“Ti Pakasuotan ti Kinapudno ti Ayatyo”

ANIAT’ ipalagipna kadakayo dagiti sasao iti ngato? Pannakaidadanes ken rigrigat? Pannakamartir? Dagita a sasao ti immuna nga insurat ni apostol Pablo iti suratna kadagiti Kristiano idiay kadaanan a Corinto. Dakkel ti kinapategda iti ili ni Jehova itatta gapu ta ti ‘kinapudno ti ayatda’ ket masusuot met itatta. Ngem kasano? Kas sungbat, sukimatentayo ti paspasamak a nakaigapuan dagiti sasao ni Pablo.

Ti Pakaigapuan ti Pannakasuot

Agarup dua a dekada kalpasan ti pannakaibangon ti Kinakristiano, ti kongregasion idiay Jerusalem ket adda iti nakaro unay a pinansial a pakarigatan. Agtataeng iti kasta a baluarte ti ibubusor ken panagil-ilem dagiti Judio, kadagiti adu a tawtawen dagiti Kristiano “inanusanda ti dakkel a kulkul dagiti rigrigat,” a naglak-amda pay ti ‘panangrabsutda kadagiti kukuada.’ (Hebreo 10:32-34) Ti tulong nga aggaput’ ruar ket kasapulan.

Siempre, dagiti kakabsatda a Gentil rebbeng koma a natignayda iti kasasaadda. Tutal, nakautangda iti naisangsangayan nga “utang” kadagiti Kristiano idiay Jerusalem. Saan kadi a manipud Jerusalem a nagsaknap ti naimbag a damag kadagiti Gentil? Pinanunot ni Pablo: “No dagiti Judio a Kristiano inramanda ti naespirituan a gamgamengda kadagiti Gentil, adda nalawag nga annongen dagiti Gentil a tumulong kadagiti namaterialan a kasapulanda.”​—Roma 15:27, The New English Bible.

Panangorganisar ti Panagurnong

Binilin ti bagi a manarawidwid ni Pablo a “lagipen koma dagiti napanglaw [a Kristiano].” (Galacia 2:10) Gapuna nangipatulod ti pakaammo kadagiti Kristiano idiay Europa ken Asia Menor maipapan ti kasasaad idiay Jerusalem. Adtoy ti bilbilin ni Pablo: “No maipapan iti maurnong a maipaay kadagiti sasanto kas imbilinko kadagiti kongregasion ti Galacia, aramidenyo met ti kasta. Tunggal umuna nga aldaw ti lawas tunggal maysa kadakayo mangilasin ti idulinna kas iti irarang-aynanto, tapno inton umayak saanto a masapul ti agurnong.”​—1 Corinto 16:1, 2.

Babaen ti panangbadyet ti kuartada itoy a pamay-an, awan asinoman a mapilpilit wenno maidurduron inton aktual a maaramiden ti panagurnong. Awan aniaman a panagamak dagiti kakabsat a ti kuartada ket magastos a di umiso wenno masayang laeng. Dagiti laeng ‘naanamongan a lallaki’ ti mapalubosan a mangipan kadagiti naurnong a kuarta, a kuyogen ida a mismo ni Pablo no kasapulan.​—1 Corinto 16:3-5.

Kasano a nagtignay dagiti taga Corinto? Nupay kasla paborable met ti panagtignay dagiti kakabsat iti pammagbaga ni Pablo, pulos a di naipatulod ti naurnong. (2 Corinto 8:6, 10, 11) Nalabit dagiti panglakayen ti nagbalin nga okupado iti panangparmek ti panagsusuppiat, imoralidad, ken ti dadduma pay a parparikut ti kongregasion nga isut’ nagsuratan ni Pablo kadakuada.

‘Wumadwad iti Kinamanagparabur’

Agpapan pay kasta, sinuratan ni Pablo ida ti maikadua a kunkunana: “Kasta met, kakabsat, ipakaammomi kadakayo ti di kaikarian a kinamanangaasi ti Dios a naited kadagiti kongregasion ti Macedonia, nupay addada iti dakkel a pannakasuot ti rigat, ti kawadwad ti rag-oda ken ti nauneg a kinapanglawda naglaplapusananda a maipaay iti kinabaknang ti nasayaat a nakemda. Ta saksiak a kas mayannugot kadagiti kabaelanda ken nalablabes pay kadagiti kabaelanda timmulongda a naknakemda laeng a dinawatda a nasnekan a kalikagum daytoy parabur a pannakairaman iti ibabadangda kadagiti sasanto. Ket saan a kas ti ninamnamami, no di ket impaayda dagiti bagbagida nga umuna iti Apo ket kalpasanna kadakami gapu iti nakem ti Dios. Iti kasta dinawatmi ken Tito, a yantangay isu rinuggianna nga immun-una, kasta met koma nga an-anayanna kadakayo daytoy a parabur. Yantangay, nawadwadkayo ngarud iti isuamin, iti pammati ken iti sao ken iti pannakammo ken iti amin a regta ken iti ayatyo kadakami, umadukayo met koma itoy a kinamanagparabur.”​—2 Corinto 8:1-7.

Ti ulidan dagiti managsakripisio a taga Macedonia nangted kadagiti taga Corinto ti adu a pagpampanunotan. Ti Corinto ket pakasarsaritaan iti kinabaknangna, kinaluho, ken ti komersiona. Dadduma kadagiti kakabsat sadiay mabalin a napanglawda, kaskasdi, kas interamente, ti kongregasion ket awan duadua a nasaysayaat ngem kadagiti Kristiano a taga Macedonia nga adda iti “nauneg a kinapanglaw.” Kaskasdi, dagiti taga Macedonia timmulongda “iti nalablabes pay kadagiti kabaelanda.” Saanda a kinasapulan ti panangidurduron ni Pablo tapno tumulongda. ‘Indawdawatda’ pay ken Pablo ‘iti nasnekan a kalikagum’ a makiramanda iti daytoy nga itutulong! Pammaneknek daytoy a dagiti Kristiano a taga Macedonia pudpudno “nga impaayda ti bagbagida iti Apo [iti awan inkedkedna a dedikasion] ken [ni Pablo ken kadagiti kakaduana],” a nagpasakupda iti nateokratikuan a panangiwanwanda.

Nasuot Maipapan iti Ayat ken Kinamanagparaburda

Dagiti Kristiano magutugotda met aya a ‘wumadwad iti kinamanagparaburda’? Idi damo a sarungkaranna ti Corinto, napilitan ni Pablo a suportaran ti bagina kas managaramid ti tolda. (Aramid 18:1-3) Intultuloyna daytoy a pagalagadan a panangsuportar ti bagina met laeng uray no addan naibangon a kongregasion sadiay, a dina kayat nga usaren ti “autoridadna” kas amin-tiempo a manag-ebanghelio tapno umawat ti pinansial a tulongda.​—1 Corinto 9:3-12.

Kuna ti komentarista ti Biblia a ni Thomas Scott: “Nalabit, adda nakitana a sumagmamano a bambanag iti kananakem dagiti Kristiano a taga Corinto, nga isut’ nangallukoy kenkuana a di umawat ti aniaman a tulong kadakuada.” Nalabit naimpluensiaan iti naagum a materialismo iti aglawlawda, dagiti medio nabaknang a taga Corinto mabalin nga awan pagannayasanda nga agbalin a managparabur. Mabalin met a pagamkan ni Pablo a dagiti komersio ti panagpampanunotna a taga Corinto pagduaduaanda ti motibona no umawat ti pinansial a tulong. Mabalin nga adda met dagidiay, kas ti sumagmamano idiay Tesalonica, nasadutda ket kayatda nga adda pambarda nga agdawat kadagiti padada a Kristiano.​—2 Tesalonica 3:7-12.

Aniaman dayta, pinili ni Pablo ken dagiti kakaduana a suportaran ti bagbagida, “tapno dikam mangikabil ti aniaman a lapped iti naimbag a damag ni Kristo.” (1 Corinto 9:12) Ngem, dimteng ti tiempo, a natnag ni Pablo kadagiti pinansial a pakarigatan, ket dimmanon ti damag kadagiti napanglaw a kakabsat nga agnaed idiay Filipos. Kinuna ni Pablo kadagiti taga Corinto: “Pinadagsenak dagiti sabali a kongregasion babaen ti panangawatko ti tangdan tapno makapagserbiak kadakayo; ngem idi addaak kadakayo ket nagkurangak ti pagkasapulan, saanak a nagbalin a padagsen iti uray siasino, ta ti nagkurangak pinunnuan dagiti kakabsat a naggapu sadi Macedonia [nalabit Filipos]. Wen, iti isuamin inannadak ti saan a paawit kadakayo ket annadakto pay.”​—2 Corinto 11:8, 9; idiligyo ti Filipos 4:15, 16.

Pudno, inamin mismo ni Pablo a dinto ‘umawat ti tulong’ manipud kadagiti taga Corinto. Ngem idi padpadasen ni Pablo a paayen ti kinamanagpadagus ti babai a taga Filipos a ni Lydia, ‘impapilitna nga umayda.’ (Aramid 16:15) Impakita aya dagiti taga Corinto ti kasta met laeng a napinget a pannakaseknan iti material a pagimbagan ni Pablo? Pagduaduaenna ti maysa. Nupay kasta, naawatan ni Pablo a ti situasion maipapan ti kongregasion idiay Jerusalem nangted gundaway a suoten no dagiti taga Corinto adda pagannayasanda nga agbalin a naimut wenno nagbalindan a managparabur. Ngarud binagbagaanna ida:

“Saanak nga agsao a kasla ti agbilin, no di ket . . . kas panangsuot ti kinapudno ti ayatyo. Ta diak sawen daytoy tapno dagiti sabsabali makapagwayawayada, ket napadagsenankayo [kayatna a sawen, saan a tapno mapalag-anan dagiti dadduma ngem agsagabakayo]; no di ket gapu iti panagpapada itoy a tiempo ti kinawadwadyo anayanna ti pakasapsapulanda, tapno ti kinawadwadda anayannanto met ti pakasapsapulanyo, tapno adda koma panagpapada. Kas adda a naisurat: ‘Ti nagakup ti adu awan ti surok kenkuana, ket ti nagakup ti bassit awan met ti nagkurang kenkuana.’”​—2 Corinto 8:8, 13-15.

Kaawatan, naipasá dagiti taga Corinto ti suotda. Di nagbayag impadamag ni Pablo: “Ta dagiti taga Macedonia ken Acaya [nga ayan ti Corinto] napanunotda a naimbag ti agurnong iti pirak a pagtutulongan a maipaay kadagiti napanglaw a sasanto nga adda idiay Jerusalem.”​—Roma 15:26.

Panangsango ti Suot Itatta

Nupay kasta, makapasátay met laeng aya kadagiti suot ti ayat ken kinamanagparabur a maidatag kadatayo itatta? Agbibiagtayon kadagiti “panawen a napeggad a narigat a pakibagayan.” (2 Timoteo 3:1-5) Ti pinansial a pakarigatan padpadagsenanna ti adu kadatayo. Ken no maminsan “ti derrep ti lasag ken ti derrep ti mata ken ti kinapalangguad iti panagbiag” partuatenda ti kabukbukodanda a panangparigat. (1 Juan 2:16) Anian a naglaka ti agbalin a naimut, a di makarikna ti pagkasapulan dagiti dadduma!

Iti interamente, dagiti Saksi ni Jehova itatta naipasáda dagiti suot ti nainkabsatan nga ayat iti naisangsangayan a pamay-an. Kas pangarigan, idi Marso 3, 1985, nagginggined idiay Santiago, Chile. Ginasgasut a kakabsat ti napukawan ti pagtaengan ken sanikua. Dagdagus, nangorganisar dagiti kongregasion ti panangtulong. “Iti las-ud ti sumagmamano nga oras,” kuna dagiti kakabsat, “mangrugin nga agsangpet dagiti dadduma nga addaan taraon, kawkawes, ul-ules ken dadduma pay a nausar a bambanag.” Nagsangpet met dagiti kontribusion iti intero a lubong. Napasamak dagiti isu met laeng a banag iti namin-adu a daras kadagiti adu a tawtawen.

Ngem saanen a kasapulan nga urayen dagiti didigra tapno paneknekan ti nainkabsatan nga ayattayo. No ti pada a Kristiano agsagaba ti pinansial a pakarigatan, mabalintay ti mangrikna iti pagkasapulanna, a mangaramid ti ad-adu pay ngem basta panagkuna, “Aginudo ken agbussogkayo.” (Santiago 2:15, 16) Ket dagidiay met ngay adda iti amin-tiempo a serbisio nga “agbiagda gapu iti naimbag a damag.” Kas ken Pablo, dagita ket saanda a dumawat wenno manginanama ti pinansial a tulong manipud kadagidiay pagserserbianda. Nupay kasta, adu dagiti natignay a mangipakitat’ kinamanagparabur kadagidiay nga agbambannog nga ‘agmula ti naespirituan a bambanag’ gapu kadakuada.​—1 Corinto 9:11, 14.

Ket dagiti met ngay kasapulan ti sangalubongan nga organisasion dagiti Saksi ni Jehova? Impadamag ti 1989 Yearbook of Jehovah’s Witnesses a “bayat ti 1988 a tawen serbisio nangbusbos ti Watch Tower Society ti $29,834,676.97 iti panangtaripato kadagiti espesial payunir, misionero, ken dagiti agdaldaliasat a manangaywan kadagiti nakaitudinganda a tay-ak ti serbisio.” Dakkel met a gatad ti nagastos iti panangtaripato ken panaggatang kadagiti pasilidades ti sanga, al-alikamen, makmakina, papel​—malaksid pay kadagiti kangrunaan a paggastuan ti panagbiag ti sangalubongan a pamilia ti Bethel, nga adda bilangdan a nasurok a 9,000! Mainayon pay, adda 18 a proyekto ti panagbangon ken panagritubar nga agdama a maar-aramid iti nadumaduma a sanga, ken 19 iti hedkuarterstayo idiay Brooklyn, Nueva York. Makiramramankay met laeng aya iti pananggasto itoy sangalubongan a trabaho?

Kas idi umuna a siglo, itatta amin ket makiramraman iti panangaywan iti daytoy a responsabilidad, agraman dagiti di unay nababaknang, a, babaen kadagiti bassit a kontribusionda, napaneknekan kas sadiri ti pinansial a pannakasuportar ti Sosiedad. Dadduma makitada a makatulong ti panangsurotda ti pagwadan a nailanad idiay 1 Corinto 16:2 ket regular a bingbingayenda dagiti personal a kuartada a maitulong iti lokal a Kingdom Hall. Dadduma mabalin a maikeddengda pay ti mangipatulod ti kuarta a direkta iti Watch Tower Society idiay 25 Columbia Heights, Brooklyn, Nueva York 11201, wenno iti maysa kadagiti sanga nga opisinana.

Manginanamakayo a silalagip ni Jehova kadagidiay a, babaen ti kinamanagparaburda, paneknekanda ti kinapudno ti ayatda. Dikay paidaman ti bagiyo kadagiti bendision! Inkari ni Pablo: “Ket ti Dios mabalinna a paaduen ti isuamin a di kaikarian a kinamanangaasi a maipaay kadakayo, tapno kadagiti isuamin a banag agnanayon nga adda kadakayo ti kinawadwad, tapno rumang-aykayo a maipaay iti isuamin nga aramid a naimbag.”​—2 Corinto 9:8.

[Kahon iti panid 26]

NO KASANO A TUMULONG TI DADDUMA ITI TRABAHO TI PAGARIAN

◻ SAGSAGUT: Mabalin a maipatulod dagiti boluntario a donasion a kuarta a direkta iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad. Dagiti sanikua kas ti daga wenno balay, agraman alahas wenno dadduma pay a napapateg a bambanag, mabalinda met a maidonar. Maysa nga ababa a surat a mangibagbaga a dayta ket diretsa a donasion ti rebbeng maipakuyog kadagitoy a kontribusion.

◻ URNOS TI DONASION NGA ADDA KONDISIONNA: Mabalin met a maited ti kuarta iti Watch Tower Society kas maitalek, nga adda probision nga inkaso adda personal a pagkasapulan, maisublinto dayta iti nangited.

◻ INSURANCE: Mabalin a ti Watch Tower Society ti mainaganan kas ti benepisiario ti polisa ti seguro-de-bida wenno ti plano ti panagretiro/panagpension. Masapul a mapakaammuan ti Sosiedad iti kasta nga urnos.

◻ PANANGITALEK: Mabalin met a dagiti savings accounts iti banko ti maitalek iti Sosiedad. No maaramidan daytoy, pangngaasiyo ta pakaammuanyo ti Sosiedad. Dagiti stocks, bonds, ken sanikua mabalinda met a maidonar iti sidong ti urnos a pakagunggonaan ti nangidonar kabayatan ti panagbiagna. Daytoy a metodo ikkatenna ti gastos ken kinadi sigurado ti panangipasdek ti kinapudno ti testamento, bayat nga ipasiguradona met a ti Sosiedad ti umawat ti sanikua inkaso ti ipapatay.

◻ TESTAMENTO: Ti sanikua wenno kuarta mabalin met a maipatawid iti Watch Tower Society babaen ti legal pannakaaramidna a testamento. Ti kopia daytoy masapul a maipatulod iti Sosiedad.

Agpaay ti ad-adu pay nga impormasion ken balakad maipapan kadagita a bambanag, agsuratkayo iti Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad.