkel a kinaimbag a maipaay iti balay ti Israel nga impaayna kadakuada.”—Isaias 63:7.
Tallo siglo a nasapsapa, nagsurat ni Ari David ti makatignay unay maipapan iti kinaimbag ti Dios. Nagsurat ni David manipud kapadasan, gapu ta tinagiragsakna daytoy a kinaimbag iti intero a panagbiagna. Aglaplapusanan ti kinaimbag ti Dios ken David, nangnangruna kalpasan dagiti nadagsen a basbasolna maipapan ken Batseba ken ni Urias a lakayna, idi nga isut’ pinakitaan ti Dios ti asi. (2 Samuel 12:9, 13) Idiay Salmo 31:19, kinuna ni David nga addaan panangipateg: “O nagdakkelen ti kinaimbagmo, nga impenpenmo nga agpaay kadagiti agbuteng kenka!”
Ipatpategyo met aya ti kinaimbag ti Dios a kas kadagidiay managdaydayaw idi ugma? No kasta, lak-amenyonto ti pudpudno a “talna ti Dios a daeganna ti amin a pannakaawat,” agraman ti nauneg a pannakatignayyo a mangaramid iti pagayatan ti Dios iti amin a tiempo. (Filipos 4:7) Iti sumagmamano a kanito usigentayo ita no aniat’ ramanen ti kinaimbag ti Dios ken no kasano a nakaskasdaaw ti saklawen dayta. Daytoy ti sigurado a mangpauneg ti panangipategtayo iti naayat a nailangitan nga Amatayo.