Itultuloyyo ti Magna iti Lawag ken Ayat
Dagiti Tampok Manipud Umuna a Juan
NI Jehova isut’ Gubuayan ti lawag ken ayat. Masapul a kumitatayo iti Dios para ti naespirituan a lawag. (Salmo 43:3) Ket ti ayat maysa kadagiti bungbunga ti nasantuan nga espirituna.—Galacia 5:22, 23.
Ti lawag, ayat, ken dadduma pay a bambanag nailawlawagda iti umuna a napaltiingan a surat ni apostol Juan, mabalin a naisurat idiay wenno iti asideg ti Efeso idi agarup 98 K.P. Maysa a kangrunaan a rason ti panangisurat iti dayta isut’ panangsaluad kadagiti Kristiano manipud apostasia ken tulongan ida tapno agtultuloy iti pannagna iti lawag. Yantangay sangsanguentayo dagiti karit iti ayat, pammati, ken kinatarnawtayo iti kinapudno, ti panangusig itoy a surat sigurado a magunggonaantayo.
‘Magna iti Lawag’
Pinagbalin a nalawag ni Juan a dagiti matalek a Kristiano masapul a magnada iti naespirituan a lawag. (1Ju 1:1–2:29) Kinunana: “Ti Dios isu ti silaw ket awan ti aniaman a sipnget [awan ti dakes, imoral, naulbod, wenno narugit] kenkuana.” Agsipud ta dagiti napulotan-espiritu a Kristiano ‘magnada iti lawag,’ adda “pannakikaduada” iti Dios, ken ni Kristo, ken iti maysa ken maysa. Nadalusanda met manipud basol babaen ti dara ni Jesus.
Datayo man ket napulotan a Kristiano nga addaan ti nailangitan a namnama wenno in-inanamaentayo ti agnanayon a biag ditoy daga, agtultuloyto ti pannakagunggonatayo manipud daton ni Jesus no la ket ta ayatentayo dagiti kakabsattayo ngem saan a daytoy lubong. Liklikantayo met ti maimpluensiaan kadagiti apostata, kas ti “anti-Kristo,” a mangiliblibak agpadpada ti Ama ken ti Anak. Ket ditay met pulos liplipatan a ti biag nga agnanayon tagiragsakento laeng dagidiay kumkumpet iti kinapudno ken mangal-alagad ti kinalinteg.
Dagiti Annak ti Dios Iparangarangda ti Ayat
Sumaruno a binigbig ni Juan dagiti annak ti Dios. (3:1–4:21) Kas maysa a banag, aramidenda no ania ti nalinteg. Tungpalenda met ti bilin ni Jehova a Dios ‘a maaddaanda ti pammati iti nagan ti Anakna, ni Jesu-Kristo, ket agayan-ayatda iti maysa ken maysa.’
Ti indibidual nga addaan “pannakaammo iti Dios” ammonat’ maipapan ti pangpanggep ni Jehova ken no kasanot’ pannakaiyebkas ti Ayatna. Daytoy komat’ mangtulong iti tao a mangiparangarang ti ayat. Kinapudnona, “ti saan nga agayat saanna nga ammo ti Dios, ta ti Dios isu ti ayat.” Naipakita ti nadiosan nga ayat idi a ti Dios “imbaonna ti Anakna kas daton a subbot kadagiti basbasoltayo.” No inayatnatayo ni Jehova agingga iti dayta a tukad, obligadotayo nga agayan-ayat ti maysa ken maysa. Wen, siasinoman nga agkunkuna nga ayatenna ti Dios masapul met nga ayatenna ti naespirituan a kabsatna.
Ti Pammati ‘Parmekenna ti Lubong’
Ti ayat tignayenna dagiti annak ti Dios nga agtungpal iti bilbilinna, ngem babaen ti pammati a ‘maparmekda ti lubong.’ (5:1-21) Ti pammatitayo iti Dios, iti Saona, ken iti Anakna, tulongannatayo a ‘mangparmek ti lubong’ babaen ti panangiwaksi iti dakes a pampanunotna ken daldalanna ken babaen ti panagtungpal iti bilbilin ni Jehova. Inted ti Dios kadagiti ‘manangparmek ti lubong’ ti namnama ti agnanayon a biag ken denggenna dagiti karkaragda a makitunos iti pagayatanna. Agsipud ta asinoman a “nabukel iti Dios” di agaramid ti basol, ni Satanas di agtaeng iti kasta a tao. Ngem agpadpada a dagiti napulotan ken dagiti ad-adipen ni Jehova nga addaan naindagaan a namnama laglagipenda koma a ‘ti isuamin a lubong adda iti babaen ti managdakdakes.’
[Kahon/Ladawan iti panid 29]
Maysa a Daton a Subbot: Ni Jesus ket “maysa a daton a subbot gapu kadagiti basbasoltayo [kadagidiay napulotan a paspasurotna], ngem saan laeng a gapu kadagiti basbasoltayo no di pay ket gapu iti isuamin a lubong,” ti dadduma iti sangatauan. (1 Juan 2:2) Ti ipapatayna ket maysa a “subbot” (Griego, hi·la·smosʹ, a mangipamatmat ti “wagas ti pannakikappia,” maysa a “panangsubbot”) ngem saan nga iti kaipapanan a panangliwliwa ti nasaktan a rikrikna iti biang ti Dios. Imbes ketdi, ti daton ni Jesus inkappiana, wenno binayadanna, dagiti kalikagum ti perpekto a nadiosan a kinahustisia. Kasano? Babaen panangipaay ti nalinteg ken nahustisiaan a pakaibatayan ti panangpakawan ti basol, tapno ti Dios “maiparangarang ti kinalintegna uray ti panangibilangna a nalinteg ti [managbasol-kasisigudna a] tao nga addaan pammati ken Jesus.” (Roma 3:23-26; 5:12) Babaen panangipaay ti wagas a panangbayad a naan-anay ti basbasol ti tao, pinagbalin ni Jesus ti datonna a mangsubbot, wenno paborable, iti tao tapno sapulen ken awatenna ti pannakaisubli ti nalinteg a pannakirelasion ken Jehova. (Efeso 1:7; Hebreo 2:17) Anian a panagyamantayo iti daytoy!