Report Dagiti Manangiwaragawag ti Pagarian

Nakumbinsirda Idiay Kathmandu

MAYSA a managdibuho ti nangirugi iti panagsapulna ti kinapudno idiay Brittany, Francia, idi 1980. Isut’ nakisarsarita kadagiti Pentecostal ken inadalna dagiti relihion ti Dumaya​—a di buyogen ti pannakapnek. Idin nakipatpatang iti maysa kadagiti Saksi ni Jehova ngem di nagbayag naisardeng. Isut’ nakasarak iti sabali pay a managdibuho ket nakipagtrabaho ken nakikabbalay kenkuana.

Kalpasan la unay daytoy ti di nagkallaysa a pareha inkeddengda ti agpasiar idiay Nepal. Nasdaawda unay iti pintas ken talna dayta a daga ngem nadismayada iti sistema a pannakabingay-bingay dagiti tao, a kasla nakillo iti panangmatmat dagiti taga Lumaud.

Idi kassangpetda idiay Francia, insingasing ti babai iti kaduana nga agadalda a dua ti Biblia, ket nasurpresa ta immannugot ti lalaki. Sinapulda ti Saksi a kinapatpatangna dua a tawen ti napalabas. Idi damo ti laeng Biblia ti inursarda, ngem idi agangay immannugotda met laeng a mangusar iti libro a Ti Kinapudno a Mangiturong iti Biag nga Agnanayon ken kalpasanna ti libro a Mabalinyo ti Agbiag nga Agnanayon iti Paraiso ditoy Daga. Iti las-ud ti makatawen insardengdan ti panagdroga.

Kalpasan panagpasiarda manen idiay Nepal iti dua a bulan, nagsubli ti pagassawaan idiay Francia a sadiay nga intuloyda ti panagadal. Insardengda ti panagsigarilio ken ipapan kadagiti pagiinuman ken nightclubs ken rinugianda ti itatabuno kadagiti gimong dagiti Saksi ni Jehova. Nupay kasta, idi nalpasda ti Agbiag nga Agnanayon a libro, inkeddengda ti sumardeng nga agadal.

Nagsublida manen idiay Nepal, a sadiay naggianda iti maysa a bassit a balay iti sakaanan ti Bambantay ti Himalaya. Maysa nga aldaw maysa a lakay, a nakaterno ken nakakurbata, ti nagtuktok iti ridawda. Agmaymaysa ti babai iti balay, ket impagarupna nga amangan no agilaklako kadagiti naipinta a ladawan ket kayatna a kitaen dagiti inkur-itda. Iti pannakasdaawna isut’ maysa gayam a Saksi a sumarungkar kas suno daydiay nangiyadal kadakuada idiay Francia. Di nagbayag simmangpet ti kabbalaynan, ket simmaruno ti dua nga oras a saritaan.

Sumagmamano nga aldaw kalpasannna, tinabunuan dagiti agassawa ti gimong dagiti Saksi ni Jehova idiay Kathmandu ket nasnasdaawda unay iti kinadalimanek dagiti timmabuno. Napaliiwda ti isu met laeng a nainkakabsatan nga ayat ken kinaragsak a nakitada kadagiti gimong idiay Francia. Nadlawda met ti panagkaykaysa dagiti timmabuno a taga Nepal, uray no dagitoy naggapuda kadagiti nagduduma a grupo dagiti tattao. Kumbinsidoda itan a talaga a daytoy ti organisasion ni Jehova.

Makabulan kalpasanna nagsublida idiay Francia ket dagdagus nga intuloyda ti panagadal ti Biblia ken itatabunoda kadagiti gimong. Nagkasarda, nangrugida a makiraman iti panangasaba a trabaho, ken kamaudiananna nabautisaranda. Ti lalaki maysa itan a ministerial nga adipen, ken ni baketna ti regular a makiramraman iti serbisio a panag-auxiliary pioneer. Pudno, tulungan ti espiritu ni Jehova dagidiay nga addaan ti nalinteg a kasasaad ti puso tapno rumang-ayda ken agbalin a managdayawna.​—Apocalipsis 7:15-17.

[Kahon/Mapa iti panid 9]

NEPAL

Populasion - 17,712,221

1990 Kangatuan a Bilang dagiti Agibumbunannag - 63

Ratio, 1 nga Agibumbunannag iti kada - 281,146

Promedio nga Agibumbunannag a Payunir - 10

Bilang dagiti Kongregasion - 1

Promedio a Panangiyadal ti Biblia - 107

Bilang ti Timmabuno iti Memorial - 220

[Mapa]

(Para iti aktual a pannakaurnosna, kitaem ti publikasion)

NEPAL

INDIA

[Ladawan iti panid 9]

Buya ti tiendaan idiay Kathmandu, Nepal