Dagiti Saludsod Manipud Kadagiti Managbasa

◼ Rebbengtay kadi nga ipato manipud Mateo 7:13, 14 ken Lucas 13:24 nga uray iti panagungar, kaaduan a tattao tumallikuddanto iti pudno a panagdayaw?

Saan, saan a suportaran dagitoy a bersikulo ti kasta a konklusion. Imbes ketdi, salaysayenna nangnangruna ti pananggun-od ti biag iti nailangitan a Pagarian.

Dagiti sasao ni Jesus idiay Mateo 7:13, 14 ket pasetda ti Sermon idiay Bantay. Kunana: “Sumrekkayo iti ruangan a nailet; ta akaba ti ruangan ken nalawa ti dalan a mangiturong iti pakadadaelan, ket adu dagiti sumrek kenkuana; ta nailet ti ruangan ken akikid ti dalan a mangiturong iti biag ket natakkon dagiti makasarak kenkuana.”

Kaaduan kadagiti nasao ni Jesus iti daytoy nga okasion ket maipapan nangnangruna iti nailangitan a Pagarian. Kas pangarigan, isut’ nangrugi kadagiti sasao a: “Naragsak dagidiay silalagip iti naespirituan a kasapulanda, ta kukuada ti pagarian ti langit.” Kunana a dagiti nadalus ti pusoda “makitadanto ti Dios” ken “ti pagarian ti langit” kukuanto dagidiay “maidadanes maipuon iti kinalinteg.” (Mateo 5:3, 8, 10) Iti kamaudianan dayta met laeng a diskurso, nagsao ni Jesus maipapan iti nalawa a dalan nga agturong iti pakadadaelan ken ti nailet a dalan nga agturong iti biag. Iti pasetna, innayonna: “Saan a tunggal maysa nga agkuna kaniak, ‘Apo, Apo,’ sumrekto iti pagarian ti langit, no di ket ti mangaramid ti pagayatan ni Amak nga adda sadi langit.”​—Mateo 7:13, 14, 21.

Ti kaipapapan ti Lucas 13:24 umas-asping, kas ipakita ti konteksto. Nangted ni Jesus ti dua nga ilustrasion maipapan “ti pagarian ti Dios.” Kamaudiananna, insaludsodda kenkuana: “Apo, bassit aya dagiti maisalakan?” Simmungbat ni Jesus: “Agawaanyo ti sumrek iti ruangan a nailet, ta kunak kadakayo nga adu dagiti agsapulto no kasano ti iseserrekda ket didanto mabalin.” Ti “adu” tuktukoyenna dagiti tattao a mangidawdawat a mapastrekda koma iti ruangan a naserraan ken nakandadduanen. Dagitoy dagiti “managaramid ti kinadakes” a di nakakualipikar nga agbalin a kadua da “Abraham ken Isaac ken Jacob ken amin dagiti mammadto idiay pagarian ti Dios.” Impato dagiti “adu” nga isudanto ti umuna “idiay pagarian ti Dios,” ngem iti aktualmente isudanto dagiti maudi, a kayatna a sawen awandanto idiay a pulos.​—Lucas 13:18-30.

Ipakita ti konteksto a salsalaysayen ni Jesus ti iseserrek iti nailangitan a Pagarian ti Dios. Dagiti papangulo a Judio idi ket nabayagen a tinagiragsakda dagiti napnuan pribilehio a posision, nga addaanda pay iti Sao ti Dios. Pagarupda a nabaknangda iti naespirituan ken nalintegda iti imatang ti Dios, a maisupadi kadagiti gagangay a tattao, a nagbabat’ panangmatmatda. (Juan 9:24-34) Kaskasdi, kuna ni Jesus a dagiti agsingsingir ti buis ken dagiti balangkantis a nangakseptar ti mensahena ken nagbabawida isudanto ti maaddaan anamong ti Dios.​—Idiligyo ti Mateo 21:23-32; Lucas 16:14-31.

Dagiti gagangay a tattao a nagbalin nga ad-adalan ni Jesus nakalineada a maakseptar kas naespirituan nga annak idi nanglukat ti nailangitan nga ayab idi Pentecostes ti 33 K.P. (Hebreo 10:19, 20) Nupay umariwekwek ti nakangngeg ken Jesus, dagidiay a nangakseptar kenkuana ken iti kamaudianan nakagun-od ti nailangitan a namnama ket bassitda. Ngem ti bassit nga ipastoran dagiti naiyanak iti espiritu a tattao nga immawat ti gunggona maiyarigda a kas ken Jacob a sisasango iti lamisaan idiay langit a kadua ni Jehova (ti Dakdakkel nga Abraham) ken ti Anakna (nga inladawan ni Isaac). Pudno a daytat’ maikari ti panagregget a naimbag ti maysa, ngem kaaduan kadagidiay nakangngeg ken Jesus saan a kastat’ inaramidda.

Gapuna, makitatayo manipud iti konteksto iti dua a pasamak a dagiti komento ni Jesus (maipapan ti bassit nga adda iti nailet a dalan nga agturong iti biag ken maisalakan) ket maipapan a nangnangruna iti pannakaaddat’ anamong ti Dios idi tiempo nga iyaw-awatna ti namnama ti nailangitan a biag. Bassit laeng no ar-arigen kadagiti nakangngeg iti mensahe ti kinapudno ken nakaammo no aniat’ kasapulan ti nagtignay ken nagbalin a matalek.​—Mateo 22:14; 24:13; Juan 6:60-66.

Makapainteres nga uray pay itatta, a mabalinen a magun-odan ti intero a Biblia ken aglaplapusananen ti kaitungpalan dagiti nadiosan a padpadto maipapan iti maudi nga al-aldaw, mammano pay latta ti mangabrasa ti Nakristianuan a mensahe ken agibtur iti panagserbi ken Jehova. Maitunos daytoy iti pangngarig ni Jesus maipapan kadagiti nagduduma a kita ti daga. Kunana a dadduma dumngegda “ti sao ti pagarian,” ngem tuktoken ni Satanas ti adda a naimula. Dadduma awatenda a sirarag-o ti sao ngem iti agangay mapaaydanto gapu ti rigrigat wenno pannakaidadanes. Kaskasdi dadduma saanda nga agbunga gapu “ti agawa itoy a sistema dagiti bambanag ken ti panangallilaw dagiti kinabaknang.”​—Mateo 13:18-23.

Makasigurotayo a dakkelto ti pannakaidumana inton minilmilion ti mapagungar inton Aldaw ti Panangukom. Iti dayta saanton a siwayawaya ni Satanas a mangtuktok kadagiti bin-i ti kinapudno a naimula iti puspusoda. Saandanto a maipasango kadagiti pannakaidadanes wenno panagagawa iti agdama a dakes a sistema. Masursuruandanto iti nalinteg nga aglawlawda, a nalikmut kadagiti namilagruan nga ar-aramid ti Dios, agraman ti panangpagungar kadagiti natay ken pannakaagas dagiti nasnasion. Ikabilyon, dadduma saandanto a dumngeg iti dayta. (Idiligyo ti Juan 11:45-53.) Ngem adda naimbag a rason a panunoten a ti kaaduan matarusandanto ti sao, abrasaendanto dayta, ket maisalakanda.