Gun-odenyo ti Intero a Kinapudno!

“DIAK nakitkita dayta a nagan idiay Bibliak,” kuna ni Francisco. Kalkalpas laeng a napagsaritaan ti nagan ni Jehova a kadua ti maysa kadagiti Saksi ni Jehova. Pudno, mabalin a saanna nakitkita ti nasantuan a nagan iti Bibliana, ti 1969 nga edision ti Portugues a bersion ni Almeida. Ti nagan a Jehova di agparang iti dayta. Kas Katoliko a taga Brazil, ni Francisco regular a makimismisa kada Domingo ket tagtagiragsakenna ti panagbasbasa ti Biblia idiay pagtaenganda. Ngem ti nagan ni Jehova ti namagsiddaaw kenkuana.

Asino ti Dios?

Iti sumaganad a lawas, isut’ inyegan ti Saksi ti sabali nga edision ti bersion ni Almeida. Pinagdiligda dagiti dua nga edision idiay Salmo 83:18. Ket aniat’ nasarakanda? Iti dayta 1966 nga edision, daytoy a teksto mabasa: “Sika, a maymaysa laeng a makinkua ti nagan a JEHOVA, ti Kangatuan iti amin a daga”! Nupay kasta, iti 1969 nga edision, imbes a “JEHOVA” nausar ti termino nga “APO.” “Makitam, adda sinukatanda ditoy,” kuna ti Saksi, ket sana insaludsod: “Ti ‘Apo’ ket saan a maysa a nagan, saan kadi?” “Saan,” kuna ni Francisco. Makapungtot bassit, innayonna: “Kasanoda a maaramidan dayta?”

Daytoy ti nanglukat ti dalan a maipaay iti bassit panagsukimat maipapan iti nagan ti Dios. Kas pangarigan, naammuan ni Francisco a sigun iti The Catholic Encyclopedia (1910), ti Jehova isu “ti maiyanatup a nagan ti Dios iti Daan a Tulag.” Naammuanna met nga iti “Daan a Tulag,” a kaaduanna naisurat iti Hebreo a lenguahe, dayta a nagan nagparang iti ngangngani 7,000 a daras. Awan manangipatarus nga addaan kalintegan a mangbaliw ti umiso a nagan ni Jehova iti di piho a titulo nga Apo. Kayat ni Francisco ti kinapudno maipapan ti nagan ni Jehova, ket nagun-odanna dayta manipud mismo a Biblia ken babaen iti umiso a naiwanwan a panagsukimat.

Aniat’ Sasaaden ni Jesus?

Kas naikunan iti napalabas nga artikulo, ginamporan dagiti nailubongan a relihion ti adu a kinapudno. Maikuna pay met, iti ministerioda a panagbalaybalay, adda gundaway dagiti Saksi ni Jehova a mangdeterminar no aniat’ papatien dagiti tattao. Siempre, agdudumaduma dagitoy iti linuganlugar, ngem sumagmamano a kapanunotan ti gagangayen. Kas pangarigan, no maisaludsod, ‘Asino ti Dios?’ sumagmamano a bumalay ti agkuna, ‘ni Jesus.’ Iti daytoy kayatda a sawen a ni Jesus isut’ Dios a Mannakabalin-amin. Ngem irepresentar aya daytoy a kapanunotan ti kinapudno?

Pagpanunotanyo dagiti sumaganad a punto. Ni Jesus nagkararag ken Amana: “Daytoy ti biag nga agnanayon, a maammuandaka koma a maymaysa a pudno a Dios, ken ni Jesu-Kristo nga imbaonmo.” (Juan 17:3) Nadlawyo aya a ni Jesus tinukoyna saan a ti bagina no di ket ti nailangitan nga Amana kas “ti maymaysa a pudno a Dios”? Gapu itoy, umiso dagiti immuna nga adalan ni Jesus idi a kunada kenkuana: “Kinapudnona a sika ti Anak ti Dios.” Kuna a mismo ni Jesus: “Siak ti Anak ti Dios.” Ngarud, ti kinapudno a ta ni Jesus saan a Dios a Mannakabalin-amin, no di ket Anak ni Jehova a Dios.​—Mateo 14:33; Juan 10:36.

Aniat’ Pagtungpalan ti Daga?

Ania met ngay ti pagtungpalan daytoy a kaputotan ken ti daga? Ni John F. Kennedy, ti pimmusayen a presidente ti Estados Unidos, kunana iti palawagna idiay UN General Assembly: “Addaantay ti pannakabalin a mangaramid itoy a kasasayaatan a kaputotan ti sangatauan iti historia ti lubong​—wenno pagbalinen nga isut’ kamaudiananen.” Nalabit a kasta met ti rikna dagiti agdama a papangulo ti lubong. Ti masansan a mangmangngegan dagiti Saksi ni Jehova iti ministerioda a ta inton panungpalan ti lubong, ti planeta a Daga madadaelto babaen iti apuy wenno nuklear a gubat. Kas panangsuportar itoy a pammatida, dadduma itudoda ti Apocalipsis 21:1, a kunana: “Ket nakitak ti maysa a langit a baro ken maysa a daga a baro; ta daydi immuna a langit ken daydi immuna a daga napalabasdan, ket ti baybay awanen.”

Masansan nga us-usaren ti Biblia ti termino a “daga” iti piguratibo a kaipapanan, a tuktukoyenna ti sangatauan. Ti pangarigan iti daytoy masarakan idiay Genesis 11:1, a kunana: “Ket iti amin a daga maymaysa idi ti pagsasao ken maymaysa ti pannakabalikasna.” (Kitaenyo met ti 1 Ar-ari 2:1, 2; Salmo 96:1.) Idiay Apocalipsis 21:1, “daydi immuna a daga” tuktukoyenna, saan a daytoy a planeta, no di ket ti nadangkes a natauan a sosiedad a madadaelto. Daytoy ti manglukatto iti dalan a maipaay ti pannakaisubli ti Paraiso ditoy daga. (Lucas 23:43; 2 Tesalonica 1:6-9; Apocalipsis 21:4) Ket daytoy umanamong iti dadduma a paset ti Biblia, nga impamatmatna a ti literal a daga dinto pulos madadael. Kas pangarigan, kuna ti Salmo 104:5 a ti Dios ti “nangikabil kadagiti pamuon toy daga; a dinto maisina uray kaanoman.” (Idiligyo ti Eclesiastes 1:4.) Pudno unay, a ni Jehova ‘binukelna ti daga tapno pagyanan’ iti agnanayon.​—Isaias 45:18.

Apay a Gun-oden ti Intero a Kinapudno?

Dagiti napalabas ket sumagmamanoda laeng a pangarigan kadagiti biddut a kapanunotan a gagangay kadagitoy nga al-aldaw. Nupay kasta, no situtulok ti bumalay a makirinnason, kas iti kaso ni Francisco, maragsakan dagiti Saksi ni Jehova ta ti dalan ket silulukat nga agpaay iti makailawlawag a diskusion kadagiti Nainkasuratan a kinapudno.

Ti saan a pannakagun-od iti intero a kinapudno mabalin nga agturong kadagiti pagbabbabawian a bungbunga. Kas panangiyilustrar: Idi adda ditoy daga ni Jesus, adut’ naallukoy a namati nga isut’ anak laeng ni Maria ken ni Jose, a maysa laeng nga alluwagi a taga Nazaret. Gapu itoy, isut’ saanda unay nga inkankano. Adda bassit kinaumisoda iti dayta. Ni Jesus ket anak ni Maria, a naisikog babaen ti nasantuan nga espiritu. Isut’ sioman ni Jose, ket pudno a maysa met nga alluwagi. (Marcos 6:3) Nupay kasta, isu aya dayta ti intero a kinapudno maipapan kenkuana? Saan! Isu a talaga ti Mesias ken ti manamnama nga “Ari dagiti ar-ari”! (Apocalipsis 17:14; Lucas 1:32-35; Aramid 2:36) Ti saan a pannakaala ti naan-anay a kinapudno maipapan ken Jesus inturongnat’ adu a tattao a nakapukaw ti dinto-mauliten a pribilehio​—a mangtagiragsak iti personal a pannakitimtimpuyog ken Jesus ditoy daga.

Sukimatenyo ti Intero a Kinapudno

Ti siudad ti Berea (a maaw-awagan Véroia itan) idiay kadaanan a Macedonia agdindinamag kadagiti managbasa ti Biblia gapu iti nagsayaat a kababalin dagiti agindeg sadiay idi umuna a siglo. Ania dayta a kababalin? Ti salaysay kunaenna: “Ta inawatda ti sao [nga inkaskasaba ni apostol Pablo] a sigagagar unay ti isipda, nga inaldaw a sinuksukimatda dagiti Sursurat, no pudno dagitoy a banag.” Ti resulta? “Iti kasta namati dagiti adu kadakuada, ken kadagiti babbai a natan-ok a taga Grecia, ken kadagiti lallaki nga adu.”​—Aramid 17:11, 12.

Di met maipababa ti kababalin dagiti mammadto ti Dios idi ugma. Isuda “sinapulda ket sinukimatda” maipapan ti pannakaisalakan nga umay babaen ti Mesias. (1 Pedro 1:10) Binendisionan ti Dios ti panagreggetda. Kaawatan, ngarud, nga awan ti pangababaan. Ti naanep a panangsapul ken naannad a panagsukimat kadagiti sursuro​—daytoy ti pamay-an a pakagun-odan ti intero a kinapudno manipud iti Biblia!

Mabalin a mapampanunotyo, ‘Sadino ti pangrugiak ngarud?’ Kalpasan ti panagbasa ti sumagmamano a Nakristianuan a publikasion, maysa a babai a taga Brazil ti nagsurat: “Di nagbayag nabigbigmi [isu ken ni lakayna] a kasapulanmi ti ad-adu pay ngem iti dayta laeng a pannakaammo, tapno magun-odanmi ti sungbat ti adu a salsaludsodmi . . . Pangngaasiyo, kasano a makaalak ti Biblia ken dadduma a libro a makatulong kaniak a makaammo ti ad-adu pay maipapan iti nailangitan nga Amatayo?” Isut’ adda iti umiso a dalan: agbasbasan ti Biblia agraman kadagiti napudno a naibatay iti Biblia a literatura. No kayatyo met ti intero a kinapudno, lukatanyo ti pusoyo ken Jehova a Dios ket dawatenyo ti tulongna. Ken pangngaasiyo ta anagenyo met dagitoy makaparegta a sasao: “Ngem no siasinoman kadakayo agkurang iti kinasirib, agdawat koma iti Dios, isu a mangted a sikakaasi kadagiti isuamin ket saan a mangpabain; ket maitedto kenkuana. Ngem agdawat koma a babaen ti pammati, nga awan ket ti panagduadua.”​—Santiago 1:5, 6.

Minilmilion a tattao ti makipagad-adal ti Biblia kadagiti Saksi ni Jehova, iti kasta agar-aramidda ti naanep a panagsapul ken naannad a panagsukimat iti kinapudno. Ti panangipauneg ken panangiyaplikar iti dayta nga umiso a pannakaammo iti pudno a Dios ken ni Jesu-Kristo kaipapananna ti biag nga agnanayon. (Juan 17:3) Daytanto met ti dakkel a bendisionyo no agsukimatkayo a sigagaget ken gun-odenyo ti intero a kinapudno.

[Ladawan iti panid 7]

Ti intero a kinapudno maipapan ken Jesus a ta isut’ Mesias, saan a basta alluwagi