“Ikararaganyo ti Maysa ken Maysa”

NI Jehova “Managdengngeg ti kararag.” (Salmo 65:2) Denggenna a kanayon ti karkararag dagidiay napeklan a naimpusuan kenkuana, ket makasigurotayo nga imdenganna no ikararaganda ti maysa ken maysa.

Ngem apay nga ikararaganyo ti maysa ken maysa? Maipapan ti ania a rebbeng a maipaay dagita a karkararag? Ken ania a nadiosan a kualidad ti maparang-ay no ikararagantayo ti maysa ken maysa?

Apay Ikararaganyo ti Maysa ken Maysa?

Ti Kasuratan paregtaenna ti ili ni Jehova nga ikararaganda ti maysa ken maysa. Dagiti kararag a maipaay ti dadduma ket nairaman kadagiti araraw ni apostol Pablo iti Dios. (Colosas 1:3; 2 Tesalonica 1:11) Mainayon pay, insurat ni adalan a Santiago: “Ikararaganyo ti maysa ken maysa.”​—Santiago 5:16.

Ti karkararag a maipaay iti dadduma nga adipen ti Dios epektiboda. Naipakita daytoy idiay Santiago 5:13-18, a sadiay ti Kristiano a masakit iti naespirituan maigunamgunam a dagiti panglakayen ti kongregasion “ikararaganda koma, a sapsapuanda ti lana iti nagan ni Jehova.” Ti pannakangngegna ti kararagda mabalin a pabilgenna ti tao a maladingitan ket daytat’ mangkumbinsir kenkuana a ti Dios sungbatannanto met ti mismo a karkararagna. (Salmo 23:5; 34:18) Malaksid ti pannakipagkararag a kadua ti indibidual, padpadasen dagiti panglakayen a pasublien ti naespirituan a salun-atna babaen ti panangiyebkas kadagiti Nainkasuratan a kapampanunotan nga arigdat’ nalamuyot a lana.

Innayon pay ni Santiago: “Ket ti kararag ti pammati paimbagennanto ti masakit, ket ni Jehova paungarennanto.” Wen, ti tao a masakit iti naespirituan mabalin a matulonganto babaen ti “kararag ti pammati” dagiti panglakayen. Kasta pay met, ti Dios “paungarennanto” iti naespirituan a salun-at no isut’ situtulok a patulongan babaen ti Kasuratan. Ngem kasanon no ti naespirituan a sakit ket resulta ti nadagsen a basol? No ti indibidual addaan panagbabawi, ni Jehova ti mangpakawan kenkuana.

“Gapuna,” kuna ni Santiago, “ipudnoyo ngarud dagiti basbasolyo iti maysa ken maysa ket ikararaganyo ti maysa ken maysa, tapno mapasalun-atkayo. Adda nabileg a pannakabalin ti nasged a kararag ti nalinteg. Ni Elias . . . nagkararag iti nasged unay a di koma tumudo; ket saan a nagtudo iti rabaw ti daga bayat dagiti tallo a tawen ken innem a bulan. Ket nagkararag manen, ket ti langit nangted iti tudo ket ti daga pinataudna ti bungana.” (1 Ar-ari 17:1-7; 18:1, 42-45) Adda pannakabalin iti kararag ti tao a nalinteg a maitunos iti pagayatan ti Dios.​—1 Juan 5:14, 15.

Ikararag Maipapan ti Ania?

Uray ania a banag mabalin a tema ti karkararagtayo a maipaay ti kapammatian. Kas pangarigan, indawat ni Pablo kadagiti dadduma nga ikararagda nga isu komat’ maaddaan ti abilidad a mangisao ti naimbag a damag. (Efeso 6:17-20) Ket anian no ammotayo a ti maysa ket masulsulisog? Mabalintay nga ikararag a ‘di koma makaaramid ti dakes’ ket isut’ saan koma a baybay-an ti Dios iti pannakasulisogna no di ket igagana manipud iti managdakdakes, ni Satanas a Diablo. (2 Corinto 13:7; Mateo 6:13) Ket no adda masakit iti pisikal, mabalintay nga idawat ken Jehova nga ikkanna koma ti panagitured a kasapulan tapno maibturanna ti an-anayenna.​—Salmo 41:1-3.

Kanayon a maiyanatup ti panangikararag kadagiti maidaddadanes a pada a managdaydayaw ken Jehova. Ni Pablo ken dagiti kakaduana nagsagabada kadagiti nabara a pannakaidadanes, ket kunana kadagiti Kristiano idiay Corinto: “Makatulongkayo met a makipagkararagkayo a maipaay kadakami, tapno dagiti adu a tao agyamanda koma gapu iti parabur a maited kadakami a maipuon iti panagkarkararag dagiti adu.” (2 Corinto 1:8-11; 11:23-27) Uray no naibaludtayo, mabalintay nga ikararagan dagiti dadduma a maidaddadanes a kakabsat, a kanayon laglagipen a ni Jehova “ipangagna ti kararag dagiti nalinteg.”​—Proverbio 15:29.

Nangnangruna a rebbeng nga ikararagantayo dagiti kakabsattayo nga addaan nadadagsen a responsabilidad iti organisasion ni Jehova. Ramanen daytoy dagidiay mangiturturong ti organisasion ken mangisagsagana ti naespirituan a taraon nga iwarwaras “ti matalek ken naannad nga adipen.” (Mateo 24:45-47) Kas pangarigan, dagiti kameng ti Bagi a Manarawidwid dagiti Saksi ni Jehova maikarida iti karkararagtayo, ken mabalintay nga ikararag a ti Dios ikkanna koma ida “ti espiritu ti kinasirib.”​—Efeso 1:16, 17.

Maparang-ay dagiti Nakristianuan a Kualidad

Babaen iti panangikarkararag kadagiti kapammatian, ipakpakitatay ti bagbagitayo a maseknan, di naimut, ken managayat. Ti awan imutna, naayat a pannakaseknan kadagiti naespirituan a kakabsattayo a lallaki ken babbai maitunos iti punto ni Pablo a ti ayat “saan nga agimbubukodan.” (1 Corinto 13:4, 5) Ti panangikararag iti dadduma ket maysa a pamay-an a “saan a kitaen ti tunggal maysa ti personal nga interes iti bukodna a bambanag, no di ket tunggal maysa kitaenna met ti personal nga interes dagiti sabsabali.” (Filipos 2:4) No pagbalinentayo ti naespirituan a pagimbagan dagiti dadduma a pakaseknan ti kararag, makitatay met ti bagitayo nga umad-adani kadakuada iti nainkabsatan nga ayat a mangilasin kadagiti adalan ni Jesus.​—Juan 13:34, 35.

Ti kualidad ti pannakipagrikna maparang-ay kadagidiay ikarkararagantayo. (1 Pedro 3:8) Addaantay simpatia kadakuada, a makiramramantayo kadagiti intereses ken dukdukotda. Iti natauan a bagi, no nadunor ti maysa nga ima, ti sabali nga ima aywananna dayta ken padpadasenna a kissayan ti sakit a patpatauden ti sugat. (Idiligyo ti 1 Corinto 12:12, 26.) Umas-asping iti dayta, ti panangikararag kadagiti kakabsat a lallaki ken babbai nga agsagsagaba parang-ayennat’ simpatiatayo kadakuada ken tulongannatayo a manglaglagip kadakuada. Pukawtayo no liwayantay dagiti matalek a padatayo a Kristiano iti karkararagtayo, ta ti Dios ken ni Kristo saanda a baybay-an ida.​—1 Pedro 5:6, 7.

Dagiti nadumaduma a nadiosan a kualidad maparang-ayda no ikararagantayo dagiti dadduma. Agbalintayo nga ad-adda a mannakaawat ken naanus kadakuada. Ti posible a kinapait maikkaten, a mangiwaya kadagiti makapabileg a pampanunot a mamagbalin kadatayo a naayat ken naragsak. Ti panangikarkararag kadagiti dadduma pataudenna met ti talna ken panagkaykaysa iti ili ni Jehova.​—2 Corinto 9:13, 14.

Itultuloyyo nga Ikararagan ti Maysa ken Maysa

Kas ken Pablo, mabalintay nga idawat kadagiti dadduma nga ikararagandatayo met. Malaksid ti pannakipagkararagda kadatayo, dagiti gagayyemtayo mabalin a pribado nga agkararagda iti Dios nga agpaay kadatayo, nga inaganandatayo, a dakamatenda ti problematayo, ken idawat a tulongannatayo. Ket umay ti tulong, ta “ni Jehova ammona nga isalakan dagiti tao nga addaan nadiosan a debosion manipud pakasuotan.”​—2 Pedro 2:9.

Dagiti Saksi ni Jehova a mangdakdakamat kadatayo iti karkararagda addaanda met kadagiti pakasusuotan​—a mabalin narigrigat pay ngem ti adda kadatayo. Kaskasdi, iyasidegda dagiti pakasekseknantayo iti saklang ti Ari ti Kina-agnanayon, a nalabit agluluada pay a maipaay kadatayo. (Idiligyo ti 2 Corinto 2:4; 2 Timoteo 1:3, 4.) Anian ti panagyamantayo a maipaay iti daytoy! Kas panangipateg ken agpaay kadagiti dadduma a rason a naisalaysayen, ngarud, ikararagantayo ti maysa ken maysa.