Ti Kaiyulogan dagiti Damdamag
Naimut a Motibo
Di nagbayag kalpasan panagtugawna idi 1933, ti pangulo ti Nazi a ni Adolf Hitler nangiyurnos ti maysa a konkordata iti Iglesia Katolika. Daytoy a konkordata nangted kalintegan ken Hitler a mangbeto iti nominasion dagiti obispo nga Aleman a kasukat dagiti sumagmamano a pribilehio nga impaay ti simbaan. Ngem asino kadagiti dua a partido ti ad-adda a nagunggonaan? Ti baro nga enciclopedia Katolika a Pranses mangted ti diretsa a sungbat iti daytoy a saludsod.
“Ni Papa Pio XI a mismo . . . imbilangna a naan-anay a kasapulan ti panangipasiguro ti pannakasalaknib ti iglesia nga Aleman babaen iti konkordata. Naiyurnos daytoy iti nagbaetan ti Abril ken Hulio 1933. Nupay pormal a pinaboranna ti Iglesia Katolika, iti aktualmente daytoy a konkordata ket maysa a panagballigi ken ni Hitler, ta daytat’ nangted panangbigbig iti panagturayna. Mainayon pay, yantangay masansan a salsalungasingen ni Hitler dayta, naakusar ti papa a mangpapaulimek kadagiti konsiensia a Katoliko ken nangdisarma kadagiti obispo babaen iti panangaramid ti pannakitulag iti maysa a maag.”
Itatta, nangnangruna idiay Francia ken Alemania, silalatak a mababbabalaw ti Iglesia Katolika gapu kadagiti pannakikompromiso ti herarkiana kabayatan ti panagturay a Nazi. Timmanor dagitoy a problema idi di impangag dagiti pangulo ti simbaan ti sasao ken ulidan ni Jesu-Kristo, a nagkuna kadagiti pudno a paspasurotna: “Saanda a paset ti lubong, a kas kaniak a saanak a paset ti lubong.” (Juan 17:16) Pudno, dagita a pannakikompromiso dagiti pangulo ti simbaan ti nanggun-od pabor ti napolitikaan nga elemento, ngem aniat’ naaramidan daytoy iti pannakirelasionda iti Dios? Idi nagsurat kadagiti padana a Kristiano, ni Santiago nga adalan ni Jesus impakdaarna: “Ti pannakipagayam iti lubong isu ti pannakibusor iti Dios.”—Santiago 4:4.
Dagiti Naab-abak iti Loteria
Dagiti tsansa ket agarup 14 milion iti 1 kontra ti panangabakyo iti loteria. Kaskasdi, minilmilion a tattao ti regular nga agayay-ayam iti papaandaren ti gobierno a loteria, kunat’ The Globe and Mail, maysa a diario idiay Canada. Ipakpakita ti panagsirarak a dagiti loteria awan pangatrakarda no di ti panangnamnama a mangabak iti jackpot, a masansan rubrubroban ti pablaak a mangisensentro “iti premio ken dagiti peggad ti di pananggatang ti tiket.” Yantangay ti ranta ti loteria isut’ panagganansia ken mangpataud ti sumagmamano a mangabak, dagiti opereytor mangaramidda kadagiti inaldaw a kangatuan a premio “iti namnama a mangipasdek ti naiparuam a panaggatang.”
Agkurkurri aya daytoy? Wen! Iti panagsuratna idiay American Health a magasin maipapan ti idudur-as ti panagsugal kadagiti tin-edyers, itudtudo ni Dr. Durand Jacobs dagiti loteria kas ti umuna a pakaiyam-ammuanda iti panagsugal “agsipud ta dagita ket nalaka, asideg ken maibagbagada kas nasayaat.” Innayonna pay: “Ti loteria ket isu ti Pied Piper a mangiturturong kadagiti adolesente kadagiti dadduma pay a porma dagiti serioso a kababalin ti panagsugal.” Maysa a Canadiano nga autoridad maipapan iti nakaro a panagsugal kunana: “Asinoman a mangibagbaga kadakayo a dagiti loteria ket saan a panagsugal mabalin nga agtigtignay a maag wenno talaga nga isudat’ maag. . . . Agsaysayangtayo ti ginasgasut a milion a doliar kadagiti loteria iti namnama a mangabak. Dayta ti panagsugal.”
Dagiti loteria rubrobanda ti panagayat ti kuarta. Ni Dr. Marvin Steinberg, a presidente ti Connecticut Council on Compulsive Gambling, napaliiwna a dagiti problema a tin-edyer a managsugal us-usarenda dagiti kuartada a pangaldaw, tinakaw a kuarta, ken naipuslit kadagiti tiendaan a mangsuportar ti bisioda nga agsugal. Pudno, umiso a talaga dagiti sasao ni apostol Pablo: “Ta ti ayat ti pirak isu ti maysa a ramut ti amin a kita ti kinadakes, nga idi inaguman dagiti dadduma . . . nasalputda kadagiti adu a ladladingit.”—1 Timoteo 6:9, 10.