Dayawen ni Jehova—Apay ken Kasano?
“Dagidiay a mangdayaw kaniak dayawekto, ket dagidiay a manglais kaniak maikasodanto a silalaka unay.”—1 SAMUEL 2:30.
1. Asino dagiti naikkan kadagiti premio a Nobel, ken kasanot’ panangmatmat dagiti adu kadagitoy a gunggona?
KADA tawen uppat nga institusion ti Scandinavia ti mangipapaay kadagiti premio a Nobel kadagidiay ‘nakaipaay ti kadadakkelan a gunggona iti sangatauan kabayatan ti napalabas a tawen.’ Dagiti premio ket maipapaay gapu kadagiti gapuanan iti innem a nagduduma a tay-ak ti pannakaammo. Ti premio a Nobel ibilbilang dagiti adu kas ti kadadakkelan a dayaw a maipaay iti asinoman a tao.
2. Asino ti nalipatan dagiti manangipaay kadagiti premio a Nobel, ken apay nga Isut’ nangnangruna a maikari ti dayaw?
2 Nupay awan pagdakdaksan ti panangted dayaw kadagiti maikari a tattao, dagidiay mangmangted kadagitoy a pammadayaw mapampanunotda met laeng kadi ti panangdayaw iti naindaklan unay a Manangted? Dayta a Manangted ket isu daydiay nangipaay ti di mabilbilangen a gunggona iti sangatauan nanipud pay pannakaparsua ti umuna a lalaki ken babai agarup 6,000 a tawtawen ti napalabasen. Ti masansan a pannakapaay a mangidayaw kenkuana mabalin a mangipalagip kadatayo ti sasao ni Eliu, ti gayyem daydi Job idi unana, a nagkuna: “Ngem awan ti agkuna, ‘Sadino ti yan ti Dios ti Naindaklan a Namarsua kaniak, Daydiay mangmangted ti kankanta iti rabii?’” (Job 35:10) Ti naindaklan a Manangtedtayo agtultuloy nga agar-aramid ti ‘naimbag, a mangmangted tudo manipud langit ken nabunga a tiempo, a punnuenna ti puspuso iti taraon ken ragsak.’ (Aramid 14:16, 17; Mateo 5:45) Talaga a ni Jehova ti Manangted ti “isuamin a sagut a nasayaat ken isuamin a sagut a naan-anay.”—Santiago 1:17.
No Aniat’ Kaipapanan ti Panangted Dayaw
3. Ania dagiti kangrunaan a sao a Hebreo ken Griego a naipaulog a “dayaw,” ken ania ti kaipapananda?
3 Ti kangrunaan a Hebreo a sao para iti dayaw, a ka·vohdhʹ, ket literal a kayatna a sawen “kinadagsen.” Gapuna ti tao a mapadayawan ti maibilbilang kas nadagsen, nakaskasdaaw, wenno adda makunkunana. Maiyanatup unay, daytoy Hebreo a sao, a ka·vohdhʹ, ti masansan maipatpatarus met iti Kasuratan kas “dayag,” nga ad-adda a mangipamatmat no kasano kalatak wenno kaimportante ti pannakaibilang daydiay mapadpadayawan. Ti sabali pay a Hebreo a sao, a yeqarʹ, a naipaulog a “dayaw” iti Kasuratan, ti maipapaulog met a “nasudi” ken “nasudi a bambanag.” Gapuna iti Hebreo a Kasuratan, ti sao a dayaw nainaig iti dayag ken kinasudi. Ti Griego a sao a naipatarus a “dayaw” idiay Biblia ket ti·meʹ, ken uray dayta met mangipapaawat ti rikna ti pannakaestimar, kinabalor, kinasudi.
4, 5. (a) Aniat’ kaipapanan ti panangted dayaw iti maysa nga indibidual? (b) Ania a kasasaad a naisalaysay idiay Ester 6:1-9 ti mangiyilustrar no aniat’ nairaman iti panangted dayaw?
4 Gapuna ti maysa padayawanna ti sabali babaen ti panangipakitana iti dayta a tao ti nauneg a panagraem ken panangestimar. Kas ilustrasion, panunotenyo ti situasion a naisalaysay iti Biblia maipapan ken Mardokeo a maysa a matalek a Judio. Naminsan imbutaktak ni Mardokeo ti sikat a maibusor ti biag ni Ari Asuero ti Persia idi ugma. Iti kamaudiananna, maysa a rabii idi saan a makaturog ti ari, ti inaramid ni Mardokeo naipalagip iti ari. Gapuna sinaludsodanna kadagiti ayudantena: “Ania a dayaw ken kaikarian ti naited idi ken Mardokeo gapu itoy?” Insungbatda: “Awan ti naaramid a maipaay kenkuana.” Anian a nakalkaldaang! Insalakan ni Mardokeo ti biag ti ari, ngem napaay ti ari a nangipakitat’ panangipategna.—Ester 6:1-3.
5 Gapuna, iti apagpag-isu a tiempo, insaludsod ni Asuero iti primero ministrona, a ni Aman, no kasano ti kasayaatan a pammadayaw iti daydiay pakaay-ayuan ti ari. Dagdagus pinanunot ni Aman iti pusona: “Asino ti pagrag-oan ti ari a pangaramidan iti dayaw a nangnangruna ngem siak met laeng?” Gapuna kinuna ni Aman a ti tao rebbeng a makawesan ti “naarian a pagan-anay” ken agsakay “iti kabayo a pagsakayan ti ari.” Sa kinunana iti maudi: “Ket isu ti pasakayenda iti bukot ti kabayo nga ipagna iti lansangan ti siudad, ket iwaragawagda iti sanguananna, ‘Daytoy ti maaramidto iti lalaki a pagrag-oan a dayawen ti ari.’” (Ester 6:4-9) Daydiay maidayaw nangatot’ panangmatmat kenkuana ti amin a tattao.
No Apay a ni Jehova Maikari ti Dayaw
6. (a) Nangnangruna ngem kadagiti dadduma asinot’ maikari ti dayawtayo? (b) Apay a ti sao a “naindaklan” maiyanatup a mangiladawan ken Jehova?
6 Iti intero a historia maik-ikkan dayaw dagiti tattao, a masansan saanda a maikarkari. (Aramid 12:21-23) Kaskasdi asinot’ nangnangruna iti isuamin a sabsabali ti maikari iti dayaw? Ay ket, ni Jehova a Dios, siempre! Isut’ maikari iti dayawtayo agsipud ta isut’ positibo a naindaklan. Masansan ti termino a “naindaklan” agaplikar kenkuana. Isu Daydiay Naindaklan, ti Naindaklan a Managaramid, ti Naindaklan a Namarsua, ti Naindaklan nga Ari, ti Naindaklan nga Instruktor, ti Naindaklan nga Apo. (Salmo 48:2; Eclesiastes 12:1; Isaias 30:20; 42:5; 54:5; Oseas 12:14) Daydiay a naindaklan ti nadaeg, nadayaw, naipangato, natan-ok, ken nakaam-amak. Ni Jehova awan pakaipadisanna, awan maipadpad kenkuana, isut’ kangatuan. Isu a mismo paneknekanna dayta a banag, a kunkunana: “Asino ti pangipadisanyonto kaniak wenno pangipadaanyo kaniak tapno mabalinmi koma ti agaasping?”—Isaias 46:5.
7. Iti di kumurang mano a nagduduma a pamay-an a maikuna a naisalsalumina ni Jehova a Dios, ken apay a maikuna nga awan pakaipadisanna maipapan iti kinaturay?
7 Ni Jehova a Dios ti di mapadisan iti di kumurang pito a nalawag a pamay-an, a mangted kadagiti espesipiko a rason a mangidayaw kenkuana. Umuna, maikari ni Jehova a Dios iti kadadakkelan a dayaw agsipud ta isut’ awan katupagna iti kinaturay. Ni Apo Jehova ti Soberano ti Uniberso—isut’ kangatuan. Isut’ Ukomtayo, Manangted-linteg, ken Aritayo. Amin a persona idiay langit ken ditoy daga ti manungsungbat Kenkuana, kaskasdi isut’ di manungsungbat iti asinoman. Umisot’ pannakailadawanna kas “dakkel, mannakabalin ken nakabutbuteng.”—Deuteronomio 10:17; Isaias 33:22; Daniel 4:35.
8. Apay a maikuna a ni Jehova awan katupagna (a) maipapan iti saadna? (b) maipapan iti kina-agnanayonna?
8 Maikadua, ni Jehova a Dios maikari iti kadadakkelan a dayaw agsipud ta isut’ di maartapan iti saadna. Isu “Nangato ken Natan-ok,” ti Kangatuan. Isut’ di maripirip ti kangatona ngem kadagiti amin a naindagaan a parparsuana! (Isaias 40:15; 57:15; Salmo 83:18) Maikatlo, ni Jehova a Dios ti maidayaw a nangatngato ngem kadagiti amin a sabsabali agsipud ta awan pumada iti agnanayon a kaaddana. Is-isu laeng ti awan nangrugianna, ta isut’ manipud agnanayon aginggat’ agnanayon.—Salmo 90:2; 1 Timoteo 1:17.
9. Iti ania a pamay-an a ni Jehova awan pakaiyaspinganna (a) maipapan iti dayagna? (b) maipapan kadagiti pamunganayan a galadna?
9 Maikapat, ni Jehova ket maikari iti kadadakkelan a dayaw gapu iti kinagrande ti personal a dayagna. Isu “ti Ama dagiti nailangitan a lawag.” Ti personana addaan kasta a kinaraniag nga awan tao a makakita kenkuana ket agbiag. Isut’ pudno a nakaam-amak. (Santiago 1:17; Exodo 33:22; Salmo 24:10) Maikalima, utangtayo ken Jehova a Dios ti kadadakkelan a dayaw gapu kadagiti nakaskasdaaw a galadna. Isu ti omnipotente, awan ingga ti pannakabalinna; isu ti omnisiente, awan ingga ti kinasiribna; isut’ naan-anay a perpekto iti kinahustisia; ken isu ti ladawan ti ayat.—Job 37:23; Proverbio 3:19; Daniel 4:37; 1 Juan 4:8.
10. Iti ania a pamay-an a ni Jehova di maartapan (a) maipapan kadagiti ar-aramid ti panamarsua ken sansanikua? (b) maipapan iti naganna ken kinatan-okna?
10 Maikanem, ni Jehova a Dios ti maikari iti kadadakkelan a posible a dayaw gapu kadagiti naindaklan nga ar-aramid ti panamarsuana. Kas ti Namarsua ti amin a bambanag idiay langit ken ditoy daga, isu met ti Naindaklan a Makinkua ti amin a bambanag. Mabasatayo idiay Salmo 89:11: “Dagiti langlangit kukuam, ti daga kukuam met.” Maikapito, ni Jehova a Diostayo ti maikari iti dayaw a nangruna ngem kadagiti amin a sabsabali gapu ta isut’ di maartapan, awan kapadana maipapan iti nagan ken kinatan-okna. Is-isu laeng ti agnagan Jehova, a kayatna a sawen “Pinataudna nga Agbalin.”—Kitaenyo ti Genesis 2:4, footnote.
No Kasano nga Idayaw ni Jehova
11. (a) Ania dagiti sumagmamano a pamay-an a panangidayawtayo ken Jehova? (b) Kasanotay a maipakita a pudpudno nga idaydayawtayo ni Jehova babaen ti panagtalek kenkuana?
11 Gapu kadagiti amin a kualidad ni Jehova, kasanot’ panangidayawtayo kenkuana? Kas ti intay makita, isut’ maidayawtayo babaen ti panangipakita kenkuana ti panagbuteng ken panagraem, babaen ti panagtulnog kenkuana, babaen ti panangbigbig kenkuana iti isuamin nga ar-aramidtayo, babaen ti panagisagut, panangtulad kenkuana, ken iyaararaw kenkuana. Isu met ti maidayawtayo babaen ti panamati kenkuana, babaen panagtalek kenkuana uray aniat’ mapaspasamak. “Agtalekka ken ni Jehova iti amin a pusom,” ti maigunamgunam kadatayo. Gapuna maidayawtayo ni Jehova a Dios babaen ti panangawat iti saona. Kas pangarigan, kunana: “Dika agbuteng, ta addaak kenka. Dika agkullayaw [iti buteng], ta siak ti Diosmo. Papigsaenkanto. Tulongankanto.” (Proverbio 3:5; Isaias 41:10) Ti pannakapaay nga agtalek a naan-anay kenkuana ket di makapadayaw kenkuana.
12. Aniat’ paset ti panagtulnog ken panagbuteng iti panangidayaw ken Jehova?
12 Ti nasinged pannakainaigna a pamay-an a panangidayaw ken Jehova a Dios ket babaen ti panagtulnog kenkuana. Ken nasken iti panagtulnog isut’ nadiosan a panagbuteng, wen, panagbuteng a mangsair iti Dios. Ti mangipakita ti relasion ti panagbuteng ken panagtulnog isut’ sasao ni Jehova ken Abraham kalpasan ti situtulnog a panangranta ni Abraham a mangidaton ken Isaac, nga anakna. “Ita mabigbigko a managbutengka iti Dios,” kuna ni Jehova. (Genesis 22:12) Idi isalsalaysayna no aniat’ utang dagiti annak kadagiti dadakkelda, impakita met ni apostol Pablo a ti panagtulnog ken dayaw aggidgiddanda. (Efeso 6:1-3) Gapuna babaen ti panagtulnog kadagiti bilbilin ti Dios, a saanda a makapadagsen, idaydayawtay ni Jehova. Awan duadua, ti isusukir ken Jehova a Dios ket di pammadayaw kenkuana.—1 Juan 5:3.
13. Ti panangidayaw iti Dios ti mangtignay kadatayo a maaddaan ti ania a kababalin ti isip maipapan kadagiti ar-aramid ken gakattayo?
13 Mainayon pay, makaiyegtay ti dayaw ken Jehova a Dios babaen ti panangipangag ti balakad idiay Proverbio 3:6: “Kadagiti amin a dalanmo isu ti bigbigem [wen, aturgarem], ket isu iturongnanto dagiti desdesmo.” Ikkannatayo ni adalan a Santiago ti nasayaat a pammagbaga iti daytoy a banag. Imbes nga agimbubukodan nga agaramid iti inaldaw-aldaw, nga agtalek kadagiti kabukbukodantay nga abilidad, rebbeng a kunaentayo: “No kayat ni Jehova, agbiagkaminto ket aramidenminto daytoy wenno daydiay.” (Santiago 4:15) Adu a tawen ti napalabasen kustombre dagiti International Bible Students nga inayon iti aniaman a saoda maipapan iti masanguanan ti pangappatan a D.V., nga itaktakderanna ti Deo volente, a kayatna a sawen “No pagayatan ti Dios.”
14. (a) Ania a kababalin mainaig kadagiti panagreggettayo ti masapul nga intay alaen no idayawtayo ti Dios? (b) Ania a kababalin ti naiparangarang maipapan iti panagipablaak kadagiti literatura ti Watch Tower Society?
14 Idayawtayo met ni Jehova a Dios babaen ti panangiparangarang ti napakumbaba a kababalin, nga ipabiang iti Dios ti aniaman a balligi a tagtagiragsakentayo. Umiso ti panagkuna ni apostol Pablo maipapan ti ministeriona: “Nagmulaak, ni Apolos ti nagsibug, ngem inted ti Dios ti idadakkel; iti kasta, uray ti agmula, uray ti agsibug, awan aniaman no di laeng ti Dios a mangted ti idadakkel.” (1 Corinto 3:6, 7) Pudno unay, maseknan ni Pablo ti panangyeg ti umno a dayaw iti Dios, saan nga iti bagina wenno iti sabsabali a tao. Gapuna, itatta, dagiti publikasion ti Watch Tower Society di mangipakpakaammo no asino ti nangisurat kadakuada, ket dagiti mannurat liklikandat’ panangibaga kadagiti sabsabali no aniat’ insuratda. Iti daytoy a pamay-an, ti atension maisentro iti impormasion, a nairanta a mangidayaw ken Jehova, a saan ket nga iti asinoman a tao.
15. Ania a kapadasan ti mangiyilustrar ti pakarigatan ti dadduma a tattao tapno maawatan ti kinaemma dagiti Saksi ni Jehova?
15 Daytoy pagannurotan a panangisentro ti atension ken Jehova, iti kasta isut’ padpadayawan, ti mamagsiddaaw kadagiti dadduma. Sumagmamano a tawen ti napalabasen, idi agikabkabitda ti sound system para iti palawag ti publiko idiay Central Park ti New York City, dagiti Saksi ti agpatpatokar ti maysa kadagiti Kingdom Melodies a tapes kas panangipadpadas iti sound system. Maysa a pagassawaan a nasayaat panagkawesda ti nagimtuod iti maysa kadagiti Saksi no ania a tokar dayta. Gapu ta pagarupna a Saksida, insungbatna: “Dayta ti Kingdom Melodies No. 4.” “Wen, ngem siasino ti nangputar iti dayta a tokar?” insaludsodda. Insungbat ti Saksi: “Ay, ti nangputar ket anonimo (saan a maibagbaga).” Simmungbat ti agassawa: “Dagiti tattao a mangputputar ti kasta a kita ti musika ket saanda nga ar-aramiden dayta nga anonimo.” Insungbat manen ti Saksi: “Ngem kastat’ ar-aramiden dagiti Saksi ni Jehova.” Wen, ar-aramidenda daytoy tapno amin a dayaw ti mapan ken Jehova a Dios!
16. Iti ania a nagduduma a pamay-an a mausartay ti timtimektayo a mangyeg dayaw ken Jehova a Dios?
16 Ti sabali pay a pamay-an a pangidayaw ken Jehova ket babaen ti panangusar kadagiti bibigtayo a mangikaskasaba kenkuana. No pudno a maseknantayo iti panangyeg dayaw kenkuana, ngarud agbalintayo a napasnek iti panangisaknap ti naimbag a damag ti Pagarian. Maaramidantay daytoy babaen iti panagbalaybalay ken iti dadduma pay a metodo a silulukat kadatayo, a di liwliwayan dagiti gundaway a mangasaba a di pormal. (Juan 4:6-26; Aramid 5:42; 20:20) Mainayon pay, addaantay kadagiti gundaway a mangidayaw iti Diostayo babaen kadagiti timtimektayo kadagiti gimong ti kongregasion, agpadpada babaen ti panagkomento ken pannakiraman iti naimpusuan a panagkanta kadagiti kankanta ti Pagarian. (Hebreo 2:12; 10:24, 25) Iti inaldaw a panagpapatangtayo, maidayawtayo met ni Jehova a Dios kadagiti bibigtayo. Babaen iti bassit a panagregget, maiturongtay dagiti panagpapatang kadagiti makapabileg a naespirituan a dalan, ket daytoy ti mangibunga ti panangyeg dayaw ken Jehova a Dios.—Salmo 145:2.
17. (a) Aniat’ epekto ti umiso nga ugali iti panangidayawtayo ken Jehova? (b) Ania met ti kaimudingan ti dakes nga ugali?
17 Nupay kasano kasayaat ti panangidayaw ken Jehova a Dios kadagiti bibigtayo, nasken met ti panangidayaw kenkuana babaen ti kababalintayo. Kinondenar ni Jesus dagidiay, nupay daydayawenda ti Dios kadagiti bibigda, ti puspusoda adayo Kenkuana. (Marcos 7:6) Ti dakes a kababalin sigurado a mangyeg ti pakaibabainan ni Jehova a Dios. Kas pangarigan, idiay Roma 2:23, 24, mabasatayo: “Sika, nga agpasindayag iti linteg, ibabainmo aya ti Dios gapu iti panangsalungasingmo iti Linteg? Ta ‘ti nagan ti Dios matabbaawan iti tengnga dagiti tattao ti nasnasion gapu kadakayo.’” Kadagiti nabiit pay a tawtawen rinibribo dagiti mailaklaksid manipud kadagiti kongregasion ti ili ni Jehova. Mabalbalin, dakdakkel pay a bilang ti agar-aramid kadagiti nakababain a kababalin saanda a nailaklaksid gapu ta nangiparangarangda ti pudno a managbabawi a kababalin. Amin dagitoy a tattao ti nangidayaw ken Jehova kadagiti bibigda, ngem dida inaramid dayta babaen ti kababalinda.
18. (a) Ania a pakaseknan ti rebbeng a maadda kadagiti sumagmamano a naparaburan tapno makaipaayda ti rumbeng a dayaw ken Jehova? (b) Kasano a ti situasion ti sumagmamano a papadi idi kaaldawan ni Malakias iyilustrarna ti kasta a pakaseknan?
18 Dagidiay okupado iti nadumaduma a tay-ak ti amin-tiempo a serbisio—idiay Bethel, iti panagbaniaga wenno misionero a trabaho, wenno kas payunir—naparaburanda ti dakkel kadagiti gundawayda a tumulong iti pakaidayawan ni Jehova. Obligasionda a mangaramid ti kasasayaatanda iti aniaman a trabaho a nakaitudinganda, nga ‘agmatalekda iti bassit agraman met iti dakkel.’ (Lucas 16:10) Iti dadduma a pamay-an ti nadayaw a kasasaadda naiyilustrar, nupay di nailadawan, babaen kadagiti papadi ken dagiti Levita iti kadaanan nga Israel. Nupay kasta, gapu iti kinaliway ti dadduma a papadi idi kaaldawan ni Malakias, kuna ni Jehova kadakuada: “No siak ngarud ti ama, sadino ti yan ti pannakadayawko? Ket no siak ti naindaklan nga apo, sadino ti yan ti panagbuteng kaniak?” (Malakias 1:6) Dagidiay a papadi linalaisda ti nagan ti Dios babaen ti panagdatdatonda kadagiti bulsek, pilay, ken masakit nga an-animal. Malaksid a pagreggetan dagidiay adda kadagiti espesial a pribilehio ti serbisio itatta nga aramiden ti kasasayaatanda, mabalin met a maikarida iti panangbabalaw nga impaay ni Jehova a Dios kadagidiay a papadi. Agkurkurangda iti panangidayaw iti Dios.
19. (a) Kas nasao idiay Proverbio 3:9, aniat’ kanayonan a pamay-an ti panangidayaw ken Jehova? (b) Aniat’ sabali a nasken pay a pamay-an a pangidayaw ken Jehova?
19 Ti sabali pay a pamay-an a panangidayawtayo ken Jehova a Dios ket babaen ti panangted ti kontribusion a kuarta iti sangalubongan a trabaho a panangasaba nga inautorisaranna. “Pagdayawmo ti napapateg a kukuam ken Jehova ken dagiti umuna a bungbunga ti amin a maapitmo,” ti naigunamgunam kadatayo. (Proverbio 3:9) Ti pribilehio a panangted kadagita a kontribusion ket maysa a gundaway a panangidayaw ken Jehova a Dios nga awan koma ti makalipat. Maidayawtayo met ni Jehova a Dios kadagiti karkararagtayo, nga isut’ idaydayaw ken agyaman kenkuana. (1 Cronicas 29:10-13) Kinapudnona, gapu ta umasidegtayo kenkuana a sipapakumbaba ken addaan nauneg a panagraem, ti iyaadanitayo iti Dios iti kararag ket panangipapaay ti dayaw kenkuana.
20. (a) Asino ti gagangay a padpadayawan dagiti tattao iti lubong, ken kasano? (b) Babaen ti panangipangag ti ania a bilin nga ad-adda a maidayawtayo ni Jehova?
20 Adu adu a tattao, nangnangruna kadagiti agtutubo, dayawenda dagidiay ipatpategda babaen ti panangtulad kadakuada—babaen ti panagsasao kas kadakuada ken panagtigtignay kas kadakuada. Masansan dagiti tattao a tultuladenda ket isuda dagiti banuar iti ay-ayam wenno dagiti artista iti lubong ti paglinglingayan. Maisupadi iti dayta, kas Kristiano, rebbeng a dayawentayo ni Jehova a Dios babaen ti panagreggettayo a mangtulad kenkuana. Indagadag ni apostol Pablo nga aramidentay dayta, nga insuratna: “Tuladenyo ngarud ti Dios, kas annak a madungdungngo, ket magnakayo babaen ti ayat.” (Efeso 5:1, 2) Wen, babaen ti panagregget a mangtulad ken Jehova, isut’ idaydayawtayo.
21. (a) Aniat’ makakabal kadatayo a mangted ken Jehova ti dayag ken dayaw? (b) Ania dagiti gunggona nga ipaay ni Jehova kadagidiay mangidayaw kenkuana?
21 Pudno unay, adu dagiti pamay-an a mabalintayo ken rebbeng a panangted dayag ken dayaw iti Dios. Ditay liplipatan a babaen ti regular a panagtaraon iti Saona ken panangam-ammo a nasaysayaat kenkuana, ad-adda met nga isu ti maidayawtayo. Aniada dagiti gunggona iti panangaramid ti kasta? “Ta dagidiay mangdayaw kaniak,” kuna ni Jehova, “dayawekto.” (1 Samuel 2:30) Iti agangay dayawento ni Jehova dagiti managdaydayawna babaen ti panangted biag nga agnanayon kadakuada iti kinaragsak, idiay langit man kas kadua nga agturay ni Jesu-Kristo, nga Anakna, wenno idiay Paraiso a daga.
Malagipyo Pay Aya?
◻ Asino ti kaaduanna a padpadayawan dagiti tattao, ken asino ti kaaduanna a liwliwayanda a dayawen?
◻ Aniat’ kaipapanan ti panangidayaw iti maysa, ken ania dagiti pamay-an a mabalin a maaramidan dayta?
◻ Ania ti sumagmamano kadagiti pamungayan a rason no apay a ni Jehova a Dios ket maikari iti dayaw?
◻ Ania dagiti sumagmamano a pamay-an a mabalintay a pangidayaw ken Jehova?
◻ Kadagiti ania a pamay-an a gunggonaan ni Jehova dagidiay mangidayaw kenkuana?